Kalōk Im̧ōko im Naan in Kam̧ool ko
Pejnej in ekkal eo an Sarah ekar kajoor. Bōtaab liin ekar wōr juon an jokāālet n̄an kōm̧m̧ane.
Pija ko jān Christina Smith, ijjello̧kin n̄e kar je
N̄an Noah, ekar juon wa. Kiin̄ Benjamin ekar kōm̧m̧ane jān juon tawōr. Innem ļeo jein im jatin Jared ear jijōt ioon baaj ko. Im n̄an Sarah Christensen jān Montana, USA? Ekwe, liin ekar jokāālet bwe ekar kōņaan kalōk im̧ōko.
Hermana Christensen, kiiō juon mijenede ej jerbal aolep raan jerbal ilo Minnesota, Minneapolis Mijen, ilo kar juon iien ekar kūtōtō bwe juon mijen ekar menin kabbōjrak jān an bōk kōttōpar ko an kōn ekkal—im ekar jab ilo m̧ool mijen eo an make!
Jen ijjino jān jinoin.
“Ikar jipan̄ jema kalōk men ko aolepān mour eo aō,” liin ear ba. “Iminene in kōjerbal kein jerbal ko rej kōjerbal jarom im ekkal, im ikar rūttoļo̧k ilo aō iakawe. Kōn menin, ke eaar 16 aō iiō, ikar jokāālet bwe ikar kōņaan jino pejnej in ekkal eo aō make.”
“Jema ekar katakin eō n̄an kobaik men ko ippān doon, jān ruo rā ko n̄an juon em̧ elikio,” Sarah ej ba.
Kalōk juon Pejnej
Sarah ekar bar kōm̧m̧ane (remodel) juon em̧ ilo jino in tata juon iiō ilo jōmaar eo. Liin ekar lukkuun iakwe jon̄an liin ekar bar bōk juon jerbal in bar kōkāāl (remodel) iiō eo tok juon. Ilo jem̧ļo̧kin, liin ekar jokāālet n̄an kōm̧adm̧ōde juon jerbal em̧ool eļapļo̧k—juon em̧ “kalōk jān kontōrāāk n̄an wia kake (spec)” ak juon em̧ me liin im kumi eo subcontractor ro an kar kalōke jān pedped eo n̄an dedeļo̧k in, kōjatdikdik n̄an wia kake im kōm̧m̧an tōprak jān e.
Raan in rubrub eo! Sarah ej bōk juon am̧a n̄an bathroom eo ilo juon iaan būroojāāk ko an.
Jino juon pejnej ekar jab būroojāāk epidodo, eļap tata kōnke Sarah ekab de kar poub ilo high school im ettōr cross country.
Sarah eaar jino pejnej kom̧bani in ekkar eo an make ke ekar 16 iiō dettan.
“Ikar kanooj katak eļap,” liin ej ba. “Ikar aikuj in kōjerbal bok in check ko n̄an kōļļāik armej, eo ijjan̄in kar kōm̧m̧ane m̧okta. Ikar aikuj in ineem̧m̧an kōnono n̄an ro ijaje kajjier me raar subcotractor ro aō. Ikar barāinwōt katak kilen ņamejļan inepata eo an lale juon kom̧bani, eo ekar jab aolep iien kam̧ōņōņō. Aolep iien en inepata eo bwe koban kōm̧m̧an jāān n̄an kōm̧m̧an tōprak n̄e wia kake juon em̧.”
Jamin Makeļo̧k
Bōtaab kōjekdo̧o̧n inepata ko im ļon̄tak ko me rej itok ippān lale juon pejnej, Sarah ekar jab aikuj in jelm̧ae ettōņak ko reļļap an make.
“Ej aolep iien kar kōm̧m̧an, im ijeļā bwe ej kōnke kōn Irooj,” liin ej ba. “Pejnej in ekar jab pidodo n̄e E ejako. E ekar jipan̄ eō ilo raan ko renana, buuļ jerbal, aolep men.”
Kadkad eo an Sarah ippān baam̧le eo an ej itok jān jerbal ippān doon.
Baam̧le eo an Sarah raar barāinwōt rie liin ilo aolep jekjek—eo ej tōlļo̧k n̄an mijen eo me ekar kōpaborbore karōk ko an.
Ļaddik eo erūtto jein Tyler ear pepe n̄an jipan̄ Sarah kalōk juon em̧ n̄e ej ro̧o̧ltok n̄an kapijuknen jān mijen eo an. Bōtaab juon raan, ļeo jein ekar talboone ļo̧k lin kōn juon ennaan eo bwe kar kajjitōk ippān n̄an kaitokļo̧k iien jerba in mijenede eo an.
