ពង្សាវតារក្សត្រ ទី២ ១៦–២៥ ៖ មេរៀនទី ៨៨
ពង្សាវតារក្សត្រ ទី២ ១៧; ២៤–២៥
ការខ្ចាត់ខ្ចាយនៃពួកសាសន៍អ៊ីស្រាអែល
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ពួកព្យាការី និងអ្នកដទៃទៀតតែងនិយាយអំពីការប្រមូលផ្ដុំអ៊ីស្រាអែល ។ ដើម្បីយល់ពីការប្រមូលនេះ វាអាចមានប្រយោជន៍ដើម្បីយល់ពីមូលហេតុដែលអ៊ីស្រាអែលត្រូវខ្ចាត់ខ្ចាយតាំងពីដំបូង ។ មេរៀននេះអាចជួយអ្នកឲ្យប្រើការខ្ចាត់ខ្ចាយ និងការប្រមូលផ្ដុំអ៊ីស្រាអែល ដើម្បីស្គាល់គុណលក្ខណៈរបស់ព្រះវរបិតាសួគ៌ និងព្រះយេស៊ូវគ្រីស្ទ ។
សិក្សាព្រះគម្ពីរ
តើអ្នកធ្លាប់ចាក់វ៉ាក់សាំងដែរឬទេ ? តើអ្នកមានអារម្មណ៍ដូចម្ដេចដែរ ? តើការចាក់វ៉ាក់សាំងនោះបានជួយអ្នកតាមវិធីណា ? ខណៈដែលការចាក់នោះអាចឈឺ ក៏ឪពុកម្តាយ និងអង្គការនៅទូទាំងពិភពលោកធានាថា កុមារគួរទទួលបានការចាក់វ៉ាក់សាំងដែរ ។ ការចាក់វ៉ាក់សាំងទាំងនេះបានជួយលុបបំបាត់ជំងឺជាច្រើននៅទូទាំងពិភពលោក ។ ចាប់ពីឆ្នាំ២០០២ដល់ដើមឆ្នាំ២០២១ សាសនចក្របានជួយចាក់វ៉ាក់សាំងដល់មនុស្សជាង១១៧លាននាក់ ( « The First Presidency and Apostles Over Age 70 Receive the COVID-19 Vaccine » Newsroom ខែមករា ឆ្នាំ២០២១ ) ។
ជាច្រើនដងនៅក្នុងព្រះគម្ពីរសញ្ញាចាស់ អ៊ីស្រាអែលបានបះបោរប្រឆាំងនឹងព្រះវរបិតាសួគ៌ និងព្រះយេស៊ូវគ្រីស្ទ ហើយត្រូវការការកែតម្រូវ ។ ការណ៍នេះនាំឲ្យមានអ្វីហៅថា ការខ្ចាត់ខ្ចាយនៃពួកសាសន៍អ៊ីស្រាអែល ។ ការខ្ចាត់ខ្ចាយនៃពួកសាសន៍អ៊ីស្រាអែលកើតមានដល់ទាំងនគរភាគខាងជើង ( អ៊ីស្រាអែល ) និងនគរភាគខាងត្បូង ( យូដា ) ទោះជាពួកគេរងផលប៉ះពាល់នៅពេលផ្សេងគ្នាក៏ដោយ ។
សូមអានវគ្គបទគម្ពីរដូចខាងក្រោមនេះអំពីនគរអ៊ីស្រាអែល និងយូដា ។ សូមគូសសម្គាល់ជម្រើសដែលពួកសាសន៍អ៊ីស្រាអែលបានធ្វើ ។ សូមយកចិត្តទុកដាក់ជាពិសេសលើអ្វីដែលបានកើតឡើងដល់ពួកគេ ដោយសារតែជម្រើសរបស់ពួកគេ ។
-
នគរភាគខាងជើង—ពង្សាវតារក្សត្រ ទី២ ១៧:៧–១៨; ២២–២៣
-
នគរភាគខាងត្បូង—របាក្សត្រ ទី២ ៣៦:១៧–២០
សូមអានវគ្គបទគម្ពីរខាងក្រោមដើម្បីស្វែងយល់ពីមូលហេតុ ដែលព្រះអម្ចាស់ផ្ចាញ់ផ្ចាល និងកែតម្រូវបុត្រាបុត្រីរបស់ទ្រង់ ។ អ្នកអាចដាក់តំណភ្ជាប់ខគម្ពីរទាំងនេះបាន ។
-
សុភាសិត ៣:១២
តើអ្នកបានរៀនសេចក្ដីពិតអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទចេញមកពីវគ្គបទគម្ពីរទាំងនេះ ?
