ការរៀបចំសម្រាប់ការអប់រំ និងការងារនាពេលអនាគត ៖ មេរៀនទី ១៨៨
សារៈសំខាន់នៃការអប់រំ
ពរជ័យខាងសាច់ឈាម និងខាងវិញ្ញាណនៃការអប់រំ
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
សម្រាប់មនុស្សមួយចំនួន ឱកាសដើម្បីមានភាពជោគជ័យនាពេលអនាគតហាក់ដូចជាទ្វារដែលបិទដូច្នោះដែរ ។ ជាអំណរគុណ មានសោដែលអាចបើកទា្វរដែលបិទនោះបាន ។
ប្រធាន ហ្គរដុន ប៊ី ហ៊ីងគ្លី ( ឆ្នាំ១៩១០–២០០៨ ) បានបង្រៀនថា « ការអប់រំគឺជាកូនសោ ដែលនឹងបើកទ្វារនៃឱកាសសម្រាប់បងប្អូន » ( « Inspirational Thoughts » Ensign ខែមិថុនា ឆ្នាំ១៩៩៩ ទំព័រ ៤ ) ។
ខណៈដែលការទទួលបានការអប់រំអាចជាការលំបាកខ្លាំង វាពិតជាមានតម្លៃនៅក្នុងការខិតខំប្រឹងប្រែង ។ ការទទួលបានការអប់រំរៀបចំអ្នកឲ្យក្លាយជាឧបករណ៍ដ៏ប្រសើរនៅក្នុងការសម្រេចបាននូវកិច្ចការរបស់ព្រះអម្ចាស់ ។ អ្នកក៏អាចប្រើការអប់រំរបស់អ្នកដើម្បីផ្ដល់ពរជ័យដល់អ្នកដែលនៅជុំវិញខ្លួនអ្នកផងដេរ ។
គោលបំណងមេរៀន ៖ ដើម្បីជួយអ្នកឲ្យយល់អំពីសារៈសំខាន់នៃការអប់រំ ទាំងខាងសាច់ឈាម និងខាងវិញ្ញាណ ។
រៀនអំពីរបៀបធ្វើ
ការអប់រំនឹងនាំមកនូវពរជ័យខាងសាច់ឈាម និងខាងវិញ្ញាណ
ព្រះវិញ្ញាណបរិសុទ្ធអាចជួយអ្នកឲ្យស្គាល់សារលិខិតដែលសម្រាប់តែអ្នកប៉ុណ្ណោះ ។ នៅពេលអ្នករៀននៅថ្ងៃនេះ សូមយកចិត្ដទុកដាក់លើចំណាប់អារម្មណ៍ដែលអាចជួយអ្នកជាមួយនឹងគោលដៅការអប់រំ និងគោលដៅជីវិតរបស់អ្នក ។
សូមស្រមៃថាមិត្ដរបស់អ្នក អ៊ីសាប៊ែល ស្អប់សាលារៀន ។ នាងនឿយណាយនឹងវិថីការអប់រំរបស់នាង ហើយព្រួយបារម្ភអំពីការប្រលងឲ្យជាប់មុខវិជ្ជាសំខាន់ៗដែលចាំបាច់សម្រាប់ការបញ្ចប់ការសិក្សា និងការចូលរៀននៅសាកលវិទ្យាល័យ ។ អ៊ីសាប៊ែល កំពុងគិតអំពីជម្រើសដែលមិនតម្រូវឲ្យមានការចូលរៀននៅឯសាលា ។
សូមសិក្សាប្រធានបទមួយដោយការប្រើប្រភពច្រើន ។ ការសិក្សាប្រធានបទមួយដោយការប្រើប្រភពច្រើនអាចជួយអ្នកឲ្យមានការយល់ដឹងកាន់តែខ្លាំងពីអ្វីដែលអ្នកកំពុងសិក្សា ។ ប្រភពច្រើនផ្ដល់នូវទស្សនៈផ្សេងៗគ្នា និងព័ត៌មានបន្ថែមដែលអ្នកអាចនឹងមិនទទួលបានមកពីប្រភពតែមួយ ។
