Sa Unsang Paagi ang Pagpasuso Makatabang sa Nutrisyon sa Bata
Ang pagpasuso adunay daghang mga benepisyo alang sa mga inahan ug sa mga masuso. Ang gatas sa inahan usa ka natural ug sustansiyado nga tinubdan sa pagkaon nga mosuporta sa paglambo sa mga bata. Ang 1 Nephi 17:2 nag-ingon, “Ug hilabihan ang mga panalangin sa Ginoo kanamo, nga . . . ang among mga kababayen-an mihatag og daghan nga gatas nga masuso sa ilang mga anak, ug mga mahimsog.”
Unsa ang mga benepisyo sa pagpasuso?
Ang gatas sa inahan usa ka natural nga tinubdan sa pagkaon nga adunay mga nutrina nga gikinahanglan sa paglambo sa utok ug sa pagtubo, ingon man sa mga antibodies nga moprotekta sa mga masuso gikan sa nagkalainlaing mga sakit ug mga impeksiyon. Ang pagpasuso mohatag sa mga bata sa tanang mga nutrina nga ilang gikinahanglan sa ilang una nga mga tuig sa kinabuhi aron makakab-ot sa ilang kinatibuk-an nga potensiyal sa umaabot. Alang sa dugang impormasyon mahitungod sa pagpasuso, iklik ang mga panguta sa ubos.
Komon nga mga Pangutana bahin sa Pagpasuso
Kanus-a man ko angay nga magsugod sa pagpasuso?
Girekomendar nga magsugod sa pagpasuso sulod a usa ka oras human sa pagkatawo. Makatabang kini sa masuso nga magsugod sa natural nga abilidad sa pagsupsop ug makahatag sa masuso sa unang gatas nga nagagikan sa suso sa inahan. Ang unang gatas, nga gitawag og colostrum, molungtad sa unang pipila ka adlaw human sa pagkatawo ug puno sa mga nutrina ug mga antibody nga makatabang sa pagprotekta sa mga bata gikan sa mga sakit.
Unsa man ko kadugay nga magpasuso?
Kon posible, ang inahan kinahanglang magpadayon sa pagpasuso hangtod ang bata anaa na sa labing menos usa ka tuig ang pangidaron. Adunay dugang nga mga benepisyo sa kahimsog ang pagpadayon og pasuso kutob sa edad nga duha ug lapas pa.
Angay ba nga mohatag ko og tubig sa masuso nga mas ubos pa sa unom ka bulan ang edad?
Ang mga masuso nga ubos pa sa unom ka bulan ang pangidaron wala magkinahanglan og tubig, bisan sa mainit nga mga klima. Ang pag-inom og igong gidaghanon sa gatas sa inahan makapadayon sa paghatag sa gikinahanglan nga tubig sa masuso. Ang paghatag og tubig sa masuso mahimong makapadugang sa risgo sa kalibanga ug kakulang sa nutrisyon.
Unsaon nako pagpundo sa gi-pump nga gatas sa inahan?
Kon ang mga inahan kinahanglan nga mag-pump og gatas aron ipainom sa ilang mga bata, angay silang manghunaw kanunay ug ihipos ang gatas sa limpyo nga sudlanan nga adunay tabon. Matipigan kini sa temperatura sa lawak sulod sa upat ngadto sa unom ka oras ug isulod sa refrigerator sulod sa 24 ka oras.
Unsaon sa mga amahan nga makatabang sa pagpasuso?
Ang mga amahan ug ubang mga minahal sa kinabuhi makahimo og importante nga tahas pinaagi sa pagsuporta ug pagdasig sa mga inahan. Makatabang sila sa pagpainom sa masuso og gatas sa inahan nga gi-pump o pinalit nga gatas kon ang inahan dili makahimo sa pagpasuso.
Kanus-a man ko makasugod sa paghatag og ubang mga pagkaon sa akong anak gawas sa gatas sa inahan?
Kon posible, ekslusibong magpasuso sulod sa unang unom ka bulan. Dayon, sa pagsugod sa unom ka bulan, ang ubang mga pagkaon angay nga idugang.
