« និក្ខមនំ ៣៥–៤០; លេវីវិន័យ ១; ៤; ១៦; ១៩ ៖ មេរៀនទី ៥២ ៖ និក្ខមនំ ២៥; ៣៥–៤០—‹ សិរីល្អនៃព្រះយេហូវ៉ាបានស្ថិតនៅពេញក្នុងរោងឧបោសថ › » សៀវភៅសិក្សាព្រះគម្ពីរសញ្ញាចាស់ សម្រាប់សិស្សថ្នាក់សិក្ខាសាលា ( ឆ្នាំ២០២៦ )
និក្ខមនំ ៣៥–៤០; លេវីវិន័យ ១; ៤; ១៦; ១៩ ៖ មេរៀនទី ៥២
និក្ខមនំ ២៥; ៣៥–៤០
« សិរីល្អនៃព្រះយេហូវ៉ាបានស្ថិតនៅពេញក្នុងរោងឧបោសថ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ព្រះអម្ចាស់បានបង្គាប់ពួកសាសន៏អ៊ីស្រាអែលឲ្យសង់រោងឧបោសថនៅទីរហោស្ថាន ។ រោងឧបោសថនេះគឺជាទីសក្ការៈចល័ត ។ ព្រះអម្ចាស់អាចគង់នៅទីនោះក្នុងចំណោមរាស្ដ្ររបស់ទ្រង់បាន ខណៈដែលពួកគេធ្វើដំណើរ ។ មេរៀននេះអាចជួយអ្នកឲ្យយល់ពីរបៀបដែលនិមិត្តរូបនៃរោងឧបោសថ និងនៃព្រះវិហារបរិសុទ្ធសម័យទំនើប អាចបង្រៀនអ្នកអំពីព្រះ ។
សិក្សាព្រះគម្ពីរ
សូមស្រមៃថា ព្រះវិហារបរិសុទ្ធមួយនឹងត្រូវបានឧទ្ទិសឆ្លងក្នុងពេលឆាប់ៗនៅក្នុងតំបន់របស់អ្នក ។ អ្នកអញ្ជើញមិត្តភក្តិម្នាក់ឲ្យចូលរួមក្នុងពិធីសម្ពោធព្រះវិហារបរិសុទ្ធជាមួយអ្នក ។ ពួកគេយល់ព្រមមក ប៉ុន្តែបាននិយាយថា ពួកគេពិតជាមិនដឹងអ្វីទាំងអស់អំពីព្រះវិហារបរិសុទ្ធ ។ តើអ្នកអាចនឹងនិយាយអ្វីខ្លះ ដើម្បីជួយមិត្តរបស់អ្នកឲ្យយល់ពីគោលបំណង និងសារៈសំខាន់នៃព្រះវិហារបរិសុទ្ធ ?
ពេលកំពុងមានបន្ទូលជាមួយម៉ូសេនៅលើភ្នំស៊ីណាយ ព្រះអម្ចាស់បានសុំឲ្យពួកសាសន៏អ៊ីស្រាអែលថ្វាយមាស ប្រាក់ និងសម្ភារដ៏មានតម្លៃផ្សេងទៀតរបស់ពួកគេ ដើម្បីសាងសង់ទីសក្ការៈ ឬរោងឧបោសថថ្វាយទ្រង់ ។ នៅសម័យរបស់យើង យើងក៏ត្រូវបានស្នើសុំឲ្យសាងសង់ព្រះវិហារបរិសុទ្ធ ដើម្បីធ្វើជាទីសក្ការៈ ឬជាទីកន្លែងនៃបរិសុទ្ធភាព ។
សូមអាន និក្ខមនំ ២៥:៨ ។ សូមគូសសម្គាល់មូលហេតុ ដែលព្រះអម្ចាស់សព្វព្រះទ័យឲ្យពួកសាសន៏អ៊ីស្រាអែលសង់រោងឧបោសថមួយ ។
សូមយកចិត្តទុកដាក់លើអ្វីដែលព្រះវិញ្ញាណបរិសុទ្ធបង្រៀនអ្នក អំពីរបៀបដែលទីសក្ការៈរបស់ព្រះភ្ជាប់យើងទៅនឹងទ្រង់ ។
