Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko Hono Ikunaʻi e Ngaahi Fakafeʻātungia ki he Hoko Atu ʻa e Akó: Ko Hono Fakaʻaongaʻi ʻo e Ngaahi Maʻuʻanga Tokoni Kotoa Pē ʻOku Maʻú

“Ko Hono Ikunaʻi e Ngaahi Fakafeʻātungia ki he Hoko Atu ʻa e Akó: Ko Hono Fakaʻaongaʻi ʻo e Ngaahi Maʻuʻanga Tokoni Kotoa Pē ʻOku Maʻú,” Fuakava Motuʻá – Tohi Lēsoni ʻa e Faiako Seminelí (2026)

Ko e Teuteu ki he Ako mo e Ngāue Maʻuʻanga Moʻui ʻi he Kahaʻú: Lēsoni 190

Ko Hono Ikunaʻi ʻo e Ngaahi Fakafeʻātungia ki he Hoko Atu ʻa e Akó

Ko Hono Fakaʻaongaʻi ʻo e Ngaahi Maʻuʻanga Tokoni Kotoa Pē ʻOku Maʻú

Kuo akoʻi ʻe he ʻEikí “ko e nāunau ʻo e ʻOtuá ko e ‘atamai poto” (Tokāteline mo e Ngaahi Fuakava 93:36). ʻIkai ngata aí, kuo toutou akonaki foki ʻa e kau taki ʻo e Siasí fekauʻaki mo e mahuʻinga ʻo e akó. Ka neongo ia, ko e taimi ʻe niʻihi ʻoku hoko ʻa e ngaahi fakafeʻātungiá ko ha tūkiaʻanga ki he hokohoko atu ʻetau akó. ʻE lava ke tokoni ʻa e lēsoni ko ʻení ke ʻiloʻi ʻe he kau akó ʻa e ngaahi maʻuʻanga tokoni ʻoku lava ke maʻu ke ikunaʻi ʻaki ʻa e ngaahi fakafeʻātungia ki he hoko atu ʻenau akó.

Ngaahi ʻEkitivitī Ako ʻOku Ala Fakahokó

Ko hono ʻiloʻi ʻo e ngaahi fakafeʻātungiá

Fakatokangaʻi ange: ʻOku kehekehe pē ʻa e ngaahi fakafeʻātungia ki he hoko atu ʻa e akó ʻi he funga ʻo e māmaní. Mahalo ʻe fiemaʻu ke ke fulihi ha ngaahi tūkunga pe ngaahi fakafeʻātungia ʻe ala hoko ʻo makatuʻunga ʻi homou feituʻú mo e ngaahi fiemaʻu hoʻo kau akó.

Fakakaukau ke kamata e kalasí ʻaki hano tā pe fakaʻaliʻali ha fakatātā ʻo ha toʻu tupu ʻoku sio atu ʻi ha vaitafe ki ha fakatātā ʻo e ako ʻi he kahaʻú ʻo hangē ko ia ʻi laló. Hili iá pea vahevahe leva ʻa e tūkunga ko ʻení.

ʻI ha lēsoni semineli kimuí ni mai, naʻe vahevahe ai ʻe he faiako ʻa Liamí ha ngaahi fakamatala mei he kau taki ʻo e Siasí fekauʻaki mo e mahuʻinga ʻo e ako hili e ako māʻolungá. ʻOku tui ʻa Liami ki he faleʻi ko ʻení pea ʻokú ne fie muimui ki ai. Ka ʻi heʻene fakakaukau ki he kahaʻú, ʻoku fonu hono ʻatamaí ʻi he ngaahi fakafeʻātungia kotoa te ne ala taʻofi ia mei hono aʻusia ʻene taumuʻá.

Hili hono vahevahe e aʻusia ʻa Liamí, te ke lava ʻo fakaafeʻi e kau akó ke lisi ʻi he fakatātā ʻo e vaitafé pe ofi ki ai ha ngaahi fakafeʻātungia ʻe ala hoko te ne ala taʻofi ʻa Liami pe ko e toʻu tupu kehé mei he hoko atu ʻenau akó. Kapau naʻe fai ʻe he kau akó ʻa e teuteu ʻa e tokotaha akó, te ke lava ʻo fakaafeʻi kinautolu ke vahevahe ha ngaahi fakafeʻātungia mei heʻenau lisí.

