Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ako maʻá e Laumālié Kotoa: Ko Hono Fakamuʻomuʻa ʻa e Ako ʻo e ʻAtamaí mo e Laumālié

“Ako maʻá e Laumālié Kotoa: Ko Hono Fakamuʻomuʻa ʻa e Ako ʻo e ʻAtamaí mo e Laumālié,” Fuakava Motuʻá – Tohi Lēsoni ʻa e Faiako Seminelí (2026)

“Ako maʻá e Laumālié Kotoa: Ko Hono Fakamuʻomuʻa ʻa e Ako ʻo e ʻAtamaí mo e Laumālié,” Fuakava Motuʻá – Tohi Lēsoni ʻa e Faiako Seminelí

Ko e Teuteu ki he Ako mo e Ngāue Maʻuʻanga Moʻui ʻi he Kahaʻú: Lēsoni 189

Ako maʻá e Laumālié Kotoa

Ko Hono Fakamuʻomuʻa ʻa e Ako ʻo e ʻAtamaí mo e Laumālié

ʻOku poupouʻi kitautolu ʻe he ʻEikí ke fakamuʻomuʻa ʻa e ako fakaʻatamaí mo fakalotú fakatouʻosi ʻi heʻetau moʻuí (vakai, Tokāteline mo e Ngaahi Fuakava 88:77–80). ʻE lava ke fakatupulaki ʻe he ako fakaʻatamaí mo fakalotú ʻa ʻetau malava ke tokoni ki he ʻOtuá mo e niʻihi kehé mo moʻui fakafalala pē kiate kitautolú. ʻE lava ke tokoni ʻa e lēsoni ko ʻení ke faʻu ʻe he kau akó ha palani ke hokohoko atu ʻenau ako fakaʻatamai mo fakalotu hili ʻa e ako māʻolungá.

Teuteu ʻa e tokotaha akó: Fakakaukau ke fakaafeʻi e kau akó ke omi mateuteu ki he kalasí ke vahevahe ha fili ʻe ua pe lahi ange ʻoku nau fakakaukau ki ai ki he meʻa te nau fai hili ʻa e ako māʻolungá.

Ngaahi ʻEkitivitī Ako ʻOku Ala Fakahokó

Fakamuʻomuʻa ʻo e akó

ʻOku loto ʻa Leki ke hoko atu ʻene moʻuí hili ʻa e ako māʻolungá ʻaki ha ʻikai toe hoko atu ʻene akó. ʻOkú ne fie ngāue ʻi ha ngaahi houa lahi ange ʻi heʻene ngāue lolotongá. Kimuʻa pea aofangatuku ʻene filí, ʻokú ne pehē ke fakakaukau ki he ngaahi lelei mo e ngaahi faingataʻa ʻo e hoko atu ʻene akó.

Ko e hā nai ha niʻihi ʻo e ngaahi lelei ʻe lava ke lisi ʻe Leki ki hono hoko atu ʻene akó?
Ko e hā nai ha niʻihi ʻo e ngaahi faingataʻá?

ʻE lava ke kamata faʻu ʻe he kau akó ha lisi mo hanau hoa pe kulupu toko siʻi. Te ke lava ʻo hiki ʻa e Ngaahi Leleí mo e Ngaahi Faingataʻá ʻi he palakipoé pea fakaafeʻi e kau akó ke hiki ʻa e ngaahi tali ne nau maʻú ʻi he palakipoé. Kapau naʻá ke toki akoʻi kimuí ni ʻa e Lēsoni 188, “Ko e Mahuʻinga ʻo e Akó,” te ke lava ʻo fakamanatu ki he kau akó ʻa e meʻa ne nau aleaʻi ʻi he lēsoni fakataumuʻa ʻo e fōnelí. ʻE lava ke hokohoko atu hono tānaki ʻe he kau akó ha ngaahi meʻa ki he fakatātā ko ʻení ʻi he lele ʻa e lēsoní.

Ako fakaʻatamai mo fakalotú

Kuo fakamamafaʻi ʻe he kau taki ʻo e Siasí ʻa e mahuʻinga ʻo e akó ki he fānau kotoa ʻa e ʻOtuá. ʻOku kau ʻi he ako ʻoku fakamamafaʻi ʻe he kau taki ʻo e Siasí ʻa e ako fakaʻatamaí mo e ako fakalotú fakatouʻosi.

