ការរៀបចំខ្លួនទៅព្រះវិហារបរិសុទ្ធ ៖ មេរៀនទី ២០៤
ការចូលរួមនៅក្នុងកិច្ចការព្រះវិហារបរិសុទ្ធ និងពង្សប្រវត្តិ
« នឹងមានពួកអ្នកដែលបានសង្គ្រោះឡើងមកឯភ្នំស៊ីយ៉ូន »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
Red Buttes Camp [ ជំរំ រែឌ ប៊ូត ] ដោយ យ៉ូសែប ប្រ៊ីកឃី
ចាប់ពីឆ្នាំ១៨៥៦ ដល់ឆ្នាំ១៨៦០ ពួកអ្នកត្រួសត្រាយនៃពួកបរិសុទ្ធថ្ងៃចុងក្រោយរាប់ពាន់នាក់បានធ្វើដំណើរទៅកាន់ជ្រលងភ្នំសលត៍លេកដោយប្រើរទេះរុញ ។ នៅខែតុលា ឆ្នាំ១៨៥៦ ព្រិកហាំ យ៉ង់ បានបញ្ជូនពួកអ្នកជួយសង្គ្រោះទៅជួយក្រុមរទេះរុញ ម៉ាទិន និង វិលី ដែលនៅឆ្ងាយរាប់រយម៉ាយល៍ ខណៈរដូវរងាជិតមកដល់ ។
ប៊ីស្សព ដបុលយូ គ្រីស្តូហ្វើរ វ៉តឌែល នៃគណៈប៊ីស្សពជាអធិបតី បានចែកចាយដូចខាងក្រោម ៖
សមាជិកម្នាក់នៃក្រុមវិលី បានរៀបរាប់អំពីស្ថានភាពអស់សង្ឃឹម មុនពេលក្រុមសង្គ្រោះដ៏សំខាន់នេះមកដល់ ។ លោកបានចែកចាយថា « [ គ្រាន់តែ ]ពេលគ្រប់គ្នាហៀបនឹងស្លាប់ ហើយនៅសល់តិចតួចសម្រាប់បន្តជីវិត … ចម្លើយមកពីព្រះចំពោះការអធិស្ឋានរបស់យើង ហាក់ដូចជាផ្គរលាន់ចេញពីផ្ទៃមេឃស្រឡះ ។ ក្រុមជួយសង្គ្រោះ នាំយកអាហារ និងសម្ភារមក … ឲ្យឃើញ ។ … តើយើងអាចអរគុណព្រះសម្រាប់ការជួយសង្គ្រោះយើងដោយរបៀបណា » ។
ក្រុមសង្គ្រោះទាំងនោះ គឺជាវីរបុរសសម្រាប់ពួកអ្នកត្រួសត្រាយផ្លូវ ដោយហ៊ានប្រថុយជីវិតផ្សងគ្រោះថ្នាក់ក្នុងលក្ខខណ្ឌអាកាសធាតុដ៏កាចសាហាវ ដើម្បីនាំមនុស្សទាំងអស់ទៅផ្ទះដោយសុវត្ថិភាពតាមដែលអាចធ្វើបាន ។ ( « លើសពីវីរបុរសធម្មតា » លីអាហូណា ខែវិច្ឆិកា ឆ្នាំ២០២៣ ទំព័រ ៨៩ )
ពួកអ្នកត្រួសត្រាយផ្លូវ ការជួយសង្គ្រោះ
ស្រដៀងគ្នានេះដែរ ព្រះវរបិតាសួគ៌ និងព្រះយេស៊ូវគ្រីស្ទបានដាក់យើងដើម្បីសង្គ្រោះដល់បុព្វការីជនរបស់យើងដែលបានស្លាប់ទៅ ។ អ្នកអាចធ្វើវាបានដោយការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។
គោលបំណងមេរៀន ៖ ដើម្បីជួយអ្នកឲ្យដាក់គោលដៅមួយដើម្បីកាន់តែប្រែក្លាយដូចជាព្រះអង្គសង្គ្រោះ ដោយការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។
រៀនអំពីរបៀបធ្វើ
ពួកអ្នកដែលបានសង្រ្គោះនៅលើភ្នំស៊ីយ៉ូន
