O Loo i Totonu ia i Latou le Mana

Se savali ina a matagofie mai ia Brother Webb. Ma o se taimi sagisagi fiafia foi i Seminare ma Inisitituti. Ua i ai la tatou mataupu aoaoina fou o le Tapenaga o le Olaga. Ua i ai latou taumafaiga Faama’ite Fou o le Inisituti. Ua faatupulaia le lesitala i le seminare; ua faatupulaia foi i le inisitituti. Ou te manatu o nei mea uma tatou te faia ua fesoasoani i le fauga ma le faia ia ofoofogia aafiaga o a tatou vasega ma tagata aoga. Ae ou te ioe faatasi ma Brother Webb, e i ai se fuataga faaopoopo o le malosi o loo sau mai feagaiga. Ma o le avea ai o ni tagata talavou—e osia ma tausia e talavou ma talavou matutua—ma faafou a latou feagaiga, e i ai se malosiaga i la tatou galuega o loo faateleina ai mea uma tatou te faia.

Ou te fia talanoa tesi atu i le asō e uiga i le faalolotoina o le aoaoina i o tatou potuaoga. O se Pulega Aoao, ou te faia ai faavaitaimi le mea ua ta’ua o se malaga taamilo i misiona lea matou te iloiloa ai le agai i luma o se misiona, matau ia taitai misiona, ma fuafaatatau le aganuu ma le agaga o faifeautali.

I se tasi o na asiasiga, sa ou maua ai se avanoa faamomoiloto e matau ai le Aufono Faaleautaitai o le Misiona, na aofia ai faifeautalai e i ai tofiga taitai i le misiona atoa. O nei taitai talavou sa faamaoni uma, ae sa tauivi i latou ma se faaiuga pe faaaofia ai nisi o faifeautalai e itiiti se poto masani i tiutetauave na tuuina atu e le peresitene o le misiona i le misiona atoa. Sa faaalia e se tasi o faifeautalai se popolega patino faapea o isi faifeautalai e matuai le mafai lava ona faatuatuaina i nei faamoemoega maualuluga. Na te lei mautinoa sa lava le gafatia o isi e faatino ai le galuega ma sa le’i matua faaleagaga e tali lelei atu ai. O isi, o le faaaofia ai o faifeautalai e le tele se poto masani, e manatu e tele naua galuega, ma sa ou taumafaufau ai pe ua le lava ea ma totoe mo le vaega o le autaitai latou te tauaveina ai e i latou lava le tiutetauave.

Sa ou ataata a o tilotilo atu i nei faifeautalai talavou, mai se vaaiga lautele o le poto masani i le Ekalesia, sa le’i matutua tele atu nai lo o latou tupulaga o e na avatua se popolega tele ia i latou. Ona ou fai atu lea i le vaega o le autaitai e mafaufau i le avanoa ua tuuina mai e lo tatou Tama Faalelagi i Ana fanau uma e galulue ai ma tuputupu a’e ma maua le tiutetauave i le talalelei. Na ou iloa mai la latou vaaiga atonu na foliga mai e i ai se eseesega tele i le va o lo latou poto masani ma o latou gafatia pe a faatusatusa i le isi vaega uma o le misiona. Ona ou fai atu lea i ai e mafaufau pe faape’i mai le silafaga a le Atua a o Ia silasila ifo ia i tatou uma.

O le va o le taitaiga i le misiona ma le isi vaega uma o le misiona atonu e foliga mai e nenefu pe a faatusatusa i le tulaga faaeaina o le Atua o silasila ifo ia i tatou uma. Ae, Na Te faamatuu maia lava e le aunoa tiutetauave maoae ma faaaofia ai le toatele o i tatou o ni epikopo, peresitene o Aualofa, peresitene o korama a toeaina, ma, ioe, taitai sone ma tuafafine taitai e faia aoaoga.

I le Mataupu Faavae ma Feagaiga tatou te faitau ai, “E moni ou te fai atu ia te outou, e tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele; aua ua i totonu ia te i latou le mana, lea ua latou pule ai ia te i latou lava. O le a lava le tulaga e oo i ai le faiga e tagata o mea lelei, o le a leai lava se ala o le a aveesea ai lo latou taui.”

