Ngaahi Tefitoʻi Moʻoni ʻe 3 ʻo e Ongoongoleleí ke Tokoni ʻo Tataki Koe ʻi he Ngaahi Polokalama Teití

Ko e faitotonú ko ha ʻuluaki ongo fakaofo ia, pea ko ha fakavaʻe mālohi ia ki ha mali taʻengata.

Naʻe akoʻi ʻe Sisitā ʻAna M. Tepi, ko e Tokoni Ua mālōlō ʻi he Kau Palesitenisī Lahi ʻo e Kau Finemuí: “ʻOku tau aʻusia ha melino ʻi hotau ʻatamaí mo e konisēnisi maʻá ʻi he taimi ʻoku tau faitotonu ai ʻi he ngaahi meʻa kotoa peé, ʻo tatau ai pē pe ʻoku lahi pe siʻisiʻi. ʻOku fakatupulaki hotau ngaahi vā fetuʻutakí he ʻoku fakatefito ʻi he falalá. Pea ko e tāpuaki maʻongoʻonga taha ʻoku maʻu mei he faitotonú ko e malava ke tau maʻu ʻa e takaua ʻo e Laumālie Māʻoniʻoní.”

ʻOku mahuʻinga ke ke faitotonu ʻi hoʻo fakamatala puipuituʻá mo hoʻo fengāueʻaki mo e niʻihi kehé. Ko ha ngaahi founga ʻeni ʻe niʻihi te ke lava ai ʻo faitotonú:

• Tuku atu haʻo ʻū tā moʻoni ʻo koe ʻi he lolotongá.

• Faitotonu ʻi ho taʻu motuʻá.

• Kapau ʻoku ʻikai te ke tokanga ki ha taha, lea moʻoni kae ʻoua ʻe taʻofi fakafokifā pē ʻa e fetuʻutakí pe takihalaʻi kinautolu.

• ʻOua te ke loi fekauʻaki mo hoʻo tuʻunga fakaakó, māʻolungá, mo e alā meʻa peheé. Ko e taimi ʻokú ke lea totonu ai fekauʻaki mo koé, ʻe fakahoungaʻi ia ʻe he taha ʻokú mo teití mo lava ke nau falala atu kiate koe.

Loto tauʻatāina mo loto fiemālie ke maheni mo ha kakai kehekehe. ʻOku lahi fau ha ngaahi meʻa ʻoku mahuʻinga ange ʻi he fōtungá mo e femanakoʻakí. Te ke ala fakaiku ʻo maʻu ha taimi fiefia mo ha taha ʻoku ʻikai angamaheni ke ke fetaulaki mo ia. Tokanga taha pē ki he ngaahi tuʻunga lelei fakalaumālié, ngaahi meʻa mahuʻinga ʻokú mo tatau aí, mo honau ʻulungaanga kiate koé (mo e niʻihi kehé!).

Naʻe pehē ʻe ʻEletā Tietā F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻI he palani ʻo e fiefia ʻa e ʻOtuá, ʻoku ʻikai ko ʻetau kumí ha taha haohaoa ka ko ha taha ʻa ia, te tau lava ʻi heʻetau fetokoniʻaki ʻi heʻetau moʻuí ke fokotuʻu ha feohi ʻofa, tuʻuloa, mo haohaoa ange.”

ʻOange ha faingamālie ki he kakaí. ʻE ala tohoakiʻi koe ki ha taha naʻe ʻikai ke ke ʻamanaki ki ai! Naʻe ʻikai ke feʻunga hoku husepānití mo e meʻa naʻá ku pehē naʻá ku fiemaʻú. Naʻá ku fakakaukau te u toe mali pē mo ha taha fakatamaiki hangē ko aú, ka, naʻá ku mali mo ha taha anga fakalongolongo. ʻOku tāpuekina ʻa Kēvini ʻaki ʻa e faʻa kātakí, loto mokomokó, mo e angamaluú; ʻo ne fakapalanisi au.

ʻAi maʻu pē ke ke fakakaukau mo loto tauʻatāina—he ʻoku ʻikai ke ke lavelaveʻiloa ʻa e taha te mo feʻungá.

Neongo ʻoku tokoni ʻa e ngaahi polokalama teití, ka ʻoku ʻi ai ha ngaahi fakatokanga ki he malú ke fakakaukauʻi.

