ទំនុកដំកើង ១–២; ៨; ១៩–៣៣; ៤០; ៤៦ ៖ មេរៀនទី ១០៣
ទំនុកដំកើង ២៤
« តើអ្នកណានឹងឡើងទៅឯភ្នំនៃព្រះយេហូវ៉ា ? »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ព្រះវិហារបរិសុទ្ធគឺជាកន្លែងដ៏ពិសិដ្ឋ និងបរិសុទ្ធ ។ ព្រះវិហារបរិសុទ្ធជួយយើងឲ្យស្រមៃឃើញពីសភាពដែលនឹងកើតមាន នៅពេលយើងនៅក្នុងវត្តមានរបស់ព្រះ ។ តាមរយៈការថ្វាយបង្គំ និងការបម្រើក្នុងព្រះវិហារបរិសុទ្ធ យើងអាចទទួលបានអំណាចរបស់ព្រះ និងរៀបចំខ្លួនដើម្បីរស់នៅជាមួយទ្រង់ម្តងទៀត ។ នៅក្នុង ទំនុកដំកើង ២៤ ស្ដេចដាវីឌបង្រៀនពីសារៈសំខាន់នៃការមានភាពស្អាតបាត និងភាពបរិសុទ្ធ ដើម្បីចូលទៅក្នុងដំណាក់របស់ព្រះអម្ចាស់ ។ មេរៀននេះអាចជួយរៀបចំអ្នកឲ្យចូលទៅក្នុងព្រះវិហារបរិសុទ្ធ និងមានអារម្មណ៍ថាមានភាពស័ក្ដិសមដើម្បីរស់នៅជាមួយព្រះម្តងទៀត ។
សិក្សាព្រះគម្ពីរ
នៅឆ្នាំ១៨៤៧ វេជ្ជបណ្ឌិតមួយក្រុមបានប្រឈមមុខនឹងបញ្ហាមួយ ។ អ្នកម្តាយម្នាក់ក្នុងចំណោមប្រាំនាក់ ដែលបានព្យាបាលនៅក្នុងមន្ទីរពេទ្យពេលសម្រាលកូន បានស្លាប់ដោយសារការឆ្លងមេរោគ ។ គួរឲ្យចាប់អារម្មណ៍ អ្នកជំងឺដែលត្រូវបានព្យាបាលដោយឆ្មប កម្រនឹងធ្លាក់ខ្លួនឈឺណាស់ ។ តាមរយៈការសង្កេត វេជ្ជបណ្ឌិតម្នាក់បានរកឃើញបញ្ហានេះ ។ បន្ទាប់ពីការធ្វើកោសល្យវិច័យលើអ្នកស្លាប់ វេជ្ជបណ្ឌិតជាច្រើនបានពិនិត្យអ្នកជំងឺដែលនៅរស់ដោយមិនបានលាងដៃនោះទេ ។ ដំណោះស្រាយគឺជារឿងដ៏សាមញ្ញមួយ ។ មន្ទីរពេទ្យបានអនុម័តការអនុវត្តទម្លាប់លាងដៃមុនពេលការណាត់ជួបនីមួយៗ ។ ការស្លាប់បានថយចុះ៨៩ភាគរយ ។ នៅសព្វថ្ងៃនេះ មន្ទីរពេទ្យជាច្រើនដាក់សញ្ញា ដែលមានបទដ្ឋានលាងដៃនៅខាងលើកន្លែងលាងដៃនីមួយៗ ។ ដូចគ្នានេះដែរ ព្រះអម្ចាស់បានដាក់បទដ្ឋានរបស់ទ្រង់សម្រាប់ការរៀបចំខ្លួន និងភាពស្អាតបាតដើម្បីចូលទៅក្នុងព្រះវិហារបរិសុទ្ធ ។
នៅពេលអ្នកសិក្សានៅថ្ងៃនេះ សូមរកមើលរបៀបដែលកិច្ចតម្រូវរបស់ព្រះអម្ចាស់ឲ្យបានស្អាតបាតខាងវិញ្ញាណ អាចជាភស្តុតាងនៃសេចក្តីស្រឡាញ់របស់ទ្រង់ចំពោះយើង ។
