25 ka Paagi sa Pag-apil sa Tibuok Kalibotan nga Inisyatiba alang sa Kababayen-an ug Kabataan

Kon panalanginan ninyo ang usa ka babaye, panalanginan usab ninyo ang iyang pamilya, komunidad, ug nasod. Sa samang paagi, kon panalanginan ninyo ang usa ka bata, namuhonan kamo sa umaabot. Mao kini ngano nga ang tibuok kalibotan nga pag-uswag nagsugod sa paghatag og prayoridad sa kaayohan sa kababayen-an ug kabataan. Ang Simbahan ni Jesukristo sa mga Santos sa Ulahing mga Adlaw naghatag og prayoridad sa mga panginahanglan sa kababayen-an ug kabataan—pinaagi sa pag-atiman sa inahan ug sa bag-ong nahimugso, mga paningkamot sa nutrisyon sa bata, mga pagbakuna, ug edukasyon sa tibuok kalibotan. Kon nagsunod kamo sa sugo sa Manluluwas sa pag-atiman niadtong nanginahanglan, kamo kabahin niining tibuok kalibotan nga paningkamot.

Ang mosunod nga lista naglakip og pipila ka ideya nga makapaaghat kaninyo sa paghunahuna ug pag-ampo mahitungod sa mga matang sa mga butang nga inyong mabuhat diha sa inyong kaugalingon nga panimalay, kasilinganan, ug komunidad aron sa pagtubag sa mga panginahanglan sa kababayen-an ug kabataan. Tinguhaa nga mahimong madasig kon asa ang Ginoo nagkinahanglan kaninyo ug kon kinsa ang kinahanglan ninyong pangulohan, giyahan, ug tuparan sa paglakaw. Kon kamo moserbisyo sa inyong pamilya, mga silingan, ug komunidad, kamo usa ka kabahin sa tibuok kalibotan nga kawsa sa Relief Society—nagdala sa gugma ug kahupayan ni Jesukristo ngadto sa atong mga igsoong babaye ug mga igsoong lalaki sa tibuok kalibotan.