វត្ថុ និងពិធីបរិសុទ្ធនៅក្នុងរោងឧបោសថគឺជានិមិត្តរូប ។ វាមានគោលបំណងបង្រៀនអ៊ីស្រាអែលអំពីព្រះវរបិតាសួគ៌ និងព្រះយេស៊ូវគ្រីស្ទ និងរបៀបធ្វើដំណើរឆ្លងកាត់ជីវិតត្រឡប់ទៅកាន់ទ្រង់ទាំងទ្វេវិញ ។
រោងឧបោសថមានបីផ្នែក ៖ ទីធ្លាខាងក្រៅ ទីបរិសុទ្ធ និងទីបរិសុទ្ធបំផុត ។ ទីបរិសុទ្ធបំផុត ( ក៏បានហៅថា បរិសុទ្ធលើអស់ទាំងបរិសុទ្ធផងដែរ ) គឺជាទីកន្លែងដែលបានរក្សាទុកហិបនៃសេចក្តីសញ្ញា ។ ទីបរិសុទ្ធបំផុត តំណាងឲ្យទីវត្តមានរបស់ព្រះ ។
ដើម្បីស្វែងយល់ពីវត្ថុទាំងឡាយនៅក្នុងរោងឧបោសថ សូមប្រើតារាងខាងក្រោមនេះ ។ សូមភ្ជាប់វត្ថុនៅក្នុងខគម្ពីរ ទៅនឹងវគ្គបទគម្ពីរដែលពន្យល់ពីនិមិត្តរូបដែលអាចមានអំពីវត្ថុនោះ ។ កាលដែលអ្នកភ្ជាប់ សូមកុំភ្លេចអានខគម្ពីរអំពីនិមិត្តរូបផងដែរ ។
|
វត្ថុក្នុងរោងឧបោសថ |
និមិត្តរូប |
|---|---|
វត្ថុក្នុងរោងឧបោសថ និក្ខមនំ ៣៨:១ ។ អាសនាដង្វាយដុត | និមិត្តរូប |
វត្ថុក្នុងរោងឧបោសថ និក្ខមនំ ៣០:១៨ ។ អាងទឹក ( ចានក្លាំទឹក ) | និមិត្តរូប វិវរណៈ ១:៥ |
វត្ថុក្នុងរោងឧបោសថ លេវីវិន័យ ២៤:២ ។ ជើងចង្កៀង ( ជើងទៀន ) | និមិត្តរូប យ៉ូហាន ៨:១២ |
វត្ថុក្នុងរោងឧបោសថ លេវីវិន័យ ២៤:៥–៦ ។ តុដាក់នំ | និមិត្តរូប យ៉ូហាន ៦:៣៥ |
វត្ថុក្នុងរោងឧបោសថ និក្ខមនំ ៣០:១ ។ អាសនាសម្រាប់ដុតគ្រឿងក្រអូប | និមិត្តរូប ទំនុកដំកើង ១៤១:២ |
វត្ថុក្នុងរោងឧបោសថ និក្ខមនំ ២៦:៣៣ ។ វាំងនន | និមិត្តរូប ហេព្រើរ ១០:១៩–២០ |
វត្ថុក្នុងរោងឧបោសថ និក្ខមនំ ២៥:២១ ។ ហិបនៃសេចក្ដីសញ្ញា និងទីសន្តោសប្រោស | និមិត្តរូប ហេព្រើរ ៩:៣–៥ |
សូមជ្រើសរើសសំណួរខាងក្រោមនេះពីរ ឬច្រើន យកមកឆ្លើយនៅក្នុងសៀវភៅកត់ចំណាំរបស់អ្នក ៖
-
តើអាសនាដង្វាយដុតចង្អុលបង្ហាញអ្នកឆ្ពោះទៅរកព្រះយេស៊ូវគ្រីស្ទយ៉ាងដូចម្តេច ?
-
តើអាងទឹកអាចតំណាងឲ្យការបានស្អាតតាមរយៈព្រះយេស៊ូវគ្រីស្ទយ៉ាងដូចម្តេច ?
-
តើពន្លឺមកពីចង្កៀងគឺជានិមិត្តរូបដ៏ល្អសម្រាប់ព្រះអង្គសង្គ្រោះដោយរបៀបណា ? សម្រាប់ព្រះវិញ្ញាណបរិសុទ្ធដោយរបៀបណា ?
