អេសាវ និងយ៉ាកុបឱបគ្នា ដោយ រ៉ូប៊ើត ធី បារែត
លោកុប្បត្តិ ២៤–៣៣; មេរៀនទី ៣២
លោកុប្បត្តិ ២៩–៣៣
« ទុកឲ្យព្រះឈ្នះ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
តើវាមានសភាពយ៉ាងដូចម្ដេចទៅ ក្នុងការរួមបញ្ចូលព្រះនៅក្នុងជីវិតរបស់អ្នក ? ដូចជាអ្នកដែរ ព្យាការីយ៉ាកុបបានប្រឈមមុខនឹងបញ្ហាប្រឈមដ៏លំបាក ។ លោកគឺជាគំរូមួយនៃការអនុញ្ញាតឲ្យឥទ្ធិពលរបស់ព្រះជ្រាបចូលក្នុងជីវិតរបស់លោក ។ លោកបានខិតខំយ៉ាងខ្លាំងដើម្បីបានរៀបការនៅក្នុងសេចក្ដីសញ្ញា ។ យ៉ាកុបបានស្វែងរកពរជ័យដ៏ទេវភាពនៅក្នុងការងារប្រចាំថ្ងៃរបស់លោក ។ លោកបានធ្វើតាមការណែនាំរបស់ព្រះ ដើម្បីកែលម្អទំនាក់ទំនងគ្រួសារ ។ តាមរយៈឧបសគ្គរបស់លោក នោះយ៉ាកុបបានរៀនអំពីការបន្ទាបខ្លួន ការតស៊ូ និងអំណាចនៃការសន្យាដ៏ទេវភាព ។ មេរៀននេះអាចជួយអ្នកឲ្យបង្កើនឆន្ទៈរបស់អ្នក ដើម្បីទុកឲ្យព្រះឈ្នះនៅក្នុងជីវិតរបស់អ្នក ។
សិក្សាព្រះគម្ពីរ
ដោយប្រើមាត្រដ្ឋានពី ១ ដល់ ៥ សូមពិចារណាពីទីតាំងដែលអ្នកនឹងដាក់ខ្លួនអ្នក ។
-
៥ ៖ ព្រះគឺជាឥទ្ធិពលដ៏ធំបំផុតនៅក្នុងជីវិតរបស់ខ្ញុំ ។
-
៤ ៖ មានរឿងមួយចំនួនដែលមានឥទ្ធិពលមកលើខ្ញុំ ប៉ុន្ដែព្រះគឺនៅជិតកំពូលគេ ។
-
៣ ៖ មានរឿងជាច្រើនដែលមានឥទ្ធិពលមកលើខ្ញុំ ហើយព្រះគឺជាឥទ្ធិពលមួយក្នុងចំណោមនោះ ។
-
២ ៖ ពេលខ្លះព្រះមានឥទ្ធិពលមកលើខ្ញុំដែរ ។
-
១ ៖ បច្ចុប្បន្ននេះ ព្រះមិនមានឥទ្ធិពលអ្វីនៅក្នុងជីវិតរបស់ខ្ញុំទេ ។
សូមអានសំណួរដ៏បំផុសគំនិតដូចខាងក្រោមនេះដោយប្រធាន រ័សុល អិម ណិលសុន ហើយជញ្ជឹងគិតពីទីតាំងរបស់អ្នកនៅលើមាត្រដ្ឋាននេះ ។
តើបងប្អូនស្ម័គ្រចិត្តទុកឲ្យព្រះឈ្នះនៅក្នុងជីវិតរបស់បងប្អូនដែរឬទេ ? តើបងប្អូនស្ម័គ្រចិត្តទុកឲ្យព្រះមានឥទ្ធិពលដ៏ខ្លាំងបំផុតនៅក្នុងជីវិតរបស់បងប្អូនដែរឬទេ ? តើបងប្អូននឹងអនុញ្ញាតឲ្យព្រះបន្ទូលទ្រង់ ព្រះបញ្ញត្តិរបស់ទ្រង់ និងសេចក្តីសញ្ញារបស់ទ្រង់មានឥទ្ធិពលលើអ្វីដែលបងប្អូនធ្វើរាល់ថ្ងៃដែរឬទេ ? តើបងប្អូននឹងអនុញ្ញាតឲ្យព្រះសូរសៀងរបស់ទ្រង់មានអាទិភាពលើសសំឡេងអ្នកដទៃដែរឬទេ ? តើបងប្អូនស្ម័គ្រចិត្តទុកឲ្យអ្វីក៏ដោយដែលទ្រង់ចង់ឲ្យបងប្អូនធ្វើ មានអាទិភាពជាងមហិច្ឆិតាផ្សេងទៀតទាំងអស់ដែរឬទេ ? តើបងប្អូនស្ម័គ្រចិត្តដើម្បីទុកឲ្យព្រះទ័យទ្រង់គ្របដណ្តប់លើចិត្តរបស់បងប្អូនដែរឬទេ ? ( « Let God Prevail » Liahona ខែវិច្ឆិកា ឆ្នាំ២០២០ ទំព័រ ៩៤ )
ព្យាការីព្រះគម្ពីរសញ្ញាចាស់ យ៉ាកុបបង្ហាញយើងពីអ្វីដែលវាអាចមានសភាព ដើម្បីទុកឲ្យព្រះឈ្នះនៅក្នុងជីវិតរបស់យើង ។ ក្នុងអំឡុងពេលដ៏លំបាកមួយក្នុងជីវិតរបស់លោក ឈ្មោះរបស់លោកត្រូវបានប្តូរទៅជា អ៊ីស្រាអែល ដែលមានន័យថា « ទុកឲ្យព្រះឈ្នះ » ( សូមមើល លោកុប្បត្តិ ៣២:២៨ ) ។