Hiki ʻa e sētesi taʻekakato ko ʻení ʻi he palakipoé ʻi lalo ʻi he Ngaahi Leleí pea fakaafeʻi e kau akó ke hiki ia ʻi heʻenau tohinoá.

ʻOku tokoniʻi kitautolu ʻe he tulifua ki he ako fakaʻatamaí mo fakalotú fakatouʻosi …

Lau ʻa e fakamatala ko ʻení ʻo kumi ha ngaahi founga kehekehe te ke lava ai ʻo fakakakato ʻa e sētesí.

Naʻe akonaki ʻa ʻEletā Kalake G. Kilipeti ʻo e Kau Fitungofulú ʻo pehē:

ʻOkú ke ʻiloʻi ʻa e ʻuhinga ʻoku ʻinivesi (fakahū) ai ʻe he Siasí ha ngaahi maʻuʻanga tokoni lahi ʻi he akó? Koeʻuhí ko e ʻofa ʻa e ʻEikí ʻiate kimoutolú. ʻOkú Ne finangalo ke ke ofi ange kiate Ia pea maʻu ha mālohi fakaeloto, fakaʻatamai, mo fakalaumālie. ʻOku fiemaʻu ʻe he kau taki ʻo e Siasí ʻa e meʻa tatau! ʻOku mau lotua kimoutolu mo hoʻomou lavameʻá. ʻOku mau līʻoa kiate kimoutolu mo hono tokoniʻi kimoutolu ke mou aʻusia homou tuʻunga malava fakalangí. (“Ako ʻa e Siasí: ʻOku ʻi ai ha Feituʻu maʻá e Tokotaha Kotoa Pē,” Ki Hono Fakamālohia ʻo e Toʻu Tupú, ʻOkatopa 2023, 18)

Fakaafeʻi e kau akó ke vahevahe mai e meʻa naʻa nau maʻú, pea hiki ʻenau ngaahi talí he palakipoé. ʻE ala kau ʻi he ngaahi tali ʻa e kau akó ʻa e:

… ʻunu ofi ange ki he ʻEikí.

… maʻu ha mālohi mei he ʻOtuá.

… aʻusia hoku tuʻunga malava fakalangí.

Ko e hā ʻe fiemaʻu ai ʻa e ako fakaʻatamaí mo e fakalotú fakatouʻosi ke fakaafeʻi ʻa e ngaahi tāpuaki ko ʻení mei he ʻEikí?

Ako fakaʻatamaí

Fakakaukau ke tā ha tohi ʻe ua ʻi he palakipoé ʻo hangē ko ʻení. Fakahingoa ʻa e ʻuluakí ko e “Fakaʻatamai” pea ko e fika uá ko e “Fakalotu.” Fakaafeʻi e kau akó ke nau tā ha tohi tatau ʻi heʻenau ngaahi tohinoa akó.

ʻI lalo ʻi he tohi ʻoku fakahingoa ko e “Fakaʻatamaí,” fakaafeʻi e kau akó ke hiki ʻenau tali ki he fehuʻi ko ʻení. Te ke lava ʻo fakaafeʻi kinautolu ke ngāue tauhoa pe fakakulupu iiki.

Ko e hā ha ngaahi meʻa te ke lava ʻo fili mei ai ki he ako fakaʻatamaí hili ʻa e ako māʻolungá?

Te ke lava ʻo vahevahe ha ngaahi fili kehe naʻe ʻikai lave ki ai ʻa e kau akó hangē ko e ako ʻi he ʻinitanetí, kolisi fakakoló, ngaahi ʻapiako ako ngāué, ngaahi faingamālie akoako ngāué, ako ngāue ʻi he ngāueʻangá, mo e ngaahi meʻa pehē.
Ko e hā ha ngaahi faingamālie ʻoku lava ke maʻu ʻo fakafou ʻi he Potungāue Ako ʻa e Siasí (CES)?

Ako fakalotú

Ko e hā ha fili ako fakalotu ʻoku lava ke maʻu ʻi he ngaahi fili ako fakaʻatamai takitaha ʻoku hiki atú?