O le aso, ou te fia talanoa atu ai e uiga i le faatuatuaina e moomia mo faiaoga ia mafai ai e o latou tagata aoao ona faaaoga le faitalia e faaloloto ai le aoaoina ma le liuaina patino. O le a mamafa lo’u utuvai mai le Aoao Atu i le Ala a le Faaola i le vaega ua faaautuina “Valaaulia le Aoaoina ma le Filiga.”

I le Eteru, mataupu e 3, ua aioi atu ai le uso o Iareto i le Alii, “Le Alii e, pa’i mai i nei maa, Le Alii e, i Lou tamatamailima ma saunia ia susulu i le pogisa; ina ia malamalama ai a’o matou sopoia le sami.” Ua leva ona ou faitaua lenei tala ma lenei fegalegaleaiga patino sa faia e le uso o Iareto o se faama’ite ma lana faitalia. Ae talu ai nei, ou te lei iloaina le matafaioi a le Alii i le valaauliaina muamua o le uso o Iareto e tauaveina le tiutetauave. A o lei faailoaina e lenei perofeta o le Tusi a Mamona le gafatia e ma’a ona susulu, o le Alii lea na valaaulia o ia e tauave le tiutetauave, e le gata e fausia ia vaa, ae i le tali e tatau ona i ai ma le mauaina o le tali i le faamalamalamaina o vaa.

A o lei fautuaina atu le tali fautuaina e le uso o Iareto, o le Alii lava na fesili atu ia te ia: “O le a se mea tou te mananao ia ou saunia mo outou ina ia outou maua le malamalama pe a tofatumoanaina outou i loloto o le sami?” Lena la, i o’u luma tonu. Ou te lei iloaina lava muamua. Ae a’o lei faia e le uso o Iareto le gaoioiga ua tatou faamemelo i ai, sa valaaulia o ia e gaoioi, tauave le tiutetauave mo le tali. Ioe, na faia e le uso o Iareto le faama’ite, ae o le Faiaoga Sili na faateleina le avanoa ma le tulaga ia tupu ai lenei mea e ala i le valaauliaina o ia e mafaufau, gaoioi, ma sue se tali.

I le Aoao Atu i le Ala a le Faaola, ua tatou faitau ai, “Sa mautinoa lava le maofa o le matamata i le Faaola o savali i luga o le vai. Ae sa lei lava lena mo Peteru. Sa ia manao e fai le mea na faia e le Faaola, ia i ai i le mea sa i ai o Ia, ma ia maua foi lea lava aafiaga e ia.” I se isi faaupuga, na valaaulia e le Faaola le aoaoina ma le filiga o Ona soo, e faapei ona Ia faia mo i tatou uma.

O le asō o le a faavae o’u manatu i auala e tolu e mafai ona tatou valaaulia ai le aoaoina ma le filiga e pei ona otooto mai i le Aoao Atu i le Ala a le Faaola. Muamua, valaaulia tagata aoao e sauni e aoao. Lua, fautuaina tagata aoao e faasoa atu upumoni o latou aoaoina. Tolu, “valaaulia tagata aoao e ola i mea ua latou aoaoina.”

A o o’u talanoaina nei taumafaiga taitasi e valaaulia le aoaoina ma le filiga, e faamoemoe ia tatou faia mea e lua: Muamua, e faamoemoe e vaai ia tatou tagata aoao i le ala e silasila ai le Atua ia i latou, iloa le mana o loo ia i latou, ma mai le silafaga a le Atua tatou te mafaia uma ona aoaoina pe a maua avanoa tutusa e gaoioi ma faaaoga la tatou faitalia. Lua, e faamoemoe o le a outou tomanatu i ala e mafai ona tou valaaulia ai le aoaoina ma le filiga, e faapei o i ai mea e mafai ona outou faaleleia. Ou te tatalo foi ia fesoasoani mai le Agaga e faamalamalama na avanoa i lo outou lava aoao atu.

