ទំនុកដំកើង ៤៩–៥១; ៦១–៦៦; ៦៩–៧២; ៧៧–៧៨; ៨៥–៨៦ ៖ មេរៀនទី ១០៤
ទំនុកដំកើង ៥១
« សូមលាងសម្អាតអំពើបាបរបស់ទូលបង្គំ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ដាវីឌបាននិពន្ធទំនុកដំកើង ដែលបង្ហាញពីបំណងប្រាថ្នាចង់បានការអភ័យទោសចំពោះអំពើបាបដែលទ្រង់បានប្រព្រឹត្ត ។ ទ្រង់បានបង្ហាញពីបំណងប្រាថ្នារបស់ទ្រង់ដើម្បីប្រែចិត្តដោយស្មោះសរ ។ មេរៀននេះអាចជួយអ្នកឲ្យយល់ថា នៅពេលអ្នកប្រែចិត្ត នោះព្រះអង្គសង្គ្រោះអាចលាងជម្រះអ្នកឲ្យស្អាតបាន ។
សិក្សាព្រះគម្ពីរ
សូមស្រមៃថា មានសំណួរអនាមិកខាងក្រោមមកពីយុវជនម្នាក់ត្រូវបានដាក់បញ្ចូលនៅក្នុង ច្បាប់បោះពុម្ពខែនេះ នៃទស្សនាវដ្តី ដើម្បីកម្លាំងនៃយុវជន ៖
ថ្មីៗនេះ ខ្ញុំបានប្រព្រឹត្តអំពើបាបធ្ងន់ធ្ងរមួយចំនួន ដែលខ្ញុំពិតជាមានអារម្មណ៍មិនល្អឡើយ ។ ខ្ញុំមិនប្រាកដថាត្រូវប្រែចិត្តដោយរបៀបណាទេ ។ និយាយឲ្យត្រង់ទៅ ខ្ញុំថែមទាំងឆ្ងល់ថា តើអំពើបាបរបស់ខ្ញុំធ្ងន់ធ្ងរពេក រហូតដល់ខ្ញុំលែងអាចប្រែចិត្តបានដែរឬអត់ ។ មានជំនួយទេ ?
នៅពេលអ្នកសិក្សាការអង្វរកររបស់ស្ដេចដាវីឌនៅក្នុង ទំនុកដំកើង ៥១ សូមរកមើលសេចក្ដីពិតដែលអាចជួយឆ្លើយសំណួររបស់យុវវ័យរូបនេះ ។ សូមជញ្ជឹងគិតពីដំបូន្មានអ្វី ដែលអ្នកនឹងចែកចាយជាមួយពួកគេ ។
ស្តេចដាវីឌគឺជាមេដឹកនាំដ៏មានអំណាច និងដ៏សុចរិតមួយអង្គ ប៉ុន្តែក្រោយមកទ្រង់បានប្រព្រឹត្តអំពើបាបដ៏ធ្ងន់ធ្ងរ ។ នៅពេលដាវីឌបានឃើញនាងបាតសេបាកំពុងងូតទឹកពីលើដំបូល នោះទ្រង់មានចំណង់ចង់បាននាង ។ នាងបាតសេបាបានរៀបការហើយ ប៉ុន្ដែដាវីឌនៅតែតាមចង់បាននាង ។ ទ្រង់បានបញ្ជូនអ្នកបម្រើឲ្យទៅយកនាងមកជួបទ្រង់ ហើយទីបំផុត ក៏មានទំនាក់ទំនងផ្លូវភេទជាមួយនាង ( សាំយូអែល ទី២ ១១:១–៥ ) ។ ដាវីឌក៏បានរៀបចំឲ្យប្តីរបស់នាងទៅស្លាប់នៅក្នុងសមរភូមិផងដែរ ។ ទំនុកដំកើង ៥១ គឺអំពីដាវីឌទូលអង្វរព្រះអម្ចាស់សូមការអភ័យទោស ។
សំណួរខាងក្រោមនេះមានបំណងដើម្បីជួយណែនាំការសិក្សារបស់អ្នកក្នុង ទំនុកដំកើង ៥១ ។ សូមឆ្លើយសំណួរនីមួយៗនៅក្នុងបទគម្ពីររបស់អ្នក ដោយការបង្កើតតំណភ្ជាប់ និងកំណត់ចំណាំពេញមួយជំពូកនេះ ។
-
តើបទគម្ពីរខាងក្រោមនេះមួយណា ដែលបង្រៀនសេចក្ដីពិតស្រដៀងគ្នានឹងអ្វីដែលបានបង្រៀននៅក្នុង ទំនុកដំកើង ៥១:១–២, ៧, ៩ ?
