Ko e Teuteu mo e Akoʻi ʻo e Ngaahi Lēsoni Teuteu ki he Moʻuí: Ako Ngāue (Inservice) mo e Kau Faiakó

Brother Jaren Dyreng: Sai, ʻoku mau fiefia ke ʻi heni ʻi he ʻahó ni, pea mo e faingamālie ʻoku tau maʻu ke fealeaʻaki aí. Mahalo kuo mou ʻosi fanongo ʻi ha ngaahi meʻa lahi fekauʻaki mo e ngaahi lēsoni ko ʻeni ʻo e Teuteu ki he Moʻuí mo e ngaahi meʻa te tau talanoa ki ai ʻi he ʻaho ní. Ko e ngaahi taukei te tau aleaʻi ‘i he fakaangaangá ‘e hoko ia ko ha tokoni lahi ‘i heʻetau teuteu ke akoʻi ‘a e ngaahi lēsoni Teuteu ki he Moʻui ko ‘ení ‘i he taʻu ko ʻeni ka hoko maí.

Fakaava ʻa e PDF

Ko ia ai ke fakafeʻiloaki atu ʻetau ako ki he ʻaho ní, ʻoku ou fie fakaafeʻi ʻa Brother Kavanau ke ne lau ʻa e talateú. Kuo ʻosi tufa atu kiate kimoutolu takitaha ha laʻipepa, pea ʻoku ou fie fakaafeʻi ʻa Brother Kavanau ke ne lau ʻa e talateu ki aí, ʻa ia te ne ʻomi ha kiʻi puipuituʻa ʻo e meʻa te tau aleaʻi fakataha ʻi he ʻaho ní. Lau koe.

Brother Cavanaugh: ‘Oku tokoni ‘a e ngaahi lēsoni Teuteu ki he Moʻuí ke fakanaunau ‘a e fānau akó ‘aki ‘a e ngaahi tuʻunga malava ke teuteu ki he ngaahi pole ‘o e moʻuí mo e ngaahi faingamālie fakaofó fakatouʻosi. Hangē ko e ngaahi lēsoni ʻo e kalasi ako folofola kehé, ʻoku fakataumuʻa ʻa e ngaahi lēsoni Teuteu ki he Moʻuí ke tokoni ki he toʻu tupú ke fakaloloto ʻenau ului kia Sīsū Kalaisí mo ʻEne ongoongolelei kuo fakafoki maí, taau ke maʻu ʻa e ngaahi tāpuaki ʻo e temipalé, pea teuteuʻi kinautolu, honau ngaahi fāmilí, mo e niʻihi kehé ki he moʻui taʻengata mo ʻenau Tamai Hēvaní.

ʻOku fakatefito ʻa e ngaahi lēsoni ko ʻení ʻia Sīsū Kalaisi, fakamaʻunga ki he folofola ʻa e ʻOtuá, pea nofotaha ki hono feau ʻa e ngaahi fiemaʻu ʻa e fānau akó. ʻOku ʻi ai ha ngaahi taukei mahuʻinga ʻe lava ke tokoni ke ke teuteu lelei ke faiako koeʻuhí ke ke lavaʻi ʻa e taumuʻa ʻa e S&I. Fakakaukau ki he fakatātā ko ʻení: ʻE fiemaʻu ke ʻomi ʻe ha faiako fana ngahau ʻoku ʻamanaki ke faifakahinohinó ha tāketi, kaufana mo ha ngahau, mo ha ngaahi faingamālie ke akoako fakahoko ai ʻa e tokotaha ako kotoa pē.

Tau fakaʻaongaʻi angé ʻa e fakatātā ko ʻení ki he teuteu ke akoʻi ha lēsoni seminelí.

Brother Dyreng: Mālō ʻaupito. Ko ia ʻoku ou fakalotolahiʻi kitautolu kotoa ke tau lotu ʻi hotau lotó ʻi heʻetau fai ʻa e fealeaʻaki ko ʻení ʻi he ʻaho ní. Hangē ko ‘eku talaatú, ‘oku ou fuʻu fiefia ‘aupito ‘i he faingamālié ni pea ‘oku ou ‘iloʻi ‘e hoko ‘eni ko ha tāpuaki lahi kiate kitautolu mo ‘etau fānau akó ‘i heʻetau fakahoko ‘a e ngaahi taukei ko ‘ení. Ko ia tau kamata ‘aki ‘etau talanoa ki he tāketí mo e meʻa ‘okú ne fakafofongaʻi ‘i he fakatātā ko ‘ení.

ʻOku ou fie fakaafeʻi ʻa Brother Simione ke ne lau ʻa e konga ʻuluaki ʻo e laʻipepa tufá ʻi lalo ʻi he taumuʻa ʻo e lēsoní.

