Mau parau rahi nō roto mai i te 191ra’a o te ’āmuira’a rahi nō ’Ātopa

E tauihia tātou ’ia fa’a’ohipa tātou i te mau parau mau nō te ’evanelia tā tātou e ha’api’i nei. ’O te poro’i ’ōhie ïa, e poro’i faufa’a mau rā tā te peresideni Russell M. Nelson i hōro’a i te ’ōmuara’a ’e i te ’ōpanira’a i te ’āmuira’a rahi.

« E pūai rahi tō te ha’api’ira’a tumu vi’ivi’i ’ore a te Mesia », tāna i parau i roto i tāna mau parau ’ōmuara’a. « E taui te reira i te orara’a o te feiā ato’a e hāro’aro’a i te reira ’e e ’imi ’ia fa’a’ohipa i te reira i roto i tōna orara’a. » I te mahana nō muri iho, i roto i tāna mau parau ’ōpanira’a, ’ua parau ’oia : « E piti mahana tō tātou ha’api’i-maita’i-ra’a-hia […] I teienei, te uira’a, ’oia ho’i, e nāhea tātou e ta’a ’ē ai i muri a’e i te mau mea tā tātou i fa’aro’o ’e i ’ite ? »

I roto i te mau ha’api’ira’a faufa’a rahi ’e te rave rahi tei ha’api’ihia i roto i teie ’āmuira’a rahi :

’Ua ha’api’i mai tātou ē ’ua tae te taime nō te fa’a’ohipa i te tahi mau rāve’a ta’a ’ē mau nō te ha’apūai i tō tātou iho niu pae vārua (hi’o Peresideni Nelson i te ’api 93).
’Ua ha’api’i mai tātou nō ni’a i te faufa’a rahi nō te ti’ara’a pipi, nā reira ato’a tō te reira ’ōhie (hi’o Peresideni M. Russell Ballard i te ’api 51, Elder Dieter F. Uchtdorf i te ’api 77 ’e Elder Gary E. Stevenson i te ’api 47).
’Ua ha’api’i mai tātou i te tumu e mea hina’arohia te ’Ēkālesia ’e e rave rahi tā tātou e nehenehe e rave nō te ha’amaita’i i te ta’ata ’ia ’ohipa ’āmui ana’e tātou (hi’o Peresideni Dallin H. Oaks i te ’api 24, ’Episekōpo L. Todd Budge i te ’api 100, Bonnie H. Cordon i te ’api 10 ’e Sharon Eubank i te ’api 53).
’Ua ha’api’i mai tātou ē, maoti te herera’a i te Atua e ti’a ai ia tātou ’ia fa’a’ore i te mau ’amahamahara’a e ’ōpani nei ia tātou ’ia riro ’ei hō’ē (hi’o Elder Jeffrey R. Holland i te ’api 8, Elder D. Todd Christofferson i te ’api 16 ’e Elder Dale G. Renlund i te ’api 83).
’Ua ha’api’i mai tātou ē, e nehenehe tātou e tītau i te heheura’a i roto i tō tātou orara’a nā roto i te aurarora’a i te hina’aro o te Fatu ’e nā roto i te uira’a i te mau uira’a ’aita tā tātou e pāhonora’a huru tano (hi’o Peresideni Henry B. Eyring i te ’api 74, Camille N. Johnson i te ’api 80 ’e Susan H. Porter i te ’api 33).

E aha tā ’outou i fa’aro’o ? E aha tā ’outou i putapū ? E nāhea tātou ’ia fa’a’ohipa i roto i tō tātou orara’a i te parau mau vi’ivi’i ’ore, te ha’api’ira’a tumu vi’ivi’i ’ore ’e te heheura’a vi’ivi’i ’ore tā ’outou e ’ite mai ’a tāmau noa ai i te tuatāpapa i te mau a’ora’a nō te ’āmuira’a rahi ?