សូមសិក្សាជម្រើសដ៏ល្អបំផុត ហើយដាក់តំណភ្ជាប់វាទៅនឹង ខទី ២ ។
-
អេសេគាល ៣:១៦–១៧ ៖ ព្យាការីគឺជា « អ្នកយាមដល់ពូជពង្សអ៊ីស្រាអែល » ។
-
ម៉ាឡាគី ៣:៨–១០ ៖ ការណ៍នេះបង្ហាញពីពរជ័យនៃការថ្វាយដង្វាយមួយភាគក្នុងដប់ ។
-
អេសាយ ១:១៨ ៖ « ទោះបើអំពើបាបរបស់ឯងដូចជាពណ៌ក្រហមទែងក៏ដោយ គង់តែនឹងបានសដូចហិមៈ » ។
-
-
សូមអាន គោលលទ្ធិ និងសេចក្ដីសញ្ញា ៥៨:៤២–៤៣ និងសម្រង់សម្ដីដូចខាងក្រោមមកពី ក្បួនខ្នាតទូទៅ ។ តើវគ្គបទគម្ពីរមួយណាពីក្នុង ទំនុកដំកើង ៥១ ដែលមានរាយបញ្ជីបន្ទាប់ពីសម្រង់សម្ដីនេះ ដែលបង្រៀនគោលការណ៍ដូចគ្នា ?
នៅពេលសមាជិកសាសនាចក្រប្រព្រឹត្តអំពើបាបធ្ងន់ធ្ងរ នោះការប្រែចិត្តរបស់ពួកគេក៏រួមមាននូវការសារភាពទៅកាន់ប៊ីស្សព ឬប្រធានស្ដេករបស់ពួកគេផងដែរ ។ ពេលនោះលោកអាចអនុវត្តកូនសោនៃដំណឹងល្អនៃការប្រែចិត្តជំនួសឲ្យពួកគេ ( សូមមើល គោលលទ្ធិ និងសេចក្តីសញ្ញា ១៣:១; ៨៤:២៦–២៧; ១០៧:១៨, ២០ ) ។ ការណ៍នេះជួយពួកគេឲ្យសះស្បើយ និងត្រឡប់មករកផ្លូវនៃដំណឹងល្អវិញ តាមរយៈអំណាចនៃដង្វាយធួនរបស់ព្រះអង្គសង្គ្រោះ ។
… ការសារភាពដោយស្ម័គ្រចិត្តបង្ហាញថា បុគ្គលម្នាក់មានបំណងប្រាថ្នាចង់ប្រែចិត្ត ។ ( ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ វគ្គ ៣២.៤.១ នៅលើបណ្ណាល័យដំណឹងល្អ )
-
ទំនុកដំកើង ៥១:៣–៤
-
ទំនុកដំកើង ៥១:១០–១២
-
ទំនុកដំកើង ៥១:១៦–១៧
-
-
គោលការណ៍ខាងក្រោមនេះទាំងអស់មាននៅក្នុង ទំនុកដំកើង ៥១ ។ តើគោលការណ៍មួយណាដែលស្របនឹងសំណើរបស់ដាវីឌនៅក្នុង ទំនុកដំកើង ៥១:១០–១២ ?
សូមសរសេរកំណត់ចំណាំមួយ ដែលចម្លងពីចម្លើយរបស់អ្នក ឬអ្វីមួយស្រដៀងគ្នានេះនៅជាប់នឹង ខទី ១០ ។
-
ខ្ញុំត្រូវតែមានចិត្តសង្រេង និងវិញ្ញាណទន់ទាប ដើម្បីប្រែចិត្តយ៉ាងពិតប្រាកដនៅចំពោះព្រះ ។
-
ការទទួលស្គាល់អំពើបាបរបស់យើងនៅចំពោះព្រះ គឺចាំបាច់សម្រាប់ការប្រែចិត្ត ។
-
នៅពេលយើងប្រែចិត្ត ព្រះអាចជួយយើងឲ្យផ្លាស់ប្តូរ ទទួលអារម្មណ៍នៃអំណរ និងមានព្រះវិញ្ញាណបរិសុទ្ធគង់នៅជាមួយយើង ។
-
-
តើវគ្គបទគម្ពីរខាងក្រោមនេះមួយណា ដែលបង្រៀនពីសេចក្ដីពិតដូចគ្នា ដែលបានបង្រៀននៅក្នុង នីហ្វៃទី៣ ៩:១៩–២០ ហើយដែលបានពន្យល់នៅក្នុងសេចក្តីថ្លែងការណ៍ខាងក្រោមដោយអែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ?