Poupouʻi e kau akó ke fakakaukau ki he ngaahi fakafeʻātungia mei tuʻa mo loto fakatouʻosi. ʻE lava ke kau ʻi he ngaahi fakafeʻātungia mei tuʻá ʻa e ngaahi fakangatangata fakapaʻangá, maaka maʻulaló, pe ʻikai malava ke maʻu e faingamālie akó. ʻE lava ke kau ʻi he ngaahi fakafeʻātungia mei lotó ʻa e siʻi e loto-falalá pe siva ʻa e ʻamanakí pe loto-vilitakí.

Ke tokoni ki he kau akó ke fakakaukau ki ha ngaahi fakafeʻātungia ʻe ala hoko ʻi he hokohoko atu ʻenau akó, te ke lava ʻo fakaafeʻi kinautolu ke nau fai ʻeni.

Tali ‘a e ngaahi fehuʻi ko ‘ení ‘i hoʻo tohinoa akó:

Ko e fē ʻa e ngaahi fakafeʻātungia (mei he palakipoé pe niʻihi kehe) ʻokú ke hohaʻa ʻe ala hoko ʻi he hoko atu hoʻo akó?
ʻOkú ke falala fēfē te ke lava ʻo ikunaʻi ʻa e ngaahi fakafeʻātungia ko ʻení?
‘E ala tokoniʻi fēfeeʻi koe ʻe he Fakamoʻuí ke ke ikunaʻi e ngaahi fakafeʻātungia ko ʻení?

Lolotonga e lēsoni ʻo e ʻaho ní, fekumi ki ha ngaahi ueʻi mei he Laumālié ke tokoniʻi koe ke ke ʻiloʻi ha ngaahi founga pau ke ikunaʻi ai hoʻo ngaahi fakafeʻātungia ki he akó.

Ko e kolosi ʻi he Vaitafe Soataní

Ke tokoni ke fakaʻaongaʻi ʻe he kau akó ʻa e folofolá ke ako ʻa e founga ke ikunaʻi ai ʻa e ngaahi fakafeʻātungia ki heʻenau akó, fakakaukau ke aleaʻi ʻa e talanoa ʻo e kolosi ʻa Sōsiua mo e fānau ʻa ʻIsilelí ʻi he Vaitafe Soataní (vakai, Lēsoni 62: “Sōsiua 2–4” ki ha ngaahi fakaikiiki lahi ange). ʻE lava ke ke lau pe fakamatalaʻi fakanounou e palakalafi ko ʻení, ʻo ka fiemaʻu.

ʻI he tūʻuta ʻa Sōsiua mo e fānau ʻo ʻIsilelí ki Kēnaní, naʻe talaʻofa ange ʻe he ʻEikí kiate kinautolu ʻa e fonua kotoa ʻi he tafaʻaki ʻe taha ʻo e Vaitafe Soataní (vakai, Sōsiua 1:1–7). Ka neongo ia, naʻa nau fehangahangai mo e fakafeʻātungia ʻo e kolosi ʻi he vaitafé ke aʻusia ʻenau taumuʻá (vakai, Sōsiua 3:15).

Te ke lava ʻo vahe ʻa e kau akó ke nau tauhoa ke lau mo aleaʻi ʻa e ngaahi veesi ko ʻení. Mahalo ʻe tokoni ke fakamatalaʻi ange ʻoku ʻuhinga ʻa e ongo kupuʻi lea “tuʻu fakaʻesi” (veesi 13) mo e “tupu hake ʻo fakatafungofungá” (veesi 16) ki hono taʻofi ʻo e tafe ʻa e Vaitafe Soataní.

