Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Mampandray anjara ny Tompo amin’ny fianaranao: Hampitombo sy hanamafy orina ny ezaka ataonao ny Tompo

“Mampandray anjara ny Tompo amin’ny fianaranao: Hampitombo sy hanamafy orina ny ezaka ataonao ny Tompo,” Testamenta Taloha: Boky torolalana ho an’ny mpampianatra seminera (2026)

“Mampandray anjara ny Tompo amin’ny fianaranao: Hampitombo sy hanamafy orina ny ezaka ataonao ny Tompo,” Testamenta Taloha: Boky torolalana ho an’ny mpampianatra seminera

Mahomby any an-tsekoly: Lesona 192

Mampandray anjara ny Tompo amin’ny fianaranao

Hampitombo sy hanamafy orina ny ezaka ataonao ny Tompo

Rehefa mianatra isika dia hiatrika sakantsakana rehefa miasa mba hampitombo ny fahalalantsika sy ny fahatakarantsika ny fahamarinana. Tsy voatery hiatrika irery ireo olana ireo isika. Miraharaha antsika sy ny fivoarantsika ny Ray any An-danitra sy i Jesoa Kristy, ary te hanampy antsika amin’ny ezaka ataontsika any an-tsekoly Izy Ireo. Ity lesona ity dia afaka manampy ny mpianatra hampandray anjara ny Tompo amin’ny fianaran’izy ireo.

Fanomanana ny mpianatra: Asao ny mpianatra hisaintsaina ny fomba nahitan’izy ireo ny Tompo nanampy azy ireo na ny olona iray fantany tany an-tsekoly. Azon’izy ireo atao ny miomana hizara ny zavatra niainany amin’ny iray kilasy.

Sahanasa fianarana azo atao

Olana any an-tsekoly

Hevero ny hanomboka ny fotoam-pianarana amin’ny alalan’ny fanasana mpianatra iray ho eny aloha mba hamita asa iray izay mitaky ny fanampian’ny hafa. Ohatra, tampeno ny mason’ilay mpianatra ary angataho izy ireo hanivana vatomamy na bokotra araka ny lokony avy. Raha sahirana ilay mpianatra amin’ny voalohany dia azonao atao ny mametraka fanontaniana toy ny hoe: “Ahoana no ahafahan’ny hafa ao amin’ny efitrano manampy anao?”

Inona no ifandraisan’io fampisehoana io amin’ny ezaka ataontsika amin’ny fianarana any an-tsekoly?
Inona avy ireo toe-javatra sasantsasany any an-tsekoly na amin’ny fianarana izay mety ho sarotra ho an’ny zatovo?

Ny valin-tenin’ireo mpianatra dia mety ahitana zavatra toy ny hoe manana olana amin’ny taranja iray manokana any an-tsekoly, na olana amin’ny fianarana, na olana amin’ny fitantanana fotoana. Azonao atao ny mitanisa ireo valin-teny ireo eny amin’ny solaitrabe. Azonao atao ny mamporisika ireo mpianatra hanoratra olana iray izay atrehan’izy ireo amin’izao fotoana izao eo amin’ny fianarany. Hanampy ny fijerena io lisitra io mandritra ny lesona.

Mitahy ireo ezaka tsara ataontsika ny Tompo

Vakio ity teny nambaran’ny Loholona Clark G. Gilbert ao amin’ny Fitopololahy ity, ka tadiavo izay azontsika itodihana mba hahazona fanampiana amin’ireo fanamby eo amin’ny ezaka ataontsika amin’ny fianarana any an-tsekoly.

Fantatro fa mety ho sarotra ny manohy ny fianaranareo ary mitaky fahafoizan-tena. Fantatro fa tena sarotra ny asa ataonareo ary misy alina sarotra maro rehefa miari-tory ianareo mba hamita ireo enti-mody, hianatra hevitra vaovao, ary hitantana ireo fanolorantena hafa mitaky ezaka lehibe eo amin’ny fiainanareo. Saingy mifikira hatrany. Manehoa fikirizana hatrany. Fa mivonòna ihany koa hivoatra avy amin’ny fikirizana mankany amin’ny fianteherana amin’ny fahasoavana. Ampandraiso anjara ny Tompo. Mivavaha mba hahazo ny fanampiany, dia hampitombo ny ezaka ataonao Izy. Fantaro ny halehiben’ny fitiavanay anao. Manan-danja kokoa, fantaro ny halehiben’ny fitiavan’ny Tompo anao ary hoampatanjahany anao amin’ireo ezaka feno fahamarinana ataonao mba hianatra sy hivoatra ary ho tonga tahaka Azy kokoa. (“From Grit to Grace” [BYU–Pathway Worldwide devotional, Sept. 25, 2018], 2, byupathway.edu)

Inona no hitanao fa mitondra fanantenana ho anao na afaka mamporisika zatovo iray amin’ny fianarany?