ខណៈដែលអ៊ីស្រាអែលបានខ្ចាត់ខ្ចាយ នោះបុត្រាបុត្រីរបស់ព្រះវរបិតាសួគ៌មិនដែលវង្វេងបាត់ពីទ្រង់ឡើយ ។ ទ្រង់ដឹងថាយើងនៅកន្លែងណា ហើយទ្រង់បានប្រើការខ្ចាត់ខ្ចាយនៃអ៊ីស្រាអែលនេះ ដើម្បីប្រទានពរជ័យដល់ពិភពលោកទាំងមូល ។
ប្រសិនបើមាន សូមមើលវីដេអូ « Lamentations of Jeremiah: Beware of Bondage » ដោយអែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់ ចាប់ពីនាទីទី ៥:៥០ ដល់ ៦:០៩ ។
គោលលទ្ធិយើងមានភាពច្បាស់លាស់ ៖ « ព្រះអម្ចាស់ទ្រង់បានកម្ចាត់កម្ចាយ ហើយធ្វើទុក្ខដល់ពូជអ៊ីស្រាអែលទាំងដប់ពីរអំបូរ ពីព្រោះតែអំពើទុច្ចរិត និងការបះបោររបស់ពួកគេ ។ ក៏ប៉ុន្តែព្រះអម្ចាស់ទ្រង់ក៏ប្រើ [ ប្រាស់ ] ការខ្ចាត់ខ្ចាយនៃរាស្ត្រជម្រើសរបស់ទ្រង់ ក្នុងចំណោមសាសន៍ទាំងឡាយក្នុងលោកិយ ដើម្បីប្រទានពរដល់សាសន៍ទាំងនេះ » [ សេចក្ដីណែនាំដល់បទគម្ពីរទាំងឡាយ « អ៊ីស្រាអែល » នៅលើបណ្ណាល័យដំណឹងល្អ ] ។ ( « Lamentations of Jeremiah: Beware of Bondage » Liahona ខែវិច្ឆិកា ឆ្នាំ២០១៣ ទំព័រ ៨៩ )
តើអ្នកធ្លាប់គិតថា តើការខ្ចាត់ខ្ចាយនៃអ៊ីស្រាអែលពិតជាពរជ័យដល់ពិភពលោកដែរឬទេ ?
ប្រធាន យ៉ូសែប ហ្វីលឌីង ស្ម៊ីធ ( ឆ្នាំ១៨៧៦–១៩៧២ ) បានប្រើដំណើររឿងនៃដើមអូលីវនៅក្នុង យ៉ាកុប ៥ ដើម្បីបង្រៀនអំពីការខ្ចាត់ខ្ចាយ និងការប្រមូលផ្ដុំអ៊ីស្រាអែល ។ លោកបានពន្យល់ ៖
« ការបកស្រាយនៃរឿងប្រៀបធៀបនេះគឺជាដំណើររឿងនៃការខ្ចាត់ខ្ចាយនៃពួកសាសន៍អ៊ីស្រាអែល និងការលាយឡំឈាមអ៊ីស្រាអែលជាមួយនឹងដើមអូលីវព្រៃ ឬពួកសាសន៍ដទៃ នៅគ្រប់ផ្នែកទាំងអស់ក្នុងពិភពលោកនេះ ។ ដូច្នេះហើយ យើងឃើញនៅក្នុងប្រទេសចិន ជប៉ុន ឥណ្ឌា និងប្រទេសផ្សេងទៀតទាំងអស់ ដែលពួកសាសន៍ដទៃរស់នៅ ដែលមានឈាមរបស់អ៊ីស្រាអែលបានខ្ចាត់ខ្ចាយ ឬ ‹ បញ្ចូល › នៅក្នុងចំណោមពួកគេ ។ ( Joseph Fielding Smith, Melchizedek Priesthood Study Guide 1972–73:280–81 ) ។
តើការខ្ចាត់ខ្ចាយ និងការប្រមូលផ្តុំនៃអ៊ីស្រាអែលគឺជាពរជ័យសម្រាប់ពិភពលោកនេះយ៉ាងដូចម្តេច ?