ព្រះអង្គសង្គ្រោះ ព្រះប្រោសលោះ និងជាព្រះដ៏ជួយសង្គ្រោះគឺជាព្រះបរមងារដែលថ្វាយព្រះយេស៊ូវគ្រីស្ទជាអង្គដែលព្រះវរបិតាសួគ៌បានតែងតាំងឲ្យសង្រ្គោះយើងចេញពីស្ថានភាពធ្លាក់របស់យើង ( សូមមើល អេសាយ ៦១:១–៣ ) ។ ព្រះអង្គសង្រ្គោះអញ្ជើញយើងឲ្យចូលរួមជាមួយទ្រង់នៅក្នុងកិច្ចការរបស់ទ្រង់ នៅពេលយើងចូលរួមនៅក្នុងការសង្រ្គោះបុព្វការីជនដែលបានទទួលមរណភាពរបស់យើង ។ សេចក្ដីសង្គ្រោះរបស់យើងពឹងផ្អែកលើបុព្វការីជនរបស់យើង ហើយសេចក្ដីសង្គ្រោះរបស់ពួកគាត់ពឹងផ្អែកលើយើង ( សូមមើល គោលលទ្ធិ និងសេចក្ដីសញ្ញា ១២៨:១៥–១៨ ) ។
នៅពេញមួយមេរៀន សូមកត់ត្រាការបំផុសគំនិតខាងវិញ្ញាណណាមួយដែលជួយអ្នកឲ្យរកឃើញរបៀបដើម្បីធ្វើជាអ្នកជួយសង្រ្គោះម្នាក់របស់ព្រះវរបិតាសួគ៌ និងព្រះយេស៊ូវគ្រីស្ទសម្រាប់បុព្វការីជនរបស់អ្នក ។
ក្រោយពីវាយយកក្រុងយេរូសាឡិមបានហើយ ព្យាការីអូបាឌាបានព្យាករថា កូនចៅរបស់អេសាវជាច្រើន ( បងប្រុសភ្លោះរបស់ព្យាការីយ៉ាកុប ) នឹងត្រូវបំផ្លាញដោយសារអំពើទុច្ចរិត ។ អូបាឌាក៏បានព្យាករអំពីការខិតខំជួយសង្គ្រោះសម្រាប់កូនចៅទាំងនេះ និងអ្នកដទៃទៀតជាច្រើននាក់ទៀត ។ វាអាចមានប្រយោជន៍ដើម្បីដឹងថា នៅក្នុងខគម្ពីរខាងក្រោមនេះ « ភ្នំស៊ីយ៉ូន » អាចសំដៅទៅលើទីក្រុងយេរូសាឡិម និងព្រះវិហារបរិសុទ្ធរបស់ទីក្រុងនេះ ។
សូមអាន អូបាឌា ១:១៧, ២១ ហើយរកមើលពាក្យដែលរំឭកអ្នកពីព្រះវិហារបរិសុទ្ធ ។
សូមបង្កើតកំណត់ចំណាំមួយនៅជាប់នឹង ខទី ២១ ដោយមាននូវសេចក្ដីពិតដូចតទៅនេះ ៖ ខ្ញុំអាចក្លាយកាន់តែដូចព្រះអង្គសង្គ្រោះ នៅពេលខ្ញុំស្វែងរកបុព្វការីជនរបស់ខ្ញុំ ហើយធ្វើពិធីបរិសុទ្ធនៃការសង្គ្រោះសម្រាប់ពួកគាត់នៅក្នុងព្រះវិហារបរិសុទ្ធ ។
តាមរយៈដង្វាយធួនរបស់ទ្រង់ ព្រះអង្គសង្គ្រោះអាចសង្គ្រោះយើងពីអំពើបាប និងសេចក្តីស្លាប់—ជាអ្វីដែលយើងមិនអាចធ្វើសម្រាប់ខ្លួនយើងបានទេ ( សូមមើល អាលម៉ា ៣៤:៨–១២ ) ។ ដូចគ្នានេះដែរ អ្នកអាចជួយសង្គ្រោះបុព្វការីជនរបស់អ្នក នៅពេលអ្នកធ្វើពិធីបរិសុទ្ធនៃការសង្គ្រោះសម្រាប់ពួកគាត់—ជាអ្វីដែលពួកគាត់មិនអាចធ្វើសម្រាប់ខ្លួនពួកគាត់បាន ។
តើកិច្ចការព្រះវិហារបរិសុទ្ធសម្រាប់បុព្វការីជនដែលបានស្លាប់ទៅរបស់អ្នក អាចប្រៀបធៀបតាមរបៀបដ៏តូចតាចទៅនឹងអ្វីដែលព្រះអង្គសង្គ្រោះបានធ្វើសម្រាប់យើងបានយ៉ាងដូចម្ដេច ?
