« មេរៀនទី ៦៣ ៖ យ៉ូស្វេ ២៣–២៤—« ចូររើសយក … នៅថ្ងៃនេះចុះ » » សៀវភៅសិក្សាព្រះគម្ពីរសញ្ញាចាស់ សម្រាប់សិស្សថ្នាក់សិក្ខាសាលា ( ឆ្នាំ២០២៦ )
យ៉ូស្វេ ១–៨; ២៣–២៤ ៖ មេរៀនទី ៦៣
យ៉ូស្វេ ២៣–២៤
« ចូររើសយក … នៅថ្ងៃនេះចុះ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
នៅពេលអ្នកចម្រើនវ័យធំឡើង ការសម្រេចចិត្ត និងឱកាសជាច្រើននឹងរង់ចាំអ្នក ។ តើអ្នកនឹងជ្រើសរើសចាប់យកអ្វី ? ហើយតើអ្នកអាចដឹងពីអ្វីដែលអ្នកគួរតែជ្រើសរើសដោយរបៀបណា ? មេរៀននេះអាចជួយអ្នកឲ្យជ្រើសរើសបម្រើព្រះអម្ចាស់លើសពីឥទ្ធិពលផ្សេងទៀត ។
សិក្សាព្រះគម្ពីរ
ឥទ្ធិពលនៃការរំខាន
សូមអានដំណើររឿងខាងក្រោមនេះមកពីស៊ីស្ទើរ គ្រីស្ទីន អិម យី នៃគណៈប្រធានសមាគមសង្គ្រោះទូទៅ ៖
នៅពេលដែលខ្ញុំមានអាយុជិត១៧ឆ្នាំ ខ្ញុំបានផ្លាស់ទៅទីក្រុងសាន់ហ្វ្រាន់ស៊ីស្កូ រដ្ឋកាលីហ្វ័រញ៉ា ស.រ.អា. ដើម្បីទៅរៀននៅសាលាសិល្បៈ ។ ខ្ញុំបានសុបិនក្នុងការក្លាយជាអ្នករចនារូបសម្រាប់ក្រុមហ៊ុន ឌីសនី ។ …
អំឡុងពេលរៀន ខ្ញុំត្រូវតែឆ្លៀតរវាងថ្នាក់ផ្សេងៗ និងកិច្ចការផ្ទះ និងទំនួលខុសត្រូវខាងសាសនាចក្រផងដែរ ។ ខ្ញុំត្រូវតែស្វែងយល់ថាអ្វីសំខាន់ជាងគេសម្រាប់ខ្ញុំ ។ តើខ្ញុំទៅសួរសុខទុក្ខមនុស្សដើម្បីផ្ដល់ការងារបម្រើដល់ពួកគេ ឬតើខ្ញុំសិក្សាសម្រាប់ការប្រលងនេះ ? តើខ្ញុំត្រូវអានព្រះគម្ពីររបស់ខ្ញុំឥឡូវនេះ ឬតើខ្ញុំបញ្ចប់កិច្ចការសាលានេះ ? ( « លែងចោលទៅ ហើយស្តាប់ » ដើម្បីកម្លាំងនៃយុវជន ខែកញ្ញា ឆ្នាំ២០២៣ ទំព័រ ២៥ )
តើអ្នកធ្លាប់មានអារម្មណ៍ថាជាប់គាំងក្នុងការធ្វើការជ្រើសរើសដែរឬទេ ? តើអ្នកជ្រើសរើសព្រះអម្ចាស់លើសអស់រឿងផ្សេងៗទៀត ដែលអាចរំខានអ្នកដោយរបៀបណា ? តើអ្វីទៅដែលអាចជាឥទ្ធិពលដ៏យូរអង្វែងនៃការជ្រើសរើសយករឿងផ្សេងទៀត ជាជាងជ្រើសរើសយកព្រះអម្ចាស់ ?
