O Mai ia Iloa Lou Faaola

Ua tatou maua le faamanuiaga ma le avanoa e aoao ai e uiga ia Iesu Keriso e ala i le suesueina o tusitusiga paia. Ae o le iloa moni o Ia ma avea ma Ona soo, e le lava ai le faitau ma le suesue. Ua tatou iloa loloto atili le Faaola e ala i le faia o mea o le a Ia faia—aemaise lava le auauna atu i isi e pei ona Ia auauna atu ai.

Ina ua mavae se mafuie mata’utia i Europa, sa ou asiasi atu i tolauapiga lea sa nonofo ai i latou na afaina i le mafuie. Sa ou feiloai i le tele o aiga sa nonofo i faleie. Latou te le’i iloa po o ai au pe o le a aumaia foi e le Ekalesia se fesoasoani. Ae a o ou feiloai ma i latou, o le mea muamua lava na latou faia o le tuuina lea o se mea e ‘ai pe inu i o’u lima ma le ataata i o latou foliga.

Na leiloloa mea uma a nei tagata. Sa ou i ai iina e auauna atu ia i latou. Ae na latou mauaina i o latou loto le auauna atu. O lenei mea na aumaia ai ia te au le olioli ma faamanatu mai ai ia te au o se tasi o auala sili e iloa ai Iesu Keriso i se auala loloto ma le loloto o le auauna atu lea ia te Ia e ala i le auauna atu i fanau a le Atua.

Mo le toatele o tagata o loo siomia i tatou, e na o le pau le ala o le a latou iloa ai e uiga i le Toefuataiga ma le Ekalesia moni a Iesu Keriso—ma o nisi taimi e uiga ia Iesu Keriso lava Ia—e ala mai ia i tatou. O le māfuaaga lea, e mana’omia ai ona tatou nofouta i taimi uma i le tāua o le avea ma se faaa’oa’oga lelei.

E tatau ona tatou ola i se auala e mafai ai e i latou o loo siomia i tatou ona iloa le Faaola. Afai tatou te ola e ese mai mea tatou te talitonu i ai ma aoao atu, atonu e le talitonu isi i a tatou upu pe i le mana foi o le Togiola a le Faaola. Nai lo lena, e mafai ona latou iloa Iesu Keriso aua latou te iloa oe ma e mafai ona latou vaai ma lagonaina Lona malamalama i lou olaga.

E faapitoa lava le moni o lenei mea mo matua. Ina ua ma maitaga ma lo’u toalua i le ma tama muamua, sa ou valaau atu i le uso o lo’u tama mo se fautuaga. O ia lea na faailoa mai au i le Ekalesia, ma ou te alofa tele ia te ia.

“O le a se mea e mafai ona ou faia?” Sa ou fesili atu ai. “E mafai faapefea ona ou aoaoina la’u fanau e fesoasoani ia latou tuputupu ae ma ia malolosi?”

Sa ou maofa i le tala a le uso o lo’u tama.

“Aua e te popole ia i latou,” o lana tala lea. “E faatatau ia te oe. O le a latou faatasi ma oe ma vaai ia te oe i taimi uma. Taumafai i le mea sili e te mafaia e usitaia poloaiga. Ia faamaoni ma agavaa i mea uma e te faia, ma o le a latou mulimuli i lau faataitaiga.”

I ni nai tausaga mulimuli ane, sa ou tafi ai i se tasi taeao ina ua sau la’u tama lona lua, pe tusa ma le fa tausaga le matua, i le faletaele ma se fasilaau ma se fasimoli ma amata ona faataitai mai ia te au. Ina ua ou vaai ia te ia, sa ou manatua le tala a le uso o lo’u tama. Na toe foi mai lana fautuaga ia te au i se auala loloto.

E toatele ua taliaina le talalelei a Iesu Keriso ona ua latou vaaia se mea e ese mai i tagata o le Ekalesia. E tatau ona tatou mautinoa o loo atagia mai le talalelei i o tatou foliga. E le faapea e tatau ona tatou atoatoa, ae e tatau ona tatou naunau e taumafai ia avea atili e faapei o Iesu Keriso i mea uma tatou te faia.