សូមសិក្សាចេញមកពីប្រភពដូចខាងក្រោម ។ នៅពេលអ្នកសិក្សា សូមដាក់ស្លាកប្រភពដែលនឹងជួយអ្នកឆ្លើយតបទៅនឹងអ៊ីសាប៊ែល ថា « ការអប់រំ » និង « ការរៀនសូត្រ » ។ នៅចុងបញ្ចប់នៃមេរៀននេះ អ្នកនឹងប្រើអ្វីដែលអ្នករកឃើញដើម្បីឆ្លើយតបទៅនឹងកង្វល់របស់អ៊ីសាប៊ែល ។
ព្រះគម្ពីរ
សូមសិក្សាបទគម្ពីរខាងក្រោមចំនួនបី ឬច្រើនជាងនេះ ហើយរកមើលអ្វីដែលព្រះអម្ចាស់បានបង្រៀនអំពីការអប់រំ ។
-
សុភាសិត ៣:១៣–២០; ៤:៥–៨ ( តម្លៃនៃប្រាជ្ញា និងការយល់ដឹង )
-
កិច្ចការ ៧:២២ ( របៀបដែលម៉ូសេបានរៀបចំខ្លួនដើម្បីដឹកនាំអ៊ីស្រាអែលចេញពីស្រុកអេស៊ីព្ទ )
-
អាលម៉ា ១៧:២–៣ ( របៀបដែលពួកបុត្រារបស់ម៉ូសាយរៀបចំខ្លួនសម្រាប់បេសកកម្មរបស់ទ្រង់ )
-
គោលលទ្ធិ និងសេចក្ដីសញ្ញា ៩:៧–៩ ( វិវរណៈទៅកាន់អូលីវើរ ខៅឌើរី បន្ទាប់ពីលោកមិនអាចបកប្រែព្រះគម្ពីរមរមនបាន )
-
គោលលទ្ធិ និងសេចក្ដីសញ្ញា ៨៨:១១៨ ( ការណែនាំទៅកាន់សាសនាចក្រនៅក្នុងឆ្នាំ១៨៣៣ អំពីរបៀបស្ថាបនាស៊ីយ៉ូន )
-
គោលលទ្ធិ និងសេចក្ដីសញ្ញា ១៣០:១៨–១៩ ( យ៉ូសែប ស៊្មីធ បង្រៀនអំពីគុណតម្លៃដ៏អស់កល្បជានិច្ចនៃការអប់រំ )
-
ម៉ូសេ ៥:១២; ៦:៥–៦ ( ការណែនាំរបស់អ័ដាម និងអេវ៉ាទៅកាន់កូនៗរបស់ពួកលោក )
ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស
សូមអានកថាខណ្ឌខាងក្រោម ហើយរកមើលសេចក្ដីពិតដែលអាចជួយ អ៊ីសាប៊ែល បាន ។
ព្រះវរបិតាសួគ៌មានព្រះទ័យចង់ឲ្យបុត្រា និងបុត្រីរបស់ទ្រង់រៀនសូត្រជានិច្ច ។ អ្នកមានហេតុផលទាំងខាងសាច់ឈាម និងខាងវិញ្ញាណក្នុងការស្វែងរក និងការស្រឡាញ់ការរៀនសូត្រ ។ ការអប់រំមិនមែនគ្រាន់តែអំពីការរកប្រាក់ប៉ុណ្ណោះនោះទេ ។ ការអប់រំគឺជាផ្នែកមួយនៃគោលដៅដ៏អស់កល្បរបស់អ្នកដើម្បីប្រែក្លាយកាន់តែដូចជាព្រះវរបិតាសួគ៌ ។ …
សូមធ្វើជាមនុស្សរៀនសូត្រជានិច្ច ។ សូមស្វែងរកឱកាសដើម្បីពង្រីកគំនិត និងជំនាញរបស់អ្នក ។ ឱកាសទាំងនេះអាចរួមបញ្ចូលការអប់រំផ្លូវការនៅសាលារៀន ឬការបណ្តុះបណ្តាលវិជ្ជាជីវៈ ក៏ដូចជាការរៀនក្រៅផ្លូវការពីប្រភពដែលអ្នកទុកចិត្តផងដែរ ។ សូមរាប់បញ្ចូលព្រះអម្ចាស់នៅក្នុងការខិតខំរបស់អ្នក