Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻOku Tau Fuakava ʻi he Temipalé ke Talangofua ki he Fono ʻo e Talangofuá mo e Feilaulaú: Ko e Fuakava ke Talangofua ki he ʻOtuá mo Fakahoko ha Ngaahi Feilaulau Maʻaná

“ʻOku Tau Fuakava ʻi he Temipalé ke Talangofua ki he Fono ʻo e Talangofuá mo e Feilaulaú: Ko e Fuakava ke Talangofua ki he ʻOtuá mo Fakahoko ha Ngaahi Feilaulau Maʻaná,” Fuakava Motuʻá – Tohi Lēsoni ʻa e Faiako Seminelí (2026)

Teuteu ki he Temipalé: Ko e Fono ʻo e Talangofuá mo e Feilaulaú: Lēsoni 202

ʻOku Tau Fuakava ʻi he Temipalé ke Talangofua ki he Fono ʻo e Talangofuá mo e Feilaulaú

Ko e Fuakava ke Talangofua ki he ʻOtuá mo Fakahoko ha Ngaahi Feilaulau Maʻaná

ʻOku ʻofa ʻa e Tamai Hēvaní ki Heʻene fānaú kotoa. Ko e taha ʻo e ngaahi founga ʻoku fakahaaʻi ai ʻe he Tamai Hēvaní ʻEne ʻofá ko hono fakaafeʻi ʻEne fānaú ke nau fakahoko ha ngaahi fuakava mo Ia ʻi he temipalé. ʻOku kau ʻi he ngaahi fuakava ko ʻení ʻa ʻetau palōmesi ke talangofua ki he fono ʻo e talangofuá mo e fono ʻo e feilaulaú. ʻE lava ke tokoni ʻa e lēsoni ko ʻení ke mahino ki he kau akó ʻa e fono ʻo e talangofuá mo e feilaulaú ʻa ia ʻoku tau fuakava ke tauhi ʻi he ʻenitaumení.

Teuteu ʻa e tokotaha akó: Fakaafeʻi e kau akó ke fakakaukau ki he fehuʻi ko ʻení kimuʻa pea haʻu ki he kalasí: ʻE tāpuekina fēfē ʻeku moʻuí ʻi hono fai ha ngaahi fuakava lahi ange mo e Tamai Hēvaní?

Ngaahi ʻEkitivitī Ako ʻOku Ala Fakahokó

Ko e ngaahi taumuʻa ʻo e temipalé

Kamata e lēsoni ko ʻení ʻaki hono tokoniʻi e kau akó ke nau ʻiloʻi e ʻuhinga te nau fie fakahoko ai ha ngaahi fuakava mo e Tamai Hēvaní mo Sīsū Kalaisí. Ko ha founga ʻeni ʻe taha ke fakahoko ai ʻeni. Te ke lava ʻo kamata ʻaki hano ʻiloʻi ha ngaahi tūkunga faingataʻa ʻe ala fehangahangai mo e kakaí ʻi he moʻuí te ne lava ʻo tataki kinautolu ke nau fakamamaʻo mei he ʻOtuá. ʻE lava pē ke kau ʻi ha ngaahi fakakaukau ʻe niʻihi ʻa e vete-malí, puké, pe mole ʻa e ngāue maʻuʻanga moʻuí.

Ko e hā ʻoku fakatupu ai ʻe he ngaahi tūkunga faingataʻa ʻe niʻihi ʻoku fepaki mo e kakaí ke nau fakamamaʻo mei he ʻOtuá?
Ko e hā ʻoku mātuʻaki mahuʻinga ai ʻi he faʻahinga tūkunga pehení ke tau ofi ki he ʻOtuá kae ʻikai ke tau mamaʻo meiate Iá?

Fakalaulauloto ki he founga te tau lava ai ʻo teuteu ki he ngaahi faingataʻa ʻo e moʻuí kae lava ke tau ofi ki he ʻOtuá pea maʻu ʻEne tokoní mo e mālohí.

