« មេរៀនទី ៦២ ៖ យ៉ូស្វេ ២–៤—ការអនុវត្តសេចក្ដីជំនឿលើព្រះយេស៊ូវគ្រីស្ទ » សៀវភៅសិក្សាព្រះគម្ពីរសញ្ញាចាស់ សម្រាប់សិស្សថ្នាក់សិក្ខាសាលា ( ឆ្នាំ២០២៦ )
Joshua Overlooking the Promised Land [ យ៉ូស្វេមើលទៅដែនដីសន្យា ] ដោយ ម៉ៃឃល ធី ម៉លម៍
យ៉ូស្វេ ១–៨; ២៣–២៤ ៖ មេរៀនទី ៦២
យ៉ូស្វេ ២–៤
ការអនុវត្តសេចក្ដីជំនឿលើព្រះយេស៊ូវគ្រីស្ទ
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
បន្ទាប់ពីការធ្វើដំណើររបស់ពួកសាសន៏អ៊ីស្រាអែលឆ្លងកាត់ទីរហោស្ថាន ព្រះអម្ចាស់បានបង្គាប់ឲ្យយ៉ូស្វេដឹកនាំពួកគេចូលទៅកាន់ដែនដីសន្យា ។ ការចូលទៅកាន់ដែនដីសន្យាតម្រូវឲ្យមានសេចក្ដីជំនឿ ។ កូនចៅអ៊ីស្រាអែល និងស្ត្រីម្នាក់ឈ្មោះរ៉ាហាបបានបង្ហាញសេចក្ដីជំនឿលើព្រះអង្គសង្គ្រោះ ។ មេរៀននេះអាចជួយអ្នកឲ្យយល់ពីរបៀបដែលអ្នកអាចអនុវត្តសេចក្ដីជំនឿលើព្រះយេស៊ូវគ្រីស្ទបាន ។
សិក្សាព្រះគម្ពីរ
នៅពេលយើងព្យាយាមយល់ពីអ្វីមួយ នោះនិយមន័យល្អអាចជួយយើងបាន ។ ទោះជាយ៉ាងណាក៏ដោយ ពេលខ្លះរបៀបដ៏ល្អបំផុតដើម្បីពន្យល់ពាក្យមួយ គឺការបង្ហាញឧទាហរណ៍មួយ ។
ព្រះគម្ពីរមាននិយមន័យជាច្រើនអំពីសេចក្តីជំនឿ ប៉ុន្តែមេរៀននេះនឹងស្វែងយល់ពីដំណើររឿងចំនួនបី ដែលមនុស្សបានបង្ហាញសេចក្ដីជំនឿតាមរបៀបខុសៗគ្នា ។
សូមអានអ្វីដែលអែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានបង្រៀនអំពីសេចក្ដីជំនឿលើព្រះយេស៊ូវគ្រីស្ទ ឬមើលវីដេអូ « Seek Learning by Faith » ចាប់ពីនាទីទី ៣:១៥ ដល់ ៤:៣៣ ។
សាវកប៉ុលបានឲ្យនិយមន័យសេចក្ដីជំនឿថា « ជាចិត្តដែលដឹងជាក់ថា នឹងបានដូចសង្ឃឹម [ និង ] ជាសម្គាល់ពីការដែលមើលមិនឃើញ » ( ហេព្រើរ ១១:១ ) ។ អាលម៉ាបានប្រកាសថា សេចក្ដីជំនឿគឺពុំមែនជាតម្រិះដ៏ល្អឥតខ្ចោះឡើយ ផ្ទុយទៅវិញ ប្រសិនបើយើងមានសេចក្ដីជំនឿ នោះយើង « សង្ឃឹមទៅលើអ្វីៗដែលមើលមិនឃើញ [ ប៉ុន្តែ ] ដែលពិត » ( អាលម៉ា ៣២:២១ ) ។ លើសពីនេះ យើងរៀននៅក្នុង Lectures on Faith ថាសេចក្តីជំនឿគឺជា … « គោលការណ៍នៃសកម្មភាពក្នុងគ្រប់ទម្រង់ទាំងអស់នៃបញ្ញា » ។
