O Oulua Ea o Avefe’au?

Ata na tusia e Bradley Clark

Sa na o au o se tasi o faifeautalai e toafa e tautatala faaSipaniolo i le Misiona a Niu Egelani. Sa ma galulue malosi e aoao le gagana ma faasoa atu le talalelei, ae sa tele lava ina ma feiloai ma le teenaina.

I se tasi aso sa ma tuitui atu ai i le faitotoa o Hugo ma Niza Diaz, o se ulugalii i Providence, Rhode Island. Ina ua uma ona la valaaulia i ma’ua i totonu o lo latou fale mautotogi, sa ou fesili atu po o le a le umi na latou nonofo ai iina.

“Faatoa ma siitia mai iinei mai Niu Ioka,” sa la fai mai ai. “Na fetalai mai le Alii ia i maua e siitia atu i Providence ma o le a Ia auina mai ia i maua ni avefeau e aoao i maua i le upumoni. “O oulua ea o avefeau?”

Sa ma tali atu ma le mautinoa, “Ioe, o i ma’ua o avefeau.” Sa ma aoaoina Hugo ma Niza e uiga i le talalelei a Iesu Keriso, ma sa la taliaina ma le lotomalie la ma savali ma e lei umi ae papatisoina i laua.

E le’i leva ona uma lo la papatisoga, ae o atu Hugo ma Niza e asiasi i lo la aiga moni i Guayaquil, Ekuatoa. Ina ua la toe foi atu i Providence, sa la faasoaina atu ni ata o i laua lava ma Peresitene N. Eldon Tanner (1898–1982), o le sa avea ma Au Peresitene Sili, ma lona faletua o Sara, i se konafesi i le eria i Ekuatoa. A o i ai iina, sa faasoa atu e Hugo ma Niza le talalelei i tagata o le aiga. E sefulutasi sa auai i le Ekalesia.

Sa ma iloa mulimuli ane ma la’u soa o loo galulue uma Uso ma Sister Diaz mo se totogi itiiti i se fale gaosi ie i le lotoifale ma auina atu le afa o a la tupe maua i Guayaquil e fesoasoani e tausia o laua aiga. Ina ua ma fautuaina e faaitiitia le tele o taimi matou te aai ai i lo latou fale ina ia aua nei avea i matou ma avega mamafa tautupe ia i laua, sa alaga atu Niza, “Oi, leai, Elder Norman!”

Sa ia faamatala mai talu ai ona sa papatisoina i laua ma amata ona totogi le sefuluai, o lea sa foliga mai ai sa tumu le la pusaaisa i le moa ma le i’a, e ui lava sa masani ona ia fafagaina faifeautalai.

I le Mataupu Faavae ma Feagaiga 123:12 ua tatou aoao ai “o i ai nei lava nisi e toatele i le lalolagi … e taofia mai le upu moni ona ua latou lē iloa le mea e maua mai ai.” E ala i taumafaiga faafaifeautalai a Hugo ma Niza o ni tagata o le ekalesia ma mulimuli ane avea ma faifeautalai a le siteki, na iloa ai e le toatele le moni o le talalelei.

Pe a tatou saili ma le filiga, e pei o Hugo ma Niza, mo le upumoni ona faasoa atu lea ma le naunautai o le tala lelei o le talalelei a Iesu Keriso, o le a tatou vaaia le anoanoai o faamanuiaga i o tatou olaga ma le tele o olaga tatou te pai atu i ai.