Agavaa mo Faamanuiaga o le Malumalu

Brother Chad H Webb: Ou te faafetai mo lenei aoaoga i lesona o le Sauniuniga mo le Olaga. E mafai ona tatou talisapaia uma le talafeagai o nei lesona mo tatou talavou. A o tatou matamata i le vitio, sa faamanatu mai le ala e mafai ona totonugalemu Keriso i nei lesona. O le faaaogaina o le faataitaiga atoatoa o le Faaola ma le ola ai i nei mataupu faavae o le talalelei ma talanoa le ala e mafai ona Ia fesoasoani i o tatou tagata aoao i o latou tulaga, e ese le mamana.

Ou te fiafia foi i le faamautu o nei lesona i le upu a le Atua, i le faaaogaina o faataitaiga mai mau ma aoaoga a perofeta o ona po nei. Te talitonu e fesoasoani lelei foi na lava metotia e aoao atu ai mau e mafai foi ona fetuunai e aoao lelei atu ai savali musuia a taitai o le Ekalesia. Faafetai mo lena faataitaiga matagofie ma le aoaoga tumatila.

Ua ou fia fesuia’ia kia ma se’e atu i se isi autu ua mamafa i lo’u mafaufau ma le loto. Ua faamanuiaina i tatou uma i aoaoga ma le auaunaga a Peresitene Russell M. Nelson. Ou te faafetai lava mo ia ma molimau atu o ia lava o le perofeta filifilia a le Alii. Ou te faafetai i le Alii mo le faasaoina o ia mo le iloa, taitaiga, ma le malosi ua ou maua patino mai e ala i musumusuga ua maua mai le Alii ia Peresitene Nelson.

O se tasi o valaaulia ua faatele ona tuu mai e Peresitene Nelson tatou te aoao ai ia maua le mana o le Alii e ala i feagaiga ma malumalu. I la matou Fonotaga a Faatonu o le Eria talu ai nei, na tonu ai e amata suesuega i taeao taitasi i mea na aoao mai e Peresitene Nelson ma taitai o le Ekalesia e uiga i feagaiga ma le maota o le Alii. Sa matuai ootia loloto lava a’u i lena aafiaga o lea sa ou talosagaina ai nisi o e na auai e faasoa mea na latou aoaoina.

Brother: Pei ona aoao mai e Peresitene Nelson le uiga o le i ai i se feagaiga ma le Atua, na ou aoaoina e le tatau ona ou vaai atu ia te ia o se CEO po o se pule o se kamupani i le lagi o faatali mai mo a’u e motusia se konekarate. Ae, o se sootaga faalefeagaiga ma se Tama alofa i le lagi, ma ona o le a le fiu lava o Ia i Ana taumafaiga e lagolago a’u ma o le a ou lē faaumaina lava Lona onosai mutimutivale. Aua ua ou iloa ona o le feagaiga, ua i ai so’u avanoa faapitoa i le finagalo o le Atua. Ua suia ai le auala ou te vaai ai i mea e pei o a’u tatalo, lea nai lo le lagona faapea o le a ou tootuli i le faaiuga o le aso ma salamo ma o le a avea o se avega ia te Ia, ua ou tosina atu ia te Ia, ma ua ou manao e talanoa atu ia te Ia, ma ua ou iloa ai o isi mea uma e fai o le tali atu lea i le alofa ua Ia faaalia mo au.

Sister: A ou mafaufau i feagaiga, ou te mafaufau i mea na aoao mai e Peresitene Nelson, o mea uma tatou te talitonu ai ma folafolaga uma na fai e le Atua i Lona nuu o le feagaiga e o mai faatasi i le malumalu. E le mafai ona ou tuueseesea le malumalu mai a’u feagaiga ona o iina ou te aoao mai ai le uiga o na feagaiga na ou faia ma le Tama Faalelagi ma Lona Alo, o Iesu Keriso. E ala mai i na folafolaga faalefeagaiga i le malumalu o le a ou maua ai faamanuiaga uma o le lagi o se afafine o le Atua. Ma ua faateleina i le aluga o tausaga a o ou malamalama atili i le faaeega paia ma lena meaalofa faapitoa tele mai lo tatou Tama Faalelagi ia i tatou.

Brother: Ua ou aoao la mai ia Peresitene Nelson a tatou faia loa se feagaiga ma lo tatou Tama Faalelagi, e suia e faavavau la tatou sootaga ma Ia. Ma e taua lena mea ia te au aua ua ou iloa e alofa le Tama Faalelagi ia te au, ma sa Ia fatuina se ala e mafai ai ona ou latalata atili ia te Ia, iloa atili o Ia, ma i’u ai ina ou maua le gafatia e faapei ai o Ia. O feagaiga, tusa lava pe o a mea lua te feagai i le olaga, e faatasi pea le Tama Faalelagi ma oe, e savali i ou autafa, Na Te uuina lou lima, Na Te taitai oe i le ala. Ma e mafua na mea uma ona o feagaiga.