Rehefa mizara ny mpianatra dia ampio izy ireo hamantatra fitsipika iray toy ny hoe rehefa mampandray anjara ny Tompo amin’ny fianarantsika isika dia hampivoatra sy hanamafy orina ny ezaka ataontsika Izy.
Ahoana no mety hampitomboan’ny Tompo, na hampatanjahany ny ezaka ataontsika rehefa mampandray anjara Azy amin’ny fianarantsika isika?

Ny mpianatra dia mety hilaza zavatra toy ny fomba ahafahan’ny Tompo manampy azy ireo hahatsiaro ny zavatra nohalalininy, na hanana faharetana amin’ireo mpampianatra sy mpiara-mianatra aminy, na hahatsapa fitoniana mandritra ny fanadinana iray. Azonao atao ny manazava fa matetika ny Tompo dia hanampy antsika hianatra amin’ny alalan’ny Fanahy Masina, izay afaka mameno antsika amin’ny fitoniana, manampy antsika hahafantatra ny fahamarinana, ary hanazava ny eritreritsika (jereo ny Romana 15:13; Môrônia 10:5; Fotopampianarana sy Fanekempihavanana 6:15).

Fomba ampandraisana anjara ny Tompo amin’ny fianaranao

Rehefa vitan’ny mpianatra ilay taratasy zaraina dia hevero ny hanasa azy ireo hisafidy mpitondra teny iray hizara ny zavatra nifanakalozan’ilay vondrona hevitra.

Raha miainga avy amin’ny zavatra nohalalininao dia inona avy ireo zavatra manokana azontsika atao mba hampandraisana anjara ny Tompo amin’ny fianarantsika?

Raha mila fitarihana fanampiny ny mpianatra dia azonao atao ny mizara ny sasany amin’ireto manaraka ireto na izy rehetra ho fomba hampandraisana anjara ny Tompo amin’ny fianarantsika:

Diniho ary aoka ianao ho feno fankasitrahana noho ireo fivoarana kely na tsy tapaka (2 Nefia 28:30).
Ao anatin’ny vavaka dia mangataha fitahiana manokana amin’ny Ray any An-danitra toy ny fananana herimpo hanangana ny tananao, hametraka fanontaniana, ary hahazo fanampiana fanampiny (Etera 2:18–23).
Ekeo ireo fahalemenao ary ampiharo ny finoanao ny Tompo fa hanampy anao amin’izy ireny Izy (Mosesy 6:31–34; Mosesy 7:13).
Halalino ireo zavatra noraisina an-tsoratra avy ao an-dakilasy isan’andro ary mangataha tsodranon’ny fisoronana alohan’ny fitsapana na andraikitra manan-danja iray (Fotopampianarana sy Fanekempihavanana 88:118).

Hevero ny hanasa ny mpianatra hizara zavatra niainana iray mikasika ny fomba nampitomboan’ny Tompo sy nampatanjahany azy ireo na ny olona iray fantany rehefa nampandray anjara ny Tompo tamin’ny fianarany izy ireo.

Mampandray anjara ny Tompo amin’ny fianarantsika

Omeo fotoana ireo mpianatra hanaovana drafitra hampandraisana anjara ny Tompo amin’ny fianaran’izy ireo. Azonao atao avy eo ny mampiseho ireto torolalana manaraka ireto ary manasa ny mpianatra hirakitra an-tsoratra ny eritreritr’izy ireo ao amin’ny diary fandalinany.

Eritrereto ny olana iray izay atrehanao amin’izao. Vitao ao anatin’ny diary fandalinanao ity manaraka ity.

Inona ao amin’ny asa atao any am-pianarana no tianao hampandraisana anjara ny Ray any An-danitra sy i Jesoa Kristy? Ataovy voafaritra mazava tsara ny zavatra ho ataonao.

