សារ៉ា និងអ៊ីសាក ដោយ ស្កត ស្នូ
លោកុប្បត្តិ ១៨–២៣ ៖ មេរៀនទី ២៥
លោកុប្បត្តិ ១៥–១៨; ២១
« ព្រះយេហូវ៉ាទ្រង់ក៏ប្រោស … ដូចជាទ្រង់បានមានព្រះបន្ទូល »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
មនុស្សធ្វើការសន្យា នៅពេលមនុស្សចង់បង្ហាញការប្តេជ្ញាចិត្តយ៉ាងខ្លាំងចំពោះអ្វីមួយ ។ គួរឲ្យសោកស្តាយ មនុស្សមិនតែងតែរក្សាការសន្យារបស់ពួកគេចំពោះគ្នាទៅវិញទៅមកជានិច្ចនោះទេ ។ ប៉ុន្ដែ នៅពេលព្រះវរបិតាសួគ៌ធ្វើការសន្យា នោះទ្រង់នឹងរក្សាការសន្យានោះ ។ មេរៀននេះអាចជួយអ្នកឲ្យបង្កើនទំនុកចិត្តរបស់អ្នកថា ព្រះអម្ចាស់នឹងរក្សាការសន្យារបស់ទ្រង់ ។
សិក្សាព្រះគម្ពីរ
សូមអានសាច់រឿងដូចខាងក្រោម ៖
យុវនារីម្នាក់បានជ្រើសរើសមានភាពស្មោះត្រង់ក្នុងការធ្វើកិច្ចការសាលារបស់នាង ដោយជឿថា ព្រះអម្ចាស់នឹងប្រទានពរដល់នាង ។ នាងសង្កេតឃើញថា ពិន្ទុរបស់នាងគឺអន់ជាងសិស្សផ្សេងទៀតដែលលួចចម្លង ។
យុវជនម្នាក់បានទទួលពរជ័យអយ្យកោរបស់គាត់ ដែលបញ្ជាក់ថា គាត់នឹងបម្រើបេសកកម្មពេញម៉ោង ។ ក្នុងអំឡុងពេលពិនិត្យសុខភាព គ្រូពេទ្យរកឃើញថា គាត់មានបញ្ហាខាងរាងកាយ ដែលនឹងមិនអនុញ្ញាតឲ្យគាត់បម្រើបានទេ ។
យុវនារីម្នាក់បានសាកល្បងការសន្យារបស់មរ៉ូណៃ ដោយការអានព្រះគម្ពីរមរមន និងការអធិស្ឋានដើម្បីដឹងថា តើព្រះគម្ពីរនេះគឺជាព្រះគម្ពីរពិតឬអត់ ។ នាងមានអារម្មណ៍ថា នាងមិនបានទទួលចម្លើយទេ ។
តើយុវវ័យទាំងនេះអាចមានសំណួរអ្វីខ្លះអំពីព្រះ និងសេចក្ដីសន្យារបស់ទ្រង់ ?
សូមជ្រើសរើសយកសាច់រឿងមួយ ក្នុងចំណោមសាច់រឿងទាំងនេះ ដែលអ្នកចង់គិតពេញមួយមេរៀននេះ ។
សេចក្ដីសន្យារបស់ព្រះអម្ចាស់ទៅកាន់អ័ប្រាហាំ និងសារ៉ា
អ័ប្រាហាំ និងសារ៉ាចង់មានកូន ( សូមមើល អ័ប្រាហាំ ១:២ ) ។ ប៉ុន្តែកាលពួកលោកមានអាយុកាន់តែច្រើន វាហាក់ដូចជាមិនអាចទៅរួចទេ ដែលពួកលោកអាចមានកូនបង្កើតដោយខ្លួនឯងអំឡុងជីវិតរមែងស្លាប់របស់ពួកលោក ។
បរិបទ ៖ នៅពេលអ្នកសិក្សាព្រះគម្ពីរ នោះវាអាចមានប្រយោជន៍ដើម្បីយល់ពីបរិបទ ។ បរិបទគឺជាកាលៈទេសៈ ឬសាវតាជុំវិញវគ្គបទគម្ពីរជាក់លាក់មួយ ។ បរិបទនេះអាចបញ្ជាក់ និងនាំមកនូវការយល់ដឹងដែលកាន់តែស៊ីជម្រៅអំពីដំណើររឿង ឬការបង្រៀនទាំងឡាយនៅក្នុងព្រះគម្ពីរ ។