សូមស្វែងរកជំនួយពីព្រះវិញ្ញាណ ដើម្បីស្គាល់នូវជម្រើសអ្វីខ្លះ ដែលអ្នកអាចជ្រើសរើសបានដើម្បីបម្រើព្រះអម្ចាស់ ។
ព្រះអម្ចាស់ជាព្រះនៃយើងខ្ញុំ
ពួកសាសន៏អ៊ីស្រាអែលបានកាន់កាប់ដែនដីដែលព្រះបានសន្យាជាមួយពួកគេ ( សូមមើល យ៉ូស្វេ ៥–១២ ) ។ ដែនដីនេះត្រូវបានបែងចែកក្នុងចំណោមអំបូរសាសន៍ទាំងដប់ពីរ ( សូមមើល យ៉ូស្វេ ១៣–២២ ) ។ នៅចុងបញ្ចប់នៃជីវិតរបស់លោក យ៉ូស្វេបានផ្តល់សារចុងក្រោយមួយដល់ពួកសាសន៏អ៊ីស្រាអែល ( សូមមើល យ៉ូស្វេ ២៣–២៤ ) ។
សូមអាន យ៉ូស្វេ ២៣:៣–១១; ២៤:២–១១ ។ សូមគូសសម្គាល់អ្វីដែលព្រះអម្ចាស់បានធ្វើរួចទៅហើយសម្រាប់អ៊ីស្រាអែល និងអ្វីដែលទ្រង់បានសន្យាថា ទ្រង់នឹងធ្វើសម្រាប់ពួកគេ ។
តើមានគំរូណាខ្លះអំពីរបៀបដែលព្រះអម្ចាស់បានប្រទានពរដល់យើងនៅថ្ងៃនេះ ? សូមគិតដល់គំរូទាំងនេះ កាលអ្នកបន្ដការសិក្សា ។
ហេតុអ្វីបានជាពួកកាណានត្រូវបានបំផ្លាញចោល ? ចោទិយកថា ៩:៤–៥ បង្រៀនថា ព្រះអម្ចាស់បានបណ្ដេញពួកសាសន៍កាណានចេញពីដែនដី ដោយសារតែអំពើទុច្ចរិតរបស់ពួកគេ ( សូមមើលផងដែរ ចោទិយកថា ២០:១៦–១៨ ) ។ នៅក្នុងព្រះគម្ពីរមរមន នីហ្វៃបានបង្រៀនដល់ពួកបងប្រុសៗរបស់លោកថា ប្រជាជនទាំងនេះ « បានបដិសេធនូវគ្រប់ព្រះបន្ទូលនៃព្រះ ហើយពួកគេកំពុងតែទុំក្នុងអំពើទុច្ចរិត ហើយភាពពោរពេញនៃសេចក្ដីក្រោធរបស់ព្រះបានធ្លាក់មកលើពួកគេ » ( នីហ្វៃទី១ ១៧:៣៥ ) ។
សូមអាន យ៉ូស្វេ ២៤:១៤–១៥ ។ សូមសរសេរកំណត់ចំណាំមួយជាប់នឹងខគម្ពីរទាំងនេះ ។ សូមសរសេរនូវអ្វីដែលយ៉ូស្វេបានបង្រៀនសាឡើងវិញ ដូចជាលោកកំពុងបង្រៀនរឿងដដែលនេះនៅសព្វថ្ងៃនេះដែរ ។ សូមបន្ថែមទៅក្នុងកំណត់ចំណាំរបស់អ្នក នូវចម្លើយរបស់អ្នកចំពោះសំណួរខាងក្រោមនេះ ៖
-
តើយើងអាចបម្រើព្រះអម្ចាស់បានតាមរបៀបណាខ្លះនៅសព្វថ្ងៃនេះ ?
-
តើអ្វីដែលអ្នកដឹងអំពីព្រះអម្ចាស់ អាចជួយអ្នកឲ្យជ្រើសរើសបម្រើទ្រង់យ៉ាងដូចម្ដេច ?