I le Tala’i La’u Talalelei tatou te faitau ai, “O le aoao mai se faiaoga lelei e taua, ae e taua foi mo oe le i ai o ni aafiaga anoa e aoao ai mai au lava suesuega o tusitusiga paia.” O se tasi o auala tatou te valaaulia ai a tatou tagata aoao e saunia e aoaoina o le valaaulia lea o i latou e suesue i tusitusiga paia. E tatau ona tatou fesoasoani i a tatou tagata aoao ia tuuitiitia le faalagolago i le potuaoga mo le faalamalamaga o le tagata lava ia a o latou aoao e atia’e se sootaga tuusao ma patino ma le Alii e ala i tusitusiga paia. I talaatu o la tatou valaaulia lautele e auai i le seminare ma le inisitituti, tatou te valaaulia o tatou tagata aoao taitasi e faitau tusitusiga paia ma isi savali faaperofeta. E sili ona aoga lea pe a tupu a o lei oo i talanoaga i le potuaoga, aua o le tapenaga e faaloloto ai le aoaoina ma siitia ai le talanoaga faafesagai pe i luga o upega tafailagi.

E tele auala e fesoasoani ai i tagata aoao e sauniuni e aoaoina. O se tasi o auala ou te faia o le faauma o lesona taitasi i se faamanatu o le faitauga mo le isi vasega. Pe a ou i ai i se potuaoga, e tele ina ou faia lenei mea i le tusia o le faitauga fautuaina i le tulimanu taumatau pito i luga o le laupapa ma toefaasino i ai i le faaiuga o le vasega. I se faatulagaga i upega tafailagi, e mafai ona faapolokalama lenei mea i le mamanu o le kosi lava ia. O isi auala e valaaulia ai le suesue o tusitusiga paia a o lei amata le vasega e aofia ai le imeli pe tesi e faamanatu i tagata aoao a o lei faia talanoaga i le potuaoga. E mafai foi ona e faamalosia le suesue i tusitusiga paia i le lumanai i le aloaia o tapenaga a au tagata aoao, i le faasoa mai e se tasi o se mea na aoaoina mai a latou faitauga tusitusiga paia po o se fesili e faamoemoe e tali pe a o mai i le vasega i lena afiafi.

E ese mai le suesue i tusitusiga paia, e i ai isi auala e valaaulia ai tagata aoao e sauni e aoao. Ua ou vaai i faiaoga mataalia o auina atu i tagata aoao ni fesili e manatunatu i ai a o lei faia se talanoaga i le potuaoga. O se isi punaoa aoga o tapenaga o le valaaulia o ni tagata aoao filifilia e muai tapena a o lei faia le vasega, e faiaoga i se tasi o manatu faavae i le lesona pe faasoa se aafiaga e mafai ona faaloloto ai le aoaoina mo isi. O nei gaoioiga e alu ai le taimi ma taumafaiga a le faiaoga, ma e tele ina manaomia ona e iloa nisi mea se tele e uiga i manaoga ma aafiaga o au tagata aoao, ae e faia ai se aafiaga tele i le faalolotoina o aafiaga e aoao ai le vasega atoa.

E mafai ona ou iloa i taimi uma pe a valaaulia e faiaoga ia tagata aoao e muai sauniuni aua o na valaaulia e tali i taumafaiga a le tagata aoao; e loloto ai le talanoaga, sili ona anoa, ma e i ai se fuataga atoa o le Agaga. Faamolemole mafaufau pe faapefea ona e valaaulia tagata aoao e muai sauniuni e aoao a o lei faia se talanoaga po o se gaoioiga i le potuaoga.

O le aoaoina loloto, e moomia ai isi mea nai lo le na o le faalogologo. E moomia o tatou tagata aoao ia faalagolago i luma ma avea o ni tagata aoao saofagā. O se tasi o auala e tupu ai lenei mea, pe a faataga tagata aoao e faasoa mea o loo latou aoaoina. Afai e te iloa o le a faamoemoe e te faasoa i mea na e aoaoina, e ese la lau tapenaga. E fesoasoani lenei faamoemoega e ese ai lau faalogo ma e gauai atili ai i lau faalogologo. Ioe, o le gaoioiga tonu lava o le faamatalaina o mea na e aoaoina, e faaloloto ai na malamalamaaga ma faamanino ai mea o loo aoaoina ma oo i ai se tagata aoao.