Brother Simmons: ʻOku ʻomi ʻe he taumuʻa ʻo e lēsoní ha tāketi mahino ki he meʻa ʻoku tau ʻamanaki ʻe ʻiloʻi, ongoʻi, pe fai ʻe he kau akó ko ha ola ʻo e aʻusia fakaakó. ʻI he taimi ʻoku tau maʻu ai ha taumuʻa mahino ʻo e lēsoní ki he ako ʻa e kau akó, te tau lava ʻo tokanga ange ki he meʻa ʻoku tau palani ke fakaafeʻi ʻa e kau akó ke nau fai lolotonga ʻa e lēsoní. Taukei fika ʻuluakí: ʻiloʻi mo fakaʻilongaʻi ʻa e taumuʻa ʻo e lēsoní ʻoku maʻu ʻi he sētesi fakaʻosi ʻo e palakalafi fakafeʻiloaki ʻo e lēsoní.

Brother Dyreng: Sai, ʻi he teuteu ʻo e lēsoni 177, ʻa ia ko e “Ko Hono Puleʻi ʻo e Tekinolosiá,” ʻoku mou maʻu kotoa ha tatau ʻo ia. ʻOku ou sio ki he palakalafi fakafeʻiloakí pea ʻoku fakamatalaʻi mai ʻe he sētesi fakaʻosí ʻa e taumuʻa ʻo e lēsoni ko ʻení. Pea ʻoku pehē ai, “ʻE lava ke tokoni ʻa e lēsoni ko ʻení ke fakaʻaongaʻi ʻe he kau akó ha founga malu ke nau puleʻi ʻenau fakaʻaongaʻi ʻa e tekinolosiá.” Ko ia ai ʻoku ou fakaʻilongaʻi mahino ia ʻi he lēsoní.

Te tau akoako fakahoko leva ʻi he taimí ni ʻa e taukei mahinongofua ko ʻení. Ko e lēsoni 185, ʻa e lēsoni hoko ʻi heʻetau fakahinohino ki he vave hono akoʻí, pea ʻoku ui ia ko e “Ko Hono Langaki ha Mālohi Fakaeloto ʻi he ʻEikí.” Ko ia ʻoku ou fie ʻoatu ha kiʻi momeniti pē kiate kimoutolu takitaha ke vakai ki he palakalafi fakafeʻiloakí pea kumi mo fakaʻilongaʻi mahino ʻa e taumuʻa ʻo e lēsoni ko ʻení.

Brother Dyreng: Te tau ʻunu ʻi he taimí ni ki he taukei hono uá. Ko ia te u fakaafeʻi ʻa Brother ʻAlakala, kātaki ka ke lau muʻa ʻa e fakaʻuhinga ʻo ʻetau taukei hono uá ʻi lalo ʻi he Moʻoni kuo Fakamahinoʻí? ʻOku tau ʻunu atu ʻi he taimí ni ki he kaufaná mo e ngahaú.

Brother Alcala:ʻOku ʻomi ʻe he moʻoni kuo fakamahinoʻí ʻa ia ʻoku maʻu ʻi he folofolá mo e ngaahi akonaki ʻa e kau taki ʻo e Siasí, ʻo hangē ko e kaufaná mo e ngahaú, ki he kau akó ʻa e ngaahi meʻangāue ʻoku fiemaʻu ke fakahoko ʻaki ʻa e taumuʻa ʻo e lēsoní. ʻI he taimi ʻoku fakamaʻunga ai ʻa e aʻusia fakaakó ki he folofola ʻa e ʻOtuá, ʻoku tau tanumaki ʻa e tuʻunga malava ko ia ʻe ako ʻa e kau akó ʻi he mālohi ʻo e Laumālie Māʻoniʻoní. Taukei Uá: Kumi ʻa e moʻoni kuo fakamahinoʻi ʻi he lēsoní pea fakaʻilongaʻi ʻa e feituʻu ʻoku maʻu ai ia ʻi he ngaahi folofolá mo e ngaahi akonaki ʻa e kau taki ʻo e Siasí.

Brother Dyreng: Mālō ʻaupito. Tau toe foki angé ki he lēsoni 177. ʻI heʻeku teuteu ʻa e lēsoni ko ʻení, ʻoku ou ʻiloʻi ʻa e ngaahi moʻoni kuo fakamahinoʻí, pea ʻoku ou fakatokangaʻi ʻi he lēsoni makehe ko ʻení, ʻoku ʻi ai ha moʻoni ʻe ua. ʻOku pehē ʻa e moʻoni ʻuluakí: “ʻOku finangalo ʻa e ʻEikí ke tau femoʻuekina ʻi he fai leleí kae ʻikai fakamoleki noa hotau taimí.” Pea ʻoku pehē ʻe he moʻoni hono uá: “ʻOku tupu mei he ʻOtuá ʻa e meʻa ʻokú ne fakatupulaki mo fakalotoa ʻa e fai leleí.”