ʻOmi ha lapapeni fakamālohisino ʻe tolu ki he kalasí. Fakaafeʻi ha kau ako ʻe toko tolu ke nau haʻu ki muʻa ʻi he kalasí pe fakaʻaliʻali ʻa e ʻū tā ʻoku ʻoatú pea fakamatalaʻi e meʻa ʻoku hokó. Fakatui ʻa e ʻuluaki lapapeni fakamālohisinó ʻi he fasiʻanima ʻo e tokotaha ako ʻuluakí. Takai tuʻo ua ʻa e lapapeni fakamālohisino hono uá ʻi he fasiʻanima ʻo e tokotaha ako fika uá. Takai tuʻo tolu leva ʻa e lapapeni fakamālohisino hono tolú ʻi he fasiʻanima ʻo e tokotaha ako fika tolú.

Fakaafeʻi takitaha e kau ako ʻe toko tolú ke faoʻi honau nimá ke sio pe ko hai ʻe faingofua taha ʻene fakahoko iá. Te ke lava foki ʻo fehuʻi ki he kalasí pe ko e fē ʻi he kau ako ʻe toko tolú ʻoku nau pehē ʻe faingofua taha ke vete hono nimá mei he lapapení.

Pe te ke lava ʻo huluʻi ʻa e vitiō “Stronger and Closer Connection to God Through Multiple Covenants (Fehokotaki Mālohi mo Ofi Ange ki he ʻOtuá Fakafou ʻi he Ngaahi Fuakavá),” mei he taimi 4:13 ki he 5:44 ʻi hono fakatātaaʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e lēsoni fakataumuʻa ko ʻení mo ha kakai lalahi kei talavou ʻe toko tolu.

Ko e hā ʻe lava ke akoʻi mai ʻe he lēsoni fakataumuʻa ko ʻení fekauʻaki mo hono fakahoko mo tauhi e ngaahi fuakava mo e ʻOtuá?

Naʻe vahevahe ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻe lava ke tāpuekina ai kitautolu ʻi hono fakahoko e ngaahi fuakava mo e ʻOtuá:

ʻOku tānaki ʻe he fuakava takitaha ha vā fetuʻutaki, ʻo tohoakiʻi kitautolu ke tau ofi ange mo fakamālohia ʻetau fehokotaki mo e ʻOtuá.

… ʻI he taimi ʻoku tau fehangahangai ai mo e ngaahi faingataʻa ʻo e moʻuí, ʻoku holo leva ʻa e malava ke tau mamaʻo mei he ʻOtuá. (“Stronger and Closer Connection to God Through Multiple Covenants,” [Brigham Young University devotional, March 5, 2024], 2, 3, speeches.byu.edu)

Mahalo te ke fie kole ki he kau akó ke nau feinga ke ʻiloʻi ha niʻihi ʻo e ngaahi fuakava ʻoku tau fakahoko mo e ʻOtuá.

ʻOku tau fakahoko ha ngaahi fuakava mo e Tamai Hēvaní ʻi he temipalé ko ha konga ʻo e ʻenitaumeni fakatemipalé. Ko e konga ʻo e ʻenitaumení, ʻoku tau fuakava ke tauhi ʻa e ngaahi fono ʻo e talangofuá, feilaulaú, ko e ongoongolelei ʻo Sīsū Kalaisí, angamaʻá, mo e fakatapuí (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 27.2). ʻOku nofotaha ʻa e lēsoni ko ʻení ʻi he ongo fono ʻo e talangofuá mo e feilaulaú.

Fakakaukau ke fakaafeʻi e kau akó ke hiki ʻeni ʻi heʻenau tohinoá: Ko e konga ʻo e ʻenitaumeni temipalé, ʻoku tau fuakava mo e Tamai Hēvaní mo Sīsū Kalaisi ke moʻui ʻaki e fono ʻo e talangofuá mo e fono ʻo e feilaulaú.

