Ang Tibuok Kalibotan nga Pag-uswag Magsugod sa Pag-atiman sa mga Bata ug Pagpalig-on sa Kababayen-an
Ang Dios nagpangga sa hilabihan sa Iyang mga anak. Dihang mibisita si Kristo sa Amerika “gikuha niya ang ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila” (3 Nephi 17:21). Naningkamot kita sa pagsunod sa ehemplo sa Manluluwas pinaagi sa pag-atiman sa kahimsog ug edukasyon sa mga bata sa tibuok kalibotan.
Nganong Iprayoridad ang mga Bata ug ang Ilang mga Pamilya?
Ang pagprayoridad sa panginahanglan sa kababayen-an ug kabataan sa katilingban dili lamang ang pagpadako kanila sa tinagsa-tagsa, apan ang pagpalambo usab sa sitwasyon sa ilang mga pamilya ug paglig-on sa tibuok komunidad.
“Sa matag higayon nga maghimo kita og bisan unsa aron sa paghatag og kahupayan ngadto sa uban—sa temporal o espirituwal—kita nagdala kanila ngadto sa gugma ni Jesukristo ug mapanalanginan sa pagkaplag sa kaugalingon natong kahupayan diha Kaniya.”
Sa unsang paagi ang mga Anak ug ang Ilang mga Pamilya Makadawat og Tabang?
Nakita namo nga dunay upat ka dapit sa pagpaningkamot nga makatabang kaayo sa mga bata ug sa ilang mga pamilya. Kining upat ka dapit mao ang nutrisyon sa bata, pag-atiman sa mga nanagsabak ug sa mga bata nga bag-ong natawo, mga pagbakuna, ug edukasyon.
Nutrisyon sa Bata
Ang malnutrisyon makaapekto og dako sa tukmang pangutok, lawas, ug sa paglambo sa pangontra sa sakit, ilabi na panahon sa pagpanamkon hangtod sa edad nga 2–3. Pinaagi sa mga paghashas sa nutrisyon, ang pag-edukar sa mga ginikanan, paghatag og akses sa limpyong tubig ug sanitasyon, ug pagkonektar sa mga bata ngadto sa mga kapanguhaang lokal nga mga klinika, kita nanghinaot nga maminosan ang malnutrisyon sa mga bata ug mapahimutang alang kanila ang mas hayag nga kaugmaon.
Pag-atiman sa Inahan ug sa Bag-ong Natawo
Kini nga paningkamot mao ang pagtabang sa mga inahan aron makaangkon sa labing maayo nga posibling kasinatian atol sa pagmabdos, pagpanganak, ug pagpasuso. Pinaagi sa paghatag og pagbansay sa mga tig-atiman sa kahimsog, mga ekipo nga pang-medikal, ug pangsuporta nga edukasyon alang sa bag-ong mga inahan, manghinaot kita nga maminosan ang gidaghanon sa mamatay nga inahan ug masuso samtang naghatag og mas maayong pag-atiman alang sa mga inahan ug sa mga batang gisabak sa dili pa matawo ug human matawo.
Mga Pagbakuna
Ang mga pagbakuna batok sa tigdas, mga bayuok, rubella, tetanus, polyo, malarya, ug susamang mapugngan ra nga susamang mga sakit naprobahan nga makawagtang sa dagkong kadaot nga modagsang sa mga pamilya. Uban sa tabang sa kaalayon nga mga organisasyon, maatiman nato ang kahimsog ug ang mga pagbakuna aron maminosan ang gidaghanon sa pagkamatay sa mga bata ug ang mga risgo sa taas nga panahon nga mga problema sa kahimsog.
Edukasyon
Ang edukasyon alang sa kababayen-an ug kabataan maghatag og walay limit nga mga oportunidad nga positibong makaapekto sa mga anak sa Dios. Atong awhagon ang mga ginikanan nga sangkapan ang ilang mga anak sa mga oportunidad ug mga kapanguhaan nga ilang gikinahanglan aron mas mohawod. Dugang pa, ang edukasyon alang sa kababayen-an maghatag nila og mga kahanas ug kahibalo nga ilang gikinahanglan aron makapaningkamot sila sa ilang kaugalingon ug mahimo nila ang pagsangkap sa ilang mga pamilya.
