« មេរៀនទី ៦១ ៖ យ៉ូស្វេ ១—« ត្រូវឲ្យឯងលាដៃដល់បងប្អូនជាកុំខានវិញ » » សៀវភៅសិក្សាព្រះគម្ពីរសញ្ញាចាស់ សម្រាប់សិស្សថ្នាក់សិក្ខាសាលា ( ឆ្នាំ២០២៦ )
យ៉ូស្វេ ១–៨; ២៣–២៤ ៖ មេរៀនទី ៦១
យ៉ូស្វេ ១
« ត្រូវឲ្យឯងលាដៃដល់បងប្អូនជាកុំខានវិញ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ក្នុងនាមជាសិស្សរបស់ព្រះយេស៊ូវគ្រីស្ទ យើងអាចទទួលបានកម្លាំង និងភាពក្លាហានមកពីការសន្យារបស់ទ្រង់ ។ ដូចដែលយ៉ូស្វេបានដឹកនាំអ៊ីស្រាអែលទៅកាន់ដែនដីសន្យាដោយភាពក្លាហានដែរ នោះពួកយើងផងដែរក៏អាចប្រឈមមុខនឹងឧបសគ្គនានាដោយមានទំនុកចិត្ត ដោយដឹងថា ព្រះអម្ចាស់នឹងមិនធ្វើឲ្យយើងបរាជ័យ ឬបោះបង់យើងចោលឡើយ ។ មេរៀននេះអាចជួយបង្កើនទំនុកចិត្តរបស់អ្នកថា ព្រះអម្ចាស់នឹងជួយអ្នកឲ្យបានរឹងមាំ និងមានចិត្តក្លាហាន ។
សិក្សាព្រះគម្ពីរ
តើអ្នកធ្លាប់ត្រូវបានគេសុំឲ្យធ្វើអ្វីមួយ ដែលអ្នកមានអារម្មណ៍ថា វាហួសពីសមត្ថភាពរបស់អ្នកដែរឬទេ ? សូមអាន យ៉ូស្វេ ១:១–២ ។ សូមរកមើលអ្វីដែលព្រះអម្ចាស់បានសុំឲ្យយ៉ូស្វេធ្វើ ។
ទោះបីជាម៉ូសេបាននៅជាមួយកូនចៅអ៊ីស្រាអែលចាប់តាំងពីការរំដោះរបស់ពួកគេពីអេស៊ីព្ទក៏ដោយ ក៏ព្រះអម្ចាស់បានហៅយ៉ូស្វេឲ្យនាំពួកគេទៅកាន់ដែនដីសន្យាដែរ ។ យ៉ូស្វេនឹងមានការទទួលខុសត្រូវក្នុងការដឹកនាំអ៊ីស្រាអែលខាងវិញ្ញាណ ។ យ៉ូស្វេក៏ជាមេបញ្ជាការកងទ័ពផងដែរ ហើយបាននាំអ៊ីស្រាអែលវាយយកដែនដីពីពួកសាសន៍កាណាន ដែលបានទុំក្នុងអំពើទុច្ចរិត ( សូមមើល នីហ្វៃទី១ ១៧:៣១–៤០ ) ។ ព្រះអម្ចាស់បានសន្យាថានឹងប្រគល់ដែនដីនេះដល់អ័ប្រាហាំ និងកូនចៅដ៏សុចរិតរបស់លោក ( សូមមើល យ៉ូស្វេ ១:១–៤ ) ។
នៅក្បែរ យ៉ូស្វេ ១:២ សូមសរសេរកំណត់ចំណាំមួយ ។ សូមសរសេរថា « ខ្ញុំនឹងមានអារម្មណ៍ថា … » រួចហើយរៀបរាប់អារម្មណ៍យ៉ាងហោចណាស់ឲ្យបានបី ។
សូមអាន យ៉ូស្វេ ១:៥–៩ ហើយគូសសម្គាល់ការសន្យា និងការណែនាំរបស់ព្រះអម្ចាស់ ដែលអាចជួយយ៉ូស្វេឲ្យផ្ដោតលើទ្រង់ ។
ការភ្ជាប់ទំនាក់ទំនង ។ ក្នុងនាមជាអ្នកដឹកនាំខាងសាច់ឈាម និងខាងវិញ្ញាណរបស់ពួកសាសន៏អ៊ីស្រាអែល យ៉ូស្វេក៏ជាគំរូ និងជាស្រមោលរបស់ព្រះយេស៊ូវគ្រីស្ទផងដែរ ។ ព្រះនាម ព្រះយេស៊ូវ គឺជា « ពាក្យនៃភាសាក្រិកមកពីពាក្យ យ៉ូស្វេ ឬ Jeshua ‹ ព្រះគឺជាជំនួយ › ឬ ‹ ព្រះអង្គសង្គ្រោះ › » ( Bible Dictionary « Jesus » ) ។ យ៉ូស្វេ/Jeshua/យេស៊ូវ នឹងជាអ្នកដឹកនាំអ៊ីស្រាអែលទៅកាន់ដែនដីសន្យា ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើការមានចិត្តក្លាហានមានន័យដូចម្តេច ?