សូមអានវគ្គបទគម្ពីរនីមួយៗខាងក្រោមនេះ និងបរិបទរបស់វាដែលអមមកជាមួយនោះ ។ សូមគូសសម្គាល់ពាក្យ ឬឃ្លាដែលអ្នកមានអារម្មណ៍ថាមានសារៈសំខាន់ និងចង់ចងចាំ ។ កាលអ្នកអាន សូមចាំក្នុងចិត្តថា ព្រះអម្ចាស់បានផ្លាស់ប្ដូរឈ្មោះរបស់អាប់រ៉ាម ទៅជាអ័ប្រាហាំ និងឈ្មោះរបស់សារ៉ាយ ទៅជាសារ៉ានៅទីបញ្ចប់ ។
-
លោកុប្បត្តិ ១៥:១–៦
បរិបទ ៖ អាប់រ៉ាមមានវ័យ៧៥ឆ្នាំជាង នៅគ្រានៃទស្សននិមិត្តនេះ ( សូមមើល លោកុប្បត្តិ ១២:៤ ) ។ មនុស្សជិតស្និទ្ធបំផុតដែលអ័ប្រាហាំមានកូនជាមួយ គឺជាអ្នកបម្រើដែលកើតនៅក្នុងផ្ទះរបស់លោក ។
-
លោកុប្បត្តិ ១៧:១៥–២១
បរិបទ ៖ ព្រះអម្ចាស់បានសន្យានឹងអាប់រ៉ាមថា លោកនឹងមានកូនក្នុងវ័យចំណាស់របស់លោក ( សូមមើល លោកុប្បត្តិ ១៥:៤–៥ ) ។ ប៉ុន្តែ សារ៉ាយ និងអាប់រ៉ាមនៅតែមិនអាចមានកូនបាន ។ ព្រះអម្ចាស់បានបញ្ជាអាប់រ៉ាមឲ្យរៀបការនឹង ហាការ ដែលជាអ្នកបម្រើរបស់សារ៉ា ។ អាប់រ៉ាមមានអាយុ៨៦ឆ្នាំ នៅពេលដែលហាការបានផ្ដល់កំណើតដល់អ៊ីសម៉ាអែល ( សូមមើល លោកុប្បត្តិ ១៦:៣, ១៦; គោលលទ្ធិ និងសេចក្ដីសញ្ញា ១៣២:៣៤ ) ។ ដោយសារហាការគឺជាបាវ ឬអ្នកបម្រើរបស់សារ៉ា នោះអ៊ីសម៉ាអែលត្រូវបានគេចាត់ទុកថាជាកូនរបស់អ័ប្រាហាំ និង សារ៉ាតាមផ្លូវច្បាប់ ។ តាមរបៀបនេះ សារ៉ាអាចមានអារម្មណ៍ថា ការសន្យារបស់ព្រះអម្ចាស់អំពីកូនចៅនោះត្រូវបានបំពេញ ។
-
លោកុប្បត្តិ ១៨:៩–១៤
បរិបទ ៖ ព្រះអម្ចាស់បានចាត់សារទូតបីរូបឲ្យទៅជួបអ័ប្រាហាំ និងសារ៉ា ។ មុននេះ ព្រះអម្ចាស់បានមានព្រះបន្ទូលប្រាប់អ័ប្រាហាំថា សារ៉ាដែលមានអាយុប្រហែល៩០ឆ្នាំនៅពេលនោះ នឹងមានកូនប្រុសម្នាក់ ( សូមមើល លោកុប្បត្តិ ១៧:១៦–១៩ ) ។ ពេលឮសារទូតថ្លែងពាក្យសន្យានេះចំពោះអ័ប្រាហាំម្ដងទៀត នោះសារ៉ាលួចអស់សំណើចខ្លួនឯងដោយមិនជឿ ( សូមមើល លោកុប្បត្តិ ១៨:១២ ) ។
តើអ្នកមានអារម្មណ៍ថា បរិបទនេះបានជួយអ្នកឲ្យយល់ពីអ្វីដែលអ្នកបានសិក្សាយ៉ាងដូចម្ដេច ?
សូមអាន លោកុប្បត្តិ ២១:១–៦ ហើយរកមើលរបៀបដែលព្រះអម្ចាស់បានគោរពសេចក្ដីសន្យារបស់ទ្រង់ចំពោះអ័ប្រាហាំ និងសារ៉ា ។ តើអ្នកបានរៀនអ្វីខ្លះអំពីព្រះអម្ចាស់ និងពាក្យសន្យារបស់ទ្រង់ ?