ឪពុករបស់យ៉ាកុបឈ្មោះ អ៊ីសាក បានបង្គាប់លោកឲ្យស្វែងរកនរណាម្នាក់ដែលមានឆន្ទៈធ្វើ និងរក្សាសេចក្ដីសញ្ញាជាមួយព្រះ ។ អ្វីៗមិនបានកើតឡើង ដូចដែលយ៉ាកុបបានគ្រោងទុកនោះទេ ។
សូមអាន លោកុប្បត្តិ ២៩:២១–២៨ ដើម្បីមើលនូវអ្វីដែលបានកើតឡើងបន្ទាប់ទៀត ។ វាជាប្រយោជន៍ដើម្បីដឹងថា ព្រះអម្ចាស់បានទទួលយកនូវអាពាហ៍ពិពាហ៍ពហុពន្ធភាពដែលទ្រង់បានបញ្ជា ( សូមមើល គោលលទ្ធិ និងសេចក្តីសញ្ញា ១៣២:៣៤, ៣៧ ) ។
យ៉ាកុប លេអា និង រ៉ាជែល បានប្រឈមមុខនឹងការលំបាកដ៏ធ្ងន់ធ្ងរ ។ ទោះជាយ៉ាងណាក្តី នៅពេលពួកគេរក្សាសេចក្ដីសញ្ញារបស់ពួកគេជាមួយព្រះ នោះគ្រួសាររបស់ពួកគេបានរីកធំ និងមានភាពចម្រុងចម្រើនឡើង រួមទាំងកូនប្រុសទាំងដប់ពីរនាក់ ដែលមានកូនចៅក្លាយជាកុលសម្ព័ន្ធអ៊ីស្រាអែលទាំងដប់ពីរផងដែរ ។
ការទុកឲ្យព្រះឈ្នះនៅក្នុងជីវិតរបស់យើងនឹងជះឥទ្ធិពលលើមនុស្សដែលយើងជ្រើសរើសដើរលេងជាគូ និងរៀបការ ។
នៅពេលអ្នកបន្ដសិក្សា សូមរកមើលឧទាហរណ៍នៃគោលការណ៍ដូចតទៅនេះ ៖ នៅពេលយើងស្ម័គ្រចិត្តទុកឲ្យព្រះឈ្នះក្នុងជីវិតរបស់យើង នោះទ្រង់នឹងប្រទានពរដល់យើងក្នុងគ្រប់ការណ៍ទាំងអស់ ។ សូមស្វែងរកការណែនាំពីព្រះវិញ្ញាណបរិសុទ្ធ នៅពេលអ្នកពិចារណាពីអត្ថន័យនៃការទុកឲ្យព្រះឈ្នះ ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើការទុកឲ្យព្រះឈ្នះនៅក្នុងជីវិតរបស់ខ្ញុំ នាំមកនូវពរជ័យអ្វីខ្លះ ?
សូមអាន ម៉ូសាយ ២:៤១ ដើម្បីមើលសេចក្ដីសន្យាមួយ ដែលព្រះអម្ចាស់បានប្រទានតាមរយៈស្តេចបេនយ៉ាមីននៅក្នុងព្រះគម្ពីរមរមន សម្រាប់អ្នកដែលទុកឲ្យព្រះឈ្នះក្នុងជីវិតរបស់ពួកគេ ។
យ៉ាកុបគឺជាគំរូមួយនៃការសន្យានេះ ។ លោកបានធ្វើការដើម្បីថែរក្សាហ្វូងចៀមរបស់ឪពុកក្មេកលោកគឺ ឡាបាន់ ។ ព្រះអម្ចាស់ទ្រង់ប្រទានពរដល់ហ្វូងចៀមឲ្យរីកចម្រើន និងកើនចំនួននៅក្រោមការថែទាំរបស់លោក ( សូមមើល លោកុប្បត្តិ ៣០:៣០ ) ។ បន្ទាប់ពីបានបម្រើឡាបាន់អស់ជាច្រើនឆ្នាំ យ៉ាកុបចង់ដោះស្រាយការខ្វែងគំនិតគ្នារបស់ពួកលោកដោយសន្តិវិធី ហើយបំបែកគ្រួសាររបស់លោកចេញពីឪពុកក្មេកលោកដោយសុខសាន្ត ។
សូមអាន លោកុប្បត្តិ ៣០:២៧ ដើម្បីមើលអ្វីដែលឡាបាន់បាននិយាយអំពីយ៉ាកុប ។
ជាការបង់ថ្លៃសម្រាប់ការងារជាច្រើនឆ្នាំរបស់លោក យ៉ាកុបបានសុំគោក្របី ចៀម និងពពែដែលមិនសូវមានតម្លៃ ដោយទុកចិត្តលើព្រះអម្ចាស់ថា ទ្រង់នឹងជួយលោកចិញ្ចឹមពួកវាឲ្យបានធំធាត់ និងមានចំនួនច្រើនឡើង ។ ឡាបាន់ក៏បានយល់ព្រម ។ នៅក្រោមការថែទាំរបស់យ៉ាកុប សត្វទាំងអស់ដែលឡាបាន់បានប្រគល់ឲ្យលោកបានធំធាត់ឡើង ( សូមមើល លោកុប្បត្តិ ៣០:៣៧–៤៣ ) ។
-
នៅពេលអ្នកបានខិតខំធ្វើតាម និងគោរពតាមព្រះអម្ចាស់ តើទ្រង់បានប្រទានពរដល់អ្នកទាំងខាងសាច់ឈាម និងខាងវិញ្ញាណយ៉ាងដូចម្ដេច ?