Brother: Ou te matua faafetai mo faamanuiaga o le i ai o se perofeta. O ana aoaoga ua sili atu ai lo’u malamalama i le alofa faapitoa o le Atua mo i latou ua ulu atu i le feagaiga ma Ia. E le gata i lea, o le a Ia le tuulafoaiina lava lena sootaga, o le a Ia le taofia lava le tuuina mai o avanoa tatou te salamo ai ma suia. O le iloaina o le natura o le Atua ua avea o se fusi o le faamoemoe ma le faamalologa i lo’u fatu.

Brother: A noatia i tatou ia Keriso, lea sa aoao moni mai e Peresitene Nelson, tatou te o i le mea e afio ai o Ia, faia foi mea Na Te faia. A faa’auamo a’u ia te Ia a o Ia o le povi matua [tulou] mo se faataitaiga, ou te alu i le mea e alu i ai o Ia, fai upu Na Te fai, fai mea Na Te fai—mulimuli ane. Ma le faamoemoe o lena faatasiga o le a avea ai a’u pei o Ia. Nai lo se isi mea i lo’u olaga, te manao e faamalie o Ia. Te manao ia oo i le tulaga i lo’u olaga ma le loto, o mea uma ou te fai e faamalie ai o Ia. Te le iloa pe faapefea ona toetotogi le Faaola mo mea na Ia faia mo au, nai lo le fai o mea ua Ia poloaiina ai au.

Brother: Ina ua ou faalogo ia Peresitene Nelson, sa ou iloa ai a tatou ulu atu i se sootaga faalefeagaiga ma lo tatou Tama Faalelagi, tatou te maua le mana faaopoopo i o tatou olaga. O se mana e pa’itino i ai. O se mea tatou te maua ai le faamoemoe, faamalologa, ma le faatuatua, o se mea e mafai ona siitia i tatou i o tatou taimi faigata. O le itu matagofie o lenei noataga faalefeagaiga, o le a le tuulafoaia lava i tatou e le Tama Faalelagi. A tatou tauivi ma le masalosalo, o le a fesoasoani o Ia e suia i le faatuatua. A tatou tauivi ma vaisu, o le a fesoasoani o Ia e suia i le saolotoga. A tatou tauivi ma le le fiafia, o le a Ia faatumu o tatou agaga i le malamalama. O le vavega a le Faaola o Iesu Keriso e ofo mai e Ia se alofa faapitoa ma le mutimutivale e tosina atu pea lava ia te Ia.

Brother Webb: Ai ua tele aoaoga po o saunoaga patino a Peresitene Nelson ua avea ma au lava mea silisili. Faataitaiga, i lana uluai fonotaga ma le aufaasalalau, o le peresitene o le Ekalesia i le 2018, na saunoa Peresitene Nelson ia tatou amata ma le taunuuga i le mafaufau. A o saunoa mai le Malumalu o Sate Leki na ia ta’ua ai, “O le iuga o loo tatou tofu tauivi ai, o le faaeeina lea i le mana i le maota o le Alii.”

I le 2021 fai mai a ia, “O le nofoaga sili ona saogalemu faaleagaga o le ola lea i totonu o feagaiga.”

I le 2024 na ia aoao mai, “E leai se isi mea o le a sili atu na fesoasoani ia te oe e pipiimau ai i le ai uamea nai lo le tapuai i le malumalu. … E leai se isi mea o le a sili atu ona puipuia ai oe … E leai se mea e faamausali ai lau molimau i le Alii o Iesu Keriso ma Lana Togiola pe fesoasoani e te malamalama atili ai i le fuafuaga ofoofogia a le Atua.”

I lana saunoaga aupito lata mai o le konafesi aoao, na ia saunoa ai, “O la’u folafolaga lenei ia te outou: O i latou uma e saili moni ia Iesu Keriso o le a maua o Ia i le malumalu.”

Ma le mea mulimuli i lana tusiga i le Liahona e ta’ua “O Le Feagaiga Tumau Faavavau,” na ia aoao mai ai, “O le taimi lava tatou te osia ai se feagaiga ma le Atua, tatou te tuua ai loa ni eleele e le faavaea e faavavau. O le a le lafoaia e le Atua Lana sootaga ma i latou o e na faia se sootaga ma Ia. O le mea moni, o i latou uma ua osia se feagaiga ma le Atua e maua se ituaiga o alofa ma le alofa mutimutivale faapitoa. … O le a faaauau pea ona galue o Ia ma i latou ma ofo atu se avanoa e sui ai. O le a Ia faamagaloina i latou pe a latou salamo. A latou se ese, o le a Ia fesoasoani ia latou maua le ala e toe foi atu ia te Ia. … Ona o la tatou feagaiga ma le Atua, o le a lē faavaivai ai Ana taumafaiga e fesoasoani ia i tatou, ma o le a tatou le faaumaina Lona onosai alofa mutimutivale ia i tatou.”

