Ko e Fakakaukauloto ki he Folofolá

Fakamatalaʻi ange ko e taimi ʻoku tau fakakaukauloto ai ki he folofolá, ʻoku tau faʻu ai ha ʻata ʻi heʻetau fakakaukaú ʻo e meʻa ʻoku tau laukongá. ʻE lava ke tokoniʻi kitautolu ʻe he taukei ko ʻení ke mahino lelei ange ʻa e ngaahi meʻa naʻe hokó, ngaahi talanoá, mo e kakai ʻoku tau laukonga ki ai ʻi he folofolá. ʻE lava ke tokoni ʻa e ngaahi fakakaukau mo e ngaahi ʻekitivitī ko ʻení ke tau fakakaukauloto ki he folofolá:

• Kumi ha ngaahi foʻi lea mo ha ngaahi kupuʻi lea ʻoku mohu fakamatala, ʻa ia ʻe ala tokoni ke ke sioloto ai ki he ngaahi fakaikiiki ʻo e meʻa naʻe hokó.

• Fakaʻaongaʻi ʻa e ngaahi fakaikiiki ʻokú ke maʻú ke ke sioloto ai ki he meʻa naʻe fakakaukau ki ai pe ongoʻi ʻe he kakai ʻi he folofolá.

• Fakakaukauloto ʻokú ke kau ʻi he talanoa he folofolá, mo fakakaukau pe ko e hā ha ngaahi ongo mo ha ngaahi fakakaukau te ke ala maʻu kapau naʻá ke foua ʻa e ngaahi meʻa ʻoku fakamatalaʻí.

• Kumi ʻa e ʻū fakatātā mo e ngaahi vitiō ʻi he Media Library, ʻoku maʻu ʻi he ChurchofJesusChrist.org, ʻa ia ʻe ala tokoni ke ke fakakaukauloto ki ha talanoa he folofolá.

Ke fakatātaaʻi ʻa e taukei ʻo e fakakaukaulotó, fakakaukau ke fakaʻaongaʻi ha taha ʻo e ngaahi fakakaukau ko ʻení pe faʻu haʻo fakakaukau pē ʻaʻau.

• Fakamatalaʻi ha kiʻi puipuituʻa nounou ki he talanoa ʻo Taniela ʻi he ʻana ʻo e fanga laioné (vakai, Taniela 6:1–15). Lau leva ʻa e Taniela 6:16–23, pea fakamahinoʻi ange ʻa e ngaahi fakaikiiki ʻe ala tokoni ke sioloto ʻa e kau akó ki he foʻi talanoá. Te ke lava ʻo fakaʻaliʻali ʻa e fakatātā ʻoku ʻoatu hení pea fakaafeʻi ʻa e kau akó ke nau fakakaukau pe naʻe mei fēfē nai ʻa e hū ʻa Taniela ki ha feituʻu naʻe fonu ai ʻa e fanga laioné.

  Te ke lava ʻo vahevahe ʻa e founga ʻoku hanga ai ʻe he fakakaukauloto ki he aʻusia ʻa Tanielá (pe aʻusia ʻa e Tuʻi ko Talaiasí) ʻo ʻai ʻa e ngaahi meʻa naʻe hoko ʻi he talanoá ke moʻoni mo fakafoʻituitui ange kiate koé. Te ke lava foki ʻo vahevahe ʻa e founga ʻoku tokoni ai ke ke houngaʻia ʻi he tui ʻa Taniela (mo Talaiasí) kae pehē ki he mālohi ʻo e ʻEikí.