-
តើតុដាក់នំ និងតុសាក្រាម៉ង់អាចចង្អុលបង្ហាញក្នុងន័យស្រដៀងគ្នាឲ្យអ្នកមើលទៅកាន់ព្រះយេស៊ូវគ្រីស្ទយ៉ាងដូចម្តេច ?
-
តើផ្សែងនៃគ្រឿងក្រអូបគឺដូចជាការអធិស្ឋានរបស់យើងយ៉ាងដូចម្តេច ?
-
ការឆ្លងកាត់វាំងននមានន័យថា ការចូលទៅក្នុងវត្តមានរបស់ព្រះ ។ តើព្រះយេស៊ូវគ្រីស្ទជួយអ្នកឲ្យត្រឡប់ទៅកាន់វត្តមានរបស់ព្រះយ៉ាងដូចម្តេច ?
ព្រះបញ្ញត្តិដែលព្រះអម្ចាស់បានប្រទានដល់ពួកសាសន៏អ៊ីស្រាអែល ឲ្យសង់រោងឧបោសថ បង្រៀនយើងពីសេចក្ដីពិតដូចជា ៖
-
ព្រះអម្ចាស់ត្រាស់បង្គាប់យើងឲ្យសាងសង់ព្រះវិហារបរិសុទ្ធ ដើម្បីទ្រង់អាចគង់ជាមួយយើង ។
-
ពិធីបរិសុទ្ធ និងនិមិត្តរូបនៃព្រះវិហារបរិសុទ្ធបង្រៀនអំពីព្រះវរបិតាសួគ៌ និងព្រះយេស៊ូវគ្រីស្ទ ។
-
ព្រះវិហារបរិសុទ្ធជួយយើងឲ្យរៀបចំខ្លួនត្រឡប់ទៅព្រះវរបិតាសួគ៌ និងព្រះយេស៊ូវគ្រីស្ទវិញ ។
ទោះបីជារោងឧបោសថ ដែលម៉ូសេត្រូវបានបង្គាប់ឲ្យសង់នោះ មានលក្ខណៈស្រដៀងគ្នានឹងព្រះវិហារបរិសុទ្ធសម័យទំនើបក៏ដោយ ( ដូចជាពិធីបរិសុទ្ធនៃបព្វជិតភាពបានធ្វើឡើងនៅក្នុងកន្លែងទាំងពីរនេះ ) ក៏រោងឧបោសថបានដំណើរការនៅក្រោមក្រឹត្យវិន័យម៉ូសេដែរ ហេតុដូច្នេះហើយវាខុសគ្នាខ្លាំងដែរពីព្រះវិហារបរិសុទ្ធសម័យទំនើប ។ យើងមិនអនុវត្តពិធីដុតយញ្ញបូជាសត្វ ឬប្រើគ្រឿងក្រអូបនៅក្នុងព្រះវិហារបរិសុទ្ធសព្វថ្ងៃនេះទេ ។
ដូចជារោងឧបោសថពីបុរាណដែរ ព្រះវិហារបរិសុទ្ធសម័យទំនើបមាននិមិត្តរូបដែលបង្រៀនយើងអំពីព្រះវរបិតាសួគ៌ និងព្រះយេស៊ូវគ្រីស្ទ ។ និមិត្តរូបទាំងនោះមួយចំនួនរួមមាន ៖
ឃ្លាថា « បរិសុទ្ធភាពថ្វាយព្រះអម្ចាស់ » និង « ព្រះដំណាក់នៃព្រះអម្ចាស់ » មាននៅជិតច្រកចូលព្រះវិហារបរិសុទ្ធនីមួយៗ ហើយវារំឭកយើងថា ព្រះវិហារបរិសុទ្ធនីមួយៗគឺជាកន្លែងដ៏ពិសិដ្ឋមួយ ។
-
សម្លៀកបំពាក់ព្រះវិហារបរិសុទ្ធ ៖សមាជិកសាសនាចក្រដែលចូលទៅក្នុងព្រះវិហារបរិសុទ្ធ ដើរទៅបន្ទប់ប្ដូរសម្លៀកបំពាក់ ដើម្បីផ្លាស់ប្តូរពីសម្លៀកបំពាក់ប្រចាំថ្ងៃរបស់ពួកគេ ទៅជាសម្លៀកបំពាក់ពណ៌ស មុនពេលចូលរួមក្នុងការបម្រើព្រះវិហារបរិសុទ្ធ ។ ការផ្លាស់ប្តូរសម្លៀកបំពាក់នេះគឺជាការរំឭកថា អ្នកចូលរួមកំពុងចាកចេញពីពិភពលោកនេះជាបណ្តោះអាសន្ន និងចូលទៅក្នុងទីដ៏បរិសុទ្ធ ។ សម្លៀកបំពាក់ពណ៌សតំណាងឲ្យភាពបរិសុទ្ធ ខណៈដែលការស្លៀកពាក់ដូចគ្នានៅក្នុងព្រះវិហារបរិសុទ្ធបង្កើតឲ្យមានស្មារតីនៃសាមគ្គីភាព និងសមភាព ។