Ko e fono ʻo e talangofuá mo e feilaulaú

Ko e meʻa naʻá ku akó

ʻE lava ke fakapapauʻi ʻe he Laumālie Māʻoniʻoní ʻa e ngaahi moʻoni kuo ako ʻe he kau akó ʻi heʻenau vahevahe ʻenau ngaahi aʻusiá mo e fakamoʻoní. Fakaafeʻi e kau akó ke vahevahe ha aʻusia fakataautaha pe fakakaukau ki ha taha ʻoku hoko ko ha sīpinga ʻo e talangofuá pe loto-fiemālie ke feilaulau maʻá e ngāue ʻa e ʻEikí. Mahalo ʻe tokoni ke vahevahe ha aʻusia pe sīpinga fakataautaha. ʻE lava ke fakaʻaongaʻi ʻa e ngaahi fehuʻi ko ʻení ʻi hono vahevahe ʻe he kau akó ʻa e ngaahi aʻusiá, ko ha konga ʻo ha fealēleaʻaki fakakalasi, pe ko hono tali ʻe he kau akó ʻi heʻenau tohinoa akó.

ʻE tokoni fēfē ʻa e talangofua ki he fono ʻo e talangofuá mo e feilaulaú ke tau hoko ʻo hangē ange ko Sīsū Kalaisí?
ʻE tokoni fēfē ʻa e fuakava ke talangofua ki he ongo fono ko ʻení ʻi he temipalé ke tau ʻunuʻunu ke ofi ange mo fakamālohia ʻetau fehokotaki mo e ʻOtuá?

Ngaahi Maʻuʻanga Tokoni Kehe

Ko e hā ʻa e ʻenitaumeni ʻoku tau maʻu ʻi he temipalé?

Ko e ʻenitaumení ko ha ouau fakalotu ʻoku fakahoko ʻi he ngaahi temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku lava ke maʻu ia ʻe he kau mēmipa lalahi ʻo e Siasí ʻoku nau mateuteu ki he aʻusia toputapu ko ʻení. ʻOku ʻoatu ʻe he ʻenitaumení ha ngaahi fakahinohino, ngaahi fuakava, mo e ngaahi tāpuaki kuo talaʻofa mai ʻokú ne ʻomi e mālohi, taumuʻa, mo e maluʻi ʻi he moʻui fakaʻahó. ʻOkú ne akoʻi fekauʻaki mo e Fakatupu ʻo e māmaní, ko e Hinga ʻa ʻĀtama mo ʻIví, ko e palani ʻo e huhuʻí ʻo fakafou ʻia Sīsū Kalaisi, pea mo ʻetau fononga ke foki ki he ʻao ʻo e ʻOtuá. …

ʻOku fakafou ʻi he ʻenitaumení ʻa e fakaloloto ʻe he kāingalotu ʻo e Siasí ʻa honau vā fakafuakava mo e ʻOtuá ʻi heʻenau palōmesi ke muimui ki Heʻene ngaahi tuʻunga ʻulungaanga ʻo e moʻui maʻá, angatonú, mo e ngāue tokoni ki he niʻihi kehé. ʻI he ouau toputapu ko ʻení, ʻoku fakahoko ʻe he kāingalotu ʻo e Siasí ha ngaahi fuakava “ke tauhi e fono ʻo e talangofuá, fono ʻo e feilaulaú, fono ʻo e ongoongoleleí, fono ʻo e angamaʻá, pea mo e fono ʻo e fakatapuí” (David A. Bednar, “Mateuteu ke Maʻu ʻa e Meʻa ʻAonga Kotoa Pē,” Liahona, Mē 2019, 103–4). ʻOku tokoni hono tauhi faivelenga ʻo e ngaahi talaʻofa ko ʻení ki he kāingalotu ʻo e Siasí ke nau hoko ko e Kau Māʻoniʻoni ʻi he Fakalelei ʻa Kalaisí. Ko e ʻenitaumení ko ha founga ia ʻe taha ʻoku foaki ai ʻe he ʻOtuá ʻa Hono mālohí ki Hono kakai ʻo e fuakavá. (Ngaahi Tefitó mo e Ngaahi Fehuʻí: ʻEnitaumení)

Ki ha fakamatala lahi ange fekauʻaki mo e ʻEnitaumení, vakai ki he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 27.2, Gospel Library.