“Ikar kanooj illu ippān,” liin ej kwaļo̧k. “Ikar āinwōt ba, ‘Tyler, kwojjab maron̄ bōke. Em̧ōj aō karōk aolep kain.’ Innān ekar ba, ‘Jerbal eo an Irooj eļapļo̧k an aorōk jān jerbal eo am̧.’ Men jab in ekar im̧we eō. IIkar jeļā bwe ear jim̧we im bwe ij aikuijin lōke karōk eo an Anij.”
Baam̧le eo an Sarah raar karuwaineneiktok ļeo jein Tayor n̄an kapijuknen eo ālkin an kar kaitokļo̧k mijen eo an.
Pija eo letok ilo kilaan jouj eo anSarah Christensen
Men̄e liin ej bōk jipan̄ jān jemān ak jipan̄ jān Jemādwōj Ilan̄, Sarah ejeļā ejjab makeļo̧k.
Juon Mijen An Make
Waanjon̄ak eo an Tyler ekar im̧we Sarah n̄an jino ļōmņak kōn jerbale mijen eo an make. “Ikar kile ewi lōn̄ in armej ro ļeo jeiū ekar jipan̄ er itok n̄an Kraist, im ikar barāinwōt lo ewi jon̄an an kar itok n̄an Kraist e make. Ikōņaan bwe en wōr aō en̄jake rōt kein,” Hermana Christensen ej ba. “Ikar jino m̧ool in ekkatak gospel eo im im kar lo bwe ļapļo̧k in an naan in kam̧ool eo im jemjerā eo aō ippān aō Rilo̧mo̧o̧r eddōkļo̧k, ekar ļapļo̧k aō kōņaan kwaļo̧k ta eo ewōr ippa.”
Sarah ekar kōm̧m̧ane juon kāālet n̄an kabōjrak pejnej in ekkal eo an im jerbal n̄an Irooj. Jokāālet in ekar leļo̧k n̄an liin kōļmenļo̧kjeņ ko rekajoor rekāāl.
“Men eo m̧oktata mijen eo aō ekar katakin eō ej bwe gospel eo elukkuun ukōt mour eo aō,” Hermana Christensen ej ba. “Rūttoļo̧k ilo Kabun̄ in ekar kōm̧m̧an an pen n̄an aō lo ewi aorōk in gospel eo kar ilo mour eo aō.
Kiiō ilo mijen in aō, ij kepool kōn armej ro im rejjab jeļā kake Jemedwōj Ilan̄ im Jisōs Kraist. Ilo aer katak bwe rej jet ajiri ro nejin Anij im E ej wōr an karōk n̄an er, menin ej ukot mour ko aer. Ej men eo em̧m̧antata n̄an kam̧ool im erom m̧ōttan. Eaar wōr juon aō meļeļe kake m̧okta jān mijen eo aō, ak kiiō ijelā bwe gospel eo an Jisōs Kraist ej aurōk n̄an lan̄lōn̄ ilo mour in im ilo eo ej itok.
Hermana Christensen (tuanm̧o̧oņ) im eo m̧ōttan Hermana Taylor (tuanmiin̄) em̧m̧an ippero jerbal ilo jabdewōt wāwein remaron̄.
Pija eo letok ilo kilaan jouj eo an Sarah Christensen
Tōmak Ioon Mijak
N̄an jodikdik ro jet rej ļōmņak in jerbale juon mijen, Hermana Christensen ej ba, “Wōr tōmak im jab mijak. Mijen ko rejjab pidodo, ak rej wōr tokjeer. Anij enaaj kōjeram̧m̧an eok ilo wāwein ko rekabwilōn̄lōn̄ ilo am̧ kōm̧m̧ane juon kālet eo n̄an erom̧ juon An rijerbal ro.”
Men̄e liin ej būrom̧ōj kōn an kōn kalōk m̧ōko ilo an jerbal, Hermana Christensen ejjab ajļo̧ke kāālet eo an. “Aeet, ewōr jikin n̄an eddōkļo̧k ko remaron̄ kar bōk jikier ilo pejnej eo aō ilo tōre eo ij juon full- time mijinede, leddik eo ej ba. “Ak ijelā Irooj enaaj kōjeraam̧m̧an kālet eo n̄an kaarmejette im likūt tullik m̧okta jidik. Pejnej eo aō emaron̄ kōttar, ak jerbal eo an Irooj ejjab maron̄!”