Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko e Kau ʻi he Ngāue Fakatemipalé mo e Hisitōlia Fakafāmilí: “ʻE ʻAlu Hake ʻa e Kau Fakamoʻuí ki he Moʻunga ko Saioné”

“Ko e Kau ʻi he Ngāue Fakatemipalé mo e Hisitōlia Fakafāmilí: ʻʻE ʻAlu Hake ʻa e Kau Fakamoʻuí ki he Moʻunga ko Saioné,’” Fuakava Motuʻá – Tohi Lēsoni ʻa e Faiako Seminelí (2026)

“Ko e Kau ʻi he Ngāue Fakatemipalé mo e Hisitōlia Fakafāmilí: ʻʻE ʻAlu Hake ʻa e Kau Fakamoʻuí ki he Moʻunga ko Saioné,’” Fuakava Motuʻá – Tohi Lēsoni ʻa e Faiako Seminelí

Teuteu ki he Temipalé: Lēsoni 204

Ko e Kau ʻi he Ngāue Fakatemipalé mo e Hisitōlia Fakafāmilí

“ʻE ʻAlu Hake ʻa e Kau Fakamoʻuí ki he Moʻunga ko Saioné”

Ko e Fakamoʻuí, Huhuʻí, mo e Faifakahaofí ko e ngaahi huafa ia naʻá ne fokotuʻu ʻa Sīsū Kalaisi ko e Tokotaha naʻe pani ʻe he Tamai Hēvaní ke fakahaofi kitautolu mei hotau tuʻunga hingá (vakai, ʻĪsaia 61:1–3). ʻOku fakaafeʻi kitautolu ʻe he Fakamoʻuí ke tau kau fakataha mo Ia ʻi Heʻene ngāué ko e “kau fakamoʻui” (vakai, ʻOpataia 1:21) ʻi heʻetau kau ʻi hono fakahaofi ʻetau ngaahi kui kuo pekiá. ʻE lava ke tokoni ʻa e lēsoni ko ʻení ke fokotuʻu ʻe he kau akó ha taumuʻa ke hoko ʻo hangē ange ko e Fakamoʻuí ʻaki ʻenau kau ʻi he ngāue fakatemipalé mo e hisitōlia fakafāmilí.

Teuteu ʻa e tokotaha akó: Fakaafeʻi e kau akó ke fai ha meʻa ʻoku fekauʻaki mo e ngāue fakatemipalé mo e hisitōlia fakafāmilí, hangē ko ha taha ʻo e ngaahi meʻá ni:

Faʻu ha ʻakauni ʻi he FamilySearch.org.

Fakaʻaongaʻi ha ngaahi miniti siʻi ke vakaiʻi e fakamatala ʻi he FamilySearch.org.

Kumi ha hingoa ʻo ha taha hoʻo ngaahi kuí ʻoku kei fiemaʻu ke fakakakato hono ngaahi ouaú ʻi he temipalé.

Kole ki ha mātuʻa pe kui ke vahevahe ha meʻa fekauʻaki mo ʻenau moʻuí pe fekauʻaki mo ha kui.

Ngaahi ʻEkitivitī Ako ʻOku Ala Fakahokó

Ki he fakahaofí

Fakakaukau ke kamata ʻa e kalasí ʻaki hono hiki e foʻi lea Fakahaofi ʻi he palakipoé.

Fakaʻaliʻali leva e fakatātā ʻo e kau paionia fononga saliote toho tangata ʻa Māteni mo Uilí pea fakaafeʻi e kau akó ke vahevahe ha ngaahi fakaikiiki mei he fakatātaá ʻokú ne fakahaaʻi ha fiemaʻu ke fakahaofi kinautolu. Pe te ke fehuʻi ki he kau akó pe ko e hā ʻoku nau ʻilo fekauʻaki mo e meʻa ʻoku hā ʻi he fakatātā ko ʻení. ʻE lava ke tokoni atu ʻa e fakamatala fakanounou ko ʻení.

Mormon pioneers at Red Buttes Camp on October 19, 1856. The pioneers are trying to light a fire to cook with in heavy snow and wind. The painting is part of the exhibits at the Mormon Handcart Visitors' Center at Martin's Cove in Wyoming.