Ki he meʻa takitaha ʻoku lisi atu ʻi he ako fakaʻatamaí, ʻai ke lisi ʻe he kau akó ha fili ako fakalotu ʻe lava ke fakahoko fakataha mo ia. Fakapapauʻi ʻoku mahino ki he kau akó ʻoku fakalele ʻe he ngaahi ʻapiako CES takitaha ʻa e ako fakalotú ko ha konga ʻo ʻenau naunau fakalēsoni ʻoku fiemaʻú. ʻE lava ke hiki ʻe he kau akó ʻa e ngaahi kalasi fakalotú ʻi he tafaʻaki ʻo ha taha pē ʻo e ngaahi ʻapiako CES.

Kapau naʻe ʻikai lave ki ai ʻa e kau akó, fakaafeʻi kinautolu ke hiki ʻa e ʻinisititiutí fakataha mo ha toe founga ako fakaʻatamai kehe ʻoku lisi atu. Kapau ʻe fiemaʻu, fakamatalaʻi ange ko kinautolu ko ia ʻoku ʻikai hū ki ha ʻapiako CES, ko e ʻinisititiutí ko ha feituʻu ia ʻe lava ke toʻo taʻetotongi ai ʻe ha kakai lalahi kei talavou (taʻu 18–35), ʻi ha feituʻu pē he māmaní, ʻa e ngaahi kalasi ako fakalotú.

Fakakaukau ki ha ngaahi founga te ke lava ai ʻo tokoniʻi e kau ako seminelí ke nau ʻiloʻi e founga ʻe lava ke tokoniʻi ai kinautolu ʻi he kahaʻú ʻi he ʻalu ki he ʻinisititiutí. Ko hono aleaʻi ʻo e tūkunga ko ʻení mo ha niʻihi ʻo e ngaahi fehuʻi ko ʻení ko ha founga ia ʻe taha te ke lava ʻo fakahoko ai ʻeni.

Tau pehē pē naʻe fakakaukau ʻa Leki ke toe maʻu ha ako makehe hili ʻa e ako māʻolungá ʻi ha akoʻanga ako ngāue pea naʻá ne fakakaukauʻi foki pe ʻoku totonu nai ke ne ʻalu ki he ʻinisititiutí.

Ko e hā ha ngaahi ʻuhinga ʻe ala ʻomi ʻe Lēki ʻi he ʻikai ke ne ʻalu ki he ʻinisititiutí?
Kuo tokoni fēfē kiate koe ʻa e seminelí lolotonga hoʻo ʻalu ki he akó?
ʻE tokoni fēfē nai kia Leki ʻa e hokohoko atu ke ako fekauʻaki mo e Tamai Hēvaní mo Sīsū Kalaisí lolotonga ʻene ako ʻi ha ʻapiako ako ngāué?

Huluʻi ʻa e foʻi vitiō “Fakaafe Fakataautaha ke ʻAlu ki he ʻInisititiutí” (2:44), ʻoku maʻu ʻi he ChurchofJesusChrist.org. Fakaafeʻi e kau akó ke kumi e ngaahi tāpuaki kuo talaʻofa mai ʻi he kau atu ki he ʻinisititiutí. Te ke lava foki ʻo fakaafeʻi e kau akó ke laukonga fekauʻaki mo e ʻinisititiutí ʻi he laʻipepa tufá.

2:50

Te ke lava ʻo tānaki atu ha ngaahi fakakaukau lahi ange ki he lisi ʻi he palakipoé ʻi lalo ʻi he Ngaahi Lelei ʻoku vahevahe ʻe he kau akó ko ha konga ʻo e fealēleaʻaki ko ʻení.
Ko e hā ha ngaahi tāpuaki naʻe makehe taha kiate koe mei he ngaahi tāpuaki naʻe talaʻofa ʻe Palesiteni Nalesoni ki he ʻalu ki he ʻinisititiutí?
Mei he meʻa kuo mou aleaʻí, ʻokú ke pehē ko e hā te ne lava ʻo fakaʻaiʻai ʻa Leki ke ʻalu ki he ʻinisititiutí?

