សូដុំម ដោយ ជូលៀស ឆ្ន័រ ហ្វុន ខារូលស៍ហ្វិល
លោកុប្បត្តិ ១៨–២៣ ៖ មេរៀនទី ២៦
លោកុប្បត្តិ ១៩
« កុំឲ្យមើលមកក្រោយឡើយ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ព្រះអម្ចាស់តែងតែខ្វល់ខ្វាយអំពីឥទ្ធិពលអាក្រក់ក្នុងជីវិតរបស់យើង ។ សមាជិកគ្រួសាររបស់ឡុតបានរងឥទ្ធិពលអាក្រក់ ដែលបានឡោមព័ទ្ធពួកគេនៅក្នុងទីក្រុងសូដុំម ។ មេរៀននេះអាចជួយអ្នកឲ្យចៀសវាងពីឥទ្ធិពលអាក្រក់ៗក្នុងជីវិតរបស់អ្នក ដើម្បីឲ្យអ្នកអាចធ្វើតាមព្រះវរបិតាសួគ៌ និងព្រះយេស៊ូវគ្រីស្ទបានកាន់តែពេញលេញ ។
សិក្សាព្រះគម្ពីរ
នៅឆ្នាំ១៩៨៦ យានអវកាស Challenger បានហោះឡើងជាមួយនឹងអវកាសយានិកចំនួនប្រាំពីរនាក់នៅលើនោះ ។ ត្រឹមតែ ៧៣ វិនាទីបន្ទាប់ពីការហោះ យានអវកាសនោះបានផ្ទុះ ។ អវកាសយានិកទាំងប្រាំពីររូបបានស្លាប់ ។ ការស៊ើបអង្កេតបានរកឃើញថា មូលហេតុនៃការផ្ទុះនេះ គឺជាត្រាបិតកៅស៊ូតូចមួយដែលហៅថា O-ring ។ វិស្វករបានព្រមានថា ត្រាបិតនេះអាចឈប់ដំណើរការក្នុងអាកាសធាតុត្រជាក់ ។ ប៉ុន្ដែលទ្ធផលដូច្នោះហាក់ដូចជាមិនងាយកើតឡើងទេ ដូច្នេះអ្នកធ្វើការសម្រេចចិត្តបានមើលរំលងវា ។
ដំណើររឿងពីយានអវកាស Challenger នេះគឺជាឧទាហរណ៍មួយពីរបៀបដែលរឿងតូចតាចអាចមានផលវិបាកធំដុំ ។
ព្រះគម្ពីរសញ្ញាចាស់តំណាលពីដំណើររឿងមួយ អំពីរបៀបដែលការសម្រេចចិត្តតូចតាចបានប៉ះពាល់ដល់អ័ប្រាហាំ និងក្មួយប្រុសរបស់លោកគឺ ឡុត ។ នៅពេលអ្នកបម្រើរបស់ពួកគាត់ចាប់ផ្តើមឈ្លោះប្រកែកគ្នា បុរសទាំងពីរនាក់បានសម្រេចចិត្តចែកដីគ្នា និងចែកផ្លូវគ្នា ។
សូមអាន លោកុប្បត្តិ ១៣:៨–១៣ ហើយគូសសម្គាល់ថា តើដីមួយណាដែលឡុតបានជ្រើសរើស និងការសម្រេចចិត្តតូចមួយ ដែលគាត់បានធ្វើអំពីត្រសាលរបស់គាត់ ។
នៅទីបំផុត ឡុត និងគ្រួសាររបស់គាត់បានផ្លាស់ទីលំនៅ ហើយទៅ « នៅ ក្រុងសូដុំម » ( លោកុប្បត្តិ ១៤:១២ បានបន្ថែមការគូសបញ្ជាក់ ) ។
សូមសរសេរកំណត់ចំណាំមួយជាប់នឹង លោកុប្បត្តិ ១៤:១២ ហើយឆ្លើយសំណួរខាងក្រោមនេះ ៖
-
តើអ្នកគិតថា ការសម្រេចចិត្តរបស់ឡុតអំពីត្រសាលរបស់គាត់ ទាក់ទងនឹងការសម្រេចចិត្តផ្លាស់ទៅនៅក្រុងសូដុំមរបស់គ្រួសារគាត់យ៉ាងដូចម្តេច ?
