ការរៀបចំខ្លួនទៅព្រះវិហារបរិសុទ្ធ ៖ មេរៀនទី ២០១
ព្រះយេស៊ូវគ្រីស្ទគឺជាចំណុចសំខាន់នៅក្នុងការថ្វាយបង្គំនៅព្រះវិហារបរិសុទ្ធទាំងអស់
« ដើម្បីឲ្យយើងបាននៅកណ្តាលគេ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
រូបមន្តសម្រាប់ផ្ចិតសមីការង្វង់គឺ (x−h)2+(y−k)2=r2 ដែល (h, k) គឺជាកូអរដោនេនៃផ្ចិត ហើយ r គឺជាកាំ ។ រូបមន្តនេះអាចត្រូវបានប្រើក្នុងការសាងសង់ វិស្វកម្ម ការរចនា គណិតវិទ្យា និងការកំណត់ផែនទី ។
សមីការនេះបង្ហាញថា ចំណុចទាំងអស់នៅលើខ្សែរង្វង់គឺមានចម្ងាយដូចគ្នាពីផ្ចិត (h, k) ។ ចម្ងាយនេះរក្សារង្វង់ឲ្យមានតុល្យភាពឥតខ្ចោះនៅជុំវិញផ្ចិតរបស់វា ។ ស្រដៀងគ្នាដែរ ពាក្យ « ដំណាក់នៃព្រះអម្ចាស់ » នៅលើព្រះវិហារបរិសុទ្ធនីមួយៗរំឭកយើងថា គ្រប់អ្វីទាំងអស់នៅក្នុងព្រះវិហារបរិសុទ្ធគឺផ្ដោតលើព្រះយេស៊ូវគ្រីស្ទ ។
ពេញមួយមេរៀននៅថ្ងៃនេះ សូមកត់ត្រាចំណាប់អារម្មណ៍ ដែលអ្នកទទួលបានពីព្រះវិញ្ញាណ ដែលបង្កើននូវបំណងប្រាថ្នារបស់អ្នក ដើម្បីនៅក្នុងព្រះវិហារបរិសុទ្ធ ។
គោលបំណងមេរៀន ៖ ដើម្បីជួយអ្នកឲ្យមាននូវបំណងប្រាថ្នាចូលទៅជិតព្រះយេស៊ូវគ្រីស្ទនៅក្នុងដំណាក់របស់ទ្រង់កាន់តែខ្លាំងឡើង ។
រៀនអំពីរបៀបធ្វើ
ដំណាក់នៃព្រះអម្ចាស់
សូមមើលវីដេអូ « Mormon Temples » ( ១:៤០ ) ឬអានការពិពណ៌នាខាងក្រោមនេះ ។
រោងឧបោសថគឺជាដំណាក់ទីមួយរបស់ព្រះ ឬព្រះវិហារបរិសុទ្ធដែលបានលើកឡើងនៅក្នុងព្រះគម្ពីរសញ្ញាចាស់ ( ប្រមាណឆ្នាំ១៣០០ មុន គ.ស. ) ។ រោងឧបោសថនោះគឺជារចនាសម្ព័ន្ធចល័តមួយសម្រាប់ពួកសាសន៍អ៊ីស្រាអែល ពេលពួកគេធ្វើដំណើរក្នុងទីរហោស្ថាន ។
ព្រះវិហារបរិសុទ្ធរបស់សាឡូម៉ូនគឺជាដំណាក់អចិន្ត្រៃយ៍នៃព្រះអម្ចាស់ដែលបានសាងសង់នៅក្រុងយេរូសាឡិម ( ប្រមាណឆ្នាំ១០០០ មុន គ.ស. ) ។ ក្រោយមក ព្រះវិហារបរិសុទ្ធនេះត្រូវបានបំផ្លាញ និងសាងសង់ឡើងវិញ ( ប្រមាណឆ្នាំ៥០០ មុន គ.ស. ) ។ រាល់ពេលដែលព្រះអម្ចាស់បានបញ្ជារាស្រ្តរបស់ទ្រង់ឲ្យសាងសង់ដំណាក់មួយថ្វាយទ្រង់នៅក្នុងព្រះគម្ពីរសញ្ញាចាស់ ទ្រង់បានចែកចាយការសន្យាស្រដៀងគ្នានេះ ។
