Ñakomparti hesape

Ko pyhare ha’ese mokõi responsabilidad importante jarekóva: peteĩha, ñamongakuaa meme Evangelio resape ñande rekovépe; ha mokõiha, ñakomparti upe tesape opavave ndive.

¿Peikuaápa mba’eichaite pevépa peneimportante? Káda una peẽ —ko’aǧaite—pevale ha pene’esencial Ñande Ru Yvagagua Plan de Salvación-pe. Jareko tembiapo jajapova’erã; jaikuaa Evangelio restaurado añetegua; ¿ñaimépa ñadefende haǧuáicha? Javiviva’erã, ñakompartiva’erã. Ñaimeva’erã firme ñande jeroviápe ha jahupi ñane ñe’ẽ ñaproclama haǧua pe doctrina añetegua.

Revista Liahona septiembre-guávape, élder M. Russell Ballard he’i: “Roikotevẽve umi kuñanguéra ñe’ẽre, ha avei ijerovia. Roikotevẽ to’aprende hikuái pe doctrina ha tokomprende umi jaroviáva, ikatu haǧua ome’ẽ testimonio añeteguágui opa mba’épe”¹.

Hermana-kuéra, peẽ pemombarete che fe Jesucristo-re. ¡Ahecha pene ejemplo, ahendu pene testimonio ha añandu pende fe Brasil guie Botswana peve! Mamo pehohápe pegueraha penendive pene influencia. Umi oiméva pende ykére oñandu —pene familia guie umi pene contacto-kuéra pende teléfono celular-gui, ha pene amigo-kuéra umi red social-kuéra umi oguapýva peve pende ykére ko pyharépe. Aime de acuerdo hermana Harriet Uchtdorf ndive ohaívo: “Peẽ niko… ha’e faro mimbi ha ikyre’ỹva peteĩ mundo iñipytũvape ohóvo pehechaukávo, pene ejemplo, Evangelio ha’eha peteĩ mensaje vy’a reheguáva”².

Presidente Thomas S. Monson he’i: “…peme’ẽse ramo pende resape opavavépe, pemimbiva’erã ”³. ¿mba’éicha jahejava’erã pe tesape omimbi ñande ryepýpe? Sapy’ánte añeñandu peteĩ foco kangýichante. ¿Mba’éicha ikatu ñamimbive?

Escritura-kuéra ombo’e: “Tupã mba’éva niko tesape; ha orresivíva tesape ha opersevera Tupãme, orresivive tesape”⁴. Ñakontinuava’erã Tupãme he’iháicha pe Escritura. Jahava’erã tesape oĩháme: Ñande Ru Yvagagua ha Jesucristo. Avei jahakuaa templo-pe, jaikuaávo opa mba’e oĩva ipype ohoha Jesucristo gotyo ha Isacrificio expiatorio tuichaitévape.

Pepensamína efecto orekóva umi templo ijerérendi. Omoporã umi táva; omimbi umi colina guie. ¿Mba’érepa omoporã ha omimbi? He’íre pe Escritura “pe… añetegua omimbi”⁵, ha umi templo oreko añetegua ha propósito eterno; peẽicha avei.

1877-pe, presidente George Q. Cannon he’i: “…opa umi templo… odisminui Satanás pu’aka yvy ári”⁶. Che arovia ojejapohápe peteĩ templo ko yvy ape ári, pytũmby ohoha. Pe templo propósito niko oservi humanida-pe ha ome’ẽ opa Ñande Ru Yvagagua ra’ýpe kapacida ojevy jey haǧua oiko Hendie. ¿Ndaha’éipa ñande propósito avei ko’ã edificio dedicadoicha, ko’ã Ñandejára Róga; pe jaservi ambuévape ha ñaipytyvõ chupekuéra tojei haǧua pytũmbýgui ha tojevy Ñande Ru Yvagagua tesapépe?

Pe templo obra sagrada omongakuaáta ñande fe Cristo-re, ha upéicha ikatúta ñainflui porãve ambuekuéra fe-pe. Pe témplo espíritu ñemombarete rupi, ikatúta jahechakuaa, pe Ñandejára Expiasiõ añetegua, pu’aka ha esperanza ñande rekovépe.