I le Mataupu Faavae ma Feagaiga, ua apoapoa’ia ai i tatou, “Tofi se faiaoga i totonu o outou lava, ma ia lē tuu atu i tagata uma e tāutala i le taimi e tasi; ae tuu atu i tagata e tautala taitoatasi mai ae tuu i isi tagata uma e faalogologo i ana upu, ina a uma ai ona tautala mai o tagata uma, o le a faapea ona mafai ona faagaeetia ai o tagata uma, ma ina ia mafai ona maua ai e tagata taitoatasi le avanoa tutusa.”

Ioe, o le faiaoga e tofia o le a tele atu lona poto masani, ma e mautinoa foi na suesueina anomea i se tulaga loloto atu nai le toatele o tagata aoao. Ae manatua le aafiaga na ou faasoa atu i le amataga o la’u savali e uiga i faifeautalai e le’i talitonuina isi e tauavea le tiutetauave mo lo latou lava atina’ega? A oo ina fuaao e se faiaoga le aafiaga mo le aoaoina, atonu ua manatu o ia o se faiaoga mataalia ona ua foliga malosi lana savali ma ua taalililili ai ona lava lagona. Peitai, o le le faaauai ai o tagata aoga, e foliga mai na te le o iloaina le aafia moni ai o lo latou aoaoina i faatonuga. E sili atu i lo lena, o se punavai e tasi o faatonuga e tele ina fāoa ai avanoa loloto mai isi tagata aoao e faasoa atu ai mea o latou aoaoina.

E tele auala e mafai ai e tagata aoao ona faasoa atu mea o latou aoaoina. O se tasi o mea faigofie e fai ai lenei mea o le tuu o se taimi e tomanatu ai. E mafai ona oo mai lea mea i se apitalaaga o mea e aoaoina po o se gaoioiga manatunatu o le vaega o se talanoaga. E mafai foi ona fai lenei mea i le folasia atu o se faataoto, se tulaga o le olaga, po o se faatatauga patino, ona tuu lea i tagata aoao e tomanatu i ai e ala i se matauga tusitusia a o lei faasoa ma isi.

O se auala e maua ai e tagata uma le avanoa tutusa i le aafiaga e aoao ai, o le tata’i o se talanoaga i fesili e valaaulia ai tagata aoao e mafaufau ma faasoa o latou malamalamaaga. E masani ona ou fai atu, afai e na o le tolu ni a’u fesili malolosi, e mafai ona ou faiaoga i se vasega mo se itula. I a’u tapenaga faafaiaoga, o le a muamua ona ou atia’e ni fesili e ala i le taula i le autu ma faamoemoega mo mea e aoaoina i le lesona. Ou te filifilia fuaitau o mau, saunoaga faaperofeta, po o se aafiaga patino e sili ona faasino atu i na faamoemoega mo mea e aoaoina, ona ou tusia lea ma toetusi ni fesili eseese ou te manatu o le a fesoasoani i tagata aoao e talaia ai upumoni e uiga i na faamoemoega mo mea e aoaoina. O nisi o fesili ou te tusia e sili ona malolosi nai lo isi, ae o isi e aoga e faaloloto ai fesili mo le taula o la’u autu po o se mataupu.