Lau ʻa e Sōsiua 3:6–8, 13–17, ʻo kumi e ngaahi meʻá ni:

Ko e ngaahi ngāue faivelenga naʻe fai ʻe he kau taulaʻeikí ke lava ai e fānau ʻo ʻIsilelí ʻo kolosi he Vaitafe Soataní
Ko e tokoni ʻa e ʻOtuá ʻi hono fakaʻatā ʻa e fānau ʻo ʻIsilelí ke kolosi ʻi he Vaitafe Soataní

ʻE lava ke vahevahe ʻe he kau akó mo e ngaahi hoá ʻa e meʻa ʻoku nau ʻiló. Te nau lava ʻo aleaʻi ʻa e founga naʻe fakaʻatā ai ʻe he ngāue faivelenga ʻa e kau taulaʻeikí mo e tokoni ʻa e ʻEikí ke ikunaʻi ʻe he fānau ʻo ʻIsilelí ʻa e fakafeʻātungiá.

Hili iá te ke lava ʻo ʻeke ʻeni ki he kalasí:
ʻE tokoniʻi fēfē ʻe he fakamatala ko ʻení ha taha taʻu hongofulu tupu ʻoku fehangahangai mo ha ngaahi fakafeʻātungia ke hoko atu ʻene akó?

Hiki ʻi hoʻo tohinoa akó ha fakamatala ʻo e moʻoní ʻo makatuʻunga ʻi he meʻa naʻá ke ako ʻe lava ke fakaʻaongaʻi ki hono ikunaʻi ʻo e ngaahi fakafeʻātungia ki he hoko atu hoʻo akó.

ʻE lava ke fakaʻaongaʻi ʻe he kau akó ʻenau lea pē ʻanautolu ke vahevahe ha moʻoni hangē ko e: ʻI heʻetau laka atu ki muʻa ʻi he tui kia Sīsū Kalaisí, te Ne tokoniʻi kitautolu ke tau ikunaʻi ʻa e ngaahi fakafeʻātungia ʻoku tau fehangahangai mo iá.

Ko e hā ka mahuʻinga ai ke tau laka atu ki muʻa ʻi he tui kia Sīsū Kalaisí (fakahoko ʻa e ngaahi meʻa kotoa pē ʻi hotau mālohí) ke ikunaʻi ʻa e ngaahi fakafeʻātungia ki he akó?
Ko e hā ka fiemaʻu ai ke fekumi faivelenga ki he tokoni ʻa e ʻOtuá ke ikunaʻi ʻa e ngaahi fakafeʻātungia ki he akó?

Te ke lava ʻo fakamanatu ki he kau akó ʻoku kau ʻi he laka atu ki muʻa ʻi he tui kia Sīsū Kalaisí ha faʻahinga ngāue pē te nau ala fakahoko. Hangē ko ʻení, ko e talanoa ki ha faifaleʻí, ngāueʻi ha paʻangá, mo totongi faivelenga e vahehongofulú ko ha ngaahi founga kotoa ia ke laka ai ki muʻa ʻi he tui kia Sīsū Kalaisí ke ikunaʻi e ngaahi fakafeʻātungia ki he akó.

Tūkunga ki he akoako fakahokó

ʻOku tokoni ʻa e ʻekitivitī ko ʻení ke akoako ʻe he kau akó ʻa e mohu fakakaukaú. Te ke lava ʻo fakamahinoʻi ange ki he kau akó ko e mohu fakakaukaú ko ha taukei ia ʻe lava ʻo tokoni ke tau fai ha ngaahi fili ʻoku leleí. ʻOku kau ai hono (1) vakaiʻi mo tānaki ha fakamatala fekauʻaki mo e tuʻutuʻuní, (2) ʻeke ha ngaahi fehuʻi fekauʻaki mo e meʻa ʻokú ke vakai ki aí, (3) aleaʻi hoʻo ngaahi fakakaukaú mo e niʻihi kehé, mo hono (4) fakaleleiʻi ʻo e ngaahi palopalemá ʻo makatuʻunga ʻi he meʻa ʻokú ke akó. Te ke lava ʻo ʻai ke fakakakato ʻe he kau akó ʻa e ngaahi sitepu takitaha ko ʻení ko ha konga ʻo e ʻekitivitī ko ʻení.

Fakaafeʻi e kau akó ke nau faʻu ʻi ha laʻipepa ha tūkunga ʻoku ʻi ai ha fakafeʻātungia ʻoku felāveʻi mo ha taha taʻu hongofulu tupu. Kapau te nau fiemaʻu tokoni, te nau lava ʻo fakafonu ʻa e ngaahi konga ʻoku fakaʻatā atu ʻi he sētesi ko ʻení.