ការបង្រៀនទាំងនេះគូសបញ្ជាក់នូវធាតុគ្រឹះចំនួនបីនៃសេចក្ដីជំនឿ ៖ ( ១ ) សេចក្តីជំនឿជា ការធានាអះអាងមួយ នៃអ្វីៗដែលសង្ឃឹមថាពិត ( ២ ) សេចក្តីជំនឿជា ភស្តុតាង នៃអ្វីៗដែលមើលមិនឃើញ និង ( ៣ ) សេចក្តីជំនឿជាគោលការណ៍នៃ សកម្មភាព នៅក្នុងគ្រប់ទម្រង់ទាំងអស់នៃបញ្ញា ។ ខ្ញុំសូមពិពណ៌នាធាតុទាំងបីនេះនៃសេចក្ដីជំនឿលើព្រះអង្គសង្គ្រោះ ថាជាការធ្វើព្រមៗគ្នានៃការប្រឈមមុខនឹងអនាគតកាល ការមើលទៅអតីតកាល និងការចាប់ផ្តើមសកម្មភាពនៅក្នុងបច្ចុប្បន្នកាល ។ ( « Seek Learning by Faith » Ensign ខែកញ្ញា ឆ្នាំ២០០៧ ទំព័រ ៦១–៦២ )
សូមកត់ត្រាការយល់ដឹងខាងក្រោមនេះមកពីអែលឌើរ បែដណា នៅក្នុងសៀវភៅកត់ចំណាំរបស់អ្នក ៖
ធាតុបីនៃសេចក្តីជំនឿគឺ ៖
-
ការប្រឈមមុខនឹងអនាគតកាល ។
-
ការមើលទៅអតីតកាល ។
-
ការចាប់ផ្តើមសកម្មភាពនៅក្នុងបច្ចុប្បន្នកាល ។
នៅពេលដែលពួកសាសន៍អ៊ីស្រាអែលបានត្រៀមខ្លួនចូលទៅក្នុងដែនដីកាណាន យ៉ូស្វេបានបញ្ជូនអ្នកស៊ើបការណ៍ពីរនាក់ទៅក្រុងយេរីខូរ ដើម្បីសង្កេតមើលស្រុកនោះ ។ អ្នកស៊ើបការណ៍បានមកដល់ផ្ទះរបស់ស្ត្រីម្នាក់ឈ្មោះ រ៉ាហាប ។ នាងបានលាក់ពួកគាត់ពីស្ដេចយេរីខូរ ហើយបានជួយពួកគេឲ្យរត់គេចខ្លួន ( សូមមើល យ៉ូស្វេ ២ ) ។ រ៉ាហាប បានប្រែចិត្តជឿលើព្រះនៃអ៊ីស្រាអែល ។ ព្រះគម្ពីរសញ្ញាថ្មីបានចងចាំនាងថាជាគំរូដ៏សំខាន់អំពីសេចក្ដីជំនឿ និងកិច្ចការល្អ ។ ( សូមមើល ហេព្រើរ ១១:៣១; យ៉ាកុប ២:២៤–២៥ ) ។
សូមអាន យ៉ូស្វេ ២:៩–១៤, ១៨ ។ សូមគូសសម្គាល់មូលហេតុដែលរ៉ាហាបបានជួយពួកអ្នកស៊ើបការណ៍ទាំងនេះ ។
នៅពេលកងទ័ពអ៊ីស្រាអែលបានយកឈ្នះលើក្រុងយេរីខូរ ពួកគេបានសង្គ្រោះតែមនុស្សដែលនៅក្នុងផ្ទះរបស់រ៉ាហាបប៉ុណ្ណោះ ( សូមមើល យ៉ូស្វេ ៦:២២–២៥ ) ។
សូមមើលសំណេរនៅក្នុងសៀវភៅកត់ចំណាំរបស់អ្នកអំពីធាតុនៃសេចក្តីជំនឿលើព្រះយេស៊ូវគ្រីស្ទ ។ សូមសរសេរឈ្មោះ « រ៉ាហាប » នៅជាប់នឹងធាតុនីមួយៗ ដែលអ្នកឃើញមានបង្ហាញនៅក្នុងដំណើររឿងនេះ ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។ បន្ទាប់មក សូមបញ្ចប់ផ្នែក « ឥឡូវត្រូវធ្វើដូចម្តេចទៀត ? » នៅចុងបញ្ចប់នៃមេរៀននេះ ។
ជម្រើស ក
តើខ្ញុំអាចបង្ហាញសេចក្តីជំនឿយ៉ាងដូចម្តេច នៅពេលខ្ញុំមិនដឹងច្បាស់លាស់អំពីអនាគតនោះ ?
