ការរៀបចំសម្រាប់ការអប់រំ និងការងារនាពេលអនាគត ៖ មេរៀនទី ១៩១
ការស្វែងរកអ្នកណែនាំ
ព្រះអម្ចាស់ដាក់បុគ្គលគំរូនៅលើផ្លូវរបស់យើង
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
យោងតាម អេច ដបុលយូ ធឿនប៊ុល « លោក អ៊ីសាក ញូវតុន ដែលជាអ្នកវិទ្យាសាស្រ្តដ៏ល្បីល្បាញមួយរូបពីសតវត្សទី១៧ ធ្លាប់បាននិយាយថា ៖ ‹ បើខ្ញុំបានមើលឃើញឲ្យឆ្ងាយជាងនេះ ក៏ដោយសារការឈរនៅលើស្មារបស់យក្សដែរ › » ។ សម្ដីនេះមានន័យថា វាសំខាន់ដើម្បីទទួលបានជំនួយ និងដំបូន្មានមកពីបុគ្គលដែលមានបទពិសោធន៍ ។ នៅពេលអ្នកជញ្ជឹងគិតពីជីវិតរបស់អ្នក តើអ្នកណែនាំដែលគួរឲ្យទុកចិត្តបានជួយអ្នកយ៉ាងដូចម្ដេចខ្លះ ?
ចាប់ពីម៉ូសេ និងយ៉ូស្វេ ដល់អេលី និងសាំយូអែល ដំណើររឿងពីបទគម្ពីរទាំងឡាយបង្ហាញពីគុណតម្លៃនៃទំនាក់ទំនងការណែនាំ ។ ដំណើររឿងទាំងនេះចង្អុលបង្ហាញយើងទៅកាន់អ្នកណែនាំដ៏ល្អឥតខ្ចោះរបស់យើង គឺព្រះវរបិតាសួគ៌ និងព្រះយេស៊ូវគ្រីស្ទ ។
នៅពេលអ្នកសិក្សាថ្ងៃនេះ សូមអញ្ជើញព្រះវិញ្ញាណបរិសុទ្ធឲ្យជួយអ្នកកំណត់អត្តសញ្ញាណអ្នកណែនាំដែលគួរឲ្យទុកចិត្តបាននៅក្នុងជីវិតរបស់អ្នក ដែលអាចជួយអ្នកឲ្យស្វែងរកការណែនាំរបស់ព្រះអម្ចាស់ នៅពេលអ្នកធ្វើការសម្រេចចិត្តអំពីផែនការអប់រំ និងអាជីព ។
គោលបំណងមេរៀន ៖ ដើម្បីជួយអ្នកឲ្យបង្កើតផែនការដើម្បីស្វែងរក និងភ្ជាប់ទំនាក់ទំនងជាមួយអ្នកណែនាំផ្នែកការអប់រំ និងផ្នែកអាជីពដែលមានសក្តានុពល ។
រៀនអំពីរបៀបធ្វើ
តើអ្នកណែនាំគឺជានរណា ?
អែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់ បានពន្យល់ពីអត្ថន័យនៃអ្នកណែនាំ ៖
[ អ្នកណែនាំ ] បានដើរមុនយើង ហើយពួកគេស្គាល់ពីផ្លូវនោះ ។ …
…បុគ្គលដែលមានបទពិសោធន៍ និងគួរឲ្យទុកចិត្ត បម្រើជាអ្នកណែនាំដ៏មានប្រសិទ្ធភាព និងជាទីប្រឹក្សាដល់បុគ្គលដែលមិនសូវមានបទពិសោធន៍ ដោយការជួយតម្រង់ការយល់ដឹងរបស់បុគ្គលនោះ ហើយបង្រៀនគោលការណ៍ដែលនឹងធ្វើឲ្យគាត់កាន់តែមានប្រសិទ្ធភាព កាន់តែរឹងមាំ កាន់តែឆ្លាតវៃ និងមានតម្លៃក្នុងនាមជាអ្នកបម្រើរបស់ព្រះ ។ ( « Thy Friends Do Stand by Thee » [ ការប្រជុំធម្មនិដ្ឋានសាកលវិទ្យាល័យ ព្រិកហាំ យ៉ង់ ថ្ងៃទី៧ ខែមីនា ឆ្នាំ២០១០ ] ទំព័រ ៣ នៅលើគេហទំព័រ speeches.byu.edu )
គំរូដ៏អស្ចារ្យបំផុតនៃអ្នកណែនាំគឺព្រះវរបិតាសួគ៌របស់យើង ។ ព្រះបរមងារមួយក្នុងចំណោមព្រះបរមងាររបស់ទ្រង់គឺ « មនុស្សនៃដំបូន្មាន » ( ម៉ូសេ ៧:៣៥ ) ។
សូមសិក្សា យ៉ូហាន ៥:១៩–២០ និង យ៉ូហាន ៨:២៦–២៨ ហើយរកមើលរបៀបដែលព្រះវរបិតាសួគ៌បានណែនាំដល់ព្រះរាជបុត្រាទ្រង់ ព្រះយេស៊ូវគ្រីស្ទ ។
សូមជ្រើសរើសដំណើររឿងព្រះគម្ពីរមួយ ក្នុងចំណោមដំណើររឿងព្រះគម្ពីរខាងក្រោម ហើយសិក្សាវគ្គបទគម្ពីរនោះ ។ សូមដាក់ស្លាកវគ្គបទគម្ពីរនោះថា « អ្នកណែនាំ » ។
-
ម៉ូសេ និងយ៉ូស្វេ ៖ ចោទិយកថា ៣:២១–២២ ( ម៉ូសេណែនាំយ៉ូស្វេ ), ២៨ ( ការណែនាំរបស់ព្រះអម្ចាស់ដល់ម៉ូសេ )
-
សង្ឃជាន់ខ្ពស់ ឈ្មោះអេលី និងព្យាការីវ័យក្មេង ឈ្មោះសាំយូអែល ៖ សាំយូអែល ទី១ ៣:១–១០
តើព្រះអម្ចាស់បានប្រទានការណែនាំរបស់ទ្រង់តាមរយៈអ្នកណែនាំនេះដោយរបៀបណា ? តើដំណើររឿងនោះអាចជួយនរណាម្នាក់ដែលស្ទាក់ស្ទើរក្នុងការស្វែងរកជំនួយពីអ្នកណែនាំបានដោយរបៀបណា ?
បងប្រុស មៀលធិន ខាម៉ាហ្គូ ទីប្រឹក្សាទីមួយនៅក្នុងគណៈប្រធានសាលាថ្ងៃអាទិត្យ បានមានប្រសាសន៍ ៖
នៅចំណុចខ្លះអំឡុងការធ្វើដំណើររបស់អ្នក [ នៅក្នុង ] ការអប់រំ … អ្នកប្រហែលជាមានអារម្មណ៍លើសលប់ជាមួយនឹងរឿងជាច្រើនដែលត្រូវធ្វើ ។ សូមចងចាំថា អ្នកមិននៅម្នាក់ឯងក្នុងអំឡុងពេលលំបាករបស់អ្នកនោះទេ ។ ព្រះអម្ចាស់បានប្រទានដល់អ្នកនូវមនុស្សជាច្រើនដែលអាចគាំទ្រដល់អ្នក—សមាជិកគ្រួសារ ថ្នាក់ដឹកនាំសាសនាចក្រ មិត្តភក្តិ ក៏ដូចជា … អ្នកណែនាំ ឬគ្រូរបស់អ្នកផងដែរ ។ ហើយជាការពិតណាស់ ព្រះអម្ចាស់ផ្ទាល់តែងតែត្រៀមព្រះកាយជានិច្ចដើម្បីលួងលោម និងពង្រឹងអ្នក ។ ( « Persevere with the Lord’s Help » [ ការប្រជុំធម្មនិដ្ឋាន BYU–Pathway Worldwide ថ្ងៃទី១ ខែមីនា ឆ្នាំ២០២២ ] ទំព័រ ២ នៅលើគេហទំព័រ byupathway.edu )