និយមន័យមួយនៃពាក្យ « ក្លាហាន » គឺជាគុណភាពនៃចិត្ត ឬវិញ្ញាណ ដែលផ្តល់អំណាចឲ្យមនុស្សម្នាក់ប្រឈមមុខនឹងការលំបាក គ្រោះថ្នាក់ ការឈឺចាប់ និងអ្វីផ្សេងទៀតបាន ទោះជាមានការភ័យខ្លាចក៏ដោយ ។ និយាយម្យ៉ាងទៀត ភាពក្លាហានគឺជាភាពអង់អាច ។ ព្រះអម្ចាស់ប្រទានការសន្យានៃភាពក្លាហាននៅពេញទាំងព្រះគម្ពីរ ។
សូមអាន យ៉ូស្វេ ១:៩ ។ សូមរកមើលអ្វីដែលព្រះអម្ចាស់បានសន្យានឹងយ៉ូស្វេ ដែលអាចផ្តល់ភាពក្លាហានដល់លោក ។
សូមអានខគម្ពីរបី ឬច្រើន ខាងក្រោមនេះ ។ សូមដាក់ស្លាកការយល់ដឹងដែលអ្នករកឃើញថា « ចិត្តក្លាហាន » ។
-
ចោទិយកថា ៣១:៧–៨
-
អេសាយ ៤០:២៩–៣១
-
យ៉ូហាន ១៤:២៧
-
រ៉ូម ៨:៣១
-
ធីម៉ូថេ ទី២ ១:៧
នៅក្នុងសៀវភៅកត់ចំណាំរបស់អ្នក សូមសរសេរបញ្ហាប្រឈមមួយចំនួន ដែលអ្នកកំពុងប្រឈមមុខនាពេលឥឡូវនេះ ឬអាចនឹងប្រឈមមុខនាពេលអនាគត ។ សូមពិចារណាពីរបៀបដែលបញ្ហាប្រឈមទាំងនេះទាមទារឲ្យមានភាពក្លាហាន ។ បន្ទាប់មក សូមឆ្លើយសំណួរខាងក្រោមនេះ ៖
-
តើការមានភាពរឹងមាំ និងភាពក្លាហាន នៅពេលប្រឈមមុខនឹងឧបសគ្គទាំងនេះមានលក្ខណៈដូចម្តេច ?
-
តើអ្នកដឹងអ្វីខ្លះអំពីព្រះអម្ចាស់ដែលអាចជួយនរណាម្នាក់ឲ្យមានភាពរឹងមាំ និងភាពក្លាហាន ? តើអ្នកដឹងការណ៍នេះបានដោយរបៀបណា ?
ជម្រើស ខ
តើការត្រិះរិះពិចារណាអំពីព្រះបន្ទូលរបស់ព្រះគ្រីស្ទ អាចផ្តល់កម្លាំង និងភាពក្លាហានដល់ខ្ញុំយ៉ាងដូចម្តេច ?
