យេរេមា ៣១–៣៣; ៣៦–៣៨; បរិទេវ ១; ៣ ៖ មេរៀនទី ១៣៤
យេរេមា ៣១
ទ្រង់នឹងចារឹកក្រឹត្យវិន័យរបស់ទ្រង់ក្នុងចិត្តរបស់យើង
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
តើសកម្មភាពរបស់យើងផ្លាស់ប្តូរយ៉ាងដូចម្ដេច នៅពេលយើងទទួលអារម្មណ៍នៃសេចក្តីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទនៅក្នុងចិត្តរបស់យើង ? យេរេមា ៣១ សន្យានឹងយើងថា នៅពេលយើងងាកទៅរកព្រះអម្ចាស់ នោះទ្រង់នឹងចារឹកក្រឹត្យវិន័យរបស់ទ្រង់នៅក្នុងចិត្តរបស់យើង ( សូមមើល យេរេមា ៣១:១៨, ៣៣ ) ។ មេរៀននេះអាចជួយអ្នកឲ្យយល់ពីអត្ថន័យនៃការចារឹកដំណឹងល្អនៅក្នុងចិត្តរបស់អ្នក ។
សិក្សាព្រះគម្ពីរ
ព្រះគម្ពីរប៊ីបតូចបំផុតរបស់ពិភពលោកត្រូវបានផលិតដោយប្រើកាំអ៊ីយ៉ុង ។ អ្នកវិទ្យាសាស្ត្របានឆ្លាក់តួអក្សរទាំងអស់១.២លាន នៃព្រះគម្ពីរសញ្ញាចាស់ទៅលើផ្ទៃដែលមានទំហំប៉ុនគ្រាប់ស្ករ ។ អត្ថបទនេះគឺតូចណាស់ដែលវាត្រូវតែពង្រីក ១០,០០០ ដងដើម្បីអាចមើលឃើញ ។
ទម្រង់គួរឲ្យចាប់អារម្មណ៍ផ្សេងទៀតសម្រាប់ព្រះបន្ទូលរបស់ព្រះ រួមមាន បន្ទះដីឥដ្ឋ បន្ទះមាស ឯកសារក្រាំងប្របុស និងទម្រង់ឌីជីថល ដូចជាបណ្ណាល័យដំណឹងល្អ ។ ទោះយ៉ាងណាក៏ដោយ យេរេមាបានបង្រៀនថា ព្រះចាប់អារម្មណ៍ក្នុងការចារឹកព្រះបន្ទូលរបស់ទ្រង់នៅកន្លែងផ្សេង ។
បន្ទាប់ពីការព្រមានអំពីផលវិបាកដែលមនុស្សទុច្ចរិតនឹងរងទុក្ខនៅថ្ងៃចុងក្រោយ ( សូមមើល យេរេមា ៣០:២៣–២៤ ) យេរេមាបានព្យាករថា ព្រះអម្ចាស់នឹងប្រមូលរាស្ត្រក្នុងសេចក្ដីសញ្ញារបស់ទ្រង់ម្ដងទៀត ។
សូមអាន យេរេមា ៣១:៣១–៣៣ ហើយរកមើលកន្លែងដែលព្រះអម្ចាស់បានសន្យាថានឹងចារឹកក្រឹត្យវិន័យរបស់ទ្រង់ នៅពេលទ្រង់ប្រមូលរាស្រ្តរបស់ទ្រង់ ។
អ្នកអាចចង់ដាក់តំណភ្ជាប់អ្វីដែលអ្នកបានរកឃើញ ទៅនឹង កូរិនថូស ទី២ ៣:៣ ដើម្បីមើលរបៀបដែលប៉ុលបានបង្រៀនសេចក្តីពិតស្រដៀងគ្នានេះ ។
អតីតប្រធានយុវនារីទូទៅ បូនី អិល អូស្ការសុន បានបង្រៀនដូចខាងក្រោម ៖
យើងចាំបាច់ត្រូវដកយកដំណឹងល្អចេញពីគំនិតរបស់យើងមកដាក់នៅក្នុងដួងចិត្តរបស់យើង ! វាស្រួលទេ បើគ្រាន់តែរស់នៅតាមដំណឹងល្អដោយគ្មានអារម្មណ៍នោះ ដោយសារវាត្រូវបានរំពឹងទុកដូច្នោះ ឬដោយសារវាជាវប្បធម៌ដែលយើងធំឡើងជាមួយ ឬដោយសារតែវាជាទម្លាប់មួយ ។…
យើងទាំងអស់គ្នាចាំបាច់ត្រូវព្យាយាមដើម្បីធ្វើឲ្យដួងចិត្ត និងធម្មជាតិរបស់យើងបានផ្លាស់ប្ដូរ ដើម្បីយើងឈប់មានបំណងធ្វើតាមផ្លូវរបស់លោកិយ ប៉ុន្ដែដើម្បីធ្វើឲ្យព្រះសព្វព្រះទ័យវិញ ។ ( « Do I Believe? » Liahona ខែឧសភា ឆ្នាំ២០១៦ ទំព័រ ៨៨ )
សូមឆ្លើយសំណួរដូចខាងក្រោមដោយមានកំណត់ចំណាំនៅជិតនឹង យេរេមា ៣១:៣៣ ៖
-
តើការស្គាល់ក្រឹត្យវិន័យរបស់ព្រះ ខុសពីការចារឹកក្រឹត្យវិន័យរបស់ព្រះក្នុងចិត្តយ៉ាងដូចម្ដេច ?