E le gata ina sa aoao mai Peresitene Nelson e uiga i le malumalu ma feaigaiga, o le peresitene o le Ekalesia, ae e silia ma le 15 tausaga ua mavae, a o matou fagatua ma le gagana mo se faaupuga fou o se faamoemoega o le S&I, o Elder Russell M. Nelson, a o avea ma Taitaifono o le Komiti Faapitoa o le Aufaatonu o Aoaoga, na fautuaina i matou e faaaofia ai le fasifuaitau lona lua o la tatou manulauti, lea e faapea mai “E tatau ona tatou fesoasoani i le autalavou ma talavou matutua ia agavaa mo faamanuiaga o le malumalu.”

Ou te le iloa pe o a tatou taumafaiga e faapuupuu la tatou faamatalaga o le manulauti o tatou talanoa na o tulaga o le faalolotoina o le liua? E ui ina matagofie le alualu i luma ua tatou i ai, ma e ao ona faaauau lena faamamafa, ou te talitonu e tele mea e mafai ona tatou faia e faamamafa ai foi le vaega lona lua o la tatou manulauti ma fesoasoani i autalavou ma talavou matutua ia agavaa mo faamanuiaga o le malumalu. Ou te le o faapea atu ia outou tusia uma se lesona fou pe fatu ni polokalama fou, ae o loo ou talosaga atu ia outou magafagafa, ia lototatalo, pe o a nisi mea e mafai ona faia e le tagata lava ia i totonu o le matalalaga o mea na ua outou faia.

A ou fesiligia tagata i lenei fesili, e tele ni tali maoae ua ou faalogo ai. O nisi o na tali e i ai fautuaga nei: tasi, ia i ai pea faamamafa ma aoaoga faaperofeta o taimi nei e faatatau i feagaiga ma le maota o le Alii. Lua, ia fesootai ma le loto lo tatou alolofa ma le faatuatua ia Iesu Keriso ia agavaa ai mo faamanuiaga o le malumalu. Tolu, tagai i fesili mo pepa faataga o le malumalu pe a talafeagai ai. Fa, faasino i feagaiga patino a o tatou aoao atu mataupu faavae o le talalelei, fesoasoani i tagata aoao ia malamalama i le aoaoga faavae o feagaiga. Ma le lima, faasoa atu lo tatou lava alofa ma le talisapaia mo le malumalu ma fesoasoani i tagata aoao ia iloa faamanuiaga ua maua i o latou olaga e ala i le tausiga o a latou feagaiga. O le a tele a isi manatu; faamolemole ia talanoaina pea lenei mea o ni faiaoga ma i vaega faaleaoaoga i le lotoifale, ma fefaasoaai mea tou te aoaoina.

O se faataitaiga o le mea ou te talitonu e mafai ma o le a tupu, ou te fia faasoa atu se atina’ega se tasi i le taimi nei. I ni nai tausaga ua mavae, sa ou i ai i Guam ma o tatou faatonu eria mai Asia ma le Pasefika. I se tasi o fonotaga, sa matou talanoaina ai pe faapefea ona tatou fesoasoani i tagata aoga toatele atu ia agavaa mo faamanuiaga o le malumalu. I le maea ai o na fonotaga, sa fono le faatonu eria i Filipaina, o Julius Parientos ma ana faatonu faaitulagi, ma sa latou filima’oti ai o le a latou galulue vavalalata ma taitai o le Ekalesia e fesoasoani atili ai i le autalavou ma talavou matutua ia umia se pepa faataga o le malumalu. Sa uunaia i latou e lo latou Au Peresitene Eria, ua uma foi ona i ai sa latou sini ia faateleina pepa faataga o le malumalu o se vaega o le fuafuaga a le eria. Sa fono foi taitai ma taitai faamaopoopo o le S&I ma taitai o le Ekalesia i le lotoifale i vaega uma, sa latou talanoaina faatasi a latou taumafaiga ma lipoti atu le tulaga agai i luma.

Ou te fia faamanino atu, latou te lei faia na o i latou e aunoa ma taitai o le Ekalesia. Sa latou lagolagoina taitai o ē ua i ai se sini ma se fuafuaga ma o ē sa mulimuli i le taitaiga a lo latou Au Peresitene Eria. Ae sa fesoasoani le S&I e ala i le taulai atu i feagaiga ma le malumalu i le aoao atu o nei mea i avanoa uma ma le talanoa soo e uiga i faamanuiaga o le malumalu.