Mei he 1856 ki he 1860, naʻe fononga ha kau paionia ʻe lauiafe ʻo e Siasí ki he Teleʻa Sōlekí ʻo fakaʻaongaʻi ha ʻū saliote toho tangata. ʻI ʻOkatopa ʻo e 1856, naʻe fekauʻi atu ai ʻe Pilikihami ʻIongi ha kau faifakahaofi moʻui ke tokoniʻi e kau fononga saliote toho tangata ʻa Māteni mo Uilí ʻa ia naʻa nau kei mamaʻo ʻaki ha maile ʻe laungeau pea lolotonga tō vave mai ʻa e faʻahitaʻu momokó.

Naʻe vahevahe ʻe Pīsope W. Kulisitofā Uātolo ʻo e Kau Pīsopeliki Pulé ʻa e meʻá ni:

10:7

Naʻe fakamatalaʻi ʻe ha mēmipa ʻo e kulupu ʻa Uilí ʻa e tūkunga faingataʻa kimuʻa pea aʻu ange ʻa e timi fakahaofí. Naʻá ne vahevahe ʻo pehē, “ʻI he taimi [pē] naʻe hangē ai ʻe siva ʻa e meʻa kotoa, … pea ʻikai ha toe ʻuhinga ke hoko atu ʻa e moʻuí, naʻe tali ʻe he ʻOtuá ʻemau ngaahi lotú ʻo hangē ha mana mei he langi tafitongá. Naʻe ʻasi mai … , ha kulupu fakahaofi, ʻo nau ʻomi mo kinautolu ha meʻakai mo e naunau. … ʻA ʻemau fakafetaʻi ki he ʻOtuá ʻi hono fakahaofi kimautolú.”

Naʻe hoko ʻa e kau fakahaofi ko ʻení ko ha kau moʻungaʻi tangata ki he kau paioniá, ʻi heʻenau fepaki mo e fakatuʻutāmaki ʻi he ngaahi tūkunga kovi ʻaupito ʻo e ʻeá ke ʻomi hao ki ʻapi ʻa e tokolahi taha ʻe ala lavá. (“Mahulu Hake ʻi ha Moʻungaʻi Tangata,” Liahona, Nōvema 2023, 89)

Kapau naʻá ke kau ʻi he kau paionia ko ʻeni naʻe faingataʻaʻiá, ko e hā naʻá ke mei fakakaukau ai ko ha kau moʻungaʻi tangata ʻa e kau faifakahaofi moʻui ko ʻení?

Fakakaukau ke fakaʻaliʻali ha laʻitā ʻo ha taha hoʻo ngaahi kuí. Te ke lava ʻo vahevahe mo e kau akó ha kiʻi meʻa siʻi fekauʻaki mo e kui ko ʻení.

Ko e founga tatau pē, ʻoku fili kitautolu ʻe he Tamai Hēvaní mo Sīsū Kalaisi ke tau fakahaofi ʻetau ngaahi kui kuo pekiá. Te tau lava ʻo fai ʻeni ʻaki ʻetau kau atu ki he ngāue fakatemipalé mo e hisitōlia fakafāmilí.

ʻE founga fēfē nai ha fiemaʻu ʻe heʻetau ngaahi kui kuo pekiá ke fakahaofi kinautolu ʻo hangē ko e kau paionia toho salioté?

Kapau ʻe fiemaʻu, te ke lava ʻo fakamatalaʻi ange ʻoku tau fiemaʻu kotoa ha ngaahi ouau mahuʻinga ke tau foki ai ki he Tamai Hēvaní, kau ai ʻa e papitaisó, maʻu ʻa e meʻafoaki ʻo e Laumālie Māʻoniʻoní, mo e ʻenitaumeni temipalé. He ʻikai lava ke maʻu ʻe heʻetau ngaahi kui kuo pekiá ʻa e ngaahi ouau ko ʻení ʻiate kinautolu pē. Naʻe teuteu ʻe he ʻEikí ha hala ke nau maʻu ai ʻa e ngaahi ouau ko ʻení ʻo fakafou ʻi he ngāue fakatemipale maʻá e kau pekiá (vakai, Tokāteline mo e Ngaahi Fuakava 128:15).

Fakalaulauloto ki he ngaahi meʻá ni:

ʻOku fēfē hoʻo ongoʻi fekauʻaki mo e kau ʻi he ngāue fakatemipalé mo e hisitōlia fakafāmilí? Ko e hā hono ʻuhingá?

