Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko e Mahuʻinga ʻo e Akó: Ngaahi Tāpuaki Fakatuʻasino mo Fakalaumālie ʻo e Akó

“Ko e Mahuʻinga ʻo e Akó: Ngaahi Tāpuaki Fakatuʻasino mo Fakalaumālie ʻo e Akó,” Fuakava Motuʻá – Tohi Lēsoni ʻa e Faiako Seminelí (2026)

“Ko e Mahuʻinga ʻo e Akó: Ngaahi Tāpuaki Fakatuʻasino mo Fakalaumālie ʻo e Akó,” Fuakava Motuʻá – Tohi Lēsoni ʻa e Faiako Seminelí

Ko e Teuteu ki he Ako mo e Ngāue Maʻuʻanga Moʻui ʻi he Kahaʻú: Lēsoni 188

Ko e Mahuʻinga ʻo e Akó

Ngaahi Tāpuaki Fakatuʻasino mo Fakalaumālie ʻo e Akó

Neongo ʻe lava ke mātuʻaki faingataʻa ʻa e ako fakaʻatamaí, ka ʻoku feʻunga ia mo e feilaulaú mo e feingá. He ʻikai ngata pē ʻi hono faitāpuekina ʻe he akó ʻetau moʻuí mo kinautolu ʻoku tau feohí, ka ʻokú ne teuteuʻi kitautolu ke tau hoko ko ha ngaahi meʻangāue lelei ange ʻi hono fakahoko e ngāue ʻa e ʻEikí. ʻE lava ke tokoni ʻa e lēsoni ko ʻení ke mahino ki he kau akó ʻa e mahuʻinga ʻo e ako fakaʻatamaí mo fakalaumālié fakatouʻosi.

Teuteu ʻa e tokotaha akó: Fakaafeʻi e kau akó ke fakalaulauloto ki ha meʻa ʻoku nau saiʻia ke ako ki ai mo e founga ne nau fakatupulaki ai e tokanga ko iá. Te nau lava foki ʻo fakalaulauloto ki he founga kuo mahuʻinga ai kiate kinautolu ʻa e ako fekauʻaki mo e tokanga ko ʻení.

Ngaahi ʻEkitivitī Ako ʻOku Ala Fakahokó

Tauʻatāiná pe fakangatangatá

Fakakaukau ke tā ha fōneli ʻe ua ʻi he palakipoé, ʻo hangē ko ʻene hā atu ʻi laló. ʻE lava ke tā ʻe he kau akó ʻa e fōneli ko ʻení ʻi heʻenau tohinoa akó. Te ke lava foki ʻo ʻomi ha fōneli ki he kalasí pe faʻu ha foʻi fōneli faingofua mei he pepá.

Fakaafeʻi e kau akó ke tuhu ki he ngataʻanga ʻo e fōnelí ʻoku hā ngali fakangatangata angé pea mo e ngataʻanga ʻoku ʻasi lahi pe tauʻatāina angé. Hili iá pea tohiʻi ʻa e Ko Hono Maʻu ha Akó ʻi ʻolunga ʻi he fakatātā ʻuluakí.

Fakakaukauloto ʻoku fakafofongaʻi ʻe he kiʻi konga fōsiʻi ʻo e fōneli ko ʻení hono maʻu ha ako fakaʻatamaí.

Ko e hā ha ngaahi founga ʻe ngali fakangatangata ai hono maʻu ha akó ki ha kakai ʻe niʻihi?
Ko e hā ʻe lava ke fakafofongaʻi ʻe he konga fōlahi lahi ange taupotu ki laló? Ko e hā hono ʻuhingá?

ʻE lava ke fakamatalaʻi ʻe he kau akó neongo ʻoku fiemaʻu ki he akó ha ngāue lahi, mapuleʻi kita, mo ha feilaulau, ka ʻe lava ke iku ia ki ha ngaahi tāpuaki mei he ʻEikí, kau ai ha tauʻatāina, ngaahi faingamālie, mo ha tupulaki lahi ange.