ទោះបីជាអ៊ីស្រាអែលត្រូវបានខ្ចាត់ខ្ចាយ ដោយសារតែការបះបោររបស់ពួកគេក្ដី ក៏ព្រះអម្ចាស់បានចុះសេចក្ដីសញ្ញាថា ទ្រង់នឹងតាមឃុំគ្រង និងប្រមូលផ្ដុំពួកគេដែរ ។ សូមអានវគ្គបទគម្ពីរខាងក្រោមនេះ ។ សូមរកមើលរបៀបដែលព្រះអម្ចាស់បានប្រើការខ្ចាត់ខ្ចាយ និងការប្រមូលផ្តុំនៃអ៊ីស្រាអែល ដើម្បីប្រទានពរជ័យដល់ពិភពលោកនេះ ។ អ្នកអាចដាក់ស្លាកវគ្គបទគម្ពីរទាំងនេះថា « សេចក្ដីមេត្តាករុណារបស់ព្រះ » ។
-
ចោទិយកថា ៤:២៧–៣១—ការព្យាករអំពីអ៊ីស្រាអែល
-
អេសាយ ៥៤:៧–១០—ព្រះបន្ទូលរបស់ព្រះអម្ចាស់អំពីអ៊ីស្រាអែលតាមរយៈអេសាយ
-
នីហ្វៃទី១ ២២:៣–៥, ៨—ការបង្រៀនរបស់នីហ្វៃអំពីការខ្ចាត់ខ្ចាយ និងការប្រមូលផ្ដុំអ៊ីស្រាអែល
សូមស្រមៃថា អ្នកត្រូវបានស្នើសុំឲ្យនិយាយនៅក្នុងសាសនាចក្រអំពីការខ្ចាត់ខ្ចាយ និងការប្រមូលផ្ដុំអ៊ីស្រាអែល ។ អ្នកសម្រេចចិត្តផ្តោតលើរបៀបដែលវាជាគំរូនៃសេចក្តីស្រឡាញ់របស់ព្រះ ។ សូមធ្វើគម្រោងខ្លីមួយសម្រាប់ការនិយាយ ឬសរសេរបញ្ជីមួយនៃអ្វីដែលអ្នកបានរៀនអំពីព្រះវរបិតាសួគ៌ និងព្រះយេស៊ូវគ្រីស្ទ ដោយសារតែការខ្ចាត់ខ្ចាយ និងការប្រមូលផ្ដុំអ៊ីស្រាអែល ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យប្រើការខ្ចាត់ខ្ចាយ និងការប្រមូលផ្ដុំអ៊ីស្រាអែល ដើម្បីស្គាល់គុណលក្ខណៈរបស់ព្រះវរបិតាសួគ៌ និងព្រះយេស៊ូវគ្រីស្ទ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
គម្រោងការនិយាយរបស់អ្នក ។
-
អ្វីដែលការខ្ចាត់ខ្ចាយ និងការប្រមូលផ្ដុំអ៊ីស្រាអែលបង្រៀនអ្នកអំពីព្រះវរបិតាសួគ៌ និងព្រះយេស៊ូវគ្រីស្ទ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?