ដំណើររឿងរបស់ពួកគាត់គឺជាផ្នែកនៃដំណើររឿងរបស់អ្នក
សូមមើលវីដេអូ « Discover Your Family History. Discover Your Story » ( ២:៤២ ) ។ សូមជញ្ជឹងគិតថា តើសៀវភៅក្រហមនៅក្នុងវីដេអូអាចតំណាងឲ្យអ្វី និងតើវាអាចទាក់ទងយ៉ាងណាខ្លះទៅនឹងបុព្វការីជនរបស់អ្នក ។
អែលឌើរ ហ្គើរីត ដបុលយូ ហ្គង ក្នុងកូរ៉ុមនៃពួកសាវកដប់ពីរនាក់ បានបង្រៀន ៖
ការភ្ជាប់ទំនាក់ទំនងជាមួយបុព្វការីជនអាចផ្លាស់ប្តូរជីវិតយើងក្នុងរបៀបដ៏អស្ចារ្យជាច្រើន ។ ចេញពីការសាកល្បង និងសមិទ្ធផលរបស់ពួកគាត់ នោះយើងទទួលបានសេចក្តីជំនឿ និងភាពរឹងមាំ ។ ចេញពីសេចក្តីស្រឡាញ់ និងការលះបង់របស់ពួកគាត់ នោះយើងរៀនអភ័យទោស និងបន្តបោះជំហានទៅមុខ ។ កូនៗរបស់យើងក្លាយជាមនុស្សមានភាពអត់ធន់ ។ យើងទទួលបានការការពារ និងអំណាច ។ ចំណងជាមួយបុព្វការីជនបង្កើនភាពស្និទ្ធស្នាលក្នុងគ្រួសារ អំណរគុណ អព្ភូតហេតុ ។ ចំណងបែបនោះអាចនាំជំនួយមកពីផ្នែកម្ខាងទៀតនៃវាំងនន ។ ( « យើងមានប្រវត្តិរៀងៗខ្លួន » លីអាហូណា ខែឧសភា ឆ្នាំ២០២២ ទំព័រ ៤៥ )
តើដំណើររឿងអ្វីខ្លះអំពីបុព្វការីជនដែលបានផ្ដល់ពរជ័យដល់ជីវិតអ្នក ?
អែលឌើរ ហ្គង បានបន្ដផ្ដល់យោបល់ដូចខាងក្រោម ដើម្បីជួយយើងឲ្យទទួលបានបទពិសោធន៍មកពីពរជ័យនៃកិច្ចការព្រះវិហារបរិសុទ្ធ និងពង្សប្រវត្តិ ។
ទីមួយ … [ ប្រមូលរូបថត និងប្រវត្តិរបស់គ្រួសារ និងបុព្វការីជនរបស់អ្នក ] សូមធ្វើឲ្យអនុស្សាវរីយរបស់ពួកគាត់ក្លាយជាការពិត ។ សូមកត់ត្រាឈ្មោះ បទពិសោធន៍ កាលបរិច្ឆេទសំខាន់ៗរបស់ពួកគាត់ ។ ពួកគាត់ជាគ្រួសាររបស់បងប្អូន—ជាគ្រួសារដែលបងប្អូនមាន និងចង់បាន ។ …
ទីពីរ សូមឲ្យការស្វែងរកពង្សប្រវត្តិធ្វើឡើងដោយចេតនា និងដុះចេញពីចិត្ត ។ [ ឧទាហរណ៍ ] ទូរសព្ទទៅរកជីដូនរបស់បងប្អូន ។ … រៀន និងទទួលស្គាល់កេរដំណែលគ្រួសារបងប្អូនដោយអំណរគុណ និងស្មោះត្រង់ ។ មានចិត្តសាទរ និងវិជ្ជមាន បើចាំបាច់ សូមធ្វើអ្វីៗគ្រប់យ៉ាងដែលអាចធ្វើបានដោយរាបសាដើម្បីបញ្ឈប់អ្វីដែលអវិជ្ជមាន ។ សូមឲ្យរឿងល្អៗចាប់ផ្តើមជាមួយបងប្អូន ។