E i ai foi auala e mafai ona e faia ai au fesili ma le siosiomaga o le talanoaga ia sili ona aoga. O le i ai o se toatasi pe toalua ni tagata aoao e fuaaoina le talanoaga e leai se eseesega ma le fuaaoina e le faiaoga o le aoaoga. A ou faia fesili i se faatulagaga o ni vaega, e tele ina ou tuu atu se taimi pe a uma ona fai se fesili a o lei tofia tagata e tali mai. E mafai ona le lagolelei lenei mea i se faiaoga e tele ina manao e tali vave mai, ae o le tuu atu o se taimi e mapu ai e lua mea e faia ai. Muamua, e maua ai e tagata aoao se taimi e manatunatu ai. Lua, e maua ai e le faiaoga se taimi faaopoopo e faalautele ai le vaega e tali mai i le talanoaga. Manatua, e te le tau tofia le lima e muamua tuu i luga. Ua ou iloaina foi o le muai fesili i tagata aoao i le mea e te ono fesili ai i le vasega, e fesoasoani ia i latou e sauniuni ma mafai ai ona aoga tonu mo tagata aoao e matamumuli pe manatu e le taua o latou manatu. Manatua foi o le valaaulia o le auai e moomia ai le siosiomaga e aoao ai, ia lagona le saogalemu i soo se itu. O le atiae i se manatu o se tagata aoao po o le auina atu o se manatu tusia pe a uma, o auala ia e faamalosia ai le auai ma fesoasoani i tagata aoga ia lagona e taua o latou sao.

O le mea mulimuli, e oo lava i talanoaga sili faavaega, e ono le mafai e tagata uma po o le toatele o tagata aoga ona saofagā i se taimi utiuti. E tele ina ou avea se tasi o a’u fesili autu ma fai i tagata aoao e faasoa o ni paga po o ni vaega toalaiti ia mautinoa ai na maua e le vasega atoa se avanoa pe tasi lava, e faasoa ai upumoni o latou aoaoina. A tatou faamalosiau i tagata aoao e faasoa upumoni latou te aoaoina, ua tatou valaaulia i latou e fai mo latou lava lo latou aoaoina.

Ua aoao mai Nifae o le mana o le faitalia e faataga ai i tatou e “galulue ai mo i tatou lava, ae le o le tau galueaiina. Pe o faatulagaga o o tatou potuaoga o faatagaina ai tagata aoao e galulue ma fai mo i latou lava lo latou aoaoina, pe ua na o ni siosiomaga ia tau ane ai, lea e tau galueaiina ai tagata aoao a o nonofo filemu ma faalogologo? Afai e asiasi atu se tasi i lou potuaoga i lenei vaiaso, pe o le a latou vaaia tagata aoao o maua avanoa e auai ai atoatoa i le faagasologa o le aoaoina? E faigata ona valaaulia le aoaoina ma le filiga pe a tatou le tuu i tagata aoao e faasoa o latou malamalamaaga, musumusuga, ma matau upumoni. Faamolemole ia faamalosiau i tagata aoao e faasoa upumoni latou te aoaoina ma ia faia o se vaega o lou aafiaga i le potuaoga.

Na aoao mai Elder David A. Bednar, “O le valaaulia e galue e taua aua o le faatuatua i le Faaola o se mataupu faavae o le faatinoga ma le mana. O se auauna a le Alii, o la’u matafaioi e le na ona faasafua atu o faamatalaga. Afai e tatau ona faateleina le faatuatua o tagata ia Iesu Keriso, e manaomia la ona latou galulue e tusa ai ma aoaoga a le Faaola.”

O le faamoemoega o aoaoga faalelotu i le Ofisa o Aoga a le Ekalesia o le “Aoao atu o le talalelei toefuataiina a Iesu Keriso … i [auala] e [fesoasoani] ai i tagata aoao taitoatasi … ia avea ma soo i le olaga atoa o Iesu Keriso, o e osia ma feagaiga, o e alolofa i le Atua ma isi, ma o e e mafai, naunau, ma tuuto e faapotopoto Isaraelu i itu uma o le veli.” O lena ituaiga avea ma soo o le a le tupu seiloga e aofia i lo tatou aoao atu ia valaaulia ia avea o se mea e sili atu ma ola i mea tatou te aoaoina.

O le fuaitau lenei e sau sa’o lava mai le Aoao Atu i le Ala a le Faaola: “Ia faasusulu atu lo outou malamalama i luma o tagata.’ ‘Alofa i ou fili.’ ‘Ole atu, ona foaiina mai ai lea.’ ‘Ia outou ulu atu i le faitotoa vaapiapi.’ Mataio5:16–44; 7:7–13.] O nisi o valaaulia sili ona manino ma manatua pea i le galuega atoa a le Faaola i le lalolagi sa tautalagia a o Ia aoao atu Ona soo i luga o se mauga e iloa atu ai le Sami o Kalilaia. O le faamoemoega o le Faaola o le suia lea o olaga, e pei ona faamanino mai i Lana valaaulia faaiu: ‘Ai se faalogo i a‘u upu nei, ma faiae ia, ou te faatusaina o ia i le tagata poto, ua na faia lona fale i luga o le papa’ [Mataio 7:24; faaopoopo le faamamafa].” Faamolemole valaaulia tagata aoao i o outou potuaoga e ola i mea ua latou aoaoina.

