Ko hono Teuteuʻi mo Akoʻi ʻo e Ngaahi Lēsoni Teuteu ki he Moʻuí: Talateú

Brother Jason Willard: Mālō e lelei, ko hoku hingoá ko Seisoni Uiliati. Hangē ko kimoutolú, ʻoku ou ʻofa ʻi he Tamai Hēvaní mo Hono ʻAlo ko Sīsū Kalaisí, ʻaki hoku lotó kotoa. ʻOku ou ʻofa ʻi he toʻu tupú mo e kakai lalahi kei talavou ʻi he funga ʻo e māmaní. Tatau mo kimoutolú, ko ʻeku fakaʻamu lahi tahá ke tokoniʻi kinautolu ke fakaloloto ʻenau ului kia Sīsū Kalaisi mo ʻEne ongoongolelei kuo fakafoki maí, taau ke maʻu ʻa e ngaahi tāpuaki ʻo e temipalé, pea teuteuʻi kinautolu, honau ngaahi fāmilí, mo e niʻihi kehé ki he moʻui taʻengata mo ʻenau Tamai Hēvaní.

Ke aʻusia iá, ʻoku ou fie vahevahe atu ha ngaahi fakakaukau ʻe faingofua ange ai hoʻomou teuteu mo akoʻi ʻa e ngaahi lēsoni Teuteu ki he Moʻuí. ‘I Sānuali 2024, na‘e fakafe‘iloaki ai ‘e Brother Seti Uepi ‘a e ngaahi lēsoni fakakaveinga ko ʻení ‘a ia ‘e ako‘i tu‘o taha ki he tu‘o ua ‘i he uike takitaha. Naʻe faʻu ia mei he ngaahi kaveinga hangē ko e ngāue fakafaifekaú, teuteu ki he temipalé mo e akó, ngaahi taukei ako folofolá, matuʻuaki fakaelotó, ngaahi taukei ʻi he moʻuí, mo e ngaahi akonaki ʻa e kau palōfita ʻo e ngaahi ʻaho kimui ní.

Naʻá ne vahevahe foki mo kitautolu ʻa e vīsone mo e taumuʻa ʻo e ngaahi lēsoni Teuteu ki he Moʻui ko ʻení ʻi heʻene pehē:

Brother Chad H Webb: Ko ʻemau ʻamanakí ke tokoniʻi ha toʻu tangata ʻo e toʻu tupú ke nau ʻiloʻi ʻa e founga hono ako ʻo e folofolá pea pikitai ki he ngaahi akonaki ʻa e kau palōfita moʻuí. Ko ha toʻu tangata ʻo ha toʻu tupu ʻoku nau matuʻuaki fakaeloto mo maʻu ha ngaahi taukei pea malava ke lavameʻa ʻi he akó, hoko ko ha ngaahi tamai mo ha ngaahi faʻē angatonu, pea te nau tataki ʻa e Siasí ʻi honau ngaahi tūkui koló. Ko ʻemau ʻamanakí ke tokoniʻi ha toʻu tangata ke nau mateuteu ke mahino kiate kinautolu ʻa e ngaahi fuakava ʻo e temipalé, ʻoku nau tukupā kakato ke tauhi kinautolu, pea mo ha toʻutangata ngāue fakafaifekau ʻoku taau, feʻunga, mo maʻu ha ivi fakalaumālie, mo mateuteu ke fakafofongaʻi ʻa e Fakamoʻuí ʻi hono fakaafeʻi mai ʻo e māmaní ke nau haʻu kiate Ia.

Ko ʻemau ʻamanakí ke teuteuʻi ha toʻu tangata ʻo ha kau ākonga ʻa Sīsū Kalaisi ʻoku nau ului moʻoni kiate Ia mo ʻEne ongoongolelei kuo fakafoki maí ʻi he toenga ʻo ʻenau moʻuí.

