Qito ni Siganimate

O ira na tisaipeli era na tucake ena dua na laini me caka kina e dua na sala baleti itautauri ni iyaloyalo ka yalovaka na nodra drauni niu.

Daunivakamacala: Na Sigatabu ni bera ni mate o Jisu Karisito, a lako mai ki Jerusalemi ena dua na asa. “Ia ni sa qai lako mai , era sa vakatekivu na tisaipeli kecega mera reki ka vakarokorokotaka na Kalou ena domo levu ena vuku ni cakacaka mana kecega era sa raica.”

O koya e taura tiko na iyaloyalo ena taubale ena sala ni taura tiko na iyaloyalo 1 (E vodoka tiko o Jisu Karisito na asa). Era kailavaka vakavica na tisaipeli na “Osana!” ni ra yalovaka na nodra drauni niu.

Tisaipeli 1: “Sa kalougata na Tui sa lako mai ena yaca ni Turaga: me tu mai lomalagi na veivinakati, kei na vakarokoroko ena veiyasana e cake sara.”

Daunivakamacala: “Ia ni sa yaco ki Jerusalemi ko koya, sa yavala kecega na lewe ni koro ka kaya, O cei li oqo?”

Tisaipeli 2: “Oqo ko Jisu na parofita mai Nasareci e Kalili.”

Era lagata kece na tamata na ikatolu ni qaqani “Beautiful Savior” (Nodra iVolanisere na Lalai, 62–63).

Daunivakamacala: Ena Lotulevu, a vakasoqoni ira vata mai na Nona tisaipeli o Jisu Karisito ka solia vei ira na sakaramede.

Me tauri cake na iyaloyalo 2 (Jisu ena iOtioti ni Kana Vata). O ira na tisaipeli mera dabe wavoki ka raica na iyaloyalo kei Jisu.

Daunivakamacala: “Ia ni ra sa kana tiko, sa taura na madrai ko Jisu, ka lotutaka, ka dovia, ka solia vei ira, ka kaya, Dou taura, kania: oqo na yagoqu.”

Ena vakarokoroko, a taura cake e dua vei ira na tisaipeli na madrai.

Daunivakamacala: “Sa qai taura na bilo ko koya, ia ni sa vakavinavinaka oti, sa solia vei ira: a ra sa gunu kece kina. A sa kaya vei ira, Sa noqu dra oqo ni veiyalayalati vou, sa liviraki e na vukudra e lewe vuqa.”

Ena vakarokoroko, a taura cake e dua vei ira na tisaipeli na bilo.

Daunivakamacala: A vakavulica talega vei ira o Jisu e dua na ka bibi. A kaya, “E dua na vunau vou kau sa solia vei kemudou, Mo dou veilomani me vaka kau sa lomani kemudou. A ka oqo era na kila kina na tamata kecega ni dou sa noqu tisaipeli, kevaka dou sa veilomani.”

Era na lagata kece na tamata na “Love One Another” (Nodra ivolanisere na lalai, 136).

Daunivakamacala: “Sa qai lako mai ko Jisu kei ira ki na dua na yasana sa vakatokai ko Kecisemani, a sa kaya vei ira na tisaipeli, Dou tiko ga eke, meu lako mada ki kea meu masu.”

Era dabe vata na tisaipeli ena dua na yasa ni buturara. O koya sa dau taura na iyaloyalo mena tucake ena yasana ka dua ni buturara, ni taura cake na iyaloyalo 3 (e masu tiko o Jisu ena were).

Daunivakamacala: “A sa lako vakalailai vaka ki liu [o Jisu], a sa cuva sobu vakatoboicu, a sa masu, ka kaya, I Tamaqu, kevaka e rawarawa, me lako tani mada vei au na bilo oqo: ia me kakua ga ni vaka na noqu lewa, me vaka ga na nomu lewa.”

O ira na tisaipeli era sa qai davo sobu ka ra vakatovolea mera sa moce lutu.

Daunivakamacala: Ni masu tiko na iVakabula, e ratou a moce ga na Nona tisaipeli. A vakararawataki duadua ga o Jisu ena were. A vakila o Koya na noda mosi kei na rarawa taucoko me rawa kina Vua me kilai keda vinaka ka vukei keda. A vakararawataki me volia na isau ni noda ivalavala ca.

Era lagata kece na tamata na “Kecisemani” (Sere ni Lotu—Me Baleta na Vuvale kei na Lotu, naba 1009).

Daunivakamacala: Ni sa masu oti o Jisu, era sa kauti Koya tani na sotia ka vesuki Koya. Dina ga ni sega ni cakava o Koya e dua na cala, era sa lewa na iliuliu mera vakamatei Koya.

O koya sa dau taura na iyaloyalo me taura cake na iyaloyalo 4 (na iVakabula ena kauveilatai). Era tekiduru wavoki na tisaipeli, ka rai cake yani na iyaloyalo.

Daunivakamacala: Ni sa rube toka ena kauveilatai, a kaya o Jisu, “I Tamaqu, kakua ni cudruvi ira; nira sa sega ni kila na ka era sa kitaka.” Ena Nona rarawa levu sara mada ga, sai Koya na ivakaraitaki uasivi duadua ni loloma kei na veivosoti.

Na tamata kece me lagata na “Delana Tu Vakayawa ” (Serenilotu, naba 111).

Daunivakamacala: Ni sa mate o Jisu Karisito, a laki vakatikori na yagodra ena ibulubulu me tolu na siga. Ena ikatolu ni siga, eratou sa mai sikova na ibulubulu o Meri Makitala kei na so tale na marama. “A ratou sa kunea ni sa vaqiqici tani na vatu. Ia ni ratou sa curu, eratou sa sega ni kunea na yago ni Turaga ko Jisu.”

Era sa qai lako o Meri kei rau na marama ena rarawa ena buturara ka veiraiyaki, ka veilecayaki.

Daunivakamacala: Rau a rairai mai e rua na agilosi ka vosa vei rau na yalewa.

Na agilosi 1 kei Agilosi 2 e rau sa kalawa yani ki na buturara e yasai Meri.

Agilosi 1: “Drau kakua ni rere ni kau sa kila drau sa vakasaqarai Jisu, ko koya ka lauvako ki na kauveilatai.”

Agilosi 2: “Sa sega eke ko koya: sa tucake tale.”

Daunivakamacala: “A rau sa lako kusarawa ni rau sa rere ka reki vakalevu; a sa cici me tukuna vei ira [na vo ni] tisaipeli.”

Sa cici tani mai o Meri kei rau na yalewa mai na buturara me wasei na itukutuku vinaka ki na tamata kecega.

Meri: Sa tucaketale o Koya! E bula tiko o Jisu Karisito!

O koya sa dau taura na iyaloyalo sa taura cake na iyaloyalo 5 (na Karisito sa tucaketale). Era lesu kece mai ki na buturara.

Daunivakamacala: Sa tucake tale na noda iVakabula ena mataka ni Siganimate. Ena Vukuna ga, sa veisau na ka kecega. Sa rawa ni tu vei keda na inuinui, vakacegu, kei na marau. Baleta ni sa bula tiko o Koya, sa tiko vata kei keda nikua kei na veigauna kecega.

Era sa lagata kece na “Jesus Has Risen” (iTokani, Apr. 2025, 18–19).