ʻI hono kotoa ʻo e lēsoni ko ʻení, lekooti ha faʻahinga ueʻi fakalaumālie pē ʻoku tokoni atu ke ke ʻiloʻi e ngaahi founga te ke lava ai ʻo hoko ko ha taha ʻo e kau faifakahaofi moʻui ʻa e Tamai Hēvaní mo Sīsū Kalaisi maʻa hoʻo ngaahi kuí.

Kau Fakamoʻui ki he Moʻunga ko Saioné

Fakakaukau ke tā ha fakatātā faingofua ʻo ha moʻunga mo ha temipale pea fakaafeʻi e kau akó ke fai e meʻa tatau ʻi heʻenau tohinoa akó. Fakahingoa ʻa e fakatātaá ko e Moʻunga ko Saioné. Hili iá pea fakamatalaʻi fakanounou pe lau ʻa e meʻa ko ʻení ke tokoni ke mahino ki he kau akó ʻa e puipuituʻa kia ʻOpataiá.

Simple drawing of the Salt Lake Temple with a mountain behnd it

Hili hono puke pōpula ʻo Selusalemá, naʻe kikiteʻi ʻe he palōfita ko ʻOpataiá ʻe fakaʻauha ha tokolahi ʻo e hako ʻo ʻĪsoá (ko e māhanga ʻo e palōfita ko Sēkopé) koeʻuhí ko e faiangahalá. Naʻe kikiteʻi foki ʻe ʻOpataia ha feinga fakahaofi ki he hako ko ʻení mo ha niʻihi tokolahi kehe. Mahalo ʻe tokoni ke ʻiloʻi ʻe lava ke ʻuhinga ʻa e “Moʻunga ko Saioné” ʻi he veesi ko ʻení ki he kolo ko Selusalemá mo hono temipalé.

Lau ʻa e ʻOpataia 1:17, 21, ʻo kumi ʻa e ngaahi foʻi lea ʻoku nau fakamanatu atu kiate koe ʻa e temipalé.

ʻE lava ke fakamahinoʻi ange ʻe he kau akó ha ngaahi foʻi lea hangē ko e fakahaofí, māʻoniʻoní, pe kau fakamoʻuí. Fakaafeʻi e kau akó ke fakaʻilongaʻi ʻa e kupuʻi lea “ʻe ʻalu hake ʻa e kau fakamoʻuí ki he moʻunga ko Saioné” (ʻOpataia 1:21).

ʻOkú ke pehē ʻoku ʻuhinga ki he hā ke hoko ko ha “fakamoʻui ki he moʻunga ko Saioné” (ʻOpataia 1:21)?

Naʻe fakamatalaʻi ʻe ʻEletā Kēliti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku foaki ʻe he ʻEikí kiate kitautolu ha faingamālie fakalangi ke hoko ʻo tatau ange mo Ia ʻi heʻetau fakahoko ʻa e ngaahi ouau fakamoʻui fakafofonga ʻi he temipalé ʻoku fiemaʻu ʻe he niʻihi kehé, ka ʻoku ʻikai ke nau lava ʻo fakahoko maʻanautolú. ʻOku tau hoko ʻo kakato mo haohaoa ange ʻi heʻetau hoko ko e “kau fakamoʻui ki he Moʻunga ko Saioné.” (“Fiefia Taʻengatá”, Liahona, Nōvema 2022, 85)

Mahalo te ke fie fakamatalaʻi ange ʻoku ʻuhinga ʻa e fakafofongá ke fakafofongaʻi ha taha kehe.

ʻE lava ke hiki ʻe he kau akó ʻenau tali ki he fehuʻi ko ʻení ʻi lalo ʻi heʻenau tā fakatātā ʻo e temipalé.

Ko e hā ʻokú ke ako meia ʻOpataia mo ʻEletā Kongo fekauʻaki mo e hoko ko e “kau fakamoʻui ki he moʻunga ko Saioné” (ʻOpataia 1:21)?

Neongo ʻe ala fakaʻaongaʻi ʻe he kau akó ha fakalea kehe, ka te nau lava ʻo vahevahe ʻa e moʻoni ko ʻení: Te tau lava ʻo hangē ange ko e Fakamoʻuí ʻi heʻetau kumi ʻetau ngaahi kuí pea fakahoko e ngaahi ouau fakamoʻuí maʻanautolu ʻi he temipalé.
ʻE fakafehoanaki fēfē nai ʻi ha founga siʻi ʻa e ngāue fakatemipale maʻa hoʻo ngaahi kui kuo pekiá ki he meʻa naʻe fakahoko ʻe he Fakamoʻuí maʻatautolú?