នៅពេលព្រះអម្ចាស់បង្គាប់ឲ្យពួកសាសន៍អ៊ីស្រាអែលចូលទៅក្នុងស្រុកកាណាន នោះទ្រង់បានប្រាប់យ៉ូស្វេឲ្យដឹកនាំពួកគេឆ្លងកាត់ទន្លេយ័រដាន់ ( សូមមើល យ៉ូស្វេ ១:២ ) ។
សូមអាន យ៉ូស្វេ ៣:៩–១៧ ។ សូមគូសសម្គាល់អ្វីដែលពួកសង្ឃត្រូវធ្វើ មុនពេលព្រះអម្ចាស់បានផ្ដាច់ទន្លេនោះ ។
សូមដាក់ស្លាក ខទី ១៥–១៧ ថា « សេចក្តីជំនឿ » ។
ប្រសិនបើមាន សូមមើលវីដេអូ « Exercise Faith in Christ » ( ១:៤៣ ) ។ ឬសូមអានសេចក្ដីថ្លែងការណ៍ខាងក្រោមដោយអែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ ។
សូមរំឭកពីរបៀបដែលពួកសាសន៍អ៊ីស្រាអែលបានមកដល់ទន្លេយ័រដាន់ ហើយបានសន្យាថាទឹកនឹងញែកជាពីរ ហើយពួកគេនឹងអាចឆ្លងកាត់នៅលើដីស្ងួត ។ គួរឲ្យចាប់អារម្មណ៍ណាស់ ទឹកមិនញែកចេញពីគ្នាទេ កាលកូនចៅអ៊ីស្រាអែលឈរនៅមាត់ទន្លេរង់ចាំឲ្យអ្វីមួយកើតឡើងនោះ ផ្ទុយទៅវិញ ស្បែកជើងរបស់ពួកគេបានសើមជាមុនសិន មុនពេលទឹកបានញែកពីគ្នា ។ សេចក្ដីជំនឿរបស់ពួកសាសន៍អ៊ីស្រាអែលត្រូវបានបើកសម្តែងនៅក្នុងការពិតដែលថា ពួកគេបានដើរចូលទៅក្នុងទឹក មុនពេលទឹកញែកចេញពីគ្នា ។ ( « Seek Learning by Faith » Ensign ខែកញ្ញា ឆ្នាំ២០០៧ ទំព័រ ៦៣ )
សូមមើលសំណេរនៅក្នុងសៀវភៅកត់ចំណាំរបស់អ្នកអំពីធាតុនៃសេចក្តីជំនឿលើព្រះយេស៊ូវគ្រីស្ទ ។ សូមសរសេរពាក្យ « ទន្លេយ័រដាន់ » នៅជាប់នឹងធាតុនីមួយៗ ដែលអ្នកឃើញមានបង្ហាញនៅក្នុងដំណើររឿងនេះ ។
ជម្រើស ខ
តើខ្ញុំអាចជួយអ្នកដទៃឲ្យចងចាំព្រះអម្ចាស់ដោយរបៀបណា ?
