O Feagaiga ma le Atua e Faasaolotoina, Ae Le o le Faatapulaaina

Aua ne’i faaseseina i tatou e Satani i lenei tulaga. O le tala ia Korioa, i le Alema 30 i le Tusi a Mamona, e aoga.

Sa ulagia e Korioa, le aneti-Keriso, tagata ona o le talitonu i tu ma aga masani a o latou tama ma tina. Fai mai a ia, o outou e “ua noanoatia i lalo i se faamoemoe valea ma le aoga, “Aisea ea ua outou faaamo ai outou lava i mea valea faapena? (fuaiupu 13).

Sa ia talai mai e leai se manaomia o se Faaola aua tatou te manuia e tusa ai ma lo tatou lava atamai ma manumalo e tusa ai ma lo tatou lava malosi. Na ia ta’ua tagata talitonu ua valea ma faaletonu. Sa ia aoao mai e tatau ona e vaai ina ia iloa ai. Sa ia talai atu o le oti o le iuga lea—o lea ia faia soo se mea e te maua ai se lagona lelei. (Tagai i fuaiupu 13–28.)

E uiga i sauniga o le perisitua, na ia saunoa ai, “Ou te le aoaoina lenei nuu ia fusifusia i latou lava i lalo i sauniga valea … ua faataatia i lalo e faitaulaga anamua, e faaaoga le mana ma le pule i luga o i latou, e taofi ai i latou i le valea, ina ia lē sii ae o latou ulu, ae ia aumai i lalo” (fuaiupu 23).

Pe o tatou vaaia ea ni aoaoga faapena i o tatou aso?

• Pe ua faapena foi ona tauemuina ma ta’ua i tatou o ni tagata valea ona o le talitonu i le Faaola?

• Pe ua ta’u mai ea ia i tatou e tatau ona fememea’i o tatou mafaufau e talitonu i se mea tatou te lei vaai i ai?

• Pe ua tatou faalogo ea o le noatia i le Atua e ala i sauniga ma feagaiga e faatapulaaina?

Ata na pueina e © Steve Callahan | Dreamstime.com

O Se Sootaga o le Feagaiga e Faasaolotoina

O togafiti lava ia na faaaoga e Korioa e taitai ese ai le toatele o tamaitai ma alii o loo faaaogaina nei e faasaga ia i tatou. E pei o Korioa, ua tau mai e le lalolagi ia i tatou o le fusia po o le amoina faatasi ma le Faaola o lona uiga ua “noatia” i tatou i lalo po o le “noatia,” e le mafai ona gaoioi po o le alualu i luma. E tatau ona tatou iloa mo i tatou lava o se sootaga o le feagaiga ma le Atua e faasaolotoina, ae le o le faatapulaaina! “E leai lava se isi ulu e mafai ona faasaolotoina ai outou,” na aoao mai ai le Tupu o Peniamina. “O lea, ou te mana’o ai ia outou ave i o outou luga le suafa o Keriso” (Mosaea 5:8).

O e tausia feagaiga e faamanuiaina i le mana o le Atua. O le tausia o a tatou feagaiga e faasaolotoina ai, faamalosia ai, ma aumaia ai ia i tatou le filemu. Na aoao mai e Peresitene Nelson “o le taui mo le tausiga o feagaiga ma le Atua, o le mana faalelagi—mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga. … O lenei mana na te faafaigofieina o tatou ala. O i latou e ola i tulafono maualuluga atu a Iesu Keriso latou te mauaina Lona mana maualuga atu. O lea, o ē tausia feagaiga e aiā i se ituaiga faapitoa o malologa lea e oo mai ia i latou e ala i a latou sootaga faalefeagaiga ma le Atua.”

Ou te iloa e moni lena mea.

O le filifili ia noatia i lo’u Faaola e ala i feagaiga na ou osia ma le Atua, ‘Ou te mafaia mea uma lava i le faamalosi mai o Keriso ia te au’ [Filipi 4:130. O a’u taumafaiga e tausia a’u feagaiga—e ui e le atoatoa—ua tauia i se gafatia faateleina e faia ai mea ua talosagaina ai au. Ua faamanuiaina au i se gafatia sili atu e auauna atu ai. Ua faamanuiaina au i musumusuga ou te manaomia e fai ai le galuega a le Alii i auala e finagalo o Ia ou te faia ai. Faatasi ai ma le faatuatua i le Alii, ua faamanuiaina ai au e fetaiai ma ou luitau ma le faamoemoe. O le mana o le Atua e faamamaina ai lo’u ala—e ui lava o se auala e maualuga!

Ae e tatau ona tatou faaaogaina lo tatou faitalia e maua ai lenei mana. E pei ona aoao mai lou fesoasoani Sister Anette Dennis, “Pe a faaaoga o tatou faitalia e filifili ai e ulu atu i se sootaga faalefeagaiga faatasi ma Ia, ua tatou molimau atu ia te Ia tatou te mananao ia atili loloto Lona aafia i o tatou olaga, ma ua tatou naunau e totogi le tau ia maua ai le mana ma avanoa faateleina lea e o mai faatasi ma lena sootaga faalefeagaiga.”

Tatou te maua lena mana a o tatou savavali i le ala o le feagaiga e toe foi atu ai i lo tatou aiga faalelagi. Tatou te o ulu atu i se ala o feagaiga pe a papatisoina ma faamauina i tatou. Tatou te ulu atoa atu i ai i le maota o le Alii. I le avea ai ma se Au Peresitene Aoao o le Aualofa, matou te mananao ia maua e o matou uso uma faamanuiaga faasaolotoina o se sootaga o le feagaiga ma le Atua, e aofia ai le mana o le Atua o loo avanoa mo i latou o e osia ma tausia feagaiga ma tapuai i le maota o le Alii.

Na aoao mai Peresitene Nelson: “O mea uma o loo a’oa’oina i totonu o le malumalu, e ala i a’oa’oga ma e ala i le Agaga, e faateleina ai lo tatou malamalama ia Iesu Keriso. O ana sauniga taua e fusia ai i tatou ia te Ia e ala i feagaiga paia o le perisitua. Ma, a tatou tausia a tatou feagaiga, Na te faaee mai ia i tatou Lona mana faamalolo ma faamalosiau.”

O le faamanuiaga o le mauaina o le mana o le Atua e faalagolago i lo tatou osia o feagaiga ma le Atua e ala i le auai i sauniga o le perisitua, lea e amoina ai i tatou ma Ia.

I le avea ai ma se au peresitene, tatou te saili e fesoasoani i tuafafine taitasi e mananao ma atiina ae se sootaga o le feagaiga ma le Tama Faalelagi ma Iesu Keriso. Matou te mananao ia vaai atu i o matou uso ua faaeeina i le maota o le Alii, ua tatalaina le faitotoa i avanoa faaleagaga ma le faaeaga, ua fusia i le Faaola ma ua faamalosia e ala i sauniga ma feagaiga. Matou te folafola atu a o outou osia ma tausia feagaiga, o le a faamanuiaina outou i le mana faasaolotoina o loo avanoa mo e tausia feagaiga.