យ៉ូស្វេ ២៤:១៥ គឺជាវគ្គចំណេះចំណានខាងគោលលទ្ធិ ។ សូមពិចារណាដាក់ស្លាកវគ្គបទគម្ពីរចំណេះចំណានខាងគោលលទ្ធិ ជាមួយនឹងប្រធានបទដែលវាបង្រៀន ដើម្បីអ្នកអាចងាយនឹងរកវាឃើញនៅពេលក្រោយ ។ សូមទន្ទេញសេចក្ដីយោង និងឃ្លាបទគម្ពីរគន្លឹះ « ចូររើសយកព្រះណាដែលឯងចង់គោរពប្រតិបត្តិតាមនៅថ្ងៃនេះចុះ » ។ ដើម្បីជួយអ្នកឲ្យទន្ទេញចាំ អ្នកអាចប្រើរូបភាព ឬគំនូរមួយ ដែលទាក់ទងនឹងការជ្រើសរើសបម្រើព្រះអម្ចាស់ ។
មេរៀនដែលនៅសេសសល់ទាំងប៉ុន្មានទៀតនេះនឹងរំឭកដំណើររឿងចំនួនពីរឡើងវិញ ដែលក្នុងនោះពួកសាសន៍អ៊ីស្រាអែលបានជ្រើសរើសថា តើត្រូវបម្រើព្រះអម្ចាស់ឬអត់ ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។ បន្ទាប់មក សូមបញ្ចប់ផ្នែក « ឥឡូវត្រូវធ្វើដូចម្តេចទៀត ? » នៅចុងបញ្ចប់នៃមេរៀននេះ ។
ជម្រើស ក
តើខ្ញុំអាចរៀនបានអ្វីខ្លះ អំពីការជ្រើសរើសយកព្រះអម្ចាស់ចេញពីការប្រយុទ្ធនៅក្រុងយេរីខូរ ?
សូមអាន យ៉ូស្វេ ៦:១–៥, ១០ ។ សូមគូសសម្គាល់សេចក្ដីណែនាំ ដែលព្រះអម្ចាស់បានប្រទានឲ្យអ៊ីស្រាអែលសម្រាប់ការប្រយុទ្ធរបស់ពួកគេជាមួយនឹងក្រុងយេរីខូរ ។ តើអ្នកនឹងមានអារម្មណ៍យ៉ាងណា ប្រសិនបើអ្នកជាសាសន៍អ៊ីស្រាអែល ដែលទទួលបានសេចក្ដីណែនាំទាំងនេះ ?
បន្ទាប់មក សូមអាន យ៉ូស្វេ ៦:១២–១៦, ២០ ហើយរកមើលលទ្ធផលនៃការប្រយុទ្ធនេះ ។
សូមគូររូបភាពកំផែងជុំវិញក្រុងយេរីខូរនៅក្នុងសៀវភៅកត់ចំណាំរបស់អ្នក ។ អ្នកអាចដាក់ឈ្មោះកំផែងនោះថាជាបញ្ហាប្រឈមមួយ ដែលអ្នកកំពុងប្រឈមមុខ ។ អ្នកក៏អាចគូររូបទាហានអ៊ីស្រាអែល ដែលដើរជុំវិញកំផែងនោះផងដែរ ។ ប្រហែលដាក់ឈ្មោះពួកទាហានទាំងនោះថាជារបៀបដែលអ្នកអាចស្វែងរកជំនួយរបស់ព្រះអម្ចាស់ ដើម្បីយកឈ្នះលើបញ្ហាប្រឈមនោះបាន ។
ជម្រើស ខ
តើខ្ញុំអាចរៀនបានអ្វីខ្លះ អំពីការជ្រើសរើសយកព្រះអម្ចាស់ចេញពីជម្រើសរបស់អេកាន ?