ខណៈដែលកំពុងរស់នៅក្នុងក្រុងសូដុំមដ៏ទុច្ចរិត ទេវតាបានយាងមកជួបនឹងគ្រួសាររបស់ឡុត ។ ទេវតាដ៏បរិសុទ្ធទាំងនេះបានព្រមានពួកគេឲ្យភៀសខ្លួន ព្រោះព្រះអម្ចាស់នឹងបំផ្លាញទីក្រុងនេះចោល ។
សូមអាន លោកុប្បត្តិ ១៩:១៤–១៩, ២៤–២៦ ។ សូមគូសសម្គាល់ការណែនាំជាក់លាក់ដែលឡុត និងគ្រួសាររបស់គាត់បានទទួល និងចុងបញ្ចប់ដែលពេញដោយសោកនាដកម្មសម្រាប់ភរិយារបស់ឡុត ។
អែលឌើរ អិល ថម ភែរី ( ឆ្នាំ១៩២២–២០១៥ ) ក្នុងកូរ៉ុមនៃពួកសាវកដប់ពីរនាក់ បានបង្រៀន ៖
ភាគច្រើននៃបញ្ហាដែលឡុតបានជួបប្រទះក្រោយមកនៅក្នុងជីវិតរបស់គាត់ ហើយគាត់មានបញ្ហាជាច្រើន អាចមានដានចេញពីការសម្រេចចិត្តដំបូងរបស់គាត់ ដើម្បីបែរទ្វារត្រសាលរបស់គាត់ទៅខាងក្រុងសូដុំម ។
អ័ប្រាហាំ ដែលជាឪពុកនៃពួកអ្នកស្មោះត្រង់ បានដកពិសោធជីវិតខុសពីនោះ ។ ពិតណាស់ មានបញ្ហាប្រឈមជាច្រើន ប៉ុន្ដែវាគឺជាជីវិតដ៏មានពរជ័យមួយ ។ យើងមិនដឹងថា ទ្វារត្រសាលរបស់អ័ប្រាហាំបែរមុខទៅខាងណានោះទេ ប៉ុន្តែមានតម្រុយដ៏មុតមាំមួយនៅខចុងក្រោយគេនៃលោកុប្បត្តិ ជំពូកទី ១៣ ។ វាចែងថា « អាប់រ៉ាម [ ឬ អ័ប្រាហាំ ] ក៏រើត្រសាលទៅនៅក្បែរដើមម៉ៃសាក់របស់ម៉ាមរេ ដែលនៅត្រង់ហេប្រុនវិញ ហើយគាត់ស្អាងអាសនា១ថ្វាយព្រះយេហូវ៉ានៅទីនោះ » ( លោកុប្បត្តិ ១៣:១៨ ) ។
ខណៈខ្ញុំមិនដឹងនៅឡើយ តែខ្ញុំផ្ទាល់ជឿថា ទ្វារត្រសាលរបស់អ័ប្រាហាំបែរមុខទៅទីអាសនា ដែលលោកបានស្អាងថ្វាយព្រះអម្ចាស់ ។ ( « The Power of Deliverance » Liahona ខែឧសភា ឆ្នាំ២០១២ ទំព័រ៩៦–៩៧ )
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើជម្រើសតូចតាចមានផលប៉ះពាល់អ្វីខ្លះ ទៅលើទំនាក់ទំនងរបស់ខ្ញុំជាមួយព្រះ ?
ប្រធាន ថូម៉ាស អេស ម៉នសុន ( ឆ្នាំ១៩២៧–២០១៨ ) បានបង្រៀន ៖
មានពាក្យថ្លែងថា ទ្វារនៃប្រវត្តិសាស្ត្របើកឡើងដោយសារតែត្រចៀកទ្វារដ៏តូច ហើយវាក៏ដូចគ្នានឹងជីវិតរបស់មនុស្សដែរ ។ ការជ្រើសរើសដែលយើងធ្វើកំណត់អំពីជោគវាសនារបស់យើង ។ ( « Choices » Liahona ខែឧសភា ឆ្នាំ២០១៦ ទំព័រ៨៦ )
ខណៈដែលជម្រើសតូចតាចរបស់ឡុតបាននាំទៅរកគ្រោះមហន្ដរាយ នោះជម្រើសតូចតាចរបស់អ័ប្រាហាំបាននាំទៅរកសុភមង្គលកាន់តែខ្លាំងឡើង ។
សូមធ្វើបញ្ជីមួយនៃចំណុចខាងក្រោមនេះនៅក្នុងសៀវភៅកត់ចំណាំរបស់អ្នក ៖
-
រឿងតូចតាចដែលអ្នកអាចធ្វើបាន ឬបន្តធ្វើ ដើម្បីខិតចូលកាន់តែជិតព្រះគ្រីស្ទ ។
-
រឿងតូចតាចដែលអ្នកអាចឈប់ធ្វើបាន ដែលនឹងជួយអ្នកឲ្យខិតចូលកាន់តែជិតព្រះគ្រីស្ទ ។
ជម្រើស ខ
តើខ្ញុំអាចធ្វើអ្វីខ្លះ ដើម្បីគេចចេញពីអំពើទុច្ចរិត ?