Ojapo heta año, ore familia ombohovake peteĩ desafío tuicháva. Aha témplope ha añembo’e atã pytyvõ rekávo. Ojerrevela chéve peteĩ añetegua. Areko peteĩ visión hesakã porãva che kangykuéragui ha añesorprende. Pe momento espiritualmente ombo’évape, ahecha peteĩ kuña ijorgullosa ojapóvo opa mba’e ha’e ojaposeháicha, ndaha’éi katuete Ñandejára oipotaháicha, ha ohekávo ijupe ǧuarã pe crédito ohupytývare. Aikuaa che ha’eha upéva. Añembo’e che korasõme Ñande Ru Yvagaguápe: “Ndaikoséi pe kuña ramo, ha katu, ¿mba’éicha ikatukuaa akambia?”.

Espíritu de revelación rupive témplope, oñembo’e chéve pe tuicha necesidad arekóva peteĩ Redentor-re. Ajevy pya’ete Ñandejára Salvador Jesucristo-pe ha añandu oho chehegui che vy’a’ỹ ha peteĩ esperanza tuicháva heñói che korasõme. Ha’ékuri che única esperanza ha che añakaramase Hesénte voi. Hesakã chéve pe chéntese orekóva kuña natural “ha’eha Tupã enemiga”⁷ ha umi hentekuéra ijerereguándi. Pe ára témplope a’aprende Jesucristo Expiasiõ rupivente pe che naturaleza orgullosa ikatuha oñekambia ha ikatuha ajapo oĩporãva. Añandu Imborayhu atã ha aikuaa Ha’e chembo’etaha Espíritu rupive ha chekambiátaha ame’ẽrõ chupe che korasõ, ajoko’ỹre mba’eve.

Añorairõ gueteri che kangykuéra ndive, ha katu ajerovia pe divina Expiasiõre. Arresiví pe instrucción potĩ aike haguére santo témplope ahekávo py’aguapy ha ñembohovái. Aike témplope peteĩ kárgare ha asẽ aikuaávo arekoha peteĩ Salvador ipu’akapáva. Añeñandu chepy’aguapyha ha avy’a arresivi haguére Hesape ha a’asepta upe plan Ha’e orekóva chéve ǧuarã.

Oimévo ko mundo jerére, umi templokuéra oreko peteĩ diseño exclusivo okáraguio, ha katu ipype opavave oreko peteĩ tesape ijapyra’ỹva, propósito ha añetegua. Pe 1 Corintios 3:16 jalee: “¿Ndapeikuaái piko peẽ ha’e Tupã templo, ha Tupã Espíritu oikeveha pendepype?”. Ñande avei, Tupã rajykuéraicha, ñaime opa ko mundo-pe, ha peteĩteĩ jaguereko diséño imba’énteva umi témploicha avei. Avei jareko peteĩ tesape espiritual ñandepype; pe tesape espiritual niko ha’e peteĩ Ñandejára resape reflejo. Oĩ heta oñeñandútava atraida hesekuéra pe imimbikuére.

Jareko ñane función ko yvy ári—membykuña ramo, sy, lídere ha mbo’ehára guive, hermana peve, proveedora, tembireko ramo ha hetave. Peteĩteĩ oreko iñinfluencia. Káda función oreko poder moral orreflehávo Evangelio añetegua ha témplo konveniokuéra ñande rekovépe.

Elder D. Todd Christofferson he’i: “Moõve hendápe noñeñandu hatãvéi kuña influencia moral … hógagui”⁸.

Ore mitãkuéra michĩ aja, añeñandu peteĩ capitán barco-peguáicha, che ména David ndive, ha añeimagina umi 11 ore mitã ha’eha peteĩ barquito flotilla-icha ovevýiva ore jerére pe bahía-re, roñembosako’ívo ronavega haǧua ko mundo mar rupi. David ha che roñandu roikotevẽ rohecha Ñandejára brújula ára ha ára roho haǧua dirección iporãvéva gotyo upe flotilla michĩvéva reheve.

Umi che ára niko henyhẽ mba’e intrascendente-gui amopẽ aokuéra, alee umi mitãme, ambosako’i senaǧua. Sapy’ánte, ñande róga bahía-pe ndaikatúi jahecha umi mba’e isensíllove ha tapiaguáva, jepe ogaguándi ñembo’e, Escritura-kuéra je’estudia ha noche de hogar, umíva rupi oiko tuicha mba’e; atestifika umíva orekoha tuicha significado. Tuicha rovy’a umi barco’i —ore mitãnguéra— okakuaávo oiko peve chuguikuéra nave guasu henyhẽva Evangelio resapégui ha toĩ hikuái listo “[oñembarkávo] Tupã servicio-pe”⁹. Umi acto michĩ fe ha servicio rehegua ha’e hína hetave ñande apytépe ñakontinuaháicha Tupãme, ha ipahápe jagueru tesape iñeternova ha gloria ñande familiakuérape, ñande amigo-kuéra ha umi ñanemoirũvape. ¡Añetehápe peẽ ikatu peguereko peteĩ influencia tuichaite!

