Pumili

Ang kakayahan nating pumili at kumilos para sa ating sarili ay tinatawag na kalayaang pumili. Mahalagang bahagi ito ng plano ng Ama sa Langit. Ang isang layunin ng buhay na ito ay ipakita na pipiliin nating sundin ang mga utos ng Diyos upang tayo ay maging lalong katulad Niya. Hahatulan tayo batay sa ating mga pagpili. (Tingnan sa 2 Nephi 2:27; Doktrina at mga Tipan 101:78; Abraham 3:25.)

Hinikayat ni Josue ang kanyang mga tao na piliin na “sa araw na ito,” o ngayon mismo. Maaari tayong gumawa ng mahahalagang pagpili nang minsanan at pagkatapos ay sikaping manatiling tapat sa mga ito. (Tingnan sa Mga Awit 37:5.)

Sa talatang ito, ang ibig sabihin ng maglingkod ay sumamba, tumulong, sumunod, at ilaan ang iyong sarili sa isang tao. Dapat tayong maglingkod sa Panginoon (tingnan sa Moises 1:15).

Inutusan ang Israel na maglingkod lamang sa tunay at buhay na Diyos na si Jesucristo (tingnan sa Exodo 20:2–5). Nagbigay si Josue ng mga halimbawa ng ibang mga diyos na hindi dapat sambahin ng kanyang mga tao. Maaaring kabilang sa ibang mga diyos sa ating buhay ang mga ari-arian, mga opinyon ng iba, iba pang mga interes—anumang bagay na naglalayo sa atin sa Panginoon.

Nagsalita si Josue para sa kanyang sarili at sa kanyang sambahayan. Sinabi niya na paglilingkuran nila ang Panginoon. Nais niyang pamunuan nang matwid ang kanyang pamilya at turuan silang sundin ang Panginoon (tingnan sa Doktrina at mga Tipan 93:40).