នៅក្នុង ទំនុកដំកើង ២៤ ស្តេចដាវីឌបានប្រើរូបភាពនៃភ្នំមួយ ។ វគ្គបទគម្ពីរខ្លះប្រើភ្នំ ឬកូនភ្នំជានិមិត្តរូបនៃព្រះវិហារបរិសុទ្ធ ( សូមមើល អេសាយ ២:២–៣ ) ។ វាអាចទៅរួចដែលដាវីឌសំដៅទៅលើព្រះវិហារបរិសុទ្ធ ឬទីវត្តមានរបស់ព្រះ ឬទាំងពីរ ។
ដូចជាគ្រូពេទ្យបានបិទសញ្ញាលាងដៃនៅក្នុងមន្ទីរពេទ្យដែរ សូមធ្វើសញ្ញាបទដ្ឋានចូលព្រះវិហារបរិសុទ្ធនៅក្នុងសៀវភៅកំណត់ហេតុសិក្សារបស់អ្នក ។ អ្នកអាចគូរគំនូរសាមញ្ញមួយនៃភ្នំ ដូចជារូបនេះបន្ទាប់ពីកថាខណ្ឌនេះ ។ សូមគូរនៅលើកំពូលភ្នំរបស់អ្នកនូវគំនូរដ៏សាមញ្ញនៃព្រះវិហារបរិសុទ្ធ និងពាក្យថា « ព្រះវរបិតាសួគ៌ និងព្រះយេស៊ូវគ្រីស្ទ » ។ អ្នកអាចគូររូបមនុស្សចង្កឹះនៅជើងភ្នំ ដើម្បីតំណាងឲ្យអ្នក ។
សូមអាន ទំនុកដំកើង ២៤:៣–៦ ហើយរកមើលអ្វីដែលយើងគួរធ្វើ ដើម្បីរៀបចំខ្លួនចូលព្រះវិហារបរិសុទ្ធ ហើយត្រឡប់ទៅកាន់ទីវត្តមានរបស់ព្រះអម្ចាស់វិញនៅថ្ងៃណាមួយ ។ សូមបន្ថែមសេចក្ដីពិតនានាដែលអ្នករកឃើញ ទៅកាន់រូបគំនូររបស់អ្នកតាមរបៀបដែលបង្ហាញថា អ្នកកំពុងរីកចម្រើនទៅកាន់ព្រះវិហារបរិសុទ្ធ និងព្រះ ។ ឧទាហរណ៍ អ្នកអាចបន្ថែមសេចក្ដីពិតដូចខាងក្រោមនេះមកពី ខទី ៣–៦ ៖
-
យើងត្រូវតែរៀបចំខ្លួនយើងខាងវិញ្ញាណ ដើម្បីថ្វាយបង្គំព្រះអម្ចាស់នៅក្នុងព្រះវិហារបរិសុទ្ធរបស់ទ្រង់ ហើយរស់នៅក្នុងទីវត្តមានរបស់ទ្រង់ ។
ទំនុកដំកើង ២៤:៣–៤ គឺជាវគ្គបទគម្ពីរចំណេះចំណានខាងគោលលទ្ធិ ។ សូមពិចារណាដាក់ស្លាកវគ្គបទគម្ពីរចំណេះចំណានខាងគោលលទ្ធិ ជាមួយនឹងប្រធានបទដែលវាបង្រៀន ដើម្បីអ្នកអាចងាយនឹងរកវាឃើញនៅពេលក្រោយ ។ សូមទន្ទេញសេចក្ដីយោង និងឃ្លាបទគម្ពីរគន្លឹះនេះ « តើអ្នកណានឹងឈរនៅក្នុងទីបរិសុទ្ធរបស់ទ្រង់បាន ? គឺជាអ្នកដែលមានដៃស្អាត និងចិត្តបរិសុទ្ធ » ។ សូមបង្កើតសមីការខាងក្រោមនេះជាមួយនឹងរូបគំនូរសាមញ្ញៗ ជំនួសឲ្យពាក្យទាំងឡាយ ៖
-
ទីបរិសុទ្ធ = ដៃស្អាត + ចិត្តបរិសុទ្ធ
នៅពេលអ្នកគូរ សូមសូត្រឃ្លាបទគម្ពីរគន្លឹះនេះឮៗ ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។ បន្ទាប់មក សូមបញ្ចប់ផ្នែក « ឥឡូវត្រូវធ្វើដូចម្តេចទៀត ? » នៅចុងបញ្ចប់នៃមេរៀននេះ ។
ជម្រើស ក
តើការយល់ពីបទគម្ពីរអាចជួយខ្ញុំឲ្យរៀបចំខ្លួនដើម្បីថ្វាយបង្គំនៅក្នុងព្រះវិហារបរិសុទ្ធយ៉ាងដូចម្តេច ?