ʻOku ou ako leva ʻa e ngaahi folofolá mo e ongo kupuʻi lea meia ʻEletā Petinaá, peá u fakaʻilongaʻi ʻa e ngaahi lea mo e ngaahi kupuʻi lea ʻoku nau akoʻi ʻa e ongo moʻoni ko ʻení ʻi he ngaahi maʻuʻanga tokoni ko ʻení. Ko ia, ki ha fakatātaá, tau vakai ki he moʻoni ʻuluakí: “ʻOku finangalo ʻa e ʻEikí ke tau femoʻuekina ʻi he fai leleí kae ʻikai fakamoleki noa hotau taimí.” Pea te tau lau ʻa e ngaahi folofola ʻoku fekauʻaki mo e moʻoni ko ʻení.

Ko ia kapau te mou ʻalu fakataha mo au, tau ʻalu ki he Tokāteline mo e Ngaahi Fuakavá, vahe 58, veesi 26 mo e 27.

Pea, ʻi heʻeku lau ʻa e ongo veesi folofola ko ʻení, ʻoku ou fakaʻilongaʻi ʻa e kupuʻi lea, “ʻoku totonu ke femoʻuekina ʻa e tangatá ʻi he holi lahi ʻi ha ngāue lelei, pea fai ha ngaahi meʻa lahi ko ʻenau fili tauʻatāina ʻanautolu pē.” Tau ʻalu ʻi he taimí ni ki he folofola hokó, ʻa ia ko e Tokāteline mo e Ngaahi Fuakavá, vahe 60, veesi 13. Pea ʻi he folofola ko ʻení, ʻoku ou fakaʻilongaʻi ai ʻa e kupuʻi lea, “ʻoua naʻá ke maumauʻi ho taimí ʻi he nofo noa.” Pea ʻoku ou fai ʻeni ki he ngaahi veesi folofola kehe ʻoku lisi ʻi he lēsoní.

Tau ʻalu ʻi he taimí ni ki he kupuʻi lea meia ʻEletā Petinā ʻoku fekauʻaki mo e moʻoni ko iá. Pea ʻi heʻeku sio ki he kupuʻi lea ko ʻení peá u sio ki he foʻi moʻoní, kuó u fili ke fakaʻilongaʻi ha kupuʻi lea ʻe ua. Ko e ʻuluakí ʻoku pehē ai ʻe ʻEletā Petinā, “ʻE fakamoleki ʻe ha [taha] ʻoku ʻikai matuʻotuʻa pe taki halaʻi ha fuʻu taimi lahi ʻi he vaʻinga vitioó, ʻi he talanoa ʻi he ʻinitanetí, pe ha ngaahi founga kehe pē ʻo puleʻi ai ʻe he naunau fakaʻilekitulōniká ʻa e ngaahi meʻá ʻi honau angamoʻoní.”

Pea ʻi he fakaʻosinga leva ʻo e kupuʻi lea ko iá, ʻoku ou toe fakaʻilongaʻi foki ʻa e, “ʻI heʻene fakaʻau ke lahi hono ngāue ʻaki ʻa e fakafiefia ʻoku ngali fainoa peé, ʻe lava ke hoko ia ko ha faʻahinga meʻa fakapōpula ʻoku fakatupu ʻauha.” Tau foki ʻi he taimí ni ki he lēsoni 185 pea ʻoatu ha faingamālie ʻi he taimí ni ke akoako fakahoko ʻa e taukei ko ʻení. Kapau te mou feinga ke ʻiloʻi ʻa e moʻoni kuo fakamahinoʻi ʻi he lēsoni ko ʻení pea mo e ngaahi folofola mo e ngaahi lea ʻa e kau palōfitá ʻoku fekauʻaki mo e moʻoni ko iá, pea fakaʻilongaʻi ʻa e feituʻu ʻi he folofola ʻa e ʻOtuá ʻoku akoʻi mahino mai ai ʻa e moʻoni ko iá.

Sai, ʻoku ʻomi ai kitautolu ki heʻetau taukei hono tolú. ʻOku ou fie fakaafeʻi ʻa Sisitā Lōpini, kapau te ke lava, ke ke lau mai ʻa e fakaʻuhinga ki heʻetau taukei hono tolú.