Ko e hā ʻoku fakahaaʻi ki he ʻOtuá ʻe heʻeku talangofua ki Heʻene ngaahi fekaú?

Fakahaaʻi ha ʻofa ki he ʻOtuá ʻaki hono tauhi ʻEne ngaahi fekaú. Hangē ko ʻení, ʻi hono tauhi e ʻaho Sāpaté ke māʻoniʻoní, kau ai e teuteu faivelenga ki hono maʻu e sākalamēnití, ʻokú ke fakahaaʻi ai ki he ʻOtuá ʻokú ke loto fiemālie ke fakatapui ha ʻaho ʻe taha he uiké kiate Ia. ʻI hoʻo ʻaukai mo totongi vahehongofulu mo e ngaahi foakí, ʻokú ke fakahaaʻi ai ki he ʻOtuá ʻoku mahuʻinga ange ʻEne ngāué kiate koe ʻi he ngaahi meʻa fakamāmaní. ʻI hoʻo fakaʻaongaʻi e huafa ʻo e ʻOtuá mo Kalaisí ʻi he ʻapasiá, ʻo ʻikai ʻi ha founga launoa pe taʻe-ʻaonga, ʻokú ke fakahaaʻi ai ʻokú ke houngaʻia ʻi he meʻa kotoa kuó Na fai maʻaú. (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí [2022], 11–12)

ʻOku tauhi fēfē ʻa e fono ʻo e feilaulaú ʻi hotau kuongá ni?

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

Na‘e fakangata ‘e he mamahi taʻefaʻalaua ‘a Sīsū Kalaisí ‘a e feilaulau ‘o e lilingi totó, ka na‘e ‘ikai te ne ta‘ofi hono mahu‘inga ‘o e feilaulaú ‘i he palani ‘o e ongoongoleleí. ‘Oku kei fiema‘u pē ‘e hotau Fakamo‘uí ke tau hokohoko atu hono fai ʻo ha ngaahi feilaulau, ka ko e feilaulau ‘okú ne fiema‘u meiate kitautolu ‘i he taimi ní, ke tau “‘oatu kiate [Ia] ‘a e feilaulau ko e loto-mafesifesi mo e laumālie fakatomala” (3 Nīfai 9:20). ‘Okú Ne toe fekau foki ke tau ‘ofa mo fetauhi‘aki ‘iate kitautolu—ko hono ‘uhingá ke ‘oatu ha ki‘i konga si‘i ‘o ‘Ene feilaulaú ‘i he‘etau fai ha ngaahi feilaulau ‘i hotau taimí mo e ngaahi taumu‘a siokitá. … Ko e mo‘oni ko ‘etau mo‘ui ngāue tokoní, ko e ngaahi faka‘ilonga fe‘unga taha ia ‘o ‘etau tukupā ke tau tauhi ki he ‘Eikí mo hotau kāingá. (“Feilaulaú,” Liahona, Mē 2012, 19–20)

Ko e hā e uhinga ʻo hono ʻoatu ʻo ha feilaulau ʻo e loto mafesifesi mo ha laumālie fakatomalá?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

11:21

ʻI he kuonga muʻá ʻi he taimi ko ia naʻe fiemaʻu ai ʻe he kakaí ke nau hū ki he ʻEikí pea feinga ke maʻu ʻEne ngaahi tāpuakí, naʻa nau faʻa ʻave ha meʻaʻofa. Hangē ko ʻení, ko e taimi naʻa nau ō ai ki he temipalé naʻa nau ʻave mo ha feilaulau ke hilifaki ʻi he funga ʻōlitá. Hili ʻa e Fakaleleí mo e Toetuʻú, naʻe folofola ʻa e Fakamoʻuí ʻo pehē he ʻikai ke Ne toe tali ha ngaahi feilaulau tutu ʻo e fanga monumanú. Ko e meʻaʻofa pe ko e feilaulau te Ne tali ʻi he taimi ní ko ha “loto-mafesifesi mo e laumālie fakatomala” (3 Nīfai 9:20). ʻI hoʻo fekumi ki he tāpuaki ʻo e uluí, te ke lava ʻo foaki ki he ʻEikí ʻa e meʻaʻofa ʻo e loto-mafesimafesi pe fakatomalá pea mo ho laumālie fakatomala pe talangofuá. Ko hono moʻoní, ko e meʻaʻofa ia ʻaʻau—ʻo ho tuʻunga lolotongá pea mo e meʻa te ke aʻusiá. (“When Thou Art Converted,” Liahona, May 2004, 12) (taimi 7:01 ki he 7:46)

