Macawa Tabu neiMia

Erau wilika o Na kei Ta na italanoa ni Sigatabu ni Gone ena ivolanikalou. Ena gauna sa gole kina o Jisu Karisito ki Jerusalemi, era sa yaloyalo ena taba ni balabala na tamata ka kaci, “Osana!”

A taura tu o Lucy na ganequ e dua na iyaloyalo kei Jisu ni vodoka tiko e dua na asa. O keitou na kena vo keitou yaloyalo ena taba ni kau pepa. Au vakila niu marau niu raitayaloyalotaka niu sa kidavaki Jisu tiko.

Sa cudru o Jisu ni ra a volitvolitaki tiko na tamata ena valetabu, sa qai ceburaki ira tani e tautuba. Keitou tomika na benu mai na veikau e vakavolivolita na lotu. Au marau ni rawa ni keitou veivuke ena kena qarauni na vale ni Kalou!

E wilika o Na na italanoa ni a tukuna o Jisu Karisito vei ira na tamata. Keirau a vakarorogo ka vakayagataka na qele me caka kina na veika mai na italanoa. A cakava o Lucy e dua na sipi baleta ni o Jisu na iVakatawa Vinaka. Au cakava e dua na cina waiwai lailai. A vukei au meu nanuma tiko na utoqu me dau vakasinaiti ena vakabauta.

A tukuna vei keitou o Ta na sala a solia kina o Meri vei Jisu Karisito e dua na waiwai digitaki me baleta na yavana. A vakasinaita na vale taucoko na kena i boi.

E sega vei keitou na waiwai digitaki oqo. Ia, keitou a vakayagataka na sinamoni me caka kina e dua na vakalomavinaka. A kaya o Na ni gauna keirau boica kina na sinamoni ni sa vavi ena kakana, sa dodonu meda vakasamataka na veika e rawa ni da solia vei Jisu.

Keitou sa waqaca na kadrala ka lagata e dua na sere, me vakataki Jisu Karisito kei iratou na Nona tisaipeli ena iOtioti ni Kana Vata. Keitou a kania na madrai vavaku ka gunuva na wainimoli qerepi me nanumi kina na imatai ni sakaramede. Sa tu talega vei keitou na promogranates me ivakananumi vei keitou na dra i Jisu, kei na vei olive me baleta na were o Kecisemani.

Ni keitou kana tiko, a rorogo na lutu ni kurukuru e tautuba. Au vakila niu taqomaki ka vakavinavinaka ni kila ni sa sotava oti o Jisu na cava butobuto.

Eda wilika na sala a mate kina o Jisu Karisito ena vukuda. Keitou qai taura na kato ni senikau lala ena were ka vakalala e yasana, me vaka e dua na ibulubulu. Keitou biuta wavoki kina na qele kei na vatu ka sega ni sogota. A solia vei keitou o Na e dua na droini me matataka na yagoi Jisu. Keirau solegi ena vakarokoroko ena dua na isulu vulavula ka biuta e loma ni kato ni senikau.

Dina ga ni dua na kato ni senikau, au vakila niu yalorarawa tiko ga ena noqu ubia na katuba ena dua na vatu.

E kaya o Na ni oti na mate nei Jisu Karisito, a vakaduria o Koya na cakacaka ni kaulotu ena vuravura ni yalo. Oqori na sala era se sega ni vulica rawa kina na Nona kosipeli e vuravura o ira na tamata era se bera ni vulica na veika e baleti Koya. Ena valetabu, e rawa ni da papitaiso ena vukudra na tamata era sega ni papitaiso ni bera ni ra mate.

Keirau se sega ni qase rawa kei Lucy me keirau curuma na valetabu, ia keirau a veivuke ena kena kotivi na kadi tabaki. Erau dau lako yadudua ki na valetabu o Na kei Ta me baleti ira na tamata ena kadi ka rau vakataubaletaki keirau wavoki e lomanibai ni valetabu. Mai tautuba sara mada ga, na valetabu e tautauvata vakalailai kei lomalagi.

Ena mataka ni Siganimate sa yali na vatu e matadra na senikau ka lala na isulu. E tiko e dua na kadi ka kaya , Sa tu cake tale o Koya!

Au sa kila oti tu ni o Jisu Karisito na vuna ni Siganimate. Ni oti na noqu marautaka na Macawa Tabu, au vakila niu kilai Koya vakavinaka cake.