សូមអានវគ្គបទគម្ពីរដូចខាងក្រោមនេះ ។ សូមគូសសម្គាល់អ្វីដែលព្រះអម្ចាស់បានសន្យាចំពោះប្រជាជននៃសេចក្ដីសញ្ញារបស់ទ្រង់ ប្រសិនបើពួកគេសាងសង់ដំណាក់មួយសម្រាប់ទ្រង់ ។
-
និក្ខមនំ ២៥:៨ ( ម៉ូសេ និងរោងឧបោសថ )
-
ពង្សាវតារក្សត្រ ទី១ ៦:១២–១៣ ( ព្រះវិហារបរិសុទ្ធរបស់សាឡូម៉ូន )
-
ហាកាយ ២:៧ ( សូរ៉ូបាបិលកសាងព្រះវិហារបរិសុទ្ធឡើងវិញ )
ការសន្យាមួយក្នុងចំណោមការសន្យាជាច្រើនដែលព្រះអម្ចាស់បានធ្វើ គឺថាប្រសិនបើបុត្រាបុត្រីរបស់ទ្រង់សាងសង់ដំណាក់របស់ទ្រង់ នោះទ្រង់នឹង « នៅកណ្ដាលគេ » ( និក្ខមនំ ២៥:៨ ) ។ ឃ្លា « នៅកណ្ដាលគេ » អាចសំដៅលើបទពិសោធន៍នៃការមានអារម្មណ៍នៃវត្ដមានរបស់ព្រះអម្ចាស់ ឬការទទួលបានព្រះចេស្ដារបស់ទ្រង់នៅក្នុងព្រះវិហារបរិសុទ្ធ និងនៅក្នុងជីវិតប្រចាំថ្ងៃរបស់យើងនៅពេលយើងធ្វើ និងរក្សាសេចក្ដីសញ្ញាជាមួយទ្រង់ ហើយថ្វាយបង្គំទ្រង់ និងបម្រើទ្រង់នៅក្នុងដំណាក់ដ៏បរិសុទ្ធរបស់ទ្រង់ ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបន្ដសាងសង់ព្រះវិហារបរិសុទ្ធជាទីដែលព្រះអម្ចាស់អាចគង់នៅ ។
នៅពេលមានប្រសាសន៍អំពីព្រះវិហារបរិសុទ្ធ អែលឌើរ អាឡែន ឌី ហែនី នៃពួកចិតសិបនាក់ បានបង្រៀន ៖
[ ព្រះយេស៊ូវគ្រីស្ទ ] គឺជាមូលហេតុដែលយើងមកព្រះវិហារបរិសុទ្ធ ។ ទ្រង់គឺជាអង្គដែលព្រះវរបិតាដែលគង់នៅស្ថានសួគ៌មានព្រះទ័យចង់ឲ្យយើងជួបនៅក្នុងព្រះវិហារបរិសុទ្ធ ។ ទ្រង់គឺជាចំណុចកណ្ដាលនៃរាល់និមិត្តសញ្ញា រាល់ពិធីបរិសុទ្ធ រាល់សេចក្តីសញ្ញា និងរាល់សេចក្តីសង្ឃឹមសម្រាប់ទទួលបានពរជ័យនៅក្នុងព្រះវិហារបរិសុទ្ធ ។ ការស្វែងរកព្រះយេស៊ូវនៅក្នុងព្រះវិហារបរិសុទ្ធអនុញ្ញាតឲ្យយើងយល់ពីមូលហេតុដែលយើងនៅក្នុងព្រះវិហារបរិសុទ្ធ និងមូលហេតុដែលយើងគួរតែត្រឡប់ទៅកាន់ព្រះវិហារបរិសុទ្ធវិញ ។ ( « Meeting Jesus in the House of the Lord » [ ការប្រជុំធម្មនិដ្ឋាននៅសាកលវិទ្យាល័យព្រិកហាំ យ៉ង់ នាថ្ងៃទី១០ ខែធ្នូ ឆ្នាំ២០២៣ ] ទំព័រ ៦ នៅលើគេហទំព័រ speeches.byu.edu )
តើការដឹងថា ព្រះវិហារបរិសុទ្ធគឺដំណាក់នៃព្រះអម្ចាស់ជះឥទ្ធិពលដល់អារម្មណ៍របស់អ្នកអំពីការទៅទីនោះយ៉ាងដូចម្ដេច ?