-
បន្ទប់សេឡេស្ទាល ៖ពុំមានពិធីអ្វីធ្វើឡើងនៅក្នុងបន្ទប់នេះទេ ។ ផ្ទុយទៅវិញ វាគឺជាទីនៃសេចក្ដីសុខសាន្ដដ៏ស្ងប់ស្ងាត់ ការអធិស្ឋាន និងការគិតពិចារណា ដែលមានបំណងធ្វើជានិមិត្តរូបនៃស្ថានសួគ៌ ជាទីដែលយើងអាចរស់នៅជារៀងរហូតជាមួយគ្រួសាររបស់យើងនៅក្នុងវត្តមានរបស់ព្រះវរបិតាសួគ៌ និងព្រះយេស៊ូវគ្រីស្ទ ។
ប្រសិនបើមាន អ្នកអាចមើលវីដេអូនេះ « Welcome to the Washington D.C. Temple » ( ១១:៤៦ ) ។
ទាំងរោងឧបោសថពីបុរាណ និងព្រះវិហារបរិសុទ្ធនៅសម័យទំនើប ទាំងពីរគឺជាដំណាក់របស់ព្រះអម្ចាស់ ជាទីដែលរាស្ដ្ររបស់ព្រះអម្ចាស់អាចមានអារម្មណ៍ជិតស្និទ្ធនឹងព្រះវរបិតាសួគ៌ និងព្រះយេស៊ូវគ្រីស្ទ ។
សូមឆ្លើយសំណួរខាងក្រោមនេះនៅក្នុងសៀវភៅកត់ចំណាំរបស់អ្នក ៖
-
តើការដឹងថា ព្រះវិហារបរិសុទ្ធបង្រៀនយើងអំពីព្រះវរបិតាសួគ៌ និងព្រះយេស៊ូវគ្រីស្ទ អាចជះឥទ្ធិពលដល់បំណងប្រាថ្នារបស់យើងដើម្បីថ្វាយបង្គំនៅទីនោះដោយរបៀបណា ?
-
តើព្រះវិហារបរិសុទ្ធ ឬកិច្ចការពង្សប្រវត្តិបានជួយអ្នកឲ្យមានអារម្មណ៍ខិតកាន់តែជិតព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ?
-
សូមនឹកចាំដល់សាច់រឿងពីដើមមេរៀននេះ ។ តើអ្នកនឹងចែកចាយអ្វីខ្លះ ជាមួយមិត្តភក្តិរបស់អ្នកអំពីសារៈសំខាន់ និងគោលបំណងនៃព្រះវិហារបរិសុទ្ធ ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យយល់ពីរបៀបដែលនិមិត្តរូបនៃរោងឧបោសថ និងនៃព្រះវិហារបរិសុទ្ធសម័យទំនើប អាចបង្រៀនអ្នកអំពីព្រះ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
និមិត្តរូបរោងឧបោសថជាក់លាក់អ្វីខ្លះដែលមានអត្ថន័យចំពោះអ្នក និងអ្វីដែលវាបង្រៀនអ្នកអំពីព្រះ ។
-
ចម្លើយរបស់អ្នកទៅកាន់មិត្តភក្តិរបស់អ្នកអំពីសារៈសំខាន់ និងគោលបំណងនៃព្រះវិហារបរិសុទ្ធ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?