កាលដែលពួកសាសន៍អ៊ីស្រាអែលបានឆ្លងកាត់ទន្លេយ័រដាន់ ដើម្បីចូលទៅក្នុងដែនដីសន្យា នោះព្រះអម្ចាស់បានមានបន្ទូលតាមរយៈយ៉ូស្វេ ហើយបានបញ្ជាឲ្យមនុស្សម្នាក់ពីកុលសម្ព័ន្ធនីមួយៗឲ្យយកថ្មមួយដុំចេញពីទន្លេនោះ ( សូមមើល យ៉ូស្វេ ៤:១–៧ ) ។
សូមអាន យ៉ូស្វេ ៤:៨–៩, ២១–២៤ ។ សូមគូសសម្គាល់អ្វីដែលកូនចៅអ៊ីស្រាអែលបានធ្វើជាមួយថ្មទាំងនោះ ។
សូមសរសេរកំណត់ចំណាំមួយជាប់នឹង ខទី ២១ ។ សូមពន្យល់ពីរបៀបដែលសេចក្ដីជំនឿរបស់ពួកសាសន៍អ៊ីស្រាអែលនៅក្នុងដំណើររឿងនេះ អាចមានឥទ្ធិពលលើពួកសាសន៍អ៊ីស្រាអែលជំនាន់ក្រោយ ។
សូមមើលសំណេរនៅក្នុងសៀវភៅកត់ចំណាំរបស់អ្នកអំពីធាតុនៃសេចក្តីជំនឿលើព្រះយេស៊ូវគ្រីស្ទ ។ សូមសរសេរពាក្យ « ថ្ម » នៅជាប់នឹងធាតុនីមួយៗ ដែលអ្នកឃើញមានបង្ហាញនៅក្នុងដំណើររឿងនេះ ។
ឥឡូវត្រូវធ្វើដូចម្តេចទៀត ?
នៅក្នុងសៀវភៅកត់ចំណាំរបស់អ្នក សូមបំពេញឃ្លាអនុសាសន៍នៅខាងក្រោមនេះមកពីប្រធាន រ័សុល អិម ណិលសុន ៖
តើបងប្អូននឹងធ្វើអ្វីខ្លះ បើសិនជាបងប្អូនមានជំនឿបន្ថែមទៀតនោះ ? សូមគិតពីការណ៍នេះ ។ សូមកត់ត្រាវាទុក ។ រួចហើយ សូមទទួលជំនឿបន្ថែមទៀតតាមរយៈការធ្វើអ្វីមួយដែលតម្រូវឲ្យមានជំនឿបន្ថែម ។ …
សេចក្តីជំនឿលើព្រះយេស៊ូវគ្រីស្ទគឺជាអំណាចដ៏ធំបំផុតដែលយើងមាននៅក្នុងជីវិតនេះ ។ ការណ៍ទាំងអស់នឹងសម្រេចបានដល់អ្នកណាដែលជឿ ។
សេចក្ដីជំនឿរបស់បងប្អូនទៅលើទ្រង់ ដែលចម្រើនឡើង នឹងរើភ្នំចេញ—មិនមែនជាភ្នំថ្មដែលធ្វើឲ្យផែនដីនេះស្រស់ស្អាតនោះទេ—តែជាភ្នំនៃទុក្ខសោកក្នុងជីវិតរបស់បងប្អូនវិញ ។ សេចក្ដីជំនឿដ៏លូតលាស់របស់បងប្អូននឹងជួយបងប្អូនឲ្យបង្វែរឧបសគ្គទៅជាការរីកចម្រើន និងឱកាសដ៏មិនអាចប្រៀបផ្ទឹមបានវិញ ។ ( « ព្រះគ្រីស្ទមានព្រះជន្មរស់ឡើងវិញ សេចក្ដីជំនឿលើទ្រង់នឹងរើភ្នំចេញបាន » លីអាហូណា ខែឧសភា ឆ្នាំ២០២១ ទំព័រ ១០៣, ១០៤ )
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យយល់ពីរបៀបដែលអ្នកអាចអនុវត្តសេចក្ដីជំនឿលើព្រះយេស៊ូវគ្រីស្ទបាន ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
អ្វីដែលរ៉ាហាប និងពួកសាសន៍អ៊ីស្រាអែលបានបង្រៀនអ្នកអំពីប្រភេទនៃសេចក្ដីជំនឿដែលអែលឌើរ បែដណា បានពិពណ៌នា ។
-
អ្វីដែលអ្នកបានសរសេរនៅក្នុងសៀវភៅកត់ចំណាំរបស់អ្នកសម្រាប់ផ្នែក « ឥឡូវត្រូវធ្វើដូចម្ដេចទៀត ? » ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?