“Ang mga sister sa Relief Society nag-amuma na sa uban diha sa ilang mga panimalay ug mga komunidad. Bisan kon dili sila direktang maapil [niini nga paningkamot], kabahin sila sa tibuok kalibotan nga panag-igsoonay nga nakahimo og kalainan sa kinabuhi sa katawhan.”
Unsay Akong Mahimo?
Bisan og dili ka direktang maapil sa tibuok kalibotan nga makitawhanong mga paningkamot, makaangkon ka og mahangtorong epekto kon magbuhat ka og makitawhanong buhat diha sa inyong komunidad. Duna kay gahom sa pag-impluwensiya sa imong kaugalingong pamilya ug mga komunidad. Aniay pipila ka kapanguhaan kon sa unsang paagi madasig ang pagpalambo sa inyong komunidad.
Sugdi Karon
Magkat-on
Ang pagkat-on mahitungod sa mga isyu nga makaapekto sa kababayen-an ug kabataan (ug ang paggamit sa unsay inyong nakat-onan) makaapekto sa inyong pamilya ug komunidad. Sama pananglit, imong makat-onan ang mahitungod sa mga hilisgotan kalabot sa nutrisyon (sama sa himsog nga pagkaon, pagpasuso, ug luwas nga pag-andam og pagkaon).
Boluntaryo
Kon motabang ka sa buhat sa pag-atiman niadtong nanginahanglan, makatabang ka sa kababayen-an ug kabataan diha sa imong komunidad nga molambo. Tan-awa ang mga oportunidad sa pagserbisyo sa inyong dapit.
Modonar
Ang ubay-ubay nga mga donasyon sa mga miyembro sa Simbahan ug sa mga higala sa Simbahan mopalambo sa atong mga paningkamot sa pag-atiman niadtong nanginahanglan. Pagkat-on og dugang mahitungod sa kon sa unsang paagi ang Simbahan nag-atiman sa mga nanginahanglan.
Samtang ang matag makitawhanon nga organisasyon adunay kaugalingon niining mga bahin sa espesyalisasyon, parehas kita og tumong sa paghupay sa nag-antos nga mga anak sa Dios.
Sa unsang paagi nga ang Simbahan Nakigtambayayong sa Ubang mga Organisasyon
Naghimo kita og kinatibuk-ang pamaagi sa makitawhanon nga buhat, nagtinguha sa pag-atiman niadtong nanginahanglan samtang nagpasiugda og taas nga termino nga pagbarog pinaagi sa kinaugalingong paningkamot alang sa indibiduwal, komunidad, o organisasyon. Aron matuman kini nga buhat, makigtambayayong kita sa daghang may integridad nga makitawhanong mga organisasyon nga nag-implementar sa mga baroganan sa pagbarog pinaagi sa kinaugalingong paningkamot sa paghimo sa ilang mga programa ug adunay naprobahang mga rekord sa kalamposan.
May Kalabotan nga Sulod
Suhira sa pagbasa ang mga artikulo sa ubos alang sa bag-ong mga ehemplo sa atong buhat kuyog sa ubang mga organisasyon sa pag-atiman sa kababayen-an ug sa mga bata sa tibuok kalibotan.
Komon nga mga Pangutana
Unsa ang gisulti sa mga kasulatan mahitungod sa pag-atiman sa kababayen-an ug kabataan?
Diha sa mga kasulatan, ang Manluluwas balikbalik nga nagsugo nga atimanon nato ang kababayen-an ug kabataan (tan-awa sa Exodo: 22:22–24; Doktrina ug mga Pakigsaad 83:2, 4).