ការស្វែងរកអ្នកណែនាំ
ព្រះអម្ចាស់ដាក់មនុស្សដែលគួរឲ្យទុកចិត្ដជាច្រើននៅលើផ្លូវរបស់អ្នក ដែលអាចបម្រើជាអ្នកណែនាំបាន ។ មនុស្សមួយចំនួនជាអ្នកណែនាំរយៈពេលខ្លី ហើយបំពេញតម្រូវការជាក់លាក់ដែលអ្នកមាន ។ អ្នកណែនាំផ្សេងទៀតអាចធ្វើការជាមួយអ្នកក្នុងរយៈពេលយូរជាងនេះ ។ សូមស្វែងរកជំនួយរបស់ព្រះវរបិតាសួគ៌ដើម្បីស្វែងរក និងភ្ជាប់ទំនាក់ទំនងជាមួយអ្នកណែនាំឥឡូវនេះ ។ សូមចាំមើលជានិច្ចពេញមួយជីវិតរបស់អ្នក ដើម្បីស្វែងរកមនុស្សដែលអ្នកអាចពឹងផ្អែកបានសម្រាប់ការណែនាំ និងការលូតលាស់ ។ ព្រះអម្ចាស់នឹងប្រទានដល់អ្នកនូវជំនួយដែលអ្នកត្រូវការ ។
ស៊ីស្ទើរ ស៊ូសាន អិល ហ្គង បានបង្រៀនថា ៖
នេះគឺជារដូវកាលដើម្បីស្វែងរកគ្រូបង្វឹកដ៏វាងវៃ និងសុចរិត—ឪពុកម្ដាយ ឬជីដូនជីតា គ្រូបង្រៀន មិត្តភក្ដិ ថ្នាក់ដឹកនាំសាសនាចក្រ និងអង្គដែលសំខាន់បំផុតនោះគឺ ព្រះយេស៊ូវគ្រីស្ទ—ដើម្បីជួយយើងកសាងជីវិតដ៏មានអត្ថន័យមួយ ។ សូមបង្កើតទំនាក់ទំនងដ៏មានអត្ថន័យជាមួយអស់អ្នកដែលអាចជួយប្អូនឲ្យរៀន និងរីកចម្រើន ។ ( « ហេតុផលដើម្បីមានក្ដីសង្ឃឹម » [ ការប្រជុំធម្មនិដ្ឋាន ស.&វ. សម្រាប់យុវមជ្ឈិមវ័យទូទាំងពិភពលោក ថ្ងៃទី១០ ខែមករា ឆ្នាំ២០២១ ] នៅក្នុងបណ្ណាល័យដំណឹងល្អ )
អ្នកណែនាំ ការអប់រំ
សូមជញ្ជឹងគិតពីអ្វីដែលអ្នកបានសិក្សាអំពីការស្វែងរក និងការជួបជាមួយអ្នកណែនាំ ។ បន្ទាប់មក សូមបំពេញចំណុចខាងក្រោមនេះនៅក្នុងសៀវភៅកត់ចំណាំរបស់អ្នក ៖
-
តើអ្វីជាផ្នែកមួយនៃការអប់រំ ឬការរៀបចំអាជីពក្នុងពេលបច្ចុប្បន្ន ឬអនាគតរបស់អ្នក ដែលអាចទទួលបានអត្ថប្រយោជន៍មកពីការប្រឹក្សារបស់អ្នកណែនាំ ?
-
តើអ្នកអាចស្នើសុំនរណាឲ្យធ្វើជាអ្នកណែនាំ ? ឬម្យ៉ាងទៀត តើអ្នកអាចសុំជំនួយក្នុងការស្វែងរកអ្នកណែនាំពីនរណា ?
-
តើអ្នកនឹងទាក់ទងទៅពួកគេនៅពេលណា ? ដោយរបៀបណា ? ( សារជាអក្សរ អ៊ីមែល ជួបដោយផ្ទាល់ )
ព័ត៌មានទំនាក់ទំនង ៖
-
សូមសរសេរសំណួរយ៉ាងហោចណាស់បីសំណួរ ដែលអ្នកអាចសួរបុគ្គលរូបនេះបាន ឬប្រធានបទដែលអ្នកចង់ពិភាក្សា ៖
-
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យបង្កើតផែនការដើម្បីស្វែងរក និងភ្ជាប់ទំនាក់ទំនងជាមួយអ្នកណែនាំផ្នែកការអប់រំ និងផ្នែកអាជីពដែលមានសក្តានុពល ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ផែនការរបស់អ្នកដើម្បីភ្ជាប់ទំនាក់ទំនងជាមួយអ្នកណែនាំដែលអាចមាន ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?