ប្រធាន ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ បានបង្រៀនដូចតទៅនេះអំពីភរិយារបស់ឡុត ។ អ្នកអាចសរសេរកំណត់ចំណាំមួយ ដែលរួមមាននូវពាក្យសម្ដីមួយចំនួន ឬពាក្យសម្ដីទាំងអស់ពីប្រធាន ហូឡិន នៅក្បែរ លោកុប្បត្តិ ១៩:២៦ ។
តាមមើលទៅ អ្វីដែលភរិយារបស់ឡុតបានធ្វើខុសគឺថា នាងមិនគ្រាន់តែគិតចង់ត្រឡប់ក្រោយវិញនោះទេ គឺនាងមានបំណងប្រាថ្នាចង់ត្រឡប់ទៅវិញតែម្តង ។ …
វាអាចទៅរួចដែលថា ភរិយារបស់ឡុតងាកត្រឡប់មើលក្រោយ ដោយការអាក់អន់ចិត្តនឹងព្រះអម្ចាស់ចំពោះអ្វីដែលទ្រង់បានបង្គាប់ឲ្យនាងបោះបង់ចោលនោះ ។ ( « Remember Lot’s Wife » [ ការប្រជុំធម្មនិដ្ឋាននៅសាកលវិទ្យាល័យព្រិកហាំយ៉ង់ ថ្ងៃទី១៣ ខែមករា ឆ្នាំ២០០៩ ] ទំព័រ២ នៅលើគេហទំព័រ speeches.byu.edu )
អ្នកប្រហែលជាយល់ពីអារម្មណ៍របស់ភរិយាឡុតបាន ។ តើអ្នកធ្លាប់ត្រូវបានល្បួងឲ្យត្រឡប់ទៅរកជម្រើសមិនល្អនៅក្នុងអតីតកាលដែរឬទេ ?
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ពេលខ្លះនៅក្នុងការប្រែចិត្តរបស់យើង នៅក្នុងការខិតខំប្រឹងប្រែងប្រចាំថ្ងៃរបស់យើងដើម្បីក្លាយដូចជាព្រះគ្រីស្ទ នោះយើងឃើញថា ខ្លួនយើងពុះពារនឹងទុក្ខលំបាកដដែលៗម្ដងហើយម្ដងទៀត ។ … សូមកុំបាក់ទឹកចិត្តឡើយ ។ បើអ្នកកំពុងខិតខំ និងធ្វើការដើម្បីប្រែចិត្ត នោះអ្នកកំពុងស្ថិតក្នុងដំណើរការនៃការប្រែចិត្តហើយ ។ …
ការលះបង់ចោលអំពើបាបមានន័យថា មិនត្រឡប់ក្រោយវិញឡើយ ។ ការលះបង់ចោលអំពើបាបត្រូវការពេលវេលា ។ ( « Repent … That I May Heal You » Liahona ខែវិច្ឆិកា ឆ្នាំ២០០៩ ទំព័រ៤១–៤២ )
វាអាចមានប្រយោជន៍ក្នុងការមើលវីដេអូនេះប្រសិនបើមាន « New Year’s: Look Not behind Thee » ( ៣:០៩ ) ។
នៅក្នុងសៀវភៅកត់ចំណាំរបស់អ្នក សូមដាក់ផែនការដើម្បីបន្ដនៅរឹងមាំក្នុងកិច្ចខិតខំរបស់អ្នកដើម្បីធ្វើតាមព្រះអម្ចាស់ ។ សូមរួមបញ្ចូលអ្វីជាក់លាក់ ដែលនឹងជួយរារាំងអ្នកកុំឲ្យមើលទៅក្រោយដូចជាភរិយារបស់ឡុត ។ អ្នកអាចពិចារណាអំពីពាក្យដូចនេះបាន ៖
-
ការលុបចោលតន្ត្រីដែលមិនសមរម្យ ។
-
ការកែលម្អការអធិស្ឋានរបស់អ្នក ។
-
ការធានាថា អ្នកចំណាយពេលវេលាជាមួយនឹងឥទ្ធិពលវិជ្ជមាន ។
-
ការអានព្រះគម្ពីររបស់អ្នក ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យចៀសវាងពីឥទ្ធិពលអាក្រក់ៗក្នុងជីវិតរបស់អ្នក ដើម្បីឲ្យអ្នកអាចធ្វើតាមព្រះវរបិតាសួគ៌ និងព្រះយេស៊ូវគ្រីស្ទបានកាន់តែពេញលេញ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
បញ្ជីនៃអ្វីៗដែលអ្នកអាចធ្វើបាន បន្តធ្វើ ឬឈប់ធ្វើដើម្បីងាកទៅរកព្រះគ្រីស្ទ ។
-
ផែនការរបស់អ្នកដើម្បីមិនមើលទៅក្រោយឡើយ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?