Te ke lava ʻo fakamatalaʻi ange ʻe lava ke fakahaofi kitautolu ʻe he Fakamoʻuí mei he angahalá mo e maté ʻo fakafou ʻi Heʻene Fakaleleí—ko ha meʻa he ʻikai ke tau lava ʻo fai maʻatautolu (vakai, ʻAlamā 34:8–12). ʻI he meʻa tatau pē, te tau lava ʻo tokoni ke fakahaofi ʻetau ngaahi kuí ʻi heʻetau fakahoko e ngaahi ouau fakamoʻuí maʻanautolú—ko ha meʻa he ʻikai ke nau lava ʻo fai maʻanautolu.
Ko e hā ha ngaahi ʻulungaanga faka-Kalaisi te tau lava ʻo fakatupulaki ʻi heʻetau kumi ʻetau ngaahi kuí pea fakahoko e ngaahi ouaú maʻanautolu ʻi he temipalé?

Ko hono kamatá

Fakaʻaliʻali e ngaahi fehuʻi ko ʻení. ʻE lava ke tohi takatakai ʻe he kau akó ʻenau ngaahi talí ʻi heʻenau tā fakatātā ʻo e temipalé.

Ko e hā ha ngaahi founga moʻoni ʻe lava ai ha taha taʻu hongofulu tupu ʻo fakahoko hangē ko e fokotuʻu ʻa ʻEletā Kongó?
Ko e hā ha ngaahi founga kehe te tau lava ai ʻo kau ʻi he ngāue fakatemipalé mo e hisitōlia fakafāmilí? (ʻE lava ke ke fakakau ai haʻo ngaahi aʻusia pe ko e niʻihi kehé.)

Fakaafeʻi ha kau ako ke vahevahe ʻenau ngaahi talí mo e kalasí. Te ke lava ʻo hiki takatakai ʻenau ngaahi talí ʻi he tā fakatātā ʻo e temipalé ʻi he palakipoé. Te ke lava ʻo maʻu ha ngaahi fakakaukau lahi ange ʻi he fakamatala “Family History Is for Everyone: 9 Fun Ways to Participate,” ʻoku maʻu ʻi he ChurchofJesusChrist.org.

Kapau ʻoku ʻi ai ha taimi, fakaʻaongaʻi e Ngaahi Ouau Kuo Māú ʻi he FamilySearch.org ke fakaʻaliʻali ki he kau akó ʻa e founga ke taʻofi ai ha ngaahi hingoa ki he temipalé.

Ko e hā ha ngaahi tāpuaki pe aʻusia kuó ke maʻu ʻi hoʻo kau ʻi he ngāue fakatemipalé mo e hisitōlia fakafāmilí?

Ko ho taumuʻá

Fekumi ki he tokoni ʻa e Laumālie Māʻoniʻoní ʻi hoʻo fokotuʻu ha taumuʻa ʻi hoʻo tohinoá ke fakahoko ha taha ʻo e ngaahi fokotuʻu ʻoku hiki atu ʻi he palakipoé. ʻE ala tokoni atu ʻa e ngaahi fakakaukau ko ʻení:

Founga mo e taimi te ke lava ai ʻo fakahoko e ngāue hisitōlia fakafāmilí
Ko hai ʻe lava ʻo tokoni atú
Founga ʻe lava ke tokoniʻi ai koe ʻe he taumuʻa ko ʻení ke ke hoko ʻo hangē ange ko Sīsū Kalaisí

Fakakaukau ke talaange ʻoku lahi ha ngaahi uooti mo ha kolo ʻoku ʻi ai haʻanau kau faifaleʻi ki he temipalé mo e hisitōlia fakafāmilí te nau lava ʻo tokoniʻi e kau akó ke nau kamata kau ʻi he ngāue fakatemipalé mo e hisitōlia fakafāmilí.

Fakaʻosi ʻaki hono fakahaaʻi hoʻo loto-falala ki he malava hoʻo kau akó ʻo hoko ko e kau faifakahaofi moʻui mo e “kau fakamoʻui ki he moʻunga ko Saioné” (ʻOpataia 1:21).