Tohiʻi ʻa e Ko e Fili ke ʻOua ʻe Akó ʻi ʻolunga ʻi he fakatātā hono uá.

Fakakaukau leva he taimí ni ʻoku fakafofongaʻi ʻe he konga fōlahi ange ʻo e fōneli ko ʻení ʻa e fili ke ʻoua ʻe akó.

Ko e hā ʻe lava ke fakafofongaʻi ʻe he konga fōsiʻi ʻi laló? Ko e hā hono ʻuhingá?

ʻE lava ke fakamatalaʻi ʻe he kau akó ko e fili ko ia ke ʻoua ʻe akó ʻe ngali tauʻatāina ia, ka ʻe lava ke iku ia ki ha tauʻatāina, ngaahi faingamālie, mo e tupulaki siʻisiʻi pe fakangatangata.

Fakalaulauloto ki he ngaahi fehuʻi ko ʻení:

ʻOku mahuʻinga fēfē ʻa e akó kiate koé? Ko e hā hono ʻuhingá?
ʻE uesia fēfē koe mo kinautolu ʻoku mou feohí ʻi hoʻo fili ke ako pe ʻikai akó?

ʻE lava ke tokoni atu ʻa e Laumālie Māʻoniʻoní ke ke ʻiloʻi ʻa e ngaahi pōpoakí maʻau pē. ʻI hoʻo ako fekauʻaki mo e akó, tokanga ki he ngaahi ongo ʻe ala tokoni atu ki hoʻo ngaahi taumuʻa fakaakó mo e moʻuí.

Ako maʻu pē

Fakaʻaliʻali e fakamatala ko ʻení. Te ke lava ʻo tufa ʻa e tohi fakahinohino Ki Hono Fakamālohia ʻo e Toʻu Tupú ki he tokotaha ako takitaha, pe fakaafeʻi kinautolu ke kumi ia ʻi he polokalama Gospel Library.

Te ke lava ʻo fakaafeʻi ʻa e kau akó ke nau ako fakafoʻituitui ʻa e ngaahi fakamatalá pea aleaʻi ʻa e ngaahi fehuʻi ʻoku hoko atu aí ʻi ha fanga kiʻi kulupu iiki.

Lau ʻa e ngaahi fakamatala ko ʻení, ʻo kumi e meʻa ʻokú ke ako fekauʻaki mo e akó.

Naʻe akonaki ʻa Palesiteni Lāsolo M. Nalesoni ʻo pehē:

ʻOku fiemaʻu ʻe hotau Tupuʻangá ʻa ʻEne fānau ʻi he feituʻu kotoa pē ke nau ako ko ha feinga fakataautaha. (“Education—A Religious Responsibility” [Fakataha lotu ʻa e ʻUnivēsiti Pilikihami ʻIongi-ʻAitahoó, 26 Sānuali 2010], byui.edu)

ʻOku pehē ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí:

ʻOku finangalo e Tamai Hēvaní ke ako maʻu pē Hono ngaahi ʻofefiné mo Hono ngaahi fohá. ʻOkú ke fakatou maʻu ha ngaahi ʻuhinga fakatuʻasino mo fakalaumālie ke ke fekumi mo manako ai ke ako. ʻOku ʻikai fakataumuʻa ʻataʻatā pē ʻa e akó ki hono maʻu ha paʻangá. Ko ha konga ia hoʻo taumuʻa taʻengatá ke hoko ʻo hangē ange ko e Tamai Hēvaní. …

Ako maʻu pē. Fekumi ki ha ngaahi faingamālie ke fakalahi ai hoʻo fakakaukaú mo hoʻo ngaahi taukeí. ʻE lava ke kau ʻi he ngaahi faingamālie ko ʻení ʻa e ako fakaʻatamai ʻi he akó pe ako ngāué pea pehē ki ha ako mei he ngaahi maʻuʻanga tokoni ʻokú ke falala ki aí. Fakakau ʻa e ʻEikí ʻi hoʻo ngaahi feingá, pea te Ne fakahinohinoʻi koe. ʻI hoʻo ako fekauʻaki mo e māmani ʻokú ne ʻākilotoa koé, ako foki fekauʻaki mo e Fakamoʻuí, ʻa ia naʻá Ne fakatupu ʻa e māmaní. Ako ʻEne moʻuí mo e ngaahi akonakí. ʻAi ke hoko ʻa e seminelí, ʻinisititiutí, mo hono ako fakataautaha ʻo e ongoongoleleí ko ha konga ʻo hoʻo ako ʻi he kotoa hoʻo moʻuí. …