I le tapenaga mo la’u savali, sa ou fai atu ia outou taitoatasi e sauniuni e ala i le suesue o le “Valaaulia le Aoaoina ma le Filiga” i le Aoao Atu i le Ala a le Faaola. Talu ai tatou te le o faatasitasi fevaaia’i, ma o nisi o outou atonu o loo matamata toatasi, ou te fautuaina outou e faasoa atu malamalamaaga i fesili nei, i a outou vaega o aoaoga i ni faatulagaga tauaofia pe i luga o upega tafailagi lea o le a matou talosagaina o outou taitai faaleaoaoga e faatautaia. O nei fesili e aofia ai:

• Aisea e sili ai ona aoga le aoaoina o le talalelei pe a aofia ai faatinoga patino, tapenaga, faasoa, ma le tali atu i valaaulia patino?

• O a faamatalaga o mau ma faaperofeta ua faamautu ai au matauga i fesili na muamua atu?

• Ae faapefea nei faamatalaga o loo taalililili pea ia te oe lava ia?

Ma le mea mulimuli, faamolemole mafaufau i mataupu faavae taitasi nei na tatou iloiloina ma pe mafai faapefea ona valaaulia ai le aoaoina ma le filiga i au tagata aoao: tasi, valaaulia tagata aoao e sauniuni e aoao: lua, fautuaina tagata aoao e faasoa upumoni o latou aoaoina; ma le tolu, valaaulia tagata aoao e ola i mea ua latou aoaoina.

O la’u valaaulia faaiu o le mafaufau pe mafai faapefea ona e faamalosia lau lava aoao atu i vaega taitasi nei e tolu.

• E mafai faapefea ona ou faia pea lava pea ma le lelei atili ona valaaulia tagata aoao e sauniuni a o lei oo i se aafiaga e aoao mai ai?

• O a ni auala ou te uunaia ai a’u tagata aoao e faasoa mai mea o latou aoaoina ma avea ma tagata malolosi e saofagā i la’u vasega?

• Ma le mea mulimuli, o a valaaulia o le a faamalolosia ai a’u tagata aoao ma fesoasoani ia ola i mea ua latou aoaoina?

Uso e ma tuafafine, matou te alolofa tele ia te outou ma ua tatou maua se avanoa e mulimuli ai i le mamanu a le Faaola ia valaaulia le aoaoina ma le filiga. Faamolemole ia talitonuina au tagata aoao. Ua na o le pau lea o le ala o le a avea ai i latou ma ē e manao le Alii ia latou avea ai. Tatou te le o faasalaluaina atu ni faamatalaga, pe na ona musuia o tatou tagata aoao i ni lesona maoae patino ma faatosina. O loo tatou tapenaina tagata aoao ia ola faaleagaga i se vaitau ua faateleina le faigata. O le ola ai faaleagaga o le a faalagolago i le mafai ona iloa le taitaiga a le Agaga Paia.

Na aoao mai Peresitene Russell M. Nelson, “I aso a sau, o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”

A tatou aoao atu a tatou tagata aoga e aoao ma le filiga e ala i le avea ma tagata auai malolosi, ua tatou aoao foi i latou ia saili ma maua le taitaiga mai le Agaga Paia. O le seti lea o tomai o le a manuia ai i latou tusa pe leva ona latou tuua potuaoga. A o e taumafai malosi e valaaulia lenei aoaoina ma le filiga, ou te folafola atu o le a e vaai i vavega o tutupu i olaga o tagata aoao. Ua i ai le mana ia i latou, ou te molimau atu ai, i le suafa o Iesu Keriso, amene.