Ang Mateo 18:14 mabasa nga, “Sa samang paagi, ang inyong Amahan nga atua sa langit dili buot nga may mawala bisag usa niining mga gagmayng bata.” Pinaagi sa pag-atiman sa kabataan, makaseguro kita nga kita nagsunod sa mando sa Manluluwas sa pagpakaon, pagtudlo, ug pag-atiman sa kabataan. Ang mga kasulatan nagtudlo usab kanato nga ang mga bata nga gitudloan ug giamumahan (sa mental, sa espirituwal, ug sa pisikal nga paagi) diha sa ilang kabatan-on magdako nga makahimo og kalainan sa ilang kaugalingon (tan-awa sa Mga Panultihon 22:6).
Sa Mga Panultihon 31 atong nakat-onan nga ang usa ka mahiyason nga babaye mobayaw sa iyang pamilya ug sa tanan sa iyang palibot. Siya “mahinatagon sa mga kabos ug timawa” (bersikulo 20); siya “kanunayng nagtan-aw sa mga kinahanglanon sa iyang banay” (bersikulo 27); ug panalanginan niya ang iyang mga anak ug ang iyang kapikas (tan-awa sa bersikulo 28). Pinaagi sa pagtabang sa kababayen-an, kita magsangkap nila og mga himan nga mahimo ang posible nga kinadak-ang kalainan alang sa kaayohan.
Tan-awa usab sa Marcos 9:36–37.
Sa unsang paagi nga ang kalalakin-an ug mga amahan makaapil niini nga paningkamot?
Ang pagpalambo sa kaayohan sa kababayen-an ug kabataan sa kasagaran magsugod sa kalalakin-an ug mga amahan. Ang kalalakin-an makapangita, makadonar, o makaboluntaryo sa mga organisasyon nga nagbayaw sa kababayen-an ug kabataan, sama sa mga dalangpan sa kababayen-an, mga programa sa pagtabang sa mga mikagiw, ug mga paningkamot alang sa nutrisyon sa bata. Kasagaran, ang kalalakin-an ug mga amahan adunay kinadak-ang epekto kon gamiton nila ang mga baroganan sa pagserbisyo ug paghigugma sulod sa ilang kaugalingong mga panimalay, mga pamilya, ug mga komunidad. Sulayi ang pagkat-on mahitungod sa mga hilisgotan sama sa tukma nga nutrisyon alang sa mga bata o mga panginahanglan sa kababayen-an alang sa kahimsog ug kalimpyo. Dayon gamita unsay imong nakat-onan diha sa imong kaugalingong kinabuhi.
Unsa ang gibuhat sa Simbahan sa pag-atiman sa kababayen-an ug kabataan niadtong 2023?
Niadtong 2023, ang Simbahan mihatag og prayoridad sa nutrisyon sa bata pinaagi sa ubay-ubay nga mga donasyon ngadto sa kasaligan nga mga organisasyon. Ang Simbahan mipasiugda usab og kaugalingon niining paningkamot sa nutrisyon sa pagtabang sa mga anak sa mga miyembro sa Simbahan nga anaa sa risgo sa malnutrisyon. Agi og dugang, ang Simbahan nagtrabaho aron mamenosan ang gidaghanon sa mamatay nga mga inahan ug bag-ong natawo, naghatag og mas maayo nga pag-atiman alang sa mga inahan ug gagmayng mga bata, naghimo og dekalidad nga edukasyon nga mas maakses sa kababayen-an ug kabataan, ug naghatag og mga oportunidad sa pagpalambo sa pagpanarbaho nga makapalig-on sa kababayen-an.
Susiha ang 2023 nga Tinuig nga Katingbanan sa mga paningkamot sa Simbahan sa pag-atiman niadtong nanginahanglan aron sa pagkat-on og dugang.
Sa unsang paagi nga ako makatabang sa akong komunidad?
Ang labing maayong paagi sa pagbayaw sa kababayen-an ug kabataan sa inyong komunidad sa kasagaran magsugod sa kaugalingon ninyong panimalay. Basaha ang tanan nga ideya nga makita diha sa link sa ubos alang sa inspirasyon kon unsay inyong posibling mahimo aron makatabang sa inyong pamilya ug komunidad.
25 ka Paagi sa Pag-apil sa Tibuok Kalibotan nga Inisyatiba alang sa Kababayen-an ug Kabataan