ʻOku fakatupulaki ʻe he akó hoʻo malava ke ngāue maʻá e ʻEikí. ʻOkú ne fakaivia koe ke ke tāpuekina e niʻihi kehé, tautautefito ki ho fāmilí. Ko e lahi ange hoʻo akó, ko e lahi ange ia hoʻo lava ʻo tokoni ke langa e puleʻanga ʻo e ʻOtuá mo tākiekina e māmaní ki he leleí. (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí [2022], 31–32)

Ko e fē ʻa e ngaahi kupuʻi lea mei he ngaahi fakamatala ko ʻení ʻoku ʻuhingamālie taha kiate koé? Ko e hā hono ʻuhingá?
Ko e hā ha ngaahi moʻoni taʻengata te tau lava ʻo ako mei he ngaahi fakamatala ko ʻení?
Lekooti ʻa e ngaahi moʻoni ʻoku vahevahe ʻe he kau akó ʻi he tafaʻaki ʻo e ʻuluaki fōnelí ʻi he palakipoé. ʻE lava ke fai ʻe he kau akó ʻa e meʻa tatau ʻi heʻenau fakatātaá. Te nau lava ʻo vahevahe ha ngaahi moʻoni hangē ko ʻení:
- Ko e akó ko ha konga ia ʻo ʻetau taumuʻa taʻengata ke hoko ʻo hangē ange ko e Tamai Hēvaní.
- ʻOku finangalo ʻa e Tamai Hēvaní ke ako maʻu pē Hono ngaahi ʻofefiné mo e ngaahi fohá.
- ʻOku fakatupulaki ʻe he akó ʻa ʻetau malava ke ngāue maʻá e ʻEikí mo faitāpuekina e niʻihi kehé.
Ko e hā ʻoku hoko ai e akó ko ha konga mahuʻinga ʻo e palani ʻa e Tamai Hēvaní?
ʻE tokoni fēfē nai ʻa e ngaahi moʻoni ko ʻení ki ha taha ʻokú ne pehē ʻoku fakangatangata ʻa e akó?

Mahuʻinga ʻo e akó

Kuo hoko maʻu pē ʻa e akó ko ha konga mahuʻinga ʻo e fakalakalaká maʻá e fānau ʻa e Tamai Hēvaní. Hangē ko ʻení, naʻe akoʻi ʻe ʻĀtama mo ʻIvi ʻena fānaú ki he ngaahi meʻa fakalaumālié mo fakamāmaní fakatouʻosi (vakai, Mōsese 5:10–12; 6:5–6), ʻo tokoniʻi ai kinautolu ke nau hoko ʻo hangē ange ko e Tamai Hēvaní.

Ko e hā ha ngaahi tāpuaki mei he ʻEikí kuó ke mamata ai ʻi hoʻo moʻuí pe moʻui ʻa e niʻihi kehé koeʻuhí ko e akó?
Ko e hā ha ngaahi aʻusia kuó ke maʻu ʻokú ne tokoniʻi koe ke ke ʻiloʻi ʻoku tokanga mai ʻa e Tamai Hēvaní ki hoʻo akó?