• Ko ha founga ʻe taha ke fakatātaaʻi ai ʻa e taukei ko ʻení ko hano lau ʻa e Tokāteline mo e Ngaahi Fuakava 45:44–45 pea toki fakaʻaliʻali ha konga ʻo e lea ʻa ʻEletā Niila L. ʻEnitaseni ko e “ʻOku Mau Lea ʻia Kalaisí” (Liahona, Nōvema 2020, 91) mei he taimi 12:28 ki he 13:48. ʻOku tokoniʻi kitautolu ʻe ʻEletā ʻEnitaseni ke tau fakakaukauloto ki he Hāʻele ʻAnga Ua Mai ʻa Sīsū Kalaisí. Te ke lava ʻo vahevahe ʻa e founga ʻoku tākiekina ai ʻe he fakakaukauloto ki he Hāʻele ʻAnga Ua Mai ʻa e Fakamoʻuí hoʻo tui kiate Iá mo hoʻo ngaahi ʻamanaki ki he ʻaho ko iá.

15:1

Fili ha potufolofola mei he laukonga ʻo e uike ní ke fakaangaanga ʻa e taukei ko ʻeni ʻo e fakakaukauloto ki he folofolá. Pe te ke fili ha potufolofola mei he ngaahi sīpinga ʻoku ʻoatu ʻi laló. Fakaafeʻi ʻa e kau akó ke nau ako ʻa e potufolofolá pea akoako fakakaukauloto ki he folofolá ʻaki hano fakaʻaongaʻi ʻa e ngaahi fakakaukau ʻi he konga ki he “Fakaʻuhingaʻí.” Te ke lava ʻo fakaʻaliʻali ʻa e ngaahi fakakaukau ko ʻení. Ka hili e fakaangaanga ʻa e kau akó, fakaafeʻi ke nau vahevahe ʻenau aʻusiá mo hanau hoa pe ʻi ha fanga kiʻi kulupu iiki. Te nau lava ʻo vahevahe ha taha ʻo e ngaahi meʻa ko ʻení pe toe lahi ange:

• Ngaahi foʻi lea mo e kupuʻi lea mei he folofolá naʻe tokoni ke nau faʻu ha fakatātā ke nau sioloto ki ai

• Ko ha ʻilo fakataautaha naʻa nau maʻu ʻi heʻenau fakakaukaulotó

• Ko ʻenau ngaahi fakakaukau ki he founga naʻe tokoni ai ha ʻīmisi pe foʻi vitiō ke nau ongoʻi vāofi ange mo e folofolá

Fakatokangaʻi ange: Te ke lava ʻo fakamanatu ange ki he kau akó ko e fakatātaá pe vitioó ko hano fakafōtunga pē ia ʻo e folofolá ka ʻoku ʻikai ko ha ʻata moʻoni ia ʻo e meʻa naʻe hokó.

Ngaahi potufolofola lahi ange ke fakaangaangá:

• ʻEkesōtosi 14:10, 21–22. ʻI he mālohi ʻo e ʻOtuá, ʻoku fakamavaeuaʻi ai ʻe Mōsese ʻa e Tahi Kulokulá.

• Mātiu 14:24–32. ʻOku fakaafeʻi ʻe Sīsū ʻa Pita ke ʻaʻeva ʻi he fukahi tahí.

• 3 Nīfai 11:13–15. Ko e ala ʻa e kakai Nīfaí ki he ngaahi kafo ʻo e Fakamoʻuí.

• Tokāteline mo e Ngaahi Fuakava 110:2–4. ʻOku hā ʻa Sīsū Kalaisi kia Siosefa Sāmita mo ʻŌliva Kautele ʻi he Temipale Ketilaní

Poupouʻi ʻa e kau akó ke nau fakakaukauloto ki he ngaahi folofolá lolotonga ʻenau akó. Kole ange ke nau ōmai mateuteu ʻi he kalasi hokó ke vahevahe ʻa e meʻa naʻa nau ako mei hono fakahoko iá. Manatuʻi ke toe vakaiʻi ʻi he lolotonga ʻo e kalasi hokó mo tuku ha taimi ke vahevahe mo aleaʻi ai ʻe he kau akó ʻa e founga naʻe tākiekina ai ʻe he taukei ko ʻení ʻenau ako ʻi he folofolá.