ʻOku ʻilo ʻe (hingoa ʻo e toʻu tupu) ʻoku mahuʻinga ʻa e ako hili ʻa e ako māʻolungá. Ka ko ha fakafeʻātungia ki he hoko atu ʻene akó ko e (fakamatalaʻi ha fakafeʻātungia).

Ko e hā ha ngaahi fehuʻi ʻe ala fai ʻe he tokotahá ni ʻi heʻene fakakaukau ki he ngaahi maʻuʻanga tokoni ʻoku maʻú? Ko hai te nau lava ʻo aleaʻi mo ia ha niʻihi ʻo ʻenau ngaahi fehuʻí?
Ko e hā ha ngaahi ngāue ʻe lava ke fai ʻe he tokotahá ni ke laka atu ai ki muʻa ʻi he tui kia Sīsū Kalaisi ke ikunaʻi ʻene ngaahi fakafeʻātungiá?
ʻE tokoniʻi fēfē ʻe he ʻOtuá ʻa e tokotahá ni ke ne ikunaʻi ʻene fakafeʻātungiá?

Fakaʻosí

Te ke lava ʻo fakaafeʻi e kau akó ke toe vakaiʻi e lisi ʻo e ngaahi fakafeʻātungia fakataautaha ne nau ʻilo ʻi he kamataʻanga ʻo e kalasí. Poupouʻi kinautolu ke fekumi ki ha fakahinohino mei he Laumālié ʻi heʻenau tali e fehuʻi ko ʻení ʻi heʻenau tohinoá.

Ko e hā ha ngaahi maʻuʻanga tokoni te ke lava ʻo fakaʻaongaʻi mei he fealēleaʻaki ʻo e ʻaho ní ke tokoniʻi koe ke ke ikunaʻi ʻa e ngaahi fakafeʻātungiá mo teuteu ki he ako ʻi he kahaʻú?
Ko e hā ha ngaahi ngāue faivelenga te ke lava ʻo fai kae lava ke tokoniʻi koe ʻe he Tamai Hēvaní mo Sīsū Kalaisi ke ke ikunaʻi ho ngaahi fakafeʻātungiá?

Te ke lava ʻo fakaʻosi ʻaki haʻo fakamoʻoni ko e taimi ʻoku tau fakahoko fiefia ai ʻa e ngaahi meʻa kotoa pē ʻi hotau mālohí, ʻe tokoniʻi kitautolu ʻe he Tamai Hēvaní mo Sīsū Kalaisi ke tau ikunaʻi ʻetau ngaahi fakafeʻātungia ki he hoko atu ʻetau akó.

Ngaahi Maʻuʻanga Tokoni Kehé

ʻE lava fēfē ʻe he tui kia Sīsū Kalaisí ʻo fakatupulaki ʻeku feinga ke hoko atu ʻeku akó?

Naʻe akonaki ʻa ʻEletā Kalake G. Kilipeti ʻo e Kau Fitungofulú ʻo pehē:

Ke fai ʻa e meʻa kotoa pē ʻoku fiemaʻu ke ke fai ko ha … tokotaha akó, ʻe fiemaʻu ke ke ngāue mālohi mo fakahaaʻi ha loto-fakapapau. Ka ke aʻu ki he feituʻu ʻokú ke fie aʻusiá, ʻe fiemaʻu ha ngāue lahi ange. ʻE fiemaʻu ke ke fekumi ki he mālohi fakaivia ʻo e Fakalelei ʻa Sīsū Kalaisí. …

ʻOku ou ʻilo ʻe lava ke faingataʻa hoʻo akó pea ʻoku fiemaʻu ki ai ha feilaulau. ʻOku ou ʻiloʻi hoʻo ngāue mālohí pea ʻoku lahi ha ngaahi pō faingataʻa ʻi hoʻo ʻā fuoloa ke fakakakato e ngaahi ngāué, ako ha ngaahi fakakaukau foʻou, mo fakahoko ha ngaahi tukupā kehe ʻoku fiemaʻu ʻi hoʻo moʻuí. Ka ke kātaki pē. Hokohoko atu hoʻo loto-toʻá. Kae mateuteu foki ke hiki mei he loto-toʻá ki he angaʻofá. Fakakau atu ʻa e ʻEikí. Lotua ʻEne tokoní pea te Ne fakalahi hoʻo ngaahi feingá. (“From Grit to Grace” [Fakataha lotu ʻa e BYU-Pathway Fakaemāmani Lahí, 25 Sēpitema 2018], 1, 2, byupathway.edu)