Fakaʻosí

Fakakaukauloto ʻoku ʻi ai haʻo kaungāmeʻa ʻoku fehiʻa ʻi he akó pea ʻokú ne fakakaukauʻi ha ngaahi fili ʻe ʻikai fiemaʻu ai ha ako lahi ange hili ʻa e ako māʻolungá. Hiki ʻa e meʻa te ke vahevahe mo ho kaungāmeʻá ʻo fakaʻaongaʻi ʻa e meʻa naʻá ke ako he ʻaho ní. Ko ha ngaahi sīpinga ʻeni ʻo e ngaahi meʻa te ke ala fakakau aí:

Ko e ngaahi tāpuaki fakatuʻasino mo fakalaumālie ʻe lava ke tāpuakiʻi ʻaki kitautolu ʻe he Tamai Hēvaní mo Sīsū Kalaisi mei hono maʻu ha akó.
Ngaahi potufolofola, kupuʻi lea, pe ngaahi fakakaukau pe aʻusia fakataautaha ʻoku ʻuhingamālie kiate koé.

Fakaafeʻi ha kau ako ʻe niʻihi ke vahevahe mo e kalasí. Fakakaukau ke fakamoʻoni ki he tāpuaki maʻongoʻonga ʻe lava ke maʻu ʻi heʻetau moʻuí mei he akó—tautautefito ʻi hono tokoniʻi kitautolu ke tau hoko ʻo hangē ange ko e Tamai Hēvaní mo Sīsū Kalaisí.

Ngaahi Maʻuʻanga Tokoni Kehé

Ko e hā ʻoku mahuʻinga ai ke akó?

Naʻe akoʻi ʻe Palesiteni Kōtoni B. Hingikelī (1910–2008) ʻo pehē:

Kuo pau ke ke maʻu e tuʻunga fakaako kotoa te ke lava ke maʻú. Kuo fakaʻau e moʻuí ke fihi mo feʻauʻauhi. He ʻikai ke ke toe lava ʻo pehē ʻoku ʻi ai ha ngaahi meʻa ʻoku ʻi ai haʻo totonu ki ai. ʻE fiemaʻu koe ke ke ngāue lahi mo fakaʻaongaʻi ho ngaahi talēniti lelei tahá ke ke aʻusia ai e kahaʻu lelei taha te ke malavá. Feilaulauʻi ha meʻalele, feilaulauʻi ha meʻa pē ʻoku fiemaʻu ke feilaulauʻi ke fakafeʻungaʻi koe ke ke fai e ngāue ʻo e māmaní. ʻE totongi lahi atu ʻe he māmani ko iá ʻa hoʻo fakakaukau ki ho mahuʻingá, pea ʻe tupulaki ho mahuʻingá ʻi hoʻo ako mo maʻu ha ʻilo lahi ʻi he malaʻe kuó ke filí. (“Words of the Prophet: Seek Learning,” New Era, Sep. 2007, 3–4)

Naʻe fakamatala ʻa Palesiteni Tāleni H. ʻOakesi mo Sisitā Kilisiteni M. ʻOakesi ʻo pehē:

Ko e lahi ange ʻo e ʻilo ʻoku tau maʻu fekauʻaki mo e ngaahi fono ʻo e langí pea mo e ngaahi meʻa ʻo e māmaní, ko e lahi ange ai pē ia hotau ivi takiekina ʻe lava ke tau fakaʻaongaʻi ke lelei kiate kinautolu ʻoku tau feohí pea te tau toe malu ange ai foki mei he ngaahi mālohi ʻo e faiangahalá mo e koví ʻa ia te ne ala ʻai ke tau puputuʻu pea fakaʻauha kitautolu. (“Akó mo e Kāingalotu ʻi he Ngaahi ʻAho Kimui Ní,” Liahona, ʻEpeleli 2009, 22–23)

Fēfē kapau ʻoku ʻikai faingamālie ʻa e ako fakaʻatamaí kiate au?