Tokoni ke mahino ki he kau akó ʻa e founga ke kumi ai ha ʻinisititiuti ʻi ha feituʻu pē te nau nofo ai hili ʻa e ako māʻolungá ʻaki haʻanau ʻalu ki he myinstitute.ChurchofJesusChrist.org/findInstitute. Fakakaukau ke fili ha ngaahi meʻa mei he ngaahi fili ki he akó naʻe lau ki ai kimuʻa ʻi he ʻuluaki tohí. Kumi e feituʻu ʻoku tuʻu ai e ngaahi fili ko iá pea fakahū ʻa e koló ki he uepisaití ke fakatātaaʻi e founga hono maʻu mo lēsisita ki he ʻinisititiutí. Te ke lava foki ʻo fakatātaaʻi e founga ke maʻu ai ha kalasi ʻinisititiuti ʻi he ʻinitanetí ʻi he fehokotakiʻanga tatau.

Faʻu ha palani

Vahevahe mo e kau akó, neongo pe ʻoku nau ʻosi mei he ako māʻolungá he taʻú ni pe ʻikai, ka ʻe lava ke ʻaonga kiate kinautolu hano faʻu ha palani ki heʻenau ako fakaʻatamaí mo e fakalotú. Ke tokoni ke faʻu ʻe he kau akó ha palani, fakaʻaliʻali ʻa e ngaahi fakahinohino mo e ngaahi fehuʻi ko ʻení. Fakaafeʻi kinautolu ke tali e ngaahi fehuʻi ko ʻení ʻi heʻenau tohinoa akó.

Fakaʻaongaʻi e ngaahi fehuʻi ʻi laló ke tataki koe, faʻu ha palani ki hoʻo ako fakaʻatamai mo fakalotu ʻi he kahaʻú. Fekumi ki ha fakahinohino mei he Tamai Hēvaní ʻo fakafou ʻi he Laumālie Māʻoniʻoní ʻi hoʻo fakakaukau mo hiki hoʻo ngaahi talí.

Ko e hā ha ngaahi taumuʻa ki he kahaʻú ʻokú ke maʻu?
Ko e hā ha ngaahi fili fakaako te ne tokoniʻi koe ke ke lavaʻi e ngaahi taumuʻa ko iá?
Ko e hā ha ngaahi palani te ke lava ʻo fai ki hoʻo ako fakalotu ʻi he taʻu kahaʻú? ʻi he ngaahi taʻu kimui aí?

ʻOku faʻa tokoni ki he kau akó ʻenau fanongo ki he ngaahi fakakaukau mei he kau ako kehé. Fakakaukau ke fakaafeʻi ha niʻihi ʻe loto-fiemālie ke vahevahe ʻenau ngaahi palaní.

Fakakaukau ke vahevahe hoʻo fakamoʻoni ki he mahuʻinga ʻo hono fakamuʻomuʻa ʻo e ako fakaʻatamaí mo fakalotú ʻi he kotoa ʻo e moʻuí.

Ngaahi Maʻuʻanga Tokoni Kehé

ʻE tāpuekina fēfē au ʻi hono fakamuʻomuʻa e ako fakalotú?

Naʻe akoʻi ʻe Palesiteni M. Lāsolo Pālati (1928–2023) ʻo e Kōlomu ʻo e Kau ʻAposetolo ʻe Toko Hongofulu Mā Uá:

15:45

Ko kimoutolu ʻi he ako māʻolungá ʻoku teuteu ngāue fakafaifekaú, ʻoku ou poupou atu ke mou kau pea lavaʻi ʻa e seminelí. ʻOku totonu ke lēsisita e kakai lalahi kei talavoú ʻi he kalasi ʻinisititiuti fakalotú. Kapau ʻokú ke ako ʻi ha ʻapiako ʻa e Siasí, fakakau atu e kalasi lēsoni fakalotú ʻi he semesitā fakaako kotoa pē. ʻI he faʻahitaʻu mahuʻinga ko ʻení ʻo e teuteu ki he ngāue fakafaifekaú pe mali taʻengatá pea mo hoʻo moʻui ko ha taha lahí, kuo pau ke ke kumi ha ngaahi founga ke ke ako mo tupulaki ai pea maʻu e ngaahi ueʻi mo e tataki fakalaumālié ʻo fakafou ʻi he Laumālie Māʻoniʻoní. ʻE lava ke tokoni atu hano ako fakalelei ki he ongoongoleleí ʻi he faʻa lotu he ngaahi kalasi seminelí, ʻinisititiutí pe lēsoni fakalotú, ke ke aʻusia e taumuʻa ko iá.