ជម្រើស ក
តើមានឧទាហរណ៍អ្វីខ្លះ ពីមនុស្សដែលបានចារឹកក្រឹត្យវិន័យរបស់ព្រះក្នុងចិត្តរបស់ពួកគេ ?
ពេលមនុស្សចារឹកក្រឹត្យវិន័យរបស់ព្រះនៅក្នុងចិត្តរបស់ពួកគេ នោះគេប្រព្រឹត្តខុសពីមុន ។
អែលឌើរ គីម ប៊ី ក្លាក នៃពួកចិតសិបនាក់បានបង្រៀន ៖
នៅពេលយើងរស់នៅតាមសេចក្ដីសញ្ញារបស់យើង វាជះឥទ្ធិពលដល់អ្វីៗគ្រប់យ៉ាងដែលយើងនិយាយ និងធ្វើ ។ យើងរស់នៅក្នុងជីវិតនៃសេចក្ដីសញ្ញាមួយ ពោរពេញដោយសកម្មភាពនៃសេចក្ដីជំនឿដ៏សាមញ្ញជារៀងរាល់ថ្ងៃ ដែលធ្វើឲ្យយើងផ្តោតលើព្រះយេស៊ូវគ្រីស្ទ ៖ ការអធិស្ឋានចេញពីចិត្តនៅក្នុងព្រះនាម របស់ទ្រង់ ការទទួលទានបន្ទូល របស់ទ្រង់ ការងាកទៅរក ទ្រង់ ដើម្បីប្រែចិត្តពីអំពើបាបរបស់យើង ការរក្សាបទបញ្ញត្តិ របស់ទ្រង់ ការទទួលទានសាក្រាម៉ង់ និងការរក្សាថ្ងៃឈប់សម្រាក របស់ទ្រង់ ឲ្យបរិសុទ្ធ ការថ្វាយបង្គំនៅក្នុងព្រះវិហារបរិសុទ្ធ របស់ទ្រង់ ឲ្យបានញឹកញាប់តាមដែលយើងអាចធ្វើបាន និងការអនុវត្តបព្វជិតភាពដ៏បរិសុទ្ធ របស់ទ្រង់ ដើម្បីបម្រើបុត្រាបុត្រីរបស់ព្រះ ។
ទង្វើនៃការលះបង់ខាងសេចក្ដីសញ្ញាទាំងនេះបើកដួងចិត្ត និងគំនិតរបស់យើងទៅរកព្រះចេស្ដាដ៏ប្រោសលោះរបស់ព្រះអង្គសង្គ្រោះ និងព្រះចេស្ដាបន្សុទ្ធនៃព្រះវិញ្ញាណបរិសុទ្ធ ។ មួយបន្ទាត់ម្តងៗ ព្រះអង្គសង្គ្រោះផ្លាស់ប្ដូរនិស្ស័យរបស់យើង យើងកាន់តែមានការប្រែចិត្តជឿយ៉ាងជ្រាលជ្រៅចំពោះទ្រង់ ហើយសេចក្ដីសញ្ញារបស់យើងមានភាពរស់រវើកនៅក្នុងដួងចិត្តរបស់យើង ។ ( « Look unto Jesus Christ » Liahona ខែឧសភា ឆ្នាំ២០១៩ ទំព័រ ៥៥ )
តើអ្នកស្គាល់នរណាម្នាក់ពីព្រះគម្ពីរ ឬជីវិតផ្ទាល់ខ្លួនរបស់អ្នកដែលត្រូវតាមបទដ្ឋាននេះដែរទេ ?
