Sa Lomani ira Vakaoqo na kai Vuravura na Kalou

E lomani keda vakalevu sara na Tamada Vakalomalagi ka tala mai kina na Luvena, o Jisu Karisito, me vukei keda meda lesu tale Vua.

Sa kila tu o Jisu ni na yaco eso na gauna ena noda bula ni da na vakila na rarawa, mosi, kei na galili. Eda na caka cala ka rere talega ena so na gauna. Ena Were o Kecisemani, a digitaka o Jisu Karisito me vakila na veika kece oqori me rawa ni kila ka vukei keda vakavinaka sara. A sauma talega o Koya na noda ivalavala ca me rawa kina ni da veivutuni. (Raica na Alama 7:11–13.)

Sa kila talega o Jisu ni sa yaco mai na gauna, eda na mate kece. Na mate e sa dua na tiki ni bula ka kena ivakarau ga ni bula. Ia na Kalou e sega ni vinakata na mate me icavacava ni noda italanoa. Ena vuku ga ni a solia o Jisu Karisito na Nona bula ka sa tucaketale, eda na bula kece talega. Oqori na vuna a digitaka kina o Koya me mate ena vukuda.

Eda vakatoka na ka e cakava na iVakabula me Veisorovaki i Jisu Karisito. Na isolisoli tabu oqo a vakayacori ena vukuda ena loloma. Nanuma tiko, na Kalou e lomana vakalevu na kai vuravura ni tala mai kina na Luvena, o Jisu Karisito (raica na Joni 3:16). Ka sa lomani keda vakalevu o Jisu ka solia kina na Nona bula me rawa kina ni da lesu ka laki bula vata tale kei na Kalou.