Naʻá ku ʻalu ʻi ha ngaahi teiti ʻe niʻihi naʻe iku ʻo u ongoʻi hohaʻa ai. Naʻe tuʻo taha haʻaku ongoʻi veiveiua kimuʻa peá ma toki oó, pea naʻá ku ongoʻi ʻoku totonu ke u kaniseli; ka, naʻá ku manavasiʻi naʻa fakatupu lotomamahi ki heʻeku teití, ko ia naʻá ku ʻalu ai pē.

Naʻe ʻikai fuoloa kuo mahino naʻe ʻikai fakaʻapaʻapaʻi ʻe he tangatá ni ʻa ʻeku ngaahi fakangatangatá. Naʻá ne fai ha ngaahi lea naʻá ne ʻai ke u ongo taʻe-fiemālie, pea naʻá ku fakaʻamu pehē ange mai naʻá ku fanongo ki he ueʻi naʻá ku maʻu ke kaniseli ʻa e teití.

Kapau te ke ongoʻi ʻoku ʻikai ke ke malu pe taʻe-fiemālie ʻi ha taha, ʻe sai pē ke ke foki vave pe kaniseli ʻa e teití. ʻAi ke ke maʻu ʻa e Laumālié mo loto fiemālie ke muimui ki he fakahā ʻokú ke maʻú.

Ko ha ngaahi founga ʻeni te ke lava ʻo fakapapauʻi ai ʻokú ke malu ʻi hoʻo teití:

• Mo fetaulaki ki ha feituʻu ʻoku tokolahi ai ʻa e kakaí kae ʻoua ʻe ʻai hoʻo teití ke ne ʻave koe ʻi ha meʻalele mei ho ʻapí.

• ʻAi ke ʻiloʻi ʻe ha taha ʻa e feituʻu te mo ō ki aí mo e fuoloa hoʻomo oó.

• ʻAi hao kaungāmeʻa te ke lava ʻo fetuʻutaki ki ai kapau te ke ʻi ha tūkunga fakatuʻutāmaki.

ʻE lava foki ke ʻuhinga ʻa e falala ki he Laumālié ʻokú ke ʻiloʻi pe ʻoku totonu ke kei hoko atu hoʻomo feohí. Neongo ʻoku angaʻofa ke fakaʻatuʻi ʻa e ngaahi ongo ʻa e niʻihi kehé, ka ʻoku fakavalevale ke lolomi hoʻo fakahā fakafoʻituituí koeʻuhí ko ha ongoʻi halaia.

Kapau ʻokú ke ongoʻi ʻe hoko hono ʻahiʻahiʻi ha polokalama teiti ko ha founga lelei ia ke ke feʻiloaki ai mo e kakaí, ʻiloʻi ʻe kehekehe ʻa e aʻusia ʻa e tokotaha kotoa pē. Mahalo te ke maʻu ai ho hoa taʻengatá. Pe ko haʻo ako ai ke puleʻi lelei ange hoʻomo feohí mo maʻu ha ngaahi aʻusia foʻou.

Neongo pe ko e hā ʻa e meʻa ʻe hokó, ʻoku ʻofa atu ʻa e ʻOtuá. ʻOkú Ne ʻafioʻi ho lotó. Naʻe pehē ʻe Sisitā Soi D. Sōnasi, ko e Palesiteni Lahi kimuʻa ʻo e Palaimelí: “ʻOku hōifua ʻa e ʻEikí ki he ngāué, pea ʻoku ʻomi ʻe he ngāué ʻa e totongí. ʻOku hokohoko atu pē ʻetau akoakó. ʻOku tau fakalakalaka maʻu pē, kehe pē ke tau fāifeinga ke muimui ki he ʻEikí.”

ʻE lava ke faingataʻa ʻa e teití ʻi he ngaahi polokalama fakakomipiutá, ka ʻi he taimi ʻoku fakaʻaongaʻi māʻoniʻoni aí, te nau lava ʻo fakafehokotaki koe mo ha kakai lelei. Te ke maʻu ha ngaahi tāpuaki ʻi hoʻo moʻui ʻaki ʻa e ngaahi tefitoʻi moʻoni ko ʻeni ʻo e ongoongoleleí mo fai hoʻo lelei tahá ke anga faka-Kalaisi ʻi hoʻo kumi ho hoa taʻengatá.