Brother Jason Willard: ʻI heʻemau ʻaʻahi ki he kau faiako kuo nau akoʻi ʻa e ngaahi lēsoni fakakaveinga ko ʻení ʻi he taʻu kuo ʻosí, ʻoku mau ʻiloʻi ʻoku hoko ʻa e ʻamanaki ko ʻení ko ha meʻa moʻoni. Ko e kau faiako ʻoku nau kamata ʻaki ʻa e aʻusia ko ʻení ʻi heʻenau fakakaukaú, ʻa e vīsone ko ʻeni ʻo ia ʻoku mau ʻamanaki ʻe aʻusia ʻe he toʻu tangata kei tupu haké, ʻoku nau sio ki he ngaahi mana naʻe vīsone ʻe Brother Uepí. ʻI heʻetau manatuʻi lelei ʻa e ʻuhinga ʻo e ngaahi lēsoni teuteu ki he moʻuí, tau talanoa ki he founga ʻo hono teuteuʻi mo akoʻi ʻo e ngaahi lēsoni fakakaveinga ko ʻení. Kimuí ni maí, naʻá ku ʻalu ki ha kalasi semineli ke akoʻi ha taha ʻo e ngaahi lēsoni Teuteu ki he Moʻui ko ʻení. Koeʻuhí ko ha pēteliake au kuo fakanofo ʻi hoku siteikí, naʻá ku fakakaukau ʻe faingofua ke akoʻi pē ʻa e lēsoní ʻi he ngaahi tāpuaki fakapēteliaké. Ko ia naʻá ku ʻalu ki he kalasí mo e taumuʻa ke akoʻi fekauʻaki mo e ngaahi tāpuaki fakapēteliaké.

Naʻe hoko ia ko ha aʻusia lelei. Hili ʻeku akoʻi ʻa e kalasí, naʻá ku ʻaʻahi ki ha taha ʻo ʻetau kau faʻutohi ʻo e naunau akó peá u ʻiloʻi ai ta ko e lēsoni ko ʻení, fakataha mo e ngaahi lēsoni kehe ʻo e Teuteu ki he Moʻuí, naʻe faʻu ia ʻi ha founga ke tokoni ki he faiakó ke ne fai ha meʻa lahi ange ʻi hono akoʻi pē fekauʻaki mo ha kaveinga paú. Naʻá ku ʻiloʻi ai naʻe ʻi ai ha ngaahi tefitoʻi ʻelemēniti ʻe tolu ʻo e lēsoni takitaha: ko ha taumuʻa pau, ko ha moʻoni kuo fakamahinoʻi ʻoku maʻu ʻi he folofola ʻa e ʻOtuá, mo ha ʻekitivitī ʻe maʻu ai ʻe he tokotaha ako kotoa pē ʻa e faingamālie ke fakahaaʻi ʻa e meʻa naʻa nau akó.

ʻI heʻeku fakakaukau ki he ngaahi meʻa mahuʻinga ʻe tolu ko ʻení, naʻá ku teuteu ke akoʻi ʻa e lēsoni tatau ki ha kalasi semineli kehe ʻi ha ngaahi uike siʻi mei ai. Naʻe fakaofo ʻa e faikehekehe ʻi he aʻusia fakaakó. Naʻe fakahaaʻi ʻe he kau ako naʻa nau ʻosi maʻu honau tāpuaki fakapēteliaké ha loto-holi moʻoni ke ako fakamātoato ange honau tāpuakí. Naʻe vahevahe ʻe ha talavou ʻe taha he ʻikai ngalo ʻiate au mo e kalasí ʻene loto-holi ke teuteu faivelenga ange ki he misiona naʻe lave ki ai hono tāpuakí.

Naʻe ʻi he lotolotonga ʻo e kau ako naʻe teʻeki ke nau maʻu honau tāpuaki fakapēteliaké ha finemui naʻá ne vahevahe ʻi he loʻimataʻia ʻa e fiemaʻu vivili naʻá ne ongoʻi ke maʻu hono tāpuakí ʻi he vave tahá. Naʻe ʻikai ke u toe hoko au ko e mataotao, ko e pēteliake, ʻi heʻeku faiako fekauʻaki mo e ngaahi tāpuaki fakapēteliaké. Naʻá ku fai ʻa e meʻa ʻe lava ʻe ha faiako pē ʻo fai ʻi ha feituʻu pē ʻi he māmaní koeʻuhí ko e ngaahi tefitoʻi taukei ʻe tolu ko ʻení. Ke tokoniʻi koe mo hoʻo kau akó ke maʻu ha ngaahi lēsoni Teuteu ki he Moʻuí ʻoku liliu ai ʻa e moʻuí, tau vakai pe ʻoku fēfē ʻeni ʻi ha lēsoni ʻi ha ako, ko ha teuteu fakataautaha ʻa ha faiako ʻo ha lēsoni, pea fakaʻosi ki ha loki ako mo e kau akó.