Tē hōro’a nei te ’Ēkālesia i te tauturu ’e te tāmarūra’a

I roto i te mau taime fifi ’e i te mau vāhi ato’a nā te ao nei e hina’arohia te tauturu, tē tāmau noa nei te ’Ēkālesia i te ’imi i te mau rāve’a ato’a nō te hōro’a i te tauturu ’e te tāmarūra’a, ma te ’āpiti pinepine atu i te tahi mau pupu tauturu ’e te mau pū e ’ere i tā te hau. I roto i nā ’āva’e e ono i ma’iri a’e nei, ’ua hōro’a mai te pū tauturu a te feiā mo’a i te mau mahana hope’a nei, te rima tauturu o te Ēkālesia i te ta’ata nō te :

Fa’ati’a i te hō’ē pupu tāmoni ’ore ’ia tāmau i te pape i roto i te mau fare i te mau fenua ātea nō te nūna’a Navajo i New Mexico, Arizona, ’e i Utaha, Marite.
’Ōpere fātata e 2 miria rā’au pātia nō te TOVI-19 i te mau huira’atira fifi i roto e 121 fenua.
Hōro’a i te mau tauha’a tauturu nō te mau tītīhoria nō Etiopia e ora ra i Soudan ’e i te mau ’oire i Sudan tei vaipu’ehia. ’Ua pāturu ato’a i te feiā fa’a’apu tei tauturuhia ’ia fa’ati’a fa’ahou i tā rātou ’ohipa i muri a’e i te pape pu’e ’e ’ua hōro’a i te mā’a nā rātou iho ’e nā vetahi, ’e ’ua tauturuhia te mau ’utuāfare ’ia fa’arava’i ia rātou iho nā roto i te fa’ahotura’a i tā rātou iho ’imira’a faufa’a.
Tauturu e 9.000 tītīhoria ’e te feiā e taui ra te fenua nā roto fātata e 190 pupu tauturu i te fenua Marite, ma te hōro’a i te tahi tuha’a moni nō te tā’āto’ara’a e $5 mirioni tārā marite.
Tāmau noa i te ha’api’ipi’i ’e i te hōro’a i te mātini rorouira nō te mau ta’ata matapō i Pōrīnetia farāni.
Fa’aau ’e te tahi atu mau fa’anahora’a pae fa’aro’o ’e a te ’oire nō te tauturu i te mau ’utuāfare o te feiā e taui ra i te fenau i roto i te hō’ē pū fa’arevara’a i Houston Texas, Marite.
Fa’a’ōhie e 20 ’ōpuara’a tauturu ma’i pe’e i Paraguay.
Hōpoi mai i te tauturu i Haiti i muri a’e i te hō’ē ’āueuera’a fenua rahi, ’e te fa’a’ohipara’a i te mau fare a te ’Ēkālesia ’ei mau fa’aeara’a ’e ’ua hōro’a te ’Ēkalesia te mā’a, te pape ’e te tahi atu mau tauiha’a.
Pāhono i te mau hina’aro faufa’a rahi o te feiā tītīhoria nō Afghanistan e ora ra i Quatar, i Europa, ’e i te fenua Marite.

’Ua tauturu ato’a te ’Ēkālesia i te mau motu nō Caraïbes nō Saint Vincent ’e nō Grenadine mā i roto i te taime ’a pūpuhi ai te mau mou’a i te vari auahi i taua vāhi ra ; ’ua fa’anahohia te feiā nō te tauturu i te tāmāra’a ’e te fa’aorara’a ’a tā’iri ai te mata’i rorofa’i i te Gulf Coast ’e i Louisiane, Marite ; ’e ’ua hōro’a i te tauturu ’a tupu ai te pape pu’e ma te vaiiho i te mau ha’amoura’a i te tahi mau tuha’a nō Helemani, i Peretita, i Hōlane, Luxembourg, ’e i Helevetia.