Makasaysayang Lugar ng Sagradong Kakahuyan

Sa isang araw ng tagsibol noong 1820, ang 14-na-taong-gulang na si Joseph Smith ay mag-isang nagpunta sa kakahuyan malapit sa kanyang tahanan at nanalangin. Nag-aalala tungkol sa katayuan niya sa harapan ng Diyos at nalilito tungkol sa maraming magkakaibang itinuturo ng iba’t ibang relihiyon sa kanyang panahon, ninais ni Joseph na makatanggap ng karunungan na alam niyang Diyos lamang ang makapagbibigay. Bilang sagot sa kanyang mapagkumbabang panalangin, nagpakita kay Joseph ang Diyos Ama at si Jesucristo. Ang mga sagot na ibinigay Nila kay Joseph noong araw na iyon ay nagpabago sa kanyang buhay at patuloy na nagpapabago sa buhay ng milyun-milyong tao sa buong mundo.

Inaanyayahan ng Sacred Grove Historic Site ang lahat na bumisita at madama ang diwa ng lugar na ito kung saan natanggap ng batang Joseph Smith ang tapat na sagot sa kanyang panalangin. Ngayon, isang bahagi ng sakahan ang iniingatan bilang isang malusog at natural na kakahuyan na kumakatawan sa tagong kakahuyan kung saan nagpunta si Joseph para manalangin. Nagbibigay ang mga liku-likong landas sa kakahuyan ng maraming lugar sa mga bisita upang pagnilayan ang mga pangyayari na naganap dito.

Noong Setyembre 21, 1823, sa itaas na palapag ng Joseph Smith Boyhood Home, unang binisita ng anghel na si Moroni si Joseph Smith sa maliit na bahay ng pamilya na yari sa troso. Pagkalipas ng apat na taon, si Joseph at ang kanyang asawang si Emma ay tumira sa mas malaking Smith Farm Home nang matanggap niya ang mga laminang ginto sa Burol ng Cumorah. Malapit sa lugar na ito ipinakita sa walong indibiduwal, na kilala bilang Walong Saksi ng Aklat ni Mormon, ang mga laminang ginto noong tag-init ng 1829. Ngayon, maaari mong bisitahin ang Smith Family Farm at ang mga kalapit na lugar kung saan naganap ang mga pangyayaring ito. Nasa lugar ngayon ang isang Welcome Center, Joseph’s Boyhood Home (ang Log Home), ang Smith Farm Home, isang Threshing Barn, at isang Cooper Shop. May mga missionary-guided tour para sa mga gusaling ito.