Ngaahi Maʻuʻanga Tokoni Kehe

ʻOku ʻuhinga ki he hā ʻa e “ʻe ʻalu hake ʻa e kau fakamoʻui ki he moʻunga ko Saioné” (ʻOpataia 1:21)?

Naʻe akoʻi ʻe he Palōfita ko Siosefa Sāmitá (1805–1844) ʻo pehē:

Ka ʻe anga fēfē haʻanau hoko ko ha kau fai-fakamoʻui ʻi he Moʻunga ko Saioné? ʻAki haʻanau langa honau ngaahi temipalé, fokotuʻu honau ngaahi faiʻanga papitaisó, pea laka atu ʻo maʻu ʻa e kotoa ʻo e ngaahi ouaú, papitaisó, [hilifakinimá], fufulú, paní, fakanofó mo e mālohi ʻo e fakamaʻú ki honau ʻulú, maʻa ʻenau ngaahi kui kotoa kuo pekiá, pea huhuʻi kinautolu ke nau lava ʻo toe tuʻu mai ʻi he ʻuluaki toetuʻú pea hākeakiʻi ki he ngaahi nofoʻanga fakatuʻi ʻo e nāunaú mo kinautolu. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007, 547–48)

Ko e hā ʻa e ngaahi tāpuaki ʻoku maʻu ʻi heʻetau kau ki he ngāue fakatemipalé mo e hisitōlia fakafāmilí?

Naʻe vahevahe ʻe Palesiteni Lāsolo M. Nalesoni ʻo pehē:

ʻE hanga ʻe hoʻo moihū ʻi he temipalé mo hoʻo tokoni ai ki hoʻo ngaahi kuí, ʻo faitāpuekina koe ʻaki ha fakahā fakafoʻituitui mo ha melino ʻoku lahi angé, pea ʻe fakamālohia ai hoʻo tukupā ke nofo maʻu ʻi he hala ʻo e fuakavá. (“‘I Heʻetau Laka Fakataha Atu Kimuʻá,” Liahona, ʻEpeleli 2018, 7)

Naʻe fakamoʻoni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:55

ʻOku ou fakaafeʻi atu e toʻu tupu ʻo e Siasí ke mou ako mo maʻu e Laumālie ʻo ʻIlaisiaá. ʻOku ou poupou atu ke mou ako, fekumi ki hoʻomou ngaahi kuí, pea teuteuʻi kimoutolu ke fai ʻa e papitaiso fakafofonga ʻi he fale ʻo e ʻEikí maʻa hoʻomou ngaahi kui kuo pekiá. …

ʻI hoʻomou tali ʻa e fakaafe ko ʻení ʻi he loto-tuí, ʻe liliu ai homou lotó ki he ngaahi tamaí. ʻE tō ʻi homou lotó ʻa e ngaahi talaʻofa ko ia naʻe fai kia ʻĒpalahame, ʻAisake, mo Sēkopé. ʻE fakafehokotaki kimoutolu ʻe homou tāpuaki fakapēteliaké, ʻa ia ʻokú ne ʻoatu e hohoko homou hakó, ʻokú ne fakafehokotaki kimoutolu ki he ngaahi tamai ko ʻení pea ʻe mahuʻinga mālie leva kiate kimoutolu. ʻE tupulaki ʻa hoʻomou ʻofa mo e houngaʻia ʻi hoʻomou ngaahi kuí. ʻE loloto mo tolonga hoʻomou fakamoʻoni mo e ului ki he Fakamoʻuí. Pea ʻoku ou palōmesi atu ʻe maluʻi ʻa kimoutolu mei he ivi tākiekina mālohi ʻo e filí. ʻI hoʻomou kau pea ʻofa ʻi he ngāue māʻoniʻoni [ko ʻení], ʻe maluʻi ai kimoutolu ʻi hoʻomou kei talavoú pea ʻi hono kotoa hoʻomou moʻuí. (“ʻE Liliu ʻa e Loto ʻo e Fānaú,” Liahona, Nōvema 2011, 26–27) (taimi 10:31 ki he 11:47)

Te u lava fēfē ʻo fakahoko e ngāue fakatemipalé mo e hisitōlia fakafāmilí kapau ʻoku ʻikai ke u lava ʻo ʻalu ki ha temipale?

