Reilo̧k n̄an Kraist

Kailey eo jon̄oul jiljimjuon iiō dettan ear pād ilo juon tiim in cheerleading m̧ae ear ioon juon joreen eo eļap n̄an kemālij eo an. Ilo an kar kajeon̄ pukot ājmour, ear jab maron̄ pād ilo jikuuļ, im ear jino an en̄jake an jenolo̧k im makke iaan. Ear jelm̧ae appan̄ ko ilo en̄jake im kar jaje ia n̄an pukot jipan̄. Juon m̧ōttan ekar karuwaineneik n̄an ron̄jake mijenede ro. Rekkar katakin e kōn Pinmuur eo an Jisōs Kraist. Katak eļapļo̧k kōn Kraist ekar leļo̧k n̄an liin kōjatdikdik, im liin ekar en̄jake āinwōt eļan̄n̄e Anij E make ekar ekkejel ippān.

Kailey ear ba n̄an jinen, “ Ijan̄in kar en̄jake bwe Anij ej iakwe eō. Ak kiō ijeļā bwe E ej iakwe eō.”

Jinen, Michelle, ear ilbōk jikidk. Liin im ļeo pāleen, Broc, raar em̧m̧akūt jān Kabun̄ eo an Jisōs Kraist im Armej ro Rekwojarjar ilo Raan-ko Āliktata ke Kailey ekar jiljilimjuon kōnke kōn elōn̄ kajjitōk ko, pere ko, im n̄ūrbōktak ko. Raar ļōmņak leddik eo nejier enaaj kar m̧ōņōņōļo̧k ilo an jako aolep kweilo̧k ko im kien ko. Rekar jab ļōmņak kāālet eo aer enaaj kar dāpij Kailey jān juon ekkejel eo epaak ippān Anij. Ke Michelle im Brock raar lale wāween an Kailey kar oktak, raar kile bwe ekar juon iien aitok jān ke raar en̄jake epaak n̄an Anij, im raar kōņaan en̄jake wāween jab eo bar juon alen.

Raar iion bisop eo aer, im ejjab to baam̧le eo, ekoba ļaddik eo jatin Braeden, raar bar ro̧o̧ltok n̄an kabun̄ in. En̄jake epaakeļo̧k Anij im bar ekkejel Ippān—eļap tata kōn jar—ekar kōjepļaakļo̧k tōmak eo aer. Bar ro̧o̧lļo̧k n̄an jar ekar jab ņa mejļan aolep kajjitōk ko aer ak n̄ūrbōktak ko, ak raar kile bwe ewōr juon ekkejel an juon make ippān Anij ekar ļapļo̧k an aorōk jān jab tōmak eo aer.

Aolepān menin ekar ijjino kōn juon m̧ōttan—juon jodikdik āinwōt kwe—kar karuwaineneik Kailey n̄an reilo̧k n̄an Kraist. Im liin ekar kōm̧m̧ane!

Jisōs Kraist ekar ba, “Reitok n̄an Eō ilo ļōmņak otemjeļo̧k; jab pere, jab mijak” (Katak im Bujen Ko 6:36). En̄in ej im̧we eo itulikin 2025 Unin Tōl eo an Jodikdik ro. Kōtļo̧k bwe jen kwaļo̧k ekōjkan am̧ maron̄ kāālet lōke ioon pere im tōmak ioon mijak ilo am̧ reilo̧k n̄an Kraist.

Tamara W. Runia

N̄e ij ļon̄tak, ej aolep iien jipan̄ eō n̄an pijaikļo̧k Jisōs Kraist kōn an pein eļļo̧kļo̧k. N̄e il reilo̧k n̄an E, ij keememej naan ko an al eo, “Inaaj Etetal ippān Jisōs”: “E ejjamin naaj ilo̧k jān kōj, jekdo̧o̧ņ n̄e ij likjab.”

Emily Belle Freeman

N̄e ij riiti eoon in an unin tōl in, ij keememej eō kōn Piter ioon Lom̧aļo in Galilee. Kalimjōk wōt lan̄ eo ekar kōļapļo̧k mijak im pere eo an, kōm̧m̧an bwe en tūm̧ļo̧k n̄an lowaan ņo̧ ko an lan̄ eo. Bōtaab kalimjōk Rilo̧mo̧o̧r eo ekar kōmaron̄ E n̄an kadedeļo̧k juon men ejjan̄in kar kōm̧m̧an m̧okta: ekar etetal ioon dān eo. Ekabwilōn̄lōn̄, lukkuun. Ta eo kwomaron̄ in kar kadedeļo̧k ilo am̧ reilo̧k n̄an E?

Andrea Muñoz Spannaus

Ke ikar jino in en̄jak mijak, jekdo̧o̧ņ ta ia eo ij pād ie ak ta jekjek eo ij pād ie, ikōn tōn wōt ļōmņak kōn jemjerā eo aō ippān Jemādwōj Ilan̄ im Jisōs Kraist. Ij āliji ilo ļōmņak eo aō jejjjo alen: N̄A IJ LEDDIK NEJIN ANIJ. Ij wōnm̧anļo̧k im kōm̧m̧ane menin m̧ae ien ej em̧m̧anļo̧k aō mour. Ej jerbal iien otemjej!

Bradley R. Wilcox

Kajjitōk ippam̧ make wōn eo ej kea im iakwe eok eļap tata. Ej ke jinōm̧ ak jemam̧ ak ritōl ro an Kabun̄ in? Ej ke armej roilo social medai me n̄an kwe kwomaron̄ baj juon membōr? Reilo̧k n̄an Jemedwōj Ilan̄ im Kraist. Er rej lukkuun kea!

Steven J. Lund

Keememej ta eo kakeememej eo kake n̄e kwoj riiti unin tōl ko an Doulul eo an Priesthood eo an Aron im Doulul eo an Jiron̄ ro: Kwoj juon ļaddk ak leddik jitōnbōro nejin Anij. En wōr am̧ tōmak bwe Jemād Ilan̄ ewōr juon an karōk n̄an kwe. Reilo̧k n̄an Kraist ej m̧eļeļein lo bwe Pinmuur eo An ej pād ioļapin karōk eo.

Michael T. Nelson

Riiti jeje ko rekwojarjar ej reilo̧k n̄an Kraist. Pere ko im mijak ko ekkā aer mejukinļo̧k ilo ad keememej mennin kabwilōn̄lōn̄ ko im katak ko an Kraist. Jej lukkun jeram̧m̧an bwe jemaron̄ tōpar naan ko an. Remaron̄ jerbal ilo jabdewōt jekjek ko jej iooni ilo mour ko ad.