បន្ទាប់មក សូមចំណាយពេលមួយនាទីដើម្បីគិតអំពីអ្វីដែលបុគ្គលនេះបានធ្វើដើម្បីឧទ្ទិសខ្លួនរបស់ពួកគេចំពោះព្រះអម្ចាស់ ហើយបន្ទាប់មក សិក្សាដំណើររឿងមួយ ឬច្រើន នៃដំណើររឿងទាំងនេះ ៖
-
ពួកសិស្សនៅក្រុងយេរូសាឡិមបន្ទាប់ពីការមានព្រះជន្មរស់ឡើងវិញរបស់ព្រះអង្គសង្គ្រោះ ( សូមមើល កិច្ចការ ២:៣៧–៤២ )
-
ពួកសាសន៍លេមិននៅសម័យស្ដេចឡាម៉ូណៃ ( សូមមើល អាលម៉ា ២៣:៥–៨ )
-
ពួកសាសន៍នីហ្វៃបន្ទាប់ពីការបង្ហាញព្រះកាយរបស់ព្រះអង្គសង្គ្រោះ ( សូមមើល នីហ្វៃទី៤ ១:២, ១៥–១៨ )
តើអ្នកបានរៀនអ្វីខ្លះពីអែលឌើរ ក្លាក និងគំរូក្នុងព្រះគម្ពីរអំពីអត្ថន័យនៃការចារឹកក្រឹត្យវិន័យរបស់ព្រះនៅក្នុងចិត្តអ្នក ?
ជម្រើស ខ
ហេតុអ្វីបានជាខ្ញុំចង់ចារឹកក្រឹត្យវិន័យរបស់ព្រះក្នុងចិត្តរបស់ខ្ញុំ ?
ពេលខ្លះ យើងអាចត្រូវបានល្បួងឲ្យគិតថា ក្រឹត្យវិន័យរបស់ព្រះគឺជាបន្ទុក ។ ប្រធាន ឌៀថើរ អេហ្វ អុជដូហ្វ ដែលពេលនោះនៅក្នុងគណៈប្រធានទីមួយ បានចែកចាយទស្សនវិស័យខុសគ្នាមួយដូចខាងក្រោម ៖
រាល់ព្រះបញ្ញត្តិទ្រង់ត្រូវបានប្រទានមកដើម្បីឲ្យពរជ័យអាចកើតមានដល់យើង ។ ព្រះបញ្ញត្តិជាឱកាសដើម្បីអនុវត្តសិទ្ធិជ្រើសរើសយើង និងដើម្បីទទួលពរជ័យ ។ ( « Grateful in Any Circumstances » Liahona ខែមេសា ឆ្នាំ២០១៤ ទំព័រ ៧០ )
សូមអានវគ្គបទគម្ពីរខាងក្រោមនេះ ហើយគូសសម្គាល់ពរជ័យដែលព្រះអម្ចាស់បានសន្យាចំពោះជនសុចរិត ។
-
យេរេមា ៣១:១៣–១៤
-
យេរេមា ៣១:១៦–១៧
-
យេរេមា ៣១:៣៤
-
យេរេមា ៣២:១៧–១៩
-
យេរេមា ៣២:២៦–២៧
-
យេរេមា ៣៣:៦–៨
តើការសន្យាដែលបានចារឹកនៅក្នុងចិត្តរបស់អ្នកទាំងនេះ ផ្លាស់ប្តូររបៀបដែលអ្នកប្រព្រឹត្តដូចម្តេច ?
ឥឡូវត្រូវធ្វើដូចម្តេចទៀត ?
សូមបង្ហាញសេចក្ដីថ្លែងការណ៍ខាងក្រោមដោយអែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ ហើយកត់ត្រាចម្លើយរបស់អ្នកនៅក្នុងសៀវភៅកត់ចំណាំរបស់អ្នក ។
តើអ្នកអាចធ្វើឲ្យដំណឹងល្អនៃព្រះយេស៊ូវគ្រីស្ទមិនគ្រាន់តែជាឥទ្ធិពលក្នុងជីវិតអ្នកប៉ុណ្ណោះទេ ប៉ុន្តែជាឥទ្ធិពលនៃការគ្រប់គ្រង ហើយជាចំណុចសំខាន់របស់អ្នកដោយរបៀបណា ? ( « When Thou Art Converted » Liahona ខែឧសភា ឆ្នាំ២០០៤ ទំព័រ ១១ )
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យយល់ពីអត្ថន័យនៃការចារឹកដំណឹងល្អនៅក្នុងចិត្តរបស់អ្នក ។
សូមចែកចាយចំណុចមួយ នៃអ្វីខាងក្រោមនេះជាមួយគ្រូបង្រៀនរបស់អ្នក ៖
-
គំរូដែលអ្នកចូលចិត្តបំផុតអំពីនរណាម្នាក់ដែលបានចារឹកក្រឹត្យវិន័យរបស់ព្រះនៅក្នុងចិត្តរបស់ពួកគេ ។
-
ការសន្យាដែលអ្នកចូលចិត្តពីក្រឹត្យវិន័យរបស់ព្រះ និងរបៀបដែលវាចារឹកនៅក្នុងចិត្តរបស់អ្នក នឹងផ្លាស់ប្តូររបៀបដែលអ្នកប្រព្រឹត្ត ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?