ទីបី ចូលទៅកាន់គេហទំព័រ FamilySearch.org ។ ទាញយកកម្មវិធីនេះដាក់លើទូរសព្ទដៃ [ ដូចជា មែកធាងកម្មវិធីស្រាវជ្រាវក្រុមគ្រួសារ និងកម្រងអនុស្សាវរីយ៍ស្រាវជ្រាវក្រុមគ្រួសារជាដើម ] ។ កម្មវិធីទាំងនេះឥតគិតថ្លៃ ហើយសប្បាយ ។ សូមស្វែងរក សូមភ្ជាប់ សូមធ្វើជាកម្មសិទ្ធិ ។ សូមមើលថា តើអ្នកមានជាប់សាច់ញាតិនឹងមនុស្សនៅក្នុងបន្ទប់ដែរឬទេ តើវាងាយស្រួល និងរីករាយយ៉ាងណាក្នុងការបន្ថែមឈ្មោះទៅលើមែកធាងគ្រួសារនៅរស់របស់បងប្អូន ។ …
ទីបួន សូមជួយបង្រួបបង្រួមក្រុមគ្រួសារអស់កល្បជានិច្ច ។ … មានវិញ្ញាណនៅផ្នែកម្ខាងទៀតនៃវាំងននច្រើនជាងនៅផ្នែកខាងនេះ ។ កាលណាមានព្រះវិហារបរិសុទ្ធច្រើនកន្លែងនៅកាន់តែជិតយើង សូមផ្ដល់ឱកាសដល់អស់អ្នកដែលរង់ចាំទទួលពិធីបរិសុទ្ធនៃព្រះវិហារបរិសុទ្ធ ។ ( « យើងមានប្រវត្តិរៀងៗខ្លួន » ទំព័រ ៤៥; បានបន្ថែមអក្សរដិត )
ការសិក្សាស៊ីជម្រៅ ៖ ប្រសិនបើមិនមានព្រះវិហារបរិសុទ្ធនៅជិតអ្នកទេនោះ សូមកុំព្រួយអី ។ សូមមើលវីដេអូ « សេចក្តីណែនាំភាពជាអ្នកដឹកនាំក្នុងព្រះវិហារបរិសុទ្ធ និងពង្សប្រវត្តិ ឆ្នាំ២០២៤ » ចាប់ពីនាទីទី ១៧:៥៤ ដល់ ២០:១២ ។
ឥឡូវត្រូវធ្វើដូចម្តេចទៀត ?
សូមដាក់គោលដៅដើម្បីក្លាយកាន់តែដូចព្រះអង្គសង្គ្រោះដោយការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។ សូមស្វែងរកជំនួយពីព្រះវិញ្ញាណបរិសុទ្ធដើម្បីដឹកនាំអ្នក ។ សូមប្រើការណែនាំមកពីអែលឌើរ ហ្គង និងសំណួរខាងក្រោមដើម្បីជួយអ្នកចាប់ផ្ដើម ៖
-
តើដោយរបៀបណា និងពេលណាដែលអ្នកនឹងធ្វើកិច្ចការពង្សប្រវត្ដិ ?
-
តើនរណាដែលអាចជួយអ្នកបាន ?
-
តើការអនុវត្តនេះអាចជួយអ្នកឲ្យក្លាយកាន់តែដូចជាព្រះយេស៊ូវគ្រីស្ទបានយ៉ាងដូចម្ដេច ?
ការសិក្សាស៊ីជម្រៅ ៖ សម្រាប់គំនិតបន្ថែម សូមមើលអត្ថបទ « Family History Is for Everyone: 9 Fun Ways to Participate » ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យដាក់គោលដៅមួយដើម្បីកាន់តែប្រែក្លាយដូចជាព្រះអង្គសង្គ្រោះ ដោយការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
គោលដៅដែលអ្នកបានដាក់ដើម្បីក្លាយកាន់តែដូចជាព្រះអង្គសង្គ្រោះ ដោយការចូលរូមក្នុងកិច្ចការព្រះវិហារបរិសុទ្ធ និងពង្សប្រវត្ដិ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?