Unsa ang mga timailhan sa malamposon nga pagpasuso?
- Makita nimo ug madungog ang inyong masuso nga nagtulon.
- Adunay kumpas nga pagsupsop.
- Kalmado ang mga bukton ug mga kamot sa masuso.
- Ang mga diaper kanunay nga basa.
- Ang tai mausab gikan sa dulom ngadto sa hayag nga brown sa ikatulo nga adlaw.
Unsay akong mabuhat kon dili ko makahimo sa pagpasuso?
Ang kasinatian sa matag inahan talagsaon. Kon dili ka makahimo sa pagpasuso, may mga paagi gihapon nga magkasuod mo ug makaalima sa imong anak. Bisan kon wala kini maglakip sa tanang mga benepisyo sa gatas sa inahan, ang infant formula mahimong gamiton isip puli kon gikinahanglan. Andama ang pormula gamit ang limpyo nga mainom nga tubig ug sunda ang mga instruksiyon nga anaa sa putos.
Unsaon Pagtabang sa Uban nga Makasabot Mahitungod sa Pagpasuso
Adunay pipila ka simple nga mag butang nga atong mahimo sa pagtabang sa mga ginikanan. Makatabang kita kanila nga makaamgo sa importansiya sa pagtubo ug paglambo sa ilang anak. Makatabang kita sa mga inahan nga mokonsiderar sa pagpasuso (kon posible). Hinuon, alang sa ubang mga babaye, ang pagpasuso dili posible. Kinahanglan kitang magmatngon nga dili mobuhat sa bisan unsang butang nga makapabati niini nga mga babaye nga sad-an o may kakulangan.
Ikonsiderar ang mga ideya sa ubos samtang mag-ampo ka og giya.
Tigpangalagad nga mga Brother ug mga Sister
Kon angay, ang mga tigpangalagad nga mga sister mahimong motanyag og praktikal nga impormasyon ug mga kapanguhaan mahitungod sa pagpasuso samtang mobisita sila og mga pamilya sa mga ginikanan nga nagpaabot nga manganak. Ang mga tigpangalagad nga mga sister mahimo usab nga modasig sa mga sister nga ilang giserbisyohan aron makat-on mahitungod sa mga benepisyo sa pagpasuso sa mga bata hangtod nga moabot sila tali sa edad nga usa ug duha ka tuig.
Ang tigpangalagad nga mga brother mahimong moawhag sa mga bana sa paghatag og mahigugmaong suporta ug pagdasig sa pagpasuso ug sa pagbuhat og laing mga katungdanan nga makatabang sa pamilya.
Lokal nga mga Lider
Ang lokal nga mga lider makaawhag sa natural nga naandan nga mga paagi sa pagpasuso, pagtubag og mga pangutana, pagpahibalo sa mga kapanguhaan, ug pagsuporta sa mga ginikanan pinaagi sa oras ug lugar alang sa pagpasuso sa ilang mga anak kon anaa sa Simbahan. Ubang mga paagi sa pagsuporta naglakip sa:
- Mabination ug matinahuron nga motabang sa mga sister kinsa adunay mga pangutana o nanginahanglan og pagdasig. Ang pagpaningkamot sa pagmugna og koneksiyon ug ang pagpakita og gugma makatabang sa mga lider nga makasabot kon unsa ang posibleng makapalisod sa usa ka babaye nga magpasuso.
- Moorganisar og mga klase alang sa mga mabdos ug bag-ong mga inahan bahin sa pagpasuso.
- Motabang sa mga inahan kinsa nakasinati og mga hagit sa pagpasuso aron mobati nga gihigugma ug gisuportahan, maglikay sa pagkompara ug paghusga. Kinahanglan walay tawo nga mopabati ni bisan kinsang babaye nga sad-an o may kakulangan kabahin sa iyang kasinatian sa pagpasuso.
- Magkat-on mahitungod sa lokal nga mga kapanguhaan nga makatabang sa mga inahan nga magpalamposon sa pagpasuso.