ព្រះអម្ចាស់បានបង្គាប់ពួកសាសន៍អ៊ីស្រាអែល កុំឲ្យរក្សាវត្ថុណាមួយមកពីទីក្រុងទាំងឡាយ ដែលពួកគេបានវាយយកឈ្នះឡើយ រួមទាំងក្រុងយេរីខូរផងដែរ ( សូមមើល យ៉ូស្វេ ៦:១៨–១៩ ) ។ ជាអកុសល បុរសសាសន៏អ៊ីស្រាអែលម្នាក់ឈ្មោះអេកាន បានយកសម្លៀកបំពាក់ មាស និងប្រាក់មួយចំនួនពីទីក្រុងនោះតាមខ្លួន ( សូមមើល យ៉ូស្វេ ៧:១, ២១ ) ។
សូមអាន យ៉ូស្វេ ៧:១–៧, ១០–១៣ ហើយរកមើលរបៀបដែលសកម្មភាពរបស់អេកាន ប៉ះពាល់ដល់ពួកសាសន៍អ៊ីស្រាអែល ។ សូមសរសេរកំណត់ចំណាំមួយជាប់នឹងខគម្ពីរទាំងនេះ ដែលឆ្លើយសំណួរខាងក្រោមនេះ ៖
-
តើនៅពេលណាដែលអ្នក ឬមនុស្សនៅជុំវិញអ្នក បានជួបប្រទះនឹងផលវិបាកអវិជ្ជមាន ដោយសារតែជម្រើសមិនល្អរបស់អ្នកដទៃ ?
-
តើបទពិសោធន៍ទាំងនេះអាចជះឥទ្ធិពលលើបំណងប្រាថ្នារបស់អ្នក ក្នុងការជ្រើសរើសយកព្រះអម្ចាស់យ៉ាងដូចម្តេច ?
ឥឡូវត្រូវធ្វើដូចម្តេចទៀត ?
សូមអានសម្រង់សម្ដីខាងក្រោមនេះមកពីស៊ីស្ទើរ គ្រីស្ទីន អិម យី នៃគណៈប្រធានសមាគមសង្គ្រោះទូទៅ ៖
ព្រះវរបិតាសួគ៌នឹងដឹកនាំប្អូន ។ …
ទ្រង់សព្វព្រះទ័យក្លាយជាផ្នែកមួយនៅក្នុងជីវិតរបស់យើង ។ ប្រសិនបើយើងអាចគ្រាន់តែអនុញ្ញាតឲ្យទ្រង់ចូលក្នុងជីវិតរបស់យើង នោះមានការភ្ញាក់ផ្អើលដ៏អស្ចារ្យជាច្រើនកំពុងរង់ចាំយើងគ្រប់ៗគ្នា ។ តើមានអ្វីខ្លះទៀតដែលទ្រង់មានសម្រាប់ប្អូនដែលប្អូនមិនអាចមើលឃើញ ? ( « លែងចោលទៅ ហើយស្តាប់ » ដើម្បីកម្លាំងនៃយុវជន ខែកញ្ញា ឆ្នាំ២០២៣ ទំព័រ ២៥ )
នៅក្នុងសៀវភៅកត់ចំណាំរបស់អ្នក សូមឆ្លើយសំណួរមួយក្នុងចំណោមសំណុំសំណួរដូចខាងក្រោម ៖
-
តើអ្នកចង់ចងចាំអ្វីខ្លះ អំពីព្រះអម្ចាស់ដែលអាចជួយអ្នកបម្រើទ្រង់ នៅពេលដែលវាអាចនឹងមានការលំបាក ? តើអ្នកគិតថា ការចងចាំព្រះអម្ចាស់ក្នុងគ្រាទាំងនោះអាចជួយអ្នកបានយ៉ាងដូចម្ដេច ?
-
តើអ្នកនឹងចាប់ផ្ដើមធ្វើ ឬឈប់ធ្វើអ្វីខ្លះ ដើម្បីជ្រើសរើសបម្រើព្រះអម្ចាស់ ? តើពរជ័យអ្វីខ្លះដែលអ្នកអាចទទួលបានមកពីការធ្វើដូច្នេះ ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យជ្រើសរើសបម្រើព្រះអម្ចាស់លើសពីឥទ្ធិពលផ្សេងទៀត ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
គំនូររបស់អ្នកដែលមានដាក់ឈ្មោះក្រុងយេរីខូរ និងពួកទាហាន ។
-
ចម្លើយរបស់អ្នកចំពោះសំណួរនៅក្នុងផ្នែក « ឥឡូវត្រូវធ្វើដូចម្ដេចទៀត ? » ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?