-
តើមានរបៀបអ្វីខ្លះ ដែលយើងអាចទុកឲ្យព្រះអម្ចាស់ឈ្នះក្នុងជីវិតប្រចាំថ្ងៃរបស់យើង ( សាលារៀន ការងារ និងផ្សេងៗទៀត ) ?
ជម្រើស ខ
តើខ្ញុំអាចទុកឲ្យព្រះឈ្នះក្នុងទំនាក់ទំនងរបស់ខ្ញុំដោយរបៀបណា ?
វិធីមួយទៀតដែលយើងអាចទុកឲ្យព្រះឈ្នះក្នុងជីវិតរបស់យើង គឺនៅក្នុងទំនាក់ទំនងរបស់យើងជាមួយមិត្តភក្តិ និងគ្រួសាររបស់យើង ។ សូមគិតពីអ្វីដែលអាចធ្វើឲ្យទំនាក់ទំនងគ្រួសាររបស់អ្នកពិបាកនៅពេលខ្លះ ។
នៅពេលយ៉ាកុបចាកចេញពីស្រុកកំណើតរបស់លោក បងប្រុសរបស់លោកគឺអេសាវ ចង់សម្លាប់លោក ( សូមមើល លោកុប្បត្តិ ២៧:៤១ ) ។ ២០ឆ្នាំក្រោយមក ព្រះអម្ចាស់បានបញ្ជាឲ្យយ៉ាកុប និងគ្រួសារដ៏ធំរបស់លោកត្រឡប់ទៅស្រុកកំណើតវិញ ( សូមមើល លោកុប្បត្តិ ៣១:៣ ) ។
នៅពេលដឹងថា យ៉ាកុបនឹងមក អេសាវបានទៅជួបលោកដោយមានបុរសចំនួន ៤០០ នាក់មកតាម ។ យ៉ាកុបមានចិត្តព្រួយបារម្ភ ( សូមមើល លោកុប្បត្តិ ៣២:៣–៧ ) ។
ទោះបីជាយើងមិនដឹងច្បាស់ពីអ្វីដែលបានកើតឡើងនៅទីនេះក៏ដោយ ក៏យើងដឹងដែរថា យ៉ាកុបបានតស៊ូពេញមួយយប់ ដើម្បីទទួលបានពរជ័យ ដែលនៅទីបំផុតលោកបានទទួលពីព្រះអម្ចាស់ ។
នៅពេលឃើញយ៉ាកុប អេសាវរត់ទៅជួបលោក ហើយបានឱបលោក ( សូមមើល លោកុប្បត្តិ ៣៣:១–៤ ) ។
-
តើអ្នកបានរៀនអ្វីខ្លះពីគំរូរបស់យ៉ាកុប ឬអំពីព្រះអម្ចាស់ដែលអាចជួយអ្នកបាន ?
-
តើបទពិសោធន៍របស់អេសាវ និងយ៉ាកុប អាចជួយដល់អ្នកជាមួយទំនាក់ទំនងគ្រួសាររបស់អ្នកបានយ៉ាងដូចម្ដេច ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យបង្កើនឆន្ទៈរបស់អ្នក ដើម្បីទុកឲ្យព្រះឈ្នះក្នុងជីវិតរបស់អ្នក ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
អ្វីដែលអ្នកបានរៀនមកពីយ៉ាកុប អំពីការទុកឲ្យព្រះឈ្នះក្នុងជីវិតរបស់អ្នក ។
-
របៀបដែលដំណើររឿងរបស់អេសាវ និងយ៉ាកុប អាចជួយអ្នកឲ្យទុកឲ្យព្រះឈ្នះនៅក្នុងទំនាក់ទំនងរបស់អ្នក ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?