ហើយទ្រង់នឹងដឹកនាំអ្នក ។ នៅពេលអ្នករៀនអំពីពិភពលោកជុំវិញអ្នក សូមរៀនផងដែរអំពីព្រះអង្គសង្គ្រោះដែលបានបង្កើតពិភពលោកនេះ ។ សូមសិក្សាអំពីព្រះជន្ម និងការបង្រៀនរបស់ទ្រង់ ។ សូមធ្វើឲ្យថ្នាក់សិក្ខាសាលា ថ្នាក់វិទ្យាស្ថាន និងការសិក្សាដំណឹងល្អផ្ទាល់ខ្លួនក្លាយជាផ្នែកមួយនៃការសិក្សាពេញមួយជីវិតរបស់អ្នក ។ …
ការអប់រំបង្កើនសមត្ថភាពរបស់អ្នកដើម្បីបម្រើព្រះអម្ចាស់ ។ វាផ្តល់អំណាចឲ្យអ្នកក្នុងការផ្ដល់ពរជ័យដល់អ្នកដទៃ ជាពិសេសគ្រួសាររបស់អ្នក ។ អ្នករៀនកាន់តែច្រើន នោះអ្នកក៏កាន់តែអាចជួយស្ថាបនានគររបស់ព្រះ និងមានឥទ្ធិពលលើពិភពលោកសម្រាប់ការល្អផងដែរ ។ ( ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] ទំព័រ ៣១–៣២ )
ការអប់រំ ការរៀនសូត្រ
សេចក្ដីថ្លែងការណ៍មកពីព្យាការី
សូមអានសេចក្តីថ្លែងការណ៍ខាងក្រោមនេះ ។ សូមជ្រើសរើសសេចក្ដីថ្លែងការណ៍យ៉ាងហោចណាស់មួយ ដែលអ្នកអាចជួយអ៊ីសាប៊ែលឲ្យដោះស្រាយកង្វល់របស់នាងបាន ។
ប្រធាន រ័សុល អិម ណិលសុន ៖
អង្គបង្កបង្កើតរបស់យើងរំពឹងថា បុត្រាបុត្រីរបស់ទ្រង់នៅគ្រប់ទីកន្លែងនឹងទទួលបានការអប់រំជាកិច្ចខិតខំប្រឹងប្រែងផ្ទាល់ខ្លួន ។ ( « Education—A Religious Responsibility » [ ការប្រជុំធម្មនិដ្ឋានសាកលវិទ្យាល័យ ព្រិកហាំ យ៉ង់–អៃដាហូ ថ្ងៃទី២៦ ខែមករា ឆ្នាំ២០១០ ] នៅលើគេហទំព័រ byui.edu )
ប្រធាន ហ្គរដុន ប៊ី ហ៊ិងគ្លី ( ឆ្នាំ១៩១០–២០០៨ )
អ្នកត្រូវតែទទួលការអប់រំទាំងអស់ដែលអ្នកអាចធ្វើទៅបាន ។ ជីវិតមានភាពស្មុគស្មាញ និងការប្រកួតប្រជែងយ៉ាងច្រើន ។ អ្នកពុំអាចសន្មតថា អ្នកមានសិទ្ធិកំណត់នោះទេ ។ អ្នកត្រូវបានរំពឹងទុកឲ្យធ្វើការខិតខំប្រឹងប្រែងយ៉ាងខ្លាំង ហើយប្រើទេពកោសល្យដ៏ល្អបំផុតរបស់អ្នកដើម្បីរៀបចំផ្លូវរបស់អ្នកទៅកាន់អនាគតដ៏អស្ចារ្យ ដែលអ្នកមានលទ្ធភាពអាចទៅដល់ ។ សូមលះបង់រថយន្ត សូមលះបង់អ្វីៗទាំងអស់ដែលចាំបាច់ ដើម្បីធ្វើឲ្យខ្លួនឯងមានលក្ខណសម្បត្តិគ្រប់គ្រាន់ ដើម្បីធ្វើកិច្ចការនៅក្នុងពិភពលោកនេះ ។ ពិភពលោកនោះនឹងផ្តល់ឲ្យអ្នកនូវអ្វីដែលវាគិតថាអ្នកសមនឹងទទួលបាន ហើយតម្លៃរបស់អ្នកនឹងកើនឡើងនៅពេលដែលអ្នកទទួលបានការអប់រំ និងជំនាញក្នុងវិស័យដែលអ្នកជ្រើសរើស ។ ( « Words of the Prophet: Seek Learning » New Era ខែកញ្ញា ឆ្នាំ២០០៧ ទំព័រ ៣–៤ )
