Sauniaina ma Aoao Atu Lesona o Sauniuniga mo le Olaga: Aoaoga Faamasani ma Faiaoga

Brother Jaren Dyreng: Fiafia lava tatou te mafuta i le aso, ma le avanoa tatou te talanoa ai. Atonu ua tele ina tou faalogo i nei lesona o le Sauniuniga mo le Olaga ma mea o le a tatou talanoaina nei. O tomai o le a tatou talanoa patino i ai o le a avea o se fesoasoani tele a o tatou sauniuni e aoao atu nei lesona o le Sauniuniga mo le Olaga i le tausaga lea.

Tatala le PDF

Ina ia folasia atu la tatou aoaoga i le aso, ou te fia valaaulia Uso Cavanaugh e faitau le faatomuaga. Ua tofu outou ma le tufaaga, ae ou te valaaulia Uso Cavanaugh e faitau le faatomuaga, o le a tatou maua ai le matalalaga tatou te talanoaina i le asō. Saunoa.

Brother Cavanaugh: E fesoasoani lesona o le Sauniuniga mo le Olaga e faaauupega ai tagata aoao i tomai e saunia ai mo luitau o le olaga ma avanoa matagofie. Pei foi o isi lesona o kosi faatusipaia, ua mamanuina lesona o le Sauniuniga mo le Olaga e fesoasoani i talavou ia loloto lo latou liua ia Iesu Keriso ma Lana talalelei toefuata’i, ia agavaa mo faamanuiaga o le malumalu, ma saunia ai ma o latou aiga, ma isi mo le ola e faavavau ma lo latou Tama i le Lagi.

Ua totonugalemu nei lesona ia Iesu Keriso, mausali i le upu a le Atua, ma taulai ia ausia manaoga o tagata aoao. E i ai nai tomai taua e mafai ona fesoasoani e te saunia lelei ai e aoao atu ina ia ausia le manulauti a le S&I. Manatu i le talafaatusa lea: O se faiaoga fanafana ‘aū e tapena e faiaoga, e tatau ona saunia se taula’iga, se aufana ma se ‘aū, ma avanoa mo tagata uma e faata’ita’i ai.

Tatou faaaoga le tala lea e saunia ai e aoao atu se lesona seminare.

Brother Dyreng: Faafetai lava. Ou te fautuaina la tatou uma e teu se tatalo i o tatou loto a o tatou talanoa i le aso. Pei na ou fai atu, ua ou fiafia lava i lenei avanoa ma le iloa o se faamanuiaga tele ia i tatou ma le ‘au aooga a o tatou faatinoina nei tomai. Tatou amata i le talanoa e uiga i le taula’iga ma le faatusa i lenei tala.

Fia valaaulia Brother Simmons e faitau le vaega muamua o le tufaaga i le faamoemoega o le lesona.

Brother Simmons: O le faamoemoega o le lesona ua i ai se taula’iga manino o le mea e faamoemoe ia iloa, lagona, pe fai e tagata aoao o se taunuuga o mea ua aoaoina. A i ai sa tatou faamoemoega manino o le lesona e aoao e tamaiti aoga, o le a tatou taulai atili i mea e fuafua e valaaulia tamaiti e fai i le taimi o le lesona. Tomai numera tasi: faailoa ma maka le faamoemoega o le lesona o i le fuaiupu mulimuli o le parakalafa tomua o le lesona.

Brother Dyreng: O le saunia la o le lesona 177, “Puleaina o Tekinolosi,” na ua tofu outou ma se kopi. O le parakalafa tomua ma le fuaiupu faaiu o loo ta’u mai ai le faamoemoega o lenei lesona. Fai mai, “E fesoasoani lenei lesona i tagata aoga e malupuipuia ai ma pulea le faaaogaina o tekinolosi. Ua ou maka maninoina la i le lesona.

O le a tatou faata’ita’ia nei lea tomai. Lesona 185 o le isi lesona o la tatou taiala, o le “Fauina o le Malosi Faalelagona i le Alii.” Ou te fia tuu atu la na o sina minute e tilotilo ai i le parakalafa tomua ma faailoa ma maka manino le faamoemoega o lenei lesona.

Brother Dyreng: O le a tatou se’e atu i le tomai lona lua. E valaau atu ia Brother Alcala, pe mafai ona e faitau maia le faauigaga o le tomai lona lua o i lalo o le upumoni faamataola? Ua tatou se’e atu nei i le aufana ma le ‘aū.

Brother Alcala: O le upumoni faamataola e maua i mau ma aoaga a taitai o le Ekalesia pei o le aufana ma le ‘aū, e maua ai e tagata aoao meafaigaluega tatau e ausia ai le faamoemoega o le lesona. A taula le aafiaga e aoaoina i le upu a le Atua, ua tatou faateleina le faamoemoe o le a aoao tagata aoao i le mana o le Agaga Paia. Tomai lua: sue le upumoni faamataola i le lesona ma maka le mea o maua ai i mau ma aoaoga a taitai o le Ekalesia.

Brother Dyreng: Faafetai lava. Tatou toefoi la i le lesona 177. A o ou saunia lenei lesona, ou te faailoa upumoni faamataola, ma ou iloa ai i lenei lesona patino, e lua upumoni. Muamua fai mai: “E finagalo le Alii ia tatou auai ma le naunautai e faia mea lelei ae aua le faamaumauina o tatou taimi.” Upumoni lona lua: “O mea e faamanino ma faatauanau e fai le lelei e mai le Atua.”

