E fa’aurura’a maita’i nā te ao nei

’A tāmau noa ai te mau peropheta ’e te mau āpōsetolo i tā rātou tāvinira’a, e ha’amaita’i tō rātou fa’aurura’a maita’i i te mau orara’a e rave rahi, ’e e fa’aitoito i te vārua tāvinira’a, te hō’ēra’a ’e te tīa’ira’a. Teie te tahi mau parau faufa’a rahi nō taua tāvinira’a ra i roto i nā āva’e e ono i ma’iri a’e nei.

I roto i te mau ha’utira’a tu’aro nui nō te pu’e tau mahanahana nō Tokyo, ’ua pia te peresideni Russell°M. Nelson i ni’a i te mau rāve’a ha’apararera’a tōtiare i te tītaura’a ’ia fa’a’ore i te mārōra’a ’e te faufa’a o te auhoara’a, te fa’atura, ’e te hō’ēra’a.

’Ua ’āmui atu Elder Jeffrey R. Holland nō te pupu nō te Tino ’Ahuru Ma Piti ’āpōsetolo i roto i te hō’ē ’āmuira’a video nā te ao nei i Windsor, Peretāne. ’Ua tāu’aparau te mau ta’ata a’o o te ’āmuira’a i te ea nō te ferurira’a ’e nō te ’āehuehu o te rahira’a mirioni ta’ata i roto i te mau pūhapa tītīhoria. ’Ua pi’i Elder Holland i te pāturura’a nō te fa’ati’a i te mau tītīhoria ’ia fa’a’ite i « te fa’aro’o o te pae fa’aro’o mau ’o tē hōro’a ia rātou i tō rātou ihota’ata ». ’Ua ’āmui ato’a mai te tuahine Sharon Eubank, tauturu hō’ē i roto i te peresidenira’a rahi o te Sōtaiete Tauturu ’e te peresideni nō te pū tōtauturu a te feiā mo’a i te mau mahana hope’a nei, i roto i te ’āmuira’a.

’Ua paraparau Elder Quentin L. Cook nō te pupu nō te Tino ’Ahuru Ma Piti ’āpōsetolo i roto i te hō’ē ’āpo’ora’a nō te hō’ēra’a te mau fa’aro’o, tei tupu i te Fare Ha’api’ira’a Teitei nō Notre Dame i Indiana, Fenua Marite. ’Ua tītau Elder Cook i te mau ta’ata tei tae atu « ’ia ti’a ’ei māramarama nō te ti’aturira’a ’e te hō’ēra’a i roto i te hō’ē ao e ha’afaufa’a ’ore pinepine nei i nā mea to’opiti ».

’Ua paraparau Elder Ronald A. Rasband nō te pupu nō te Tino ’Ahuru Ma Piti ’āpōsetolo, i roto i te Forum a te mau fa’aro’o o te G20, tei fa’atupuhia i Bologna, ’Ītāria. (Tei roto i te mau fenua nō te G20 te mau fa’arava’ira’a faufa’a rahi roa a’e i te ao nei.) « ’Ia hōro’a-ana’e-hia i te ha’apa’ora’a fa’aro’o te ti’amāra’a ’ia ruperupe, e rave te feiā fa’aro’o nō te mau vāhi ato’a, i te mau ’ohipa ’ōhie ’e i te tahi taime ’ei mau ’ohipa tāvinira’a tu’iro’o », te parau ïa a Elder Rasband. I roto ato’a i te reira forum, ’ua paraparau te tuahine Eubank nō ni’a i te mau hope’ara’a o te po’ia ’e te tano-’ore-ra’a te mā’a nō te mau tamari’i veve. « E nehenehe noa te tauira’a … e fa’atupuhia nā roto i te mau aura’a ti’aturi o te ta’ata iho », tāna ïa i parau.

I muri a’e i te hō’ē ’āueuera’a fenua tei fa’a’ino roa ia Haiti, ’ua paraparau Elder Ulisses Soares nō te pupu nō te Tino ’Ahuru Ma Piti ’āpōsetolo i roto i te hō’ē ha’apūrorora’a purera’a i te mau melo parau farani nō Caraïbes, ma te fa’aha’amana’o ia rātou ē, « nā te fa’aro’o e ’īriti i te mana o te Atua i roto i tō tātou orara’a ». ’Ua ’āmui ato’a mai te tuahine Reyna°I. Aburto, tauturu piti i roto i te peresidenira’a rahi o te Sōtaiete Tauturu, i roto i te purera’a ’e ’ua paraparau ato’a nā roto i te natirara i te mau melo i roto i te mau rurura’a feiā fa’atere ’e te mau ’āmuira’a titi. « E nehenehe tā tātou e ti’a pūai », ’ua parau ’oia, « noa atu e tae mai te mata’i ’e e ’āueue te fenua ’ati a’e ia tātou ». ’Ua parau ato’a Elder Soares i roto i te hō’ē ha’apurorora’a purera’a nā te feiā ’āpī nō Caraïbes, ma te fa’aha’amana’o ia rātou ē, « e hina’aro tātou i te fa’aurura’a a te Vārua Maita’i i roto i tō tātou orara’a ».