Naʻe pehē ʻe Palesiteni Tieta F. ʻUkitofa, ʻi heʻene hoko kimuʻa ko ha mēmipa ʻo e Kau Palesitenisī ʻUluakí:

18:45

Kapau he ʻikai lava ke maʻu ha ako fakaʻatamai ʻoku lelei angé, ʻoua naʻa tuku ia ke ne taʻofi koe mei hoʻo maʻu ʻa e ʻilo kotoa pē te ke lavá. ʻI he ngaahi tūkunga ko ʻení, ʻe lava ke hoko ʻa e ngaahi tohi lelei tahá ko hoʻo ʻʻunivēsiti’—ʻa ia ko ha lokiako ʻoku ava mo lava ke hū maʻu pē ki ai ʻa e tokotaha kotoa ʻoku fie hū ki aí.” Feinga ke fakatupulaki hoʻo ʻilo ki he ngaahi meʻa kotoa pē ʻoku “māʻoniʻoni, fakaʻofoʻofa, pe ongoongo lelei pe feʻunga mo hono vīkivikiʻí.” Fekumi ki he ʻiló “ʻi he ako pea ʻi he tui foki.” (“Tefitoʻi Moʻoni ʻe Ua ki ha Faʻahinga ʻEkonōmika pē,” Liahona, Nōvema 2009, 58) (taimi 15:28 ki he 16:05)

Ngaahi ʻEkitivitī Fakalahi ki he Akó

Founga ʻe taha ke kamata ʻakí

Fakakaukau ke kamata e kalasí ʻaki hono fakaʻaliʻali ha fakatātā ʻo ha matapā ʻoku ava.

Hili iá pea fakaʻaliʻali ʻa e kupuʻi lea ko ʻení, ʻo toʻo ʻa e foʻi lea ʻuluakí. Fakaafeʻi e fānaú ke nau mateʻi pe ko e hā e foʻi lea ʻoku pulí. ʻI heʻenau vahevahe ha ngaahi tali ʻe ala maʻú, te nau lava ʻo fakamatalaʻi e ʻuhinga ne nau fili ai e foʻi lea ne nau filí.

Naʻe akoʻi ʻe Palesiteni Kōtoni B. Hingikelī (1910–2008) ʻa e meʻá ni:

ʻa e kī te ne fakaava ʻa e matapā ʻo e faingamālié kiate koé. ʻOku ʻaonga ke feilaulau ke maʻu. (“Inspirational Thoughts,” Ensign, June 1999, 4)

Hili ha taimi feʻunga, hiki ʻa e Ko e akó ʻi he feituʻu ʻoku ʻataá. Fakaafeʻi e kau akó ke vahevahe ʻa e founga ʻe lava ke moʻoni ai ʻa e fakamatalá. Kapau ʻoku ʻikai lea ʻaki ia ʻe he kau akó, fakakaukau ke fakamatalaʻi ʻa e founga ʻoku fakaava ai ʻe he akó e ngaahi matapā ʻo e faingamālié maʻatautolú koeʻuhí ʻokú ne tokoniʻi kitautolu ke tau ako mo tupulaki, pea hoko ai ʻo hangē ange ko e Tamai Hēvaní mo Sīsū Kalaisi (vakai, Tokāteline mo e Ngaahi Fuakava 93:36).

Fakaʻaliʻali leva ha fakatātā ʻo ha matapā kuo tāpuni.

Fakaafeʻi e kau akó ke vahevahe ha ngaahi ʻuhinga ʻe ala fili ai ha kakai ʻe niʻihi ke ʻoua te nau fekumi ki he ʻiló mo e akó. Te ke lava ʻo fakaafeʻi e kau akó ke fakalaulauloto ki heʻenau ngaahi fakakaukau fakataautaha ki he akó.

Ko e akó ʻa e kī ki he faingamālié

Ki ha ʻekitivitī ʻe taha ke fili mei ai ʻi he konga “Mahuʻinga ʻo e akó,” fakakaukau ke huluʻi ʻa e vitiō “Education Is the Key to Opportunity” (1:38). ʻI he foʻi vitiō ko ʻení, ʻoku talanoa ai ʻa Tōmasi S. Monisoni mo Kōtoni B. Hingikelī fekauʻaki mo e mahuʻinga ʻo e akó. Te ke lava ʻo fakaafeʻi e kau akó ke nau vakai ki he fōneli ʻi he palakipoé, ʻo kumi ha ngaahi founga ʻoku fakaava ai ʻe he akó ʻa e matapaá ki ha toe faingamālie mo ha ngaahi tāpuakí.

1:38