Azonao atao ny mangataka ireo mpianatra izay vonona hizara ny zavatra tsapany fa tokony hataony. Hevero ny hizara ny fijoroana ho vavolombelona anananao momba ny Ray any An-danitra sy i Jesoa Kristy ary ny fomba hitahian’ Izy Ireo antsika rehefa mampandray anjara Azy Ireo amin’ny fianarantsika isika.

Loharanom-pitaovana fanampiny

Ahoana raha manana olana aho izay mahatonga ny fianarana ho sarotra ho ahy?

Nampianatra izao ny Filoha Dieter F. Uchtdorf, izay tao amin’ny Fiadidiana Voalohany tamin’izany:

19:13

Na dia manana fahalemena avokoa aza isika rehetra, dia azontsika resena izy ireny. Eny, amin’ny alalan’ny famindrampon’ Andriamanitra dia tonga matanjaka ho antsika ny zavatra malemy, raha manetry tena sy manam-pinoana isika.

Mandritra ny androm-piainantsika, dia manolotra fitahiana ara-batana sy fanomezana ara-panahy ny fahasoavan’ Andriamanitra, izay manitatra ny fahafahantsika manao zavatra sy manatsara ny fiainantsika. Manadio antsika ny fahasoavany. Manampy antsika ho tonga ilay tsara indrindra vitantsika ny fahasoavany. (“Ny fanomezam-pahasoavan’ny famindram-po,”Liahona, mey 2015, 108)

Nampianatra ny Filoha Henry B. Eyring hoe:

Fantatry ny Tompo ny zavatra izay ilainy hataonao sy ny zavatra ilainao ho fantatra. Tsara fanahy sy mahafantatra ny zava-drehetra Izy. Noho izany dia afaka manantena amim-pahatokiana ianao fa nanomana fomba ahafahanao mianatra Izy ao anatin’ny fiomanana amin’ny asa fanompoana izay hataonao. Tsy ho fantatrareo tanteraka ireo fahafahana ireo, tahaka ny tsy nahafantarako izany. Saingy raha mametraka ny zavatra ara-panahy ho lohalaharana ianao eo amin’ny fiainanao dia hahatsapa ho voatarika mankany amina fianarana ary hazoto hiasa mafy kokoa. Ho fantatrao any aoriana any fa nitombo ny hery hanompoanao, ary ho feno fankasitrahana ianao. (“Education for Real Life,” Ensign, Oct. 2002, 18–19)

Nahoana aho no tokony hitodika any amin’ Andriamanitra mba hahazoana fanampiana amin’ny fianarako?

Nilaza izao ny Loholona Ronald A. Rasband ao amin’ny Kôlejin’ny Apôstôly Roambinifolo:

Isika tsirairay dia sarobidy sy tian’ny Tompo, izay miahiahy, mibitsika, ary miambina antsika amin’ny fomba miavaka ho an’ny tsirairay amintsika. Tena hendry kokoa sy mahery kokoa noho ny lehilahy sy vehivavy mety maty Izy. Fantany ireo olantsika, ireo fandresentsika, ary ireo faniriana marina ao am-pontsika. (“Amin’ny alalan’ny drafitra masina,” Liahona, nôv. 2017, 56)

Nampianatra izao ny Filoha Russell M. Nelson:

Ry rahalahy sy anabavy malala, Andriamanitra no loharanon’ny fahamarinana rehetra. Ny Fiangonan’i Jesoa Kristy ho an’ny Olomasin’ny Andro Farany dia manaiky ny fahamarinana rehetra izay ampitain’ Andriamanitra amin’ireo zanany, na nianarany tao amin’ny laboratoara siantifika izany na azo tamin’ny fanambarana mivantana avy Aminy. (“Inona no marina?” Liahona, nôv. 2017, 61)

Sahanasa fianarana fanampiny

Fomba hafa hanombohana

Ho solon’ilay fanasana mpianatra iray hamita asa iray any am-piandohan’ny fotoam-pianarana dia azonao atao ny mampiseho sarina tany foana sy zaridaina iray toy ireto sary roa manaraka ireto. Azonao atao ny mangataka ny mpianatra hizara ny zavatra tonga ao an-tsainy rehefa mieritreritra tany foana iray izy ireo raha oharina amin’ny zaridaina iray.