Naʻe vahevahe ʻe he kau taki ʻo e Siasí ha faleʻi ʻaonga kiate kinautolu ʻoku ʻikai ke nau ofi ki ha temipalé ka ʻoku nau kei fiemaʻu pē ʻa e ngaahi tāpuaki ʻo hono fakahoko e ngāue fakatemipalé mo e hisitōlia fakafāmilí. ʻE lava ke maʻu ʻa e faleʻi ko ʻení ʻi he vitiō “Fakahinohino ki he Tuʻunga Fakatakimuʻa ʻo e Temipalé mo e Hisitōlia Fakafāmilí ki he 2024” mei he taimi 17:54 ki he 20:12.

28:2

Ngaahi ʻEkitivitī Fakalahi ki he Akó

Founga ʻe taha ke kamata ʻakí

Ki ha founga ʻe taha ke kamata ʻaki e lēsoní, fakakaukau ke fakaʻaliʻali ʻa e ngaahi meʻa ko ʻení:

Ko e hā ha meʻa ʻoku faitatau ai e ngaahi meʻa ko ʻení?
Ko e fē ha taimi kuó ke mamata pe fanongo ai ʻi hano fakahaofi ha taha koeʻuhí ko ha taha ʻo e ngaahi meʻa ko ʻení?

Ngaahi tāpuaki kuo talaʻofa maí

Ke tokoni ke ʻiloʻi ʻe he kau akó ʻa e ngaahi tāpuaki kuo talaʻofa mai ʻe he kau palōfitá mo e kau ʻaposetoló ʻi he kau ki he ngāue fakatemipalé mo e hisitōlia fakafāmilí, fakakaukau ke huluʻi ha taha ʻo e ongo vitiō ko ʻení: “The Promised Blessings of Temple and Family History Work” (3:26) pe “The Promised Blessings of Temple and Family History Work 2” (4:04). Te ke lava foki ʻo vahevahe ʻa e ngaahi fakamatala meia ʻEletā Kongo mo ʻEletā Petinā ʻi he konga Ngaahi Maʻuʻanga Tokoni Kehé.

3:22

4:13

Ko hono ʻiloʻi hotau hisitōlia fakafāmilí

Ke fakamamafaʻi e mahuʻinga hono ʻiloʻi hotau hisitōlia fakafāmilí, fakakaukau ke huluʻi e vitiō “Discover Your Family History. Discover Your Story.” (2:42) ʻi he konga “Ko hono kamatá” ʻo e lēsoní. ʻI he mamata ʻa e kau akó, fakaafeʻi kinautolu ke fakalaulauloto ki he meʻa ʻe lava ke fakafofongaʻi ʻe he tohi kulokula ʻi he vitioó. Hili e vitioó, tokoni ke mahino kiate kinautolu te ne lava ʻo fakafofongaʻi ʻetau ngaahi hisitōlia fakafāmilí.

2:42

Ko e hā ha ngaahi founga kuo tāpuekina ai e taʻahine ʻi he vitioó koeʻuhí naʻá ne ʻiloʻi ʻene ngaahi kuí mo ʻenau ngaahi talanoá?

Fakakaukau ke vahevahe ʻa e fakamatala ko ʻení:

Naʻe akoʻi ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE lava ʻe he fehokotaki mo [ʻetau] ngaahi kuí ʻo liliu ʻetau moʻuí ʻi ha ngaahi founga fakaofo. Te tau maʻu ʻa e tuí mo e ivi mālohí mei honau ngaahi faingataʻaʻiá mo e lavameʻá. Te tau ako mei heʻenau ʻofá mo e ngaahi feilaulaú ke faʻa fakamolemole mo laka ki muʻa. ʻE hoko ʻetau fānaú ʻo loto-vilitaki. Te tau maʻu ʻa e maluʻi mo e mālohi. ʻOku hoko ʻa e ngaahi fehokotaki mo e ngaahi kuí ke fakatupulaki ai ʻa e vāofi fakafāmilí, loto-houngaʻiá, mo e ngaahi maná. ʻE lava ʻe he ngaahi vā fetuʻutaki peheé ke ʻomi ha tokoni mei he tafaʻaki ʻe taha ʻo e veilí. (“ʻOku ʻI Ai Hotau Hisitōlia Takitaha,” Liahona, Mē 2022, 45)

Te ke lava leva ʻo ʻeke ange ʻa e fehuʻi ko ʻení:

Ko e hā ha talanoa ki hoʻo kuí kuó ne tāpuekina hoʻo moʻuí?