សូមដាក់តំណភ្ជាប់ឃ្លានីមួយៗមកពី ទំនុកដំកើង ២៤:៤ ទៅនឹងខគម្ពីរខាងក្រោមនេះ ។
-
ដៃស្អាត—គោលលទ្ធិ និងសេចក្តីសញ្ញា ៨៨:៨៦
-
ចិត្តបរិសុទ្ធ—ម៉ូសាយ ៥:២
-
មិនបណ្តោយឲ្យព្រលឹងខ្លួនទៅតាមសេចក្តីភូតភរ—គោលលទ្ធិ និងសេចក្តី សញ្ញា ១១២:១០
-
មិនបានស្បថប្រវ័ញ្ចគេឡើយ—អាលម៉ា ២៧:២៧
សូមសរសេរកំណត់ចំណាំមួយនៅជាប់នឹងឃ្លា មួយ ឬច្រើន នៅក្នុង ទំនុកដំកើង ២៤ ហើយពន្យល់ដូចខាងក្រោម ៖
-
តើអ្នកគិតថា ហេតុអ្វីបានជាទិដ្ឋភាពនៃការរៀបចំខ្លួននេះមានសារៈសំខាន់ក្នុងការថ្វាយបង្គំក្នុងព្រះវិហារបរិសុទ្ធ និងការរស់នៅជាមួយព្រះវរបិតាសួគ៌ និងព្រះយេស៊ូវគ្រីស្ទនៅថ្ងៃណាមួយ ?
-
តើមានរបៀបជាក់លាក់អ្វីខ្លះ ដែលក្មេងវ័យជំទង់ពួកបរិសុទ្ធថ្ងៃចុងក្រោយអាចផ្ដោតទៅលើទិដ្ឋភាពនៃការរៀបចំខ្លួននោះ ?
ជម្រើស ខ
តើខ្ញុំអាចដឹងថា ខ្ញុំបានរៀបចំខ្លួនរួចហើយដើម្បីចូលព្រះវិហារបរិសុទ្ធដោយរបៀបណា ?