ការអប់រំ ការរៀនសូត្រ ការលះបង់
ប្រធាន ឌៀថើរ អេហ្វ អុជដូហ្វ កាលនោះនៅក្នុងគណៈប្រធានទីមួយ ៖
បើពុំមានជម្រើសទទួលការអប់រំត្រឹមត្រូវទេ សូមកុំបណ្តោយឲ្យការណ៍នោះរារាំងបងប្អូនពីការទទួលបាននូវរាល់ចំណេះដឹងដែលបងប្អូនរាល់គ្នាអាចទទួលបានឡើយ ។ ជាទូទៅ នៅក្នុងស្ថានភាពបែបនេះ នោះសៀវភៅល្អៗជាច្រើនអាចក្លាយជា « សាកលវិទ្យាល័យ » របស់បងប្អូនបាន—សៀវភៅគឺជាថ្នាក់រៀនមួយដែលតែងតែត្រៀមខ្លួនបើក ហើយវាព្រមទទួលយកអស់អ្នកដែលអនុវត្តតាម ។ ចូរព្យាយាមបង្កើនចំណេះដឹងរបស់បងប្អូនអំពីអ្វីគ្រប់យ៉ាងដែលមាន « គុណធម៌ គួរឲ្យស្រឡាញ់ ឬឈ្មោះល្អ ឬក៏គួរឲ្យសរសើរ » ។ ចូរស្វែងរកការរៀនសូត្រ « ដោយសារការសិក្សា និងដោយសារសេចក្តីជំនឿផង » ។ ( « Two Principles for Any Economy » Liahona ខែវិច្ឆិកា ឆ្នាំ២០០៩ ទំព័រ ៥៨ )
វីដេអូ
សូមមើលវីដេអូមួយ ឬច្រើន នៅខាងក្រោមនេះ ។ នៅពេលអ្នកមើល សូមសួរខ្លួនឯងថា តើវីដេអូមួយណាដែលអ្នកចង់មើលជាងគេ ហើយហេតុអ្វី ។ សូមរកមើលសេចក្ដីពិតដែលអាចមានប្រយោជន៍សម្រាប់អ៊ីសាប៊ែល ។
-
« Education for a Better Life » ( ៤:៥៥ )
4:56 -
« Love of Learning » ( ២:៥៧ )
2:58
ឥឡូវនេះកាលអ្នកបានសិក្សាធនធានទាំងនេះហើយ សូមប្រើស្លាកដែលអ្នកបានបង្កើត ដើម្បីចងក្រងការឆ្លើយតបទៅកាន់អ៊ីសាប៊ែល ។ សូមចែកចាយសារមួយជាមួយសមាជិកគ្រួសារ ឬនរណាម្នាក់ដែលអ្នកមានអារម្មណ៍ថានឹងទទួលបានពរ ដោយការរៀនពីព្រះទ័យរបស់ព្រះអម្ចាស់អំពីការអប់រំ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យយល់អំពីសារៈសំខាន់នៃការអប់រំ ទាំងខាងសាច់ឈាម និងខាងវិញ្ញាណ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ការឆ្លើយតបរបស់អ្នកទៅកាន់អ៊ីសាប៊ែល រួមបញ្ចូលទាំងប្រភពសមស្របនានា ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?