1. Suportahi ang literasiya ug edukasyon sa kababayen-an ug kabataan pinaagi sa pag-ila ug pagpakigbatok sa mga babag diha sa inyong komunidad.
2. Tabangi ang mga bata nga mobasa og kusog. Walay laing mas makapalambo sa mga kahanas sa panghunahuna sa mga bata kay sa pagbasa uban sa mga hamtong kinsa nagpakabana kanila.
3. Sutaa kon unsa nga mga hagit diha sa inyong komunidad ang tingali nagpugong sa bag-ong mga inahan sa paggamit sa pag-atiman sa dili pa ang pagpanganak. Tinguhaa ang pagtubag niadto nga mga hagit.
4. Sayaw, ambak, katkat, ug pagdula diha sa salog uban sa mga bata. Ang paglihok moabag sa pagpalambo sa mga utok sa mga bata ug paglig-on sa ilang nagtubo nga mga lawas.
5. Pagtanom og usa ka tanaman ug ipakigbahin ang ani ngadto sa inyong mga silingan. Apila ang mga bata sa pag-atiman sa tanaman.
6. Pagkat-on mahitungod sa pagpreserbar og pagkaon, aron makaon kini kon dili na season. Ug paglain og dili madaot nga pagkaon, kon posible, aron sa paggahin og reserba alang sa mga emerhensiya.
7. Kat-oni kon unsa ang mabuhat aron sa pagtabang sa mga pamilya nga nagdepende sa pag-apod-apod sa pagkaon diha sa inyong komunidad ug pagtabang sa pagsulbad sa maong hagit.
8. Pakigtambayayong sa inyong lokal nga gobyerno aron sa pagseguro sa access sa inyong komunidad ngadto sa limpyo nga tubig, hangin, ug mga tinubdan sa pagkaon nga walay mga contimenant ug mga hugaw.
9. Pagplano og mga kalihokan sa Relief Society nga maghatag og suporta ug edukasyon nga may kalabotan ngadto sa mga paningkamot sa tibuok kalibotan, ug pagtinambagay diha sa inyong Relief Society mahitungod sa mga paagi nga makaapil.
10. Tigtudlo usa ka babaye nga anaa sa dalan paingon sa pagbarog sa kinaugalingong paningkamot.
11. Kon mahimo, ekslusibo nga patutoya ang inyong anak alang sa unang unom ka bulan. Pagsugod sa pagpaila sa inyong masuso og sustansiyado nga mga pagkaon sa ikaunom nga bulan ug padayon sa pagpatutoy aron sa paghatag sa inyong masuso sa tanang nutrina nga ilang gikinahanglan sulod sa labing minos usa ka tuig.
12. Seguroha ang usa ka pribado ug masuportahon nga palibot sa simbahan ug trabahoan alang sa mga inahan nga nagpatutoy o nag-pump.
13. Awhaga ang regular nga pisikal nga mga pagpa-check-up aron makakuha sa gikinahanglan nga pag-atiman lakip sa pag-atiman aron mapugngan ang mga sakit, pag-atiman sa dili pa ug human sa pagpanganak alang sa mabdos nga mga babaye, ug naandan nga mga bakuna alang sa mga bata.
14. Kaon sa makahimsog nga mga pagkaon uban sa mga bata. Patabanga sila ninyo sa pagpili ug pag-andam sa pagkaon o meryenda. Paghisgot mahitungod sa mga benepisyo sa sustansiyado nga mga pagkaon samtang magdungan sa pag-andam.
15. Pangita og laing mga meryenda gawas sa mga tam-is alang sa mga kalihokan sa simbahan, pagpraktis sa sports, ug mga meryenda human sa eskwela.
16. Pakig-istorya sa mga masuso ug gagmayng mga bata sa sayo pa ug kanunay. Ang pagtan-aw sa mata, pakig-istorya, ug pakigdula sa mga masuso magpalambo og lig-on nga mga koneksyon sa ilang mga utok.
17. Tabangi ang usa ka bata sa homework human sa klase.
18. Paghatag og mga libro isip mga gasa ug ipakigbahin ang rason nga piho ninyong gipili kini alang niana nga tawo. Ang pagbaton og mga libro diha sa panimalay maghatag og oportunidad sa pagkat-on ug paglambo.
19. Suportahi ang lokal nga mga librarya nga magpahulam og mga libro ug ubang libre nga mga kapanguhaan sa libro.
20. Pakig-istorya ngadto sa inyong lokal nga mga eskwelahan mahitungod sa ilang mga tumong alang sa sustansiyado nga mga pagkaon ug mga meryenda. Ikonsiderar kon unsay mabuhat sa mga ginikanan ug sa komunidad aron sa pagtabang.
21. Pakig-istorya sa mga bata sa sayo pa ug kanunay. Suginli sila og mga istorya ug tugoti sila nga mopakigbahin sa ilang mga istorya nganha kaninyo.
22. Lig-ona ang pagbati sa bili sa kaugalingon sa usa ka bata pinaagi sa pagtabang kanila sa pag-ila sa ilang mga gasa ug mga talento. Tabangi ang mga bata sa paggamit sa ilang mga gasa ug mga talento sa pagpanalangin sa uban.
23. Hatagi og responsibilidad ang mga bata diha sa panimalay aron tabangan sila nga hatagan og bili ang trabaho, makat-on sa importansiya sa pagtinabangay ug pagbarog sa kinaugalingong paningkamot ug sa pagpalambo sa ilang bili sa kaugalingon.
24. Pagpuasa ug paghatag og donasyon nga kwarta nga halad. Ang dili pagkaon aron ang laing tawo makakaon usa ka yano nga paagi nga kamao makatabang.
25. Apil o pag-post og proyekto diha sa JustServe mga motabang sa kababayen-an ug kabataan diha sa inyong komunidad.