Pepensamína pe influencia orekóva hógape pe mitãkuña’i Primaria-gua jerovia. Pe jerovia orekóva ore membykuña’i ohovasa ore róga okañy jave peteĩva ore mitã’i michĩva peteĩ parque-pe. Ore rogaygua odispara oheka py’apýre chupe. Ore mitãkuña’i nueve áño orekóva chetira che jyvágui ha he’i: “Mamá, ¿nañañembo’eva’erãi piko?”. ¡ha irrazón! Ore familia oñembyaty heta hénte mbytépe ha rojerure rojuhumi haǧua ore mitã. Ha rojuhu. Umi mitãkuña’i Primaria-guápe ha’e: “¡Peseguínte pemomandu’ávo pende rukuérape oñembo’eva’erãha!”.

Ko verano-pe arekókuri privilegio ahávo peteĩ campamento oĩháme 900 mitãkuña Alaska-pe. Che’influencia pypuku hikuái. Oǧuahẽ hikuái upe campamento-pe espiritualmente preparada; omoñe’ẽkuri Libro de Mormón ha omombyta iñakãme “El Cristo Viviente: El testimonio de los Apóstoles”. Pe pyhare mbohapyha campamento-pe, umi 900 mitãkuña oñembyaty ha he’ĩjeypaite upe documento, ñe’ẽ peteĩteĩme.

Pe Espíritu omyenyhẽmba pe kotyguasu, ha ajapose che avei upéicha. Ha katu ndaikatúi; ndapagái kuri pe precio amemorisa haǧua.

Añepyrũkuri amemorisa umi ñe’ẽ “El Cristo Viviente” gui umi mitãkuñáicha, ha iñinfluencia rupi, amomba’eve pe Konvénio sacramental ñanemandu’ataha akoiete ñande Salvador-re arrepetívo umi Apóstol-kuéra testimonio Cristo-gui. Pe Santa Cena isignifikádo pypukuve chéve ǧuarã.

Che esperanza niko ame’ẽvo Ñandejárape peteĩ regalo navida-pe ko áñope amemorisávo “El Cristo Viviente” ha amombytávo che korasõme 25 de diciembre-pe ǧuarã. Aha’arõ areko peteĩ influencia porã —umi hermana-kuéra Alaska-pegua orekoháicha chéve ǧuarã.

¿Ikatúpa pejehecha pendejupe ko’ã ñe’ẽ oĩva upe documento: “El Cristo Viviente”-pe? “Ha’e ojerure asýkuri opavave tosegui Iñejemplo. Oikundaha Palestina rape, omonguerávo hasývape, ojavóvo umi ohecha’ỹva tohecha ha omopu’ãjeývo omanova’ekuépe”¹⁰.

Ñande, hermana-kuéra Tupaogua, nañaikundahái Palestina rape ñamonguerávo hasývape, ha katu ikatukuaa ñañembo’e hesekuéra ha ja’aplika pe Expiasiõ pu’aka oporomongueráva umi relación haýva ha problemática-pe.

Ndajajapói ramo jepe pe ohecha’ỹva tohechajey ojapo haguéicha pe Salvador, jatestifikakuaa Plan de Salvación-re umi espiritualmente ohecha’ỹvape; ikatu jaipe’a umi iñentendimiento resa pe sacerdocio ha convenio eterno-kuéra ñeikotevẽre.

Nañamopu’ãmo’ãi omanova’ekuépe ojapo haguéicha Ñandejára, ha katu ikatu jahovasa umi omanova’ekuépe jarahávo herakuéra témplope obra ojejapo haǧua hesekuéra; upéicharõ añetépe ñamopu’ãta chupekuéra iprisión espiritual-gui ha ñaikuave’ẽta chupekuéra vida eterna rape.

Atestifika jarekoha peteĩ Salvador oikovéva, Jesucristo, ha Ipu’aka ha Hesape reheve ikatúta ñamomombyry ko mundo pytũmby, ikatúta ñahendu añetegua ñe’ẽ jaikuaáva ha ñainflui opavavépe ou haǧua Hendápe . Jesucristo rérape. Amén.