I le tolu tausaga, faatasi ai ma taumafaiga tuufaatasi a taitai o le Ekalesia, matua, ma faiaoga o le S&I na faateleina ai talavou na umia pepa faataga i le Atu Filipaina i le 277 pasene. Ae e le maua faamanuiaga i na o fuainumera, na maoae le aafiaga i talavou ma o latou aiga. Na faapena foi mo le aiga o Topydor mai le Siteki o Bayambang, o loo faailoa atu ii. Faapei o le toatele o aiga i Filipaina, ua auai faatasi soo le aiga o Topyadors i le malumalu. O le faamanuiaga o se aiga o o faatasi i le malumalu e i ai lona taua e faavavau ma e totonugalemu i le mea e finagalo ai le Alii mo Ana fanau. Ou te talitonu e ala ia tatou taumafaiga e taulai i faamanuiaga o le maota o le Alii, e mafai ai ona tatou fesoasoani i autalavou ma talavou matutua e toatele i le lalolagi atoa e osia ma tausia feagaiga ma le Alii.

Ou te fia faauma i le faasoa atu o se lesona faitino faigofie. Na ou mafaufau i le mana o feagaiga ma pe faapefea ona tatou faamalamalama manino ia oo lava i se tamaitiiti e mafai ona malamalama ai. A o o’u faia, sa manatua ai se lesona faitino lea ua vaai i ai nisi o outou. Pei lava na ou vaai muamua o faaaoga e Brother Chad Wilkinson.

Afai ou te fai atu i se tasi e sau i luga e gagau le penitala lea, soo se tasi lava o le a mafai ona faia. Ae a pe a ou faapipiiina se penitala i le pate peisipolo lea? Mata la e mafai ona e gagauina le penitala? I lea ata faigofie, o le a pe o ai foi le penitala? O le a pe o ai foi le pate? Ae o le a foi le meafaapipii? O le lesona faitino ua faapea mai o le penitala o oe ma a’u, o le pate o le Faaola o Iesu Keriso, a o le meafaapipii e faatusa ia tatou feagaiga.

O le mana o feagaiga e noatia ai i tatou ia Iesu Keriso. Manatua, e leai se mea o le a sili atu ona puipuia ai oe. O le nofoaga sili ona saogalemu ia i ai, o le ola lea ia tatou feagaiga. Ma o le tele foi tatou te faafoua ai a tatou feagaiga, o le malosi foi lea o lo tatou noataga. E tusa lava pe gau le penitala, e mafai ona faamalolo i tatou e le Faaola e ala i feagaiga. Ma afai e mananao tagata e toalua e faatasi e faavavau, o feagaiga o le a noatia ai faatasi i la’ua ma i le Alii.

Ou te faafetai tele ona ua lava le alofa o le Alii ua faamanuia ai i tatou i feagaiga. Ia avea i tatou ma tagata tausi feagaiga ma ia tatou fesoasoani atili i le autalavou ma talavou matutua ia agavaa mo faamanuiaga o le maota o le Alii, lea o le a maua ai e e uma e sailia faamaoni Iesu Keriso. I le suafa o Iesu Keriso, amene.

O lo’u avanoa lenei e faalauiloa atu ai le susuga ia Elder Clark G. Gilbert. Sa valaauina Elder Gilbert o se Fitugafulu o le Au Pulega Aoao i le 2021. Ua avea o ia ma Komesina o le Ofisa o Aoga a le Ekalesia. Na maua ona faailoga mai le BYU, Stanford, ma Harvard, ma sa amata lana matata o se polofesa i le Iunivesite o Harvard. Sa avea o ia ma faatonu sili o le Deseret News ma le Deseret Digital Media. Sa avea foi o ia ma Peresitene o le BYU-Idaho ma le BYU-Pathway. Ua faaipoipo ia Christine Calder, ma o ni matua o se fanau e toavalu.

Ou te faafetai tele mo Elder Gilbert. O ia o se faiaoga faufautua ofoofogia. E loloto lona amana’ia o le galuega o Seminare ma Inisitituti. Ou te talisapaia le ala na te faaogatusa ai o ia ma Peresitene Nelson ma isi taitai o le Ekalesia, ma lona vaavaai pea mo avanoa e faateleina ai a latou aoaoga. E alofa o ia i le Alii ma e galue ma le le faalogologo tiga e auauna ia te Ia, ma faaaoga avanoa uma e molimau atu ai i le Faaola o Iesu Keriso. Ua ou fiafia lava ma faafetai i le asō mo le avanoa e aoao ai mai ia te ia.