O Lea Ou Te Vaai ia te Oe, saunia e Greg Olsen, atonu e le mafai ona kopiina

Vaai atu i le Faaola

Na matauina e Elder Neal A. Maxwell (1926–2004) o le Korama a Aposetolo e Toasefululua, “Semanu e leai se Togiola e aunoa ma uiga o Keriso!” E oo lava i tulaga sili ona faigata o Lona soifuaga, sa i ai i uiga o Iesu Keriso le le mafaufau ia te Ia lava. Sa ia manatu i taimi uma i isi;

Ina ua uma ona iloa ua fasiotia Ioane le Papatiso, sa valaaulia e Iesu Ana Aposetolo e o ese faatasi ma Ia i se nofoaga tuufua e malolo ai. Sa mulimuli atu le motu o tagata e silia ma le 5,000 ia te Ia. Na faataatia ese e Iesu Lona manaoga e malolo e faamalolo ai, aoao atu, ma fafaga i latou-i latou uma (tagai Mataio 14:12–21).

Ina ua Ia iloaina Ona soo o loo tauivi ma la latou vaa i luga o le Sami o Kalilaia, sa savali atu Iesu ia i latou i luga o le vai ma fetalai atu, “O a’u lava; aua le fefe” (tagai Mataio 14:22–27).

Mulimuli ane, a o tiga i luga o le satauro, sa valaau atu le Faaola i le Aposetolo o Ioane e tausi Lona tina (tagai Ioane 19:25–27). Ina ua mavae Lona Faasatauroga, sa alu atu o Ia i le lalolagi o agaga ma “tofia [agaga amiotonu] e o atu ma avatu le malamalama o le talalelei ia te i latou o e sa i le pogisa, i agaga uma lava o tagata” (Mataupu Faavae ma Feagaiga 138:30).

E pei ona taua e Elder David A. Bednar o le Korama a Aposetolo e Toasefululua, i le avea ai ma tagata soifua, e masani lava ona tatou liliu atu i totonu i taimi o o tatou luitau po o mafatiaga, ae na faia tonu lava e Iesu Keriso le faafeagai. E oo lava i Ona taimi sili ona manaomia ma faigata, sa Ia tatalaina lava o Ia lava i taimi uma i manaoga o isi. O loo ia faia pea lava. Na Ia faataunuuina le Togiola mo i tatou ma tatalaina le faitotoa ina ia mafai ona tatou toe o mai i le Tama. E mafai ona tatou vaavaai atu ia te Ia i taimi uma, ma o le a i ai pea o Ia iina e fesoasoani ia i tatou.

Ua tatou ola i se lalolagi pa’u. O le tala fiafia e faapea, e le’i tupu lenei mea i se mea sesē. O lenei lalolagi pau e i ai sona faamoemoega, ma e mamalu (tagai Mose 1:39). E ui lava ua tatou ola i taimi faigata ma le tele o mea leaga i le lalolagi, ae o loo i ai se auala e aluese ai ona o Iesu Keriso. O Ia o le mafuaaga o le faamoemoe uma.

O malumalu uma i le lalolagi e molimau mai i lo tatou faamoemoe i le Faaola. I se isi itu, o taimi uma lava e faasilasila atu ai e le perofeta se malumalu fou o se folafolaga lea o le moni o Iesu Keriso ma Lona mana togiola. Na pau lava le mafuaaga ua tatou maua ai malumalu ona o Ia ma Lana taulaga togiola. Ma o taimi uma lava tatou te tapuai ai i le maota o le Alii ma osia feagaiga ma le Atua mo i tatou lava ma mo i latou o loo i le isi itu o le veli, tatou te folafola atu lo tatou faatuatua ia Keriso toetu.

O loo soifua Iesu Keriso. E savavali faatasi o Ia ma i tatou i lenei malaga faaletino. E tumu o Ia i le alofa tunoa. E alofa tele o Ia ia i tatou o lea na afio mai ai o Ia i lenei lalolagi e faia mea sa le mafai ona tatou faia na o i tatou. O ia o la tatou uo. “E le sili lava le alofa o se tasi i lenei alofa,” na Ia saunoa ai, “ia tuuina atu e se tasi lona ola e sui ai ana uo” (Ioane 15:13).

O se avanoa mo au le molimau atu ia Iesu Keriso. Ma lo’u loto atoa, ou te manao e avea ma Ana uo. O loo Ia taitaia Lana Ekalesia e ala i perofeta ma aposetolo. E silafia e Ia i tatou uma taitoatasi. Na te silafia i tatou i o tatou igoa ma silafia o tatou manaoga, o tatou tauiviga, ma manaoga o o tatou loto. E ala mai ia te Ia tatou te pipiimau ai i le faamoemoe. A o tatou auauna atu i isi, taumafai e avea ma se faataitaiga, vaavaai atu ia Iesu Keriso, ma pipiimau i “se malamalama atoatoa o le faamoemoe” (2 Nifae 31:20), tatou te iloa ai o Ia ma iloa ai o loo faatasi pea o Ia ma i tatou e faatumu o tatou olaga i le filemu ma le olioli.