សូមអាន យ៉ូស្វេ ១:៨ និងបទគម្ពីរខាងក្រោមនេះ មួយ ឬច្រើន ៖
-
ធីម៉ូថេ ទី២ ៣:១៥–១៧
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
នៅពេលខ្ញុំនិយាយថា « សិក្សា » ខ្ញុំចង់សំដៅលើសពីការអានទៅទៀត ។ ពេលខ្លះវាជារឿងល្អមួយ ក្នុងការអានព្រះគម្ពីរ នៅក្នុងពេលកំណត់ណាមួយ ដើម្បីដឹងន័យទូទៅនៃសារលិខិតនោះ ប៉ុន្ដែចំពោះការប្រែចិត្តជឿវិញ អ្នកគួរតែយកចិត្តទុកដាក់ទៅលើចំនួនពេលវេលាដែលអ្នកបានចំណាយលើព្រះគម្ពីរ ជាងគិតអំពីចំនួនពេលវេលាដែលអ្នកចំណាយដើម្បីអាននៅក្នុងពេលនោះ ។ ខ្ញុំឃើញថា ពេលខ្លះអ្នកអានពីរបីខគម្ពីរ ឈប់ដើម្បីជញ្ជឹងគិតអំពីខគម្ពីរទាំងនោះ អានខគម្ពីរនេះម្តងទៀតដោយយកចិត្តទុកដាក់ ហើយនៅពេលបងប្អូនគិតអំពីអត្ថន័យរបស់វា សូមអធិស្ឋានដើម្បីទទួលបានការយល់ដឹង ដោយសួរសំណួរនៅក្នុងគំនិតរបស់អ្នក រង់ចាំការបំផុសគំនិតខាងវិញ្ញាណ រួចសរសេរទុកនូវការបំផុសគំនិត និងការយល់ដឹងដែលនឹងកើតមានដើម្បីឲ្យអ្នកអាចចងចាំ ហើយរៀនសូត្របានកាន់តែប្រសើរឡើង ។ ការសិក្សារបៀបនេះ អ្នកប្រហែលមិនអានច្រើនជំពូក ឬច្រើនខគម្ពីរនោះទេនៅក្នុងរយៈពេលកន្លះម៉ោង ប៉ុន្ដែអ្នកនឹងទុកកន្លែងមួយសម្រាប់ព្រះបន្ទូលនៃព្រះនៅក្នុងដួងចិត្តរបស់អ្នក ហើយទ្រង់នឹងមានព្រះបន្ទូលមកកាន់អ្នក ។ ( « When Thou Art Converted » Liahona ខែឧសភា ឆ្នាំ២០០៤ ទំព័រ ១១ )
សូមជ្រើសរើសវគ្គបទគម្ពីរមួយយកមកហាត់ត្រិះរិះពិចារណា ។ សូមប្រើអ្វីដែលអែលឌើរ គ្រីស្តូហ្វឺសិន បានបង្រៀន នៅពេលអ្នកធ្វើការត្រិះរិះពិចារណា ។
-
សូមអាន និងអានវគ្គបទគម្ពីរដែលអ្នកបានជ្រើសរើសឡើងវិញ ដោយមានបំណងចង់រៀនអំពីវគ្គបទគម្ពីរនោះ ជាជាងគ្រាន់តែចង់អានឲ្យចប់ ។
-
សូមគិតពិចារណាពីអ្វីដែលអ្នកកំពុងអាន អត្ថន័យនៃពាក្យទាំងនោះ និងរបៀបដែលពាក្យទាំងនោះអនុវត្តចំពោះអ្នក ។ សូមគិតឲ្យស៊ីជម្រៅអំពីពាក្យទាំងនោះម្តងហើយម្តងទៀត ។
-
សូមព្យាយាមខិតខំយកចិត្តទុកដាក់នៅក្នុងដំណើរការដ៏សកម្ម ស្វែងរក និងគិតយ៉ាងស៊ីជម្រៅអំពីព្រះគម្ពីរ ពាក្យនិងឃ្លា និងរបៀបដែលសារនៃខគម្ពីរនោះអាចជួយអ្នកបាន ។
-
សូមសរសេរចូលនូវគំនិត ឬអារម្មណ៍ណាមួយដែលកើតឡើង នៅពេលអ្នកអនុវត្ត ។
ក្រោយពីការត្រិះរិះពិចារណាអំពីខគម្ពីររបស់អ្នកហើយ សូមឆ្លើយនឹងសំណួរខាងក្រោមនេះនៅក្នុងសៀវភៅកត់ចំណាំរបស់អ្នក ៖
-
តើអ្វីទៅដែលបានជួយអ្នកឲ្យត្រិះរិះពិចារណាពីបទគម្ពីរ ?
-
តើអ្នកគិតថា ការត្រិះរិះពិចារណាពីព្រះបន្ទូលរបស់ព្រះអាចជួយអ្នកឲ្យមានកម្លាំង និងភាពក្លាហានយ៉ាងដូចម្ដេច ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយបង្កើនទំនុកចិត្តរបស់អ្នកថា ព្រះអម្ចាស់នឹងជួយអ្នកឲ្យបានរឹងមាំ និងមានចិត្តក្លាហាន ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
អ្វីដែលអ្នកបានរៀនអំពីព្រះវរបិតាសួគ៌ និងព្រះយេស៊ូវគ្រីស្ទ ដែលអាចជួយអ្នកឲ្យបានរឹងមាំ និងមានសេចក្ដីក្លាហាន នៅពេលប្រឈមមុខនឹងឧបសគ្គទាំងឡាយ ។
-
វគ្គបទគម្ពីរដែលអ្នកបានត្រិះរិះពិចារណា និងរបៀបដែលវាជួយអ្នកឲ្យមានទំនុកចិត្តថា ព្រះអម្ចាស់អាចជួយដល់អ្នកបាន ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?