Sisitā Robbins: Fakahaaʻi ʻa e meʻa ne akó. ʻOku fakaʻatā ʻe he ʻekitivitī ako ʻi he fakaʻosinga ʻo e lēsoní ʻa e tokotaha ako takitaha ke fakahaaʻi ʻa e meʻa naʻa nau akó, pe ko ha faingamālie ke nau feinga ke fanaʻi ha foʻi ngahau ki he tāketí. ʻE lava ke kau ʻi he ngaahi sīpinga ʻo e meʻa ʻe ala fai ʻe he kau akó ʻi he ʻekitivitī ako ko ʻení ʻa e tohi ʻi ha tohinoa, fakamatala, vahevahe, faʻu ha palani, akoako fakahoko ha taukei, pe faʻu ha meʻá. Ko e taukei fika tolú ko e feinga ke ʻiloʻi mo fakaʻilongaʻi ʻa e ʻekitivitī ʻi he lēsoní ʻa ia ʻoku ʻoange ai ki he fānau akó ʻa e faingamālie ke fakahaaʻi ʻenau akó ʻo fakatatau ki he taumuʻa ʻo e lēsoní.

Brother Dyreng: Ko ia ai kuo tau fokotuʻu ha tāketi. Kuo tau maʻu ʻa e meʻangāué—ko e kaufaná mo e ngahaú. Pea ʻi he taimi ní ʻe ʻoange ha faingamālie ki he kau akó ke fanaʻi ʻa e ngahau ko iá ki he tāketí. Ko ia ʻi heʻeku toe vakai ki he lēsoni 177, ʻoku ou vakai ofi ki he ngataʻanga ʻo e lēsoní pea ʻiloʻi ʻa e feituʻu ʻoku ʻoange ai ki he tokotaha ako kotoa pē ʻa e faingamālie ke fakahaaʻi ʻa e taumuʻa ʻo e lēsoní. Pea ʻoku ou fakatokangaʻi ʻi he lēsoni makehe ko ʻení, ʻoku ʻi ai ha ongo meʻa ʻoku tokoni ki he kau akó ke nau fakaʻaongaʻi ʻa e ngaahi maluʻi ki heʻenau fakaʻaongaʻi ʻo e tekinolosiá.

ʻOku tokoni ha taha ʻo e ngaahi meʻá ni ki he kau akó ke nau ʻahiʻahiʻi hono tomuʻa faʻu ha palani ki he founga te nau mapuleʻi ai ʻenau fakaʻaongaʻi ʻo e tekinolosiá. Pea ko e taha leva ko ha faingamālie ia ke nau fai ai ha palani ki he founga te nau taʻofi ai ʻenau ngāue ʻaki ʻa e tekinolosiá ʻi he taimi te nau fetaulaki ai mo e mītia taʻefeʻungá. Pea ko ia ʻoku ou fakaʻilongaʻi mahino ʻi he lēsoní ʻa e ongo faingamālie ko iá maʻá e fānau akó.

Te tau foki ʻi he taimí ni ki he lēsoni 185 pea ʻoatu ha faingamālie ke akoako fakahoko ʻa e taukei ko ʻení. Ko ia kapau te ke sio ki he fakaʻosinga ʻo e lēsoní pea ʻiloʻi ʻa e feituʻu ʻoku ʻoange ai ki he kau akó ʻa e faingamālie ke fakahaaʻi ʻa e taumuʻa ʻo e lēsoní pea fakaʻilongaʻi leva ia. Te u ʻoatu ha miniti ʻe taha ke mou fakasio ia.

ʻOku ou fie fakaafeʻi kimoutolu takitaha. ʻI hoʻomou teuteu mo akoʻi ʻa e ngaahi lēsoni ko ʻeni ʻo e Teuteu ki he Moʻuí ʻi he taʻu ní, te mou fakaʻaongaʻi nai ʻa e ngaahi taukei ʻe tolu ko ʻeni kuo tau aleaʻi ʻi he ʻaho ní?

ALL: ʻIo.

Brother Dyreng: ʻOku ou ʻilo ʻi heʻetau fai ʻení, te tau tokoniʻi ai ʻetau kau akó ke fakaloloto ʻenau ului ki he Fakamoʻui ko Sīsū Kalaisí. Pea ʻi he founga ko iá, ʻe liliu foki hotau lotó.

ʻOku ʻi ai ʻeku fakamoʻoni ʻoku tataki mo fakahinohinoʻi kitautolu ʻe heʻetau Tamai ʻi Hēvaní mo hotau Fakamoʻui ko Sīsū Kalaisí, pea te Na tāpuakiʻi kitautolu ʻi heʻetau muimui mo fanongo ki he kau taki kuó Na fakanofo ke nau tataki mo fakahinohinoʻi kitautolu ʻi he ngaahi ʻaho kimui ní. ʻOku ou houngaʻia ʻi he polokalama ako ko ʻeni kuo ʻomi kiate kitautolú pea mo e faingamālie ʻokú ne ʻomi ke tau tokoni ki hono fakaloloto ʻo e ului ki he Fakamoʻui ko Sīsū Kalaisí.

Pea ʻoku ou tuku eni mo kimoutolu ʻi he ʻahó ni ʻi he huafa ʻo Sīsū Kalaisí, ʻēmeni.