Vakio ny Salamo 63:1 sy ny Isaia 58:11, dia tadiavo ny zavatra ampianarin’ireo andininy ireo momba ny Tompo.

Inona no ifandraisan’ireo sary ireo amin’ny zavatra nianaranao momba ny Tompo?
Nahoana no fanoharana mahery vaika maneho ny Tompo ny rano?

Ampio ny mpianatra hamantatra ny fomba hamahanan’ny Tompo ara-panahy ny fanahintsika sy hamelany antsika mitombo. Azonao atao ny manasa ny mpianatra hieritreritra ny fomba ahafahan’ny Tompo mamahana ara-panahy ny ezaka ataon’izy ireo mba hianatra. Avy eo dia azonao atao ny mifindra mankamin’ilay teny nambaran’ny Loholona Clark G. Gilbert momba ny fianarana.

Ohatra iray ao amin’ny soratra masina amin’ny fampandraisana anjara ny Tompo

Mety hahazo tombontsoa ny mpianatra avy amin’ny fandalinana ohatra iray avy amin’ny soratra masina izay ahitana olona iray nampandray anjara ny Tompo tamin’ny zavatra iray. Hevero ny hampiasa ity sahanasa manaraka ity mba hampitomboana ny fahatakaran’ny mpianatra ilay fahamarinana avy amin’ny Loholona Clark.

Azonao atao ny manazava amin’ny mpianatra fa ny Mpanjaka Nebokadnezara avy any Babylona dia nanana nofy izay nanahirana azy. Nandidy ireo magy tao amin’ny fanjakany izy, anisan’izany i Daniela, mba hilaza aminy ny dikan’ilay nofy. Raha tsy nahavita izany izy ireo dia nilaza ny mpanjaka fa hovonoina ho faty izy ireo. Nangataka fotoana misimisy kokoa tamin’ny mpanjaka i Daniela, sady nampanantena ny handika ilay nofy (jereo ny Daniela 2:1–16).

Asao ny mpianatra hamaky ny Daniela 2:17–23, ka hitady ny zavatra azontsika ianarana avy amin’i Daniela izay afaka manampy antsika hahatakatra ny fomba ahafahan’ny Tompo ho tafiditra ao anatin’ny fandalinantsika sy ny fianarantsika. Apetraho ny iray na ny maro amin’ireto fanontaniana manaraka ireto:

Araka ny hevitrao, inona no nianaran’i Daniela momba an’ Andriamanitra avy tamin’io zavatra niainana io?
Ahoana araka ny eritreritrao no ahafahan’ny ohatra nasehon’i Daniela manentana na manome fanantenana ny zatovo iray izay manana olana sarotra amin’ny fianarana any an-tsekoly?
Amin’ny fomba ahoana no hanehoan’ny zavatra niainan’i Daniela ny fahamarinana nampianarin’ny Loholona Gilbert?

Ohatra iray amin’ny fampandraisana anjara ny Tompo avy amin’ny mpaminanin’ny andro farany

Mba hanampiana ny mpianatra hahita ohatra maoderina momba ilay fahamarinana nampianarin’ny Loholona Gilbert dia afaka mijery ity ohatra manaraka ity avy amin’ny fiainan’ny Filoha Russell M. Nelson ny mpianatra (manomboka amin’ny mari-potoana 4:15 ka hatramin’ny 8:38) (Russell M. Nelson, “Le doux pouvoir de la prière,” Liahona, May 2003, 7–8).

16:47

Avy eo dia azonao atao ny mametraka fanontaniana toy izao manaraka izao:

Tamin’ny fomba ahoana no nampandraisan’ny Filoha Nelson anjara ny Tompo tamin’ny ezaka nataony mba hianarana ny fomba fandidiana tsy nivononany?
Ahoana no fomba nampitomboana sy nampatanjahan’ny Tompo ny ezaka nataon’ny Filoha Nelson?

Mety hanaiky ianao fa na dia tsy mitovy amin’ny an’ny Filoha Nelson aza ny toe-javatra iainantsika dia miraharaha momba ny fianarantsika any an-tsekoly na any amin’ny toeram-piasantsika na any an-trano ny Tompo. Na dia mety tsy haneho valiny an-tsary ao an-tsaintsika aza ny Tompo dia misy fomba maro samihafa izay hampivoarany sy hampatanjahany ny ezaka ataontsika rehefa mampandray anjara Azy ao anatin’izany dingana izany isika.