Naʻe vahevahe ʻe ʻEletā Kali B. Kuki ʻo e Kau Fitungofulú:

ʻE tokoniʻi kitautolu ʻe he ʻOtua ʻo e langí mo māmani ke tau ikunaʻi ʻa e loto-foʻí mo ha faʻahinga faingataʻa pē ʻoku tau foua kapau te tau sio pē kiate Ia, muimui ʻi he ueʻi ʻa e Laumālie Māʻoniʻoní, pea hokohoko atu—ʻi he tui.

ʻOku tau fakamālō pē, he ko e taimi ʻoku tau vaivai ai pe ʻikai malavá, ʻoku fakamālohia ʻe he ʻEikí ʻetau tuí. Te ne lava ʻo fakatupulaki ʻa ʻetau malava ʻo ope atu ʻi he meʻa te tau lavá. (“Kātaki ʻo Hokohoko Atu—ʻi he Tui,” Liahona, Mē 2023, 14)

Ko e hā hoku fatongia fekauʻaki mo e akó?

Naʻe faleʻi ʻa Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí, ʻo pehē:

18:45

[Ki he kāingalotu ʻo e Siasí], ko e akó ʻoku ʻikai ko ha fakakaukau lelei pē ia—ko ha fekau ia. Kuo pau ke tau ako ki he “ngaahi meʻa ʻoku ʻi he langí pea ʻi he māmaní fakatouʻosi, pea ʻi he lalo māmaní; ʻa e ngaahi meʻa kuo ʻi ai, ʻa e ngaahi meʻa ʻoku ʻi ai, ʻa e ngaahi meʻa kuo pau ke vave ʻene hokó; ʻa e ngaahi meʻa ʻoku ʻi homou fonuá, ʻa e ngaahi meʻa ʻoku ʻi muli [vakai,Tokāteline mo e Ngaahi Fuakava 88:79–80].”

… ʻOku ʻi ai homou fatongia ke ako ki he lahi taha te mou lavá. Kātaki ʻo poupouʻi homou ngaahi fāmilí, kau mēmipa hoʻomou kōlomú mo e tokotaha kotoa pē ke ako mo maʻu ha ako ʻoku māʻolunga angé. Kapau he ʻikai lava ke maʻu ha ako fakaʻatamai ʻoku lelei angé, ʻoua naʻa tuku ia ke ne taʻofi koe mei hoʻo maʻu ʻa e ʻilo kotoa pē te ke lavá. ʻI he ngaahi tūkunga ko ʻení, ʻe lava ke hoko ʻa e ngaahi tohi lelei tahá ko hoʻo “ʻunivēsití”—ʻa ia ko ha lokiako ʻoku ava mo lava ke hū maʻu pē ki ai ʻa e tokotaha kotoa ʻoku fie hū ki aí.” Feinga ke fakatupulaki hoʻo ʻilo ki he ngaahi meʻa kotoa pē ʻoku “māʻoniʻoni, fakaʻofoʻofa, pe ongoongo lelei pe feʻunga mo hono vikivikiʻí [Tefito ʻo e Tui 1:13].” Fekumi ki he ʻiló “ʻi he ako pea ʻi he tui foki [Tokāteline mo e Ngaahi Fuakava 109:7].” Fekumi ʻi he laumālie fakatōkilalo mo e loto-mafesifesi [Tokāteline mo e Ngaahi Fuakava 136:33].” (“Tefitoʻi Moʻoni ʻe Ua ki ha Faʻahinga ʻEkonōmika Pē,” Liahona, Nōvema 2009, 58)

Ngaahi ʻEkitivitī Fakalahi ki he Akó

Fekumi ʻi he ngaahi maʻuʻanga tokoni fakalotofonuá

Ki he ngaahi fakafeʻātungia fakaako ʻoku makehe ki homou feituʻú, mahalo te ke fie teuteu ha lisi ʻo e ngaahi maʻuʻanga tokoni fakalotofonuá maʻa hoʻo kau akó. ʻE ala kau ʻi he ngaahi maʻuʻanga tokoni ko ʻení ha ngaahi fakaikiiki fekauʻaki mo e:

Ako fakatoʻú
Kau tā sīpinga leleí
Ngaahi maʻuʻanga tokoni ‘i he ‘initanetí
Tokoni fakakoló
Ngaahi sikolasipí mo e paʻanga tokoní
Ngaahi polokalama fakatupulaki ʻo e taukeí

Te ke lava ʻo fakaʻaongaʻi ha taimi ko ha kalasi ke fekumi ki he ngaahi maʻuʻanga tokoni fakalotofonuá ke ikunaʻi ʻa e ngaahi fakafeʻātungia angamaheni ʻo e akó. ʻIkai ngata aí, te ke lava ʻo fakaafeʻi ha taki fakalotofonua ʻo e Siasí pe faifaleʻi ke haʻu ki he kalasí ʻo fakamatalaʻi ʻa e ngaahi maʻuʻanga tokoni ke fili mei aí.

Foʻi vitiō ʻokú ne fakamamafaʻi ʻa e mahuʻinga ʻo e hokohoko atu ʻa e akó

ʻOku fakamatalaʻi ʻe ʻEletā Siosefa W. Sitati ʻa e founga naʻá ne ikunaʻi ai e ngaahi faingataʻá ke maʻu ha ako lelei ʻi Kēniá. ʻI heʻene tulifua ki he akó, naʻe lava ai ke ne kumi hono uaifí, maʻu ha ngāue, pea tali ʻa e ongoongolelei ʻo Sīsū Kalaisí.

4:56

Hili hono vahevahe ʻo e vitioó, te ke lava ʻo fakaafeʻi e kau akó ke text pe ʻīmeili ki he kau mēmipa ʻo e fāmilí pe ngaahi kaungāmeʻa kuo hokohoko atu ʻenau akó hili ʻa e ako māʻolungá. Fakaafeʻi e kau akó ke fehuʻi ange pe naʻe anga fēfē ʻenau ikunaʻi e ngaahi fakafeʻātungia ki hono maʻu ʻenau akó.

Ko e laka ki muʻa ʻi he tui kia Sīsū Kalaisí

Ke fakamamafaʻi ʻa e foʻi moʻoni ʻoku fakaʻilongaʻi mataʻāʻā ʻi he lēsoní, te ke lava ʻo ʻai ke lau ʻe he kau akó ʻa e Tokāteline mo e Ngaahi Fuakava 123:17 pea mo e lea ko ʻeni ʻa ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi e meʻa ʻoku akoʻi ʻe he ngaahi maʻuʻanga tokoni ko ʻení fekauʻaki mo hono ikunaʻi ʻo e ngaahi fakafeʻātungiá.

ʻOku akoʻi ʻe he ʻEikí ʻi he Tokāteline mo e Ngaahi Fuakava, vahe 123, veesi 17, ha tefitoʻi moʻoni mahuʻinga mo ʻomi ha talaʻofa fakaofo.

Ko e tefitoʻi moʻoni mahuʻinga ʻeni ʻoku akoʻi ʻe he ʻEikí: “Fai ʻi he loto-fiefia ʻa e ngaahi meʻa kotoa pē ʻoku tau maʻu ʻa e mālohi ke faí.” Ko ha tefitoʻi moʻoni ʻeni ʻo e tuí mo e ngāué. … ʻOku tokoni hono fai e meʻa kotoa ʻoku tau maʻu e mālohi ke faí ke tau maʻu e tokoni mo e ueʻi fakalaumālie ʻa e ʻOtuá. ʻOku ngāue fakataha ʻetau ngaahi feinga lelei tahá mo e tokoni ʻa e ʻOtuá. (“Cheerfully Do All Things in Our Power” [fakataha lotu Fakaemāmani Lahi ʻa e BYU–Pathway, 5 Tīsema, 2023], 1, byupathway.edu)

Ko e hā ʻoku akoʻi ʻe ʻEletā Kongo ʻe lava ʻo tokoni ki ha taha ke laka ki muʻa ʻi he tui kia Sīsū Kalaisí?