Ona ou suesueina lea o mau ma upusii mai ia Elder Bednar, ma maka upu ma fasifuaitau o aoao mai ai nei upumoni i nei punavai. Mo se faataitaiga la, tagai i lena upumoni muamua: “E finagalo le Alii ia tatou auai ma le naunautai e faia mea lelei ae aua le faamaumauina o tatou taimi.” Tatou faitauina foi la ia mau e o faatasi ma lea upumoni.

Tatou sue faatasi la i le Mataupu Faavae ma Feagaiga vaega e 58 fuaiupu 26 ma le 27.

A’o ou faitaua nei mau, ua ou makaina le fuaitau “e tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie.” Tatou o la i le isi mau, le Mataupu Faavae ma Feagaiga vaega 60 fuaiupu 13. I le mau lea, ua ou makaina le fuaitau “aua e te faama’umauina lou taimi.” Ona ou faia ai foi lea o le mea lea i isi mau o lisi i le lesona.

Tatou o la i le saunoaga a Elder Bednar e o faatasi ma lea upumoni. A ou tilotilo i lea upusii ma le upumoni, sa ou filifili e maka fasifuaitau e lua. Muamua, o le mea o ta’ua e Elder Bednar, “E ono tuuto atu e se [tagata] mafaufau faatamaitiiti pe taitai seseina foi le tele o le taimi e taalo ai i taaloga vitio, talanoa i le initoneti, po o isi auala e faatagaina ai masini omiomi e pulea mea e pei ona i ai.”

I le faaiuga la o lena upusii, ua ou makaina ai foi le, “O faafiafiaga soonafai e foliga e mamā e mafai ona avea ma ituaiga faapologa faataumaoi.” Tatou toefoi la i le lesona 185 tou te maua ai le avanoa e faata’ita’i ai le tomai lea. Ia tou faailoa mai le upumoni faamataola i le lesona lea ma mau ma upu a perofeta e o faatasi ma lena upumoni, ma maka po o fea o le upu a le Atua o loo aoao manino mai ai lena upumoni.

Ona tatou oo mai ai lea i le tomai lona tolu. Ou te fia valaaulia Sister Robins, e te faitau maia le uiga o la tatou tomai lona tolu.

Sister Robbins: Faataitai le aoaoina. O le gaoioiga aoaoina e lata i le faaiuga o le lesona e mafai ai e tagata aoao taitasi ona faapupula mea na latou aoaoina, po o se avanoa e fana ai se ‘aū i le taula’iga. O ni nai faataitaiga e ono fai e tagata aoao i le gaoioiga lea e aofia ai le tusi i se apitalaaga, faamatala, faasoa, fai se fuafuaga, faataitai se tomai, pe fatu se mea. O le tomai lona tolu o le faailoa ma maka le gaoioiga i le lesona lea e maua ai e tagata le avanoa e faapupula mai ai mea latou te aoaoina e tusa ma le faamoemoega o le lesona.

Brother Dyreng: Ua tatou faatuina la se taula’iga. Ua i ai meafaigaluega—le aufana ma le ‘aū. O le a tuu atu nei i tagata aoga le avanoa e fana ai le ‘aū i le taula’iga. I le toetepa la i le lesona 177, ou te vaai e lata i le faaiuga o le lesona e iloa ai mea na tuu ai i tagata aoga uma le avanoa e faaali mai ai le faamoemoega o le lesona. Ma ou matauina ai i le lesona patino lenei e lua e fesoasoani ai i tagata aoga e faaaoga malupuipuiga o tekinolosi.

O se tasi o nei mea na fesoasoani i tagata aoga e faataitai le vave fai o se fuafuaga mo le puleaina o tekinolosi. A o leisi o se avanoa latou te faia ai se fuafuaga e koma ai le faaaogaina o tekinolosi pe a fetaia’i ma ni faasalalauga le talafeagai. Sa ou maka maninoina foi i le lesona na avanoa uma mo tagata aooga.

Tatou toefoi la i le lesona 185 tou te maua ai le avanoa e faata’ita’i ai le tomai lea. A tou toe vaai la e lata i le faaiuga o le lesona e iloa ai mea na tuu ai i tagata aoga le avanoa e faaali mai ai le faamoemoega o le lesona ona maka lea. O le a tuu atu se minute e fai ai.

Ou te manao e valaaulia outou taitoatasi. Pe o le a outou, a o sauniuni ma aoao atu nei lesona o le Sauniuniga mo le Olaga i lenei tausaga, faatino nei tomai e tolu na talanoaina nei?

Tagata Uma: Ioe.

Brother Dyreng: Te iloa a tatou faia, o le a fesoasoani i o tatou tagata aoao ia loloto lo latou liua i le Faaola, o Iesu Keriso. I lena la faagasologa, o le a tupu foi se mea i o tatou loto.

E i ai sa’u molimau o loo ta’ita’ia ma taiala i tatou e lo tatou Tama i le Lagi ma lo tatou Faaola, o Iesu Keriso, ma o le a La faamanuiaina i tatou a o tatou mulimuli ma faalogo i taitai ua La tofia e taitai ma taiala i tatou i nei aso e gata ai. Ou te faafetai mo nei mataupu aoaoina ua tatou maua ai le avanoa tatou te fesoasoani ai e faaloloto le liua i le Faaola, o Iesu Keriso.

Ou te faia ai lenei molimau i le suafa paia o Iesu Keriso, amene.