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ បានបង្រៀន ៖
សមាជិកគ្រប់រូបដែលចង់ទៅព្រះវិហារបរិសុទ្ធ មិនថាក្នុងវ័យណានោះទេ ចាំបាច់ត្រូវត្រៀមខ្លួនសម្រាប់បទពិសោធន៍ដ៏ពិសិដ្ឋនេះ ។ សំណួរជាក់លាក់នឹងត្រូវបានសួរដោយប៊ីស្សពរបស់អ្នក ឬប្រធានស្ដេករបស់អ្នក ដែលកាន់កូនសោនៃសិទ្ធិអំណាចបព្វជិតភាព ហើយជាចៅក្រមទូទៅនៅក្នុងសាសនាចក្រ ។ សំណួរសំខាន់ៗទាំងនេះនឹងរួមមាន ៖ តើអ្នកស្មោះត្រង់ឬទេ ? តើអ្នកស្អាតស្អំខាងសីលធម៌ឬទេ? តើអ្នកកាន់តាមពាក្យសម្ដីនៃប្រាជ្ញាវាងវៃឬទេ ? តើអ្នកគោរពតាមក្រឹត្យវិន័យនៃដង្វាយមួយភាគក្នុងដប់ឬទេ ? ហើយតើអ្នកគាំទ្រដល់សិទ្ធិអំណាចទាំងឡាយក្នុងសាសនាចក្រឬទេ ? ចម្លើយចំពោះសំណួរសំខាន់ទាំងនេះឆ្លុះបញ្ចាំងអំពីអាកប្បកិរិយា និងសកម្មភាពរបស់អ្នក ។ ( « See the End from the Beginning » Liahona ខែឧសភា ឆ្នាំ២០០៦ ទំព័រ ៤៤ )
ប្រសិនបើមាន សូមមើលវីដេអូ « Standing in Holy Places » ( ៥:៣៦ ) ។ សូមរកមើលរបៀបដែលស្រ្តីវ័យក្មេងរូបនេះបានរៀបចំខ្លួន ដើម្បីចូលព្រះវិហារបរិសុទ្ធដោយភាពស័ក្ដិសម ។
សូមធ្វើការពិនិត្យមើលពីការរៀបចំខាងវិញ្ញាណ ។ សូមពិនិត្យមើលសំណួរសម្រាប់ទទួលប័ណ្ណចូលព្រះវិហារបរិសុទ្ធ ដែលមាននៅក្នុង « សំណួរសម្រាប់ទទួលប័ណ្ណចូលព្រះវិហារបរិសុទ្ធសម្រាប់យុវវ័យ » ( ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២០ ] ទំព័រ ៣៧ ) ។
ឥឡូវត្រូវធ្វើដូចម្តេចទៀត ?
សូមជញ្ជឹងគិតអំពីរបៀបដែលអ្នកកំពុងរៀបចំខ្លួនខាងវិញ្ញាណរបស់អ្នក ។ សូមជញ្ជឹងគិតពីអ្វីដែលអ្នកទទួលអារម្មណ៍ថាព្រះវរបិតាសួគ៌សព្វព្រះទ័យ និងផ្នែកដែលអ្នកអាចកែលម្អបាន ។
សូមឆ្លើយសំណួរខាងក្រោមនេះនៅក្នុងសៀវភៅកត់ចំណាំរបស់អ្នក ៖
-
តើអ្នកមានអារម្មណ៍ថា ព្រះវរបិតាសួគ៌ចង់ឲ្យអ្នកធ្វើអ្វីខ្លះ ដើម្បីរៀបចំខ្លួនអ្នកសម្រាប់ព្រះវិហារបរិសុទ្ធ និងសម្រាប់ការរស់នៅជាមួយទ្រង់នៅថ្ងៃណាមួយ ?
-
តើអ្នកអាចពឹងផ្អែកលើព្រះអង្គសង្គ្រោះដើម្បីទូលសុំជំនួយដោយរបៀបណា ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយរៀបចំអ្នកឲ្យចូលទៅក្នុងព្រះវិហារបរិសុទ្ធ និងមានអារម្មណ៍ថាមានភាពស័ក្ដិសមដើម្បីរស់នៅជាមួយព្រះម្តងទៀត ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
កំណត់ចំណាំដែលអ្នកបានសរសេរនៅជាប់នឹងឃ្លាមួយមកពី ទំនុកដំកើង ២៤:៤ ។
-
ចម្លើយរបស់អ្នកមកពីសំណួរមួយនៅក្នុងផ្នែក « ឥឡូវត្រូវធ្វើដូចម្ដេចទៀត ? » ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?