អ្នកអាចកត់ត្រាសេចក្ដីពិតដែលអ្នកបានរកឃើញអំពីព្រះ ដែលបានរក្សាពាក្យសន្យារបស់ទ្រង់ នៅក្នុងកំណត់ចំណាំមួយនៅក្បែរខគម្ពីរទាំងនេះ ។
ប្រធាន ឌៀថើរ អេហ្វ អុជដូហ្វ កាលនៅក្នុងគណៈប្រធានទីមួយ បានចែកចាយមេរៀនមួយ ដែលលោកបានរៀនអំពីសេចក្ដីសន្យារបស់ព្រះ ៖
សេចក្ដីសន្យារបស់ព្រះមិនមែនសុទ្ធតែត្រូវបានបំពេញភ្លាមៗ ឬនៅក្នុងរបៀបដែលយើងសង្ឃឹមទុកនោះទេ វាកើតឡើងស្របតាមពេលវេលារបស់ទ្រង់ និងរបៀបរបស់ទ្រង់ ។ ( « Continue in Patience » Liahona ខែឧសភា ឆ្នាំ២០១០ ទំព័រ៥៨ )
ប្រសិនបើមាន សូមមើលវីដេអូ « Good Things to Come » ( ៤:៥៥ ) ឬសូមគិតពីបទពិសោធន៍ផ្ទាល់ខ្លួនដែលអ្នកបានមាន នៅពេលអ្នកបានឃើញការសន្យារបស់ព្រះអម្ចាស់បានបំពេញនៅក្នុងជីវិតរបស់អ្នក ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើខ្ញុំអាចជួយអ្នកដទៃឲ្យមើលឃើញថា ព្រះបំពេញតាមពាក្យសន្យារបស់ទ្រង់ដោយរបៀបណា ?
សូមរើសយកសាច់រឿងមួយ ពីខាងដើមមេរៀននេះ ។ ដោយប្រើដំណើររឿងអំពីអ័ប្រាហាំ និងសារ៉ា និងអ្វីដែលអ្នកបានរៀនអំពីព្រះអម្ចាស់ និងពាក្យសន្យារបស់ទ្រង់ សូមសរសេរសារលើកទឹកចិត្តមួយទៅកាន់បុគ្គលនៅក្នុងសាច់រឿងនោះ ។
ជម្រើស ខ
តើខ្ញុំអាចចងចាំថា ព្រះបំពេញតាមពាក្យសន្យារបស់ទ្រង់ដោយរបៀបណា ?
ព្រះវរបិតាសួគ៌សព្វព្រះទ័យឲ្យអ្នកចងចាំថា នៅពេលអ្នកគោរពប្រតិបត្តិតាមសេចក្តីសញ្ញាដែលអ្នកធ្វើជាមួយទ្រង់ នោះទ្រង់នឹងរក្សាពាក្យសន្យាដ៏ពិសិដ្ឋរបស់ទ្រង់ ។ សូមចំណាយពេលពីរបីនាទី ហើយសរសេរសំបុត្រលើកទឹកចិត្តមួយទៅកាន់ខ្លួនអ្នកផ្ទាល់ ។ សូមរួមបញ្ចូលសេចក្ដីពិតនានា ដែលព្រះវរបិតាសួគ៌បានបង្រៀន ដែលនឹងជួយដល់អ្នកនៅអំឡុងពេលដ៏លំបាក ។ វាអាចជាការល្អដើម្បីរួមបញ្ចូលព័ត៌មានលម្អិតអំពីអ័ប្រាហាំ និងសារ៉ា ឬព័ត៌មានលម្អិតចេញពីជីវិតរបស់អ្នកផ្ទាល់ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យបង្កើនសេចក្ដីទុកចិត្តរបស់អ្នកថា ព្រះអម្ចាស់នឹងរក្សាសេចក្ដីសន្យារបស់ទ្រង់ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
សារដែលអ្នកបានសរសេរទៅកាន់មនុស្សម្នាក់នៅក្នុងសាច់រឿងមួយ ។ សូមរួមបញ្ចូលអ្វីមួយ ដែលអ្នកបានរៀនមកពីអន្តរកម្មរបស់ព្រះអម្ចាស់ជាមួយអ័ប្រាហាំ ឬអ្នកដទៃទៀត ។
-
សំបុត្រលើកទឹកចិត្តដែលអ្នកបានសរសេរទៅកាន់ខ្លួនឯង ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?