Ngaahi ʻEkitivitī Fakalahi ki he Akó

Ngaahi feilaulau ke maʻu ʻa e ngaahi tāpuaki taʻengata kuo talaʻofa ʻi he temipalé

ʻE lava ke fakaʻaongaʻi ʻa e vitiō “Temples Are A Beacon (Ko Ha Maama ʻa e Ngaahi Temipalé)” (2:50) ke ueʻi ʻa e kau akó ke nau fakahoko ha ngaahi feilaulau ke ʻalu ki he temipalé. ʻI he vitioó, ʻoku vahevahe ai ʻe Palesiteni Tōmasi S. Monisoni (1927–2018) ʻa e talanoa ʻo e fāmili Mou Tamí ʻa ia naʻa nau fai ha ngaahi feilaulau lahi ke ʻalu ki he temipalé. Hili e vitioó te mou lava ʻo aleaʻi e ngaahi feilaulau te tau lava ʻo fai ke moihū ai ki he ʻOtuá ʻi Hono falé.

2:50

Ko ha fakakoloa ʻo e mālohí

Fakakaukau ke tokoni ke mahino ki he kau akó ʻa e founga ʻoku tāpuekina ai kitautolu ʻaki e mālohi ʻo e ʻOtuá ʻo fakafou ʻi he ʻenitaumeni temipalé. Fakakaukau ke lau ʻa e Tokāteline mo e Ngaahi Fuakava 38:32, 38; 43:16. ʻE lava foki ke lau ʻe he kau akó ʻa e fakamatala fekauʻaki mo e ʻenitaumení ʻi he Ngaahi Maʻuʻanga Tokoni Kehé. Aleaʻi ha ngaahi founga ʻe lava ke tokoniʻi ai kitautolu ʻi hono moʻui ʻaki e fono ʻo e talangofuá mo e feilaulaú ke fakakoloaʻi kitautolu ʻaki e mālohi ʻo e ʻOtuá. Tokoniʻi e kau akó ko ha konga ʻo e fealēleaʻakí, ke nau fakatokangaʻi ʻoku tokoniʻi kitautolu ʻe heʻetau feinga ke moʻui ʻaki e ngaahi fono ʻo e talangofuá mo e feilaulaú ke tau hoko ʻo hangē ange ko Sīsū Kalaisí.

Ko e teuteu ke fakahoko ha ngaahi fuakava mo e ʻOtuá ʻi he temipalé

Naʻe vahevahe ʻe Sini B. Pingihemi, ko e Palesiteni Lahi mālōlō ʻo e Fineʻofá, ʻa ʻene aʻusia ʻi he teuteu ke fakahoko ha ngaahi fuakava mo e ʻOtuá ʻi he temipalé. Te ke lava ʻo huluʻi ʻa e vitiō: “ʻOku Fakamālohia, Maluʻi, mo Teuteuʻi Kitautolu ʻe he Ngaahi Fuakava mo e ʻOtuá ki he Nāunau Taʻengatá” (11:59) mei he taimi 1:42 ki he 2:50.

11:59

Hili e vitioó, te mou lava ʻo aleaʻi ʻa e founga ʻe lava ai ʻe he mahino ʻo e ngaahi fuakava te tau fakahoko mo e ʻOtuá ʻi he temipalé, ʻo teuteuʻi kitautolu ki he meʻa toputapu ko iá.