ពរជ័យពីការថ្វាយបង្គំព្រះអម្ចាស់នៅក្នុងដំណាក់របស់ទ្រង់
វិធីមួយដើម្បីមើលឃើញភស្ដុតាងថា ព្រះវិហារបរិសុទ្ធគឺជាកន្លែងដែលយើងអាចទទួលអារម្មណ៍នៃវត្ដមាន និងព្រះចេស្ដានៃព្រះអម្ចាស់គឺតាមរយៈពរជ័យដែលទ្រង់ប្រទានឲ្យ នៅពេលដែលយើងទៅទីនោះ ។ ពរជ័យទាំងនេះអាចជួយអ្នកឲ្យទទួលអារម្មណ៍នៃសេចក្ដីស្រឡាញ់របស់ទ្រង់ ។
ប្រធាន រ័សុល អិម ណិលសុន បានបង្រៀនពីរបៀបដែលការទៅដំណាក់នៃព្រះអម្ចាស់អាចនាំយើងខិតកាន់តែជិតព្រះយេស៊ូវគ្រីស្ទ ។ សូមធ្វើបញ្ជីមួយនៅក្នុងសៀវភៅកត់ចំណាំរបស់អ្នកអំពីពរជ័យដែលទ្រង់បានសន្យា ៖
ចំពោះអ្នកដែលបម្រើ និងថ្វាយបង្គំនៅក្នុងដំណាក់របស់ព្រះអម្ចាស់ … អាច រំពឹង ថានឹងទទួលបានចម្លើយចំពោះការអធិស្ឋាន វិវរណៈផ្ទាល់ខ្លួន មានសេចក្ដីជំនឿកាន់តែខ្លាំង មានភាពរឹងមាំ មានការលួងលោមចិត្ត បង្កើនចំណេះដឹង និងបង្កើនអំណាច ។
ពេលវេលានៅក្នុងព្រះវិហារបរិសុទ្ធនឹងជួយបងប្អូនឲ្យ គិតដល់សេឡេស្ទាល និងចាប់យកចក្ខុវិស័យថាបងប្អូនជានរណាពិតប្រាកដ បងប្អូនអាចប្រែក្លាយជាយ៉ាងណា និងប្រភេទនៃជីវិតដែលបងប្អូនអាចមានជារៀងរហូត ។ ការថ្វាយបង្គំក្នុងព្រះវិហារបរិសុទ្ធជាទៀងទាត់នឹងអភិវឌ្ឍរបៀបដែលបងប្អូនមើលមកខ្លួនឯង និងរបៀបដែលបងប្អូនចុះចូលក្នុងផែនការដ៏អស្ចារ្យរបស់ព្រះ ។ ខ្ញុំសូមសន្យានឹងបងប្អូនថា …
បងប្អូនប្រុសស្រីជាទីស្រឡាញ់នេះជាការសន្យារបស់ខ្ញុំ ។ គ្មានអ្វីនឹងជួយបងប្អូន ច្រើនជាង ការថ្វាយបង្គំនៅក្នុងព្រះវិហារបរិសុទ្ធជាទៀងទាត់តាមដែលកាលៈទេសៈរបស់បងប្អូនអនុញ្ញាតឲ្យ ដើម្បីកាន់ដំបងដែកយ៉ាងខ្ជាប់ខ្ជួនជានិច្ចនោះទេ ។ គ្មានអ្វីដែលនឹងការពារបងប្អូន ពេលដែលបងប្អូនជួបនឹងភាពងងឹតនៃពិភពលោក ជាង នេះនោះទេ ។ គ្មានអ្វីដែលនឹងពង្រឹងទីបន្ទាល់របស់បងប្អូនអំពីព្រះអម្ចាស់ព្រះយេស៊ូវគ្រីស្ទ និងដង្វាយធួនរបស់ទ្រង់ ឬជួយបងប្អូនឲ្យយល់ពីផែនការដ៏អស្ចារ្យរបស់ព្រះ ជាង នេះនោះទេ ។ គ្មានអ្វីដែលនឹងធ្វើឲ្យវិញ្ញាណរបស់បងប្អូនធូរស្រាលក្នុងអំឡុងពេលឈឺចាប់ ជាង នេះនោះទេ ។ គ្មានអ្វីដែលនឹងបើកស្ថានសួគ៌ ជាង នេះនោះទេ ។ គ្មានទាល់តែសោះ ! ( « រីករាយនៅក្នុងអំណោយទាននៃកូនសោបព្វជិតភាព » លីអាហូណា ខែឧសភា ឆ្នាំ២០២៤ ទំព័រ ១២១, ១២២ )
ការថ្វាយបង្គំក្នុងព្រះវិហារបរិសុទ្ឋ ពរជ័យនៃព្រះវិហារបរិសុទ្ឋ
សូមបញ្ចប់លំហាត់ខាងក្រោមនៅក្នុងកំណត់ហេតុរបស់អ្នក ៖
-
សូមគិត ហើយកត់ត្រាពរជ័យបន្ថែមនានាដែលអ្នកអាចទទួលបាន នៅពេលអ្នកចូលទៅក្នុងដំណាក់នៃព្រះអម្ចាស់ ។
-
សូមជ្រើសរើសពរជ័យពីរ ហើយពន្យល់ពីរបៀបដែលពរជ័យទាំងនេះបានជួយអ្នកឲ្យទទួលអារម្មណ៍នៃសេចក្ដីស្រឡាញ់របស់ព្រះនៅក្នុងជីវិតរបស់អ្នក ។
-
សូមកត់ត្រាអ្វីដែលអ្នកអាចធ្វើបានដើម្បីរៀបចំខ្លួនអ្នក ដើម្បីទៅកាន់ព្រះវិហារបរិសុទ្ធ ហើយខិតកាន់តែជិតព្រះអម្ចាស់ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យមាននូវបំណងប្រាថ្នាចូលទៅជិតព្រះយេស៊ូវគ្រីស្ទនៅក្នុងដំណាក់របស់ទ្រង់កាន់តែខ្លាំងឡើង ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ពរជ័យមួយ ឬពីរដែលអ្នកបានរកឃើញ ។ សូមរួមបញ្ចូលពីរបៀបដែលពរជ័យនោះបានជួយអ្នកឲ្យខិតកាន់តែជិតព្រះអម្ចាស់ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?