Tatau ai pē pe ʻokú ke ako ʻi ha ʻapiako Siasi pe ʻikai, pe ʻokú ke ako ʻunivēsiti pe ʻikai, ʻoua naʻá ke fakakaukau ʻokú ke fuʻu femoʻuekina ke ako e ongoongoleleí. ʻE ngaohi ʻe he ngaahi kalasi seminelí, ʻinisititiutí pe lēsoni fakalotú ke palanisi hoʻo moʻuí pea mo tokoni atu ki hoʻo ako fakaʻatamaí, ʻaki hono ʻoatu ha toe faingamālie ke ke fakaʻaongaʻi ho taimí ʻi hono ako ʻo e folofolá mo e ngaahi akonaki ʻa e kau palōfitá mo e kau ʻaposetoló. (“Ko e Toʻu Tangata Maʻongoʻonga Taha ʻo e Kakai Lalahi Kei Talavoú,” Liahona, Mē 2015, 69)

Naʻe akonaki ʻa Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

ʻOku totonu ke hoko ʻa e ako fakalaumālié ko e ʻuluaki meʻa ia ʻoku tau fakamuʻomuʻá. …

ʻOku mahino ʻi hono fakamuʻomuʻa ʻo e ako fakalaumālié, ʻoku ʻikai ke ne fakamaʻamaʻa ai kitautolu mei heʻetau ako fakamāmaní. ʻI he tafaʻaki ʻe tahá, ʻokú ne ʻomi ha taumuʻa ki heʻetau ako fakamatelié mo fakaʻaiʻai kitautolu ke tau ngāue mālohi ange ai.

Kuo pau ke tau fakahoko ha ngaahi fili faingataʻa ki he founga ʻoku tau fakaʻaongaʻi ai hotau taimí, kapau te tau fakamuʻomuʻa ʻa e ako fakalaumālié. Ka ʻoku ʻikai totonu ke teitei fakahoko ha fili ʻi he ʻiloʻilo pau ke tuku ʻa e meʻa fakalaumālié ke fika ua hake ko ha sīpinga angamaheni ʻi heʻetau moʻui. (“Education for Real Life,” Ensign, Oct. 2002, 17, 18)

Naʻe vahevahe ʻe Palesiteni Kōtoni B. Hingikelī (1910–2008) ʻo pehē:

Ako ʻo kau kiate Ia ʻi he kotoa hoʻo akó. ʻI he kotoa hoʻo akó, fekumi ke ke ʻiloʻi ʻa e ʻEikí. ʻE tokoni ʻa e ʻilo ko iá ʻi ha founga fakaʻofoʻofa ki he ako fakaʻatamai ʻokú ke maʻú mo foaki ha taumuʻa ki hoʻo moʻuí mo e ʻulungāngá he ʻikai lava ke maʻu ʻi ha toe founga kehe. (ʻi he Conference Report, Oct. 1964, 118)

Fēfē kapau ʻe ongo fakatupu lōmekina ʻeku ngaahi fili ki he kahaʻú?

Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí mo Kilisiteni M. ʻOakesi ʻo pehē:

ʻOku tau ʻiloʻi ʻoku ʻikai mo ha meʻa ʻe fakapuputuʻu mo fakatupu hohaʻa ange ki he ʻatamaí ka ko e ʻikai ke ʻiloʻi e meʻa ke ke fai ʻi ho kahaʻú, pea ʻoku ʻikai mo ha meʻa ʻe fakafiemālie ange ka ko hoʻo ʻiloʻi fakatāutaha e ngaahi meʻa ʻokú ke malava ke faí. Lau ho tāpuaki fakapēteliaké, fakakaukau ki ho ngaahi talēnití mo e ngaahi meʻa te ke lava fakanatula ʻo faí, pea hoko atu hoʻo moʻuí. Fakahoko e sitepu ʻuluakí pea ʻe hoko mai ha ngaahi faingamālie. (“Akó mo e Kāingalotu ʻi he Ngaahi ʻAho Kimui Ní,” Liahona, ʻEpeleli 2009, 25)