ការមានចិត្តសង្រេង គឺត្រូវមានចិត្តរាបទាប ប្រែចិត្ត និងស្លូតបូត ទទួលយកដោយអន្ទះសាចំពោះព្រះហឫទ័យរបស់ព្រះ ។ វិញ្ញាណទន់ទាបដាក់ផលប្រយោជន៍ផ្ទាល់ខ្លួននៅក្នុងព្រះហស្តរបស់ព្រះ ដោយជឿថា ព្រះហឫទ័យរបស់ទ្រង់ មិនមែនតាមចិត្តយើងទេ នឹងជួយយើងឲ្យក្លាយជាមនុស្សដែលយើងគួរតែក្លាយ ។ ( The Divine Gift of Forgiveness [ ឆ្នាំ២០១៩ ] ទំព័រ ១៥៣ )
-
ទំនុកដំកើង ៥១:៣–៤
-
ទំនុកដំកើង ៥១:១០–១២
-
ទំនុកដំកើង ៥១:១៦–១៧
-
-
តើវគ្គបទគម្ពីរមួយណានៅក្នុង ទំនុកដំកើង ៥១ ដែលអ្នកចង់ដាក់តំណភ្ជាប់ទៅនឹងសេចក្ដីថ្លែងការណ៍ខាងក្រោមដោយប្រធាន ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ ?
[ មិន ] ថាកំហុសច្រើនប៉ុនណាដែលអ្នកមានអារម្មណ៍ថាអ្នកបានធ្វើ … ឬការឃ្លាតឆ្ងាយពីផ្ទះ និងគ្រួសារ និងព្រះដែលអ្នកមានអារម្មណ៍ថា អ្នកបានធ្វើដំណើរមកឆ្ងាយយ៉ាងណានោះទេ ខ្ញុំសូមថ្លែងទីបន្ទាល់ថា អ្នកមិនបានធ្វើដំណើរឆ្ងាយផុតពីទំហំនៃសេចក្ដីស្រឡាញ់របស់ព្រះឡើយ ។ វាមិនអាចទៅរួចសម្រាប់អ្នក ដើម្បីលិចទៅជ្រៅជាងពន្លឺដ៏និរន្ដន៍នៃដង្វាយធួនរបស់ព្រះគ្រីស្ទ ដែលអាចចែងចាំងដល់បានទេ ។ ( « The Laborers in the Vineyard » Liahona ខែឧសភា ឆ្នាំ២០១២ ទំព័រ ៣៣ )
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើខ្ញុំអាចសួរសំណួរអ្វីទៀតអំពីការប្រែចិត្ត ?
សូមស្រមៃថា អ្នកគឺជាគ្រូបង្រៀនថ្នាក់សិក្ខាសាលា ដែលមានសុទ្ធតែក្មេងជំទង់ដូចអ្នកដែរ ។ សូមឆ្លើយសំណួរខាងក្រោមនេះនៅក្នុងសៀវភៅកត់ចំណាំរបស់អ្នក ។
-
តើអ្នកនឹងសួរសំណួរ ( ណា ) ខ្លះ ដើម្បីវាស់វែងថា តើពួកគេយល់ពីគោលលទ្ធិនៃការប្រែចិត្តដែរឬអត់ ?
ជម្រើស ខ
តើខ្ញុំអាចពន្យល់ពីការប្រែចិត្តប្រាប់អ្នកដទៃបានយ៉ាងដូចម្ដេច ?
សូមឆ្លើយនឹងសំណួរ ដែលបានសួរដោយក្មេងជំទង់ម្នាក់នៅដើមមេរៀននេះ ។ សូមប្រើយ៉ាងហោចណាស់បទគម្ពីរ ឬសេចក្តីថ្លែងការណ៍មួយ ដែលអ្នកបានសិក្សានៅថ្ងៃនេះនៅក្នុងចម្លើយរបស់អ្នក ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យយល់ថា នៅពេលអ្នកប្រែចិត្ត នោះព្រះអង្គសង្គ្រោះអាចលាងជម្រះអ្នកឲ្យស្អាតបាន ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ការឆ្លើយតបរបស់អ្នកចំពោះសំណួរទាំងប្រាំ និងសំណួរ ( ទាំងឡាយ ) ដែលអ្នកនឹងសួរក្នុងថ្នាក់សិក្ខាសាលា ។
-
របៀបដែលអ្នកប្រើអ្វីដែលអ្នកបានសិក្សា ដើម្បីឆ្លើយនឹងសំណួរនៅដើមមេរៀននេះ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?