Naʻe vahevahe ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku fifili ha toʻu tupu tokolahi pe ʻoku totonu nai ke nau hū ki ha ʻunivēsiti, kolisi, pe ki ha ʻapiako ako ngāue. Ko e fili pē ia ʻaʻau. Ko e fili ke fakahokó ʻoku meimei ko ha meʻa ia ʻoku tau saiʻia ai, ka ʻoku ʻikai ko ha tefitoʻi moʻoni. Ko ia ai, kimuʻa peá ke filí, fakapapauʻi lelei e ngaahi meʻa ʻokú ke manako aí, hoʻo pōtoʻi ngāué, mo e ngaahi tūkunga ʻokú ke ʻi aí. Ngāue fakatatau ki hoʻo ngaahi ongó mo e ngaahi meʻa ʻokú ke saiʻia aí. Hoko atu leva ʻo vilitaki ʻi hono maʻu ʻo e faʻahinga ako mo e ako ngāue ʻokú ne fakahaaʻi lelei taha e ngaahi meʻa ʻokú ke mahuʻingaʻia aí mo e meʻa ʻokú ke malavá. Manatuʻi, ʻoku fakaʻeiʻeiki ha faʻahinga ngāue pē ʻoku fakaʻeiʻeiki. (“Seek Learning, Even by Study and Also by Faith,” 1994 videocassette).

Ngaahi ʻEkitivitī Fakalahi ki he Akó

Ko e hā e ngaahi taimi ʻoku ngata ki ai e tohi kole hū ki he ngaahi akoʻanga ʻa e Siasí?

Ke tokoni ke ʻilo ʻe he kau akó ʻa e taimi ʻe lava ke nau tohi kole hū ai ki he ngaahi akoʻanga ʻa e Siasí, fakaʻaongaʻi ʻa e ngaahi fehokotakiʻanga ko ʻení ke maʻu ʻa e fakamatala fakamuimuitahá.

BYU Pathway: https://www.byupathway.edu/academic-calendar

BYU: https://enrollment.byu.edu/admissions/when-should-i-apply

BYU–Hawaii: https://ai1.ivy-cdn.com/storage/assets/Ve6D4xkngR0YrMOv2zPW8wdbZEKB2QOo.png

BYU–Idaho: https://www.byui.edu/admissions/application-deadlines

Ensign College: https://www.ensign.edu/admissions-dates-deadlines

Ko e ʻinisititiutí ʻoku maʻá e taha kotoa pē

Kapau ʻe ʻaonga ki he kau akó ha fakamatala lahi ange fekauʻaki mo e ʻinisititiutí, fakakaukau ke huluʻi ha vitiō ʻe taha pe lahi ange mei he peesi mītia “I Love Institute.” ʻI he ngaahi vitiō ko ʻení, ʻoku fakamoʻoni ai ʻa e kakai lalahi kei talavou mei he funga ʻo e māmaní ki hono mahuʻinga ʻo e ʻinisititiutí.

Ko ha founga ʻe taha ke kamata ʻaki e kalasí

Te ke lava ʻo kamata e kalasí ʻaki haʻo vahevahe ʻa e fakamatala ko ʻení: Fakatatau ki he Kautaha Moʻui ʻa Māmaní, ko e ʻavalisi fakaemāmani lahi ʻo e moʻuí ʻoku meimei ko e taʻu 73. (uepisaiti ʻa e Kautaha Moʻui Lelei ʻa Māmaní).

Te ke lava ʻo vahevahe mo e kau akó, kapau naʻe taʻu 16 ha taha pea moʻui ʻo aʻu ki hono taʻu 73, ʻoku toe ha pēseti nai ʻe 78 ʻo ʻenau moʻuí.

ʻOkú ke pehē ko e hā ʻoku mahuʻinga ai ʻi he ako māʻolungá ke ʻiloʻi ʻoku kei toe ha konga lahi pehē ʻo e moʻuí?

Tokoni ke mahino ki he kau akó ʻe lava ke liliu ʻe heʻenau ʻinivesi ʻi he ako ʻunivēsití ha ngaahi taʻu lahi ʻo ʻenau moʻui ka hoko maí. Kapau kuó ke ʻosi akoʻi ʻa e Lēsoni 188, “Ko e Mahuʻinga ʻo e Akó,” fakaafeʻi ʻa e kau akó ke vahevahe ʻa e meʻa ʻoku nau manatuʻi fekauʻaki mo e ʻuhinga ʻoku mahuʻinga ai ʻa e akó.