Ko Hono Fakaʻaongaʻi ʻo e Tui kia Sīsū Kalaisí ke Langaki ʻa e Moʻui Fakafalala Kiate Kitá

ʻOku fiefia ʻa Piuela ke ʻosi mei he ako māʻolungá hili ha taʻu ʻe ua. Ka neongo ia, ʻokú ne ongoʻi manavasiʻi fekauʻaki mo e lahi ʻo e paʻanga ʻe fiemaʻu ke ne tānaki ki he kahaʻú.

Ko e hā ha faleʻi te ke ʻoange kapau:

1. ʻOku fakakaukau ʻa Piuela ke lotu ʻi he ʻaho kotoa pē ke foaki ʻe he ʻOtuá ʻa e paʻanga te ne fiemaʻu hili ʻa e fakaʻosi akó. ʻOku ʻikai haʻane palani ke kumi ngāue, ʻo falala ʻe tokonaki ʻe he ʻOtuá maʻana.

2. ʻOku ongoʻi ʻe Piuela koeʻuhí ʻoku ʻikai ko ha “meʻa fakalaumālie” ʻa e paʻangá, he ʻikai tokanga mai ʻa e ʻOtuá ia. ʻOkú ne fakakaukau ke fekumi ʻi he ʻaho kotoa pē ki ha ngāue maʻuʻanga moʻui ʻoku feʻunga mo ʻene taimi-tēpile fakaakó. ʻOkú ne faʻu ha ngaahi palani ke talanoa mo e kau maʻu pisinisí, fakahū ʻene ʻū tohi fakamoʻoni akó, mo ako ha ngaahi pōtoʻi ngāue foʻou ke fakamahuʻingaʻi lahi ange ia ʻe he ngaahi falekoloa fakalotofonuá.

Naʻe fakamatala ʻa Pīsope W. Kulisitofā Uātolo, Tokoni ʻUluaki ʻi he Kau Pīsopeliki Pulé, ʻo pehē:

10:7

Ko e meʻa kotoa pē, naʻe fakataumuʻa leva ia kia Sīsū Kalaisi, ko e fakavaʻe kuo pau ke tau langa aí ʻo aʻu pē ki heʻetau mateuteu fakatuʻasinó.

ʻOku ʻuhinga ʻa e mateuteu [fakatuʻasino] mo e moʻui fakafalala pē kiate kitá ko e “tui te tau lava ʻo maʻu ʻa e ngaahi fiemaʻu fakalaumālie mo fakatuʻasino kotoa pē ʻo e moʻuí ʻoku tau fiemaʻu maʻatautolu mo hotau fāmilí” [Ngaahi Meʻa Fakapaʻanga Fakataautaha ki he Moʻui Fakafalala Pē Kiate Kitá (2017), 4]. (“Naʻe ʻi ai ʻa e Mā,” Liahona, ʻOkatopa 2020, 44)

Hiki ʻa e ngaahi meʻa ko ʻení ʻo fakahokohoko mei he faingofua taha ki he faingataʻa taha kiate koe ke langaki ʻa e moʻui fakafalala pē kiate kitá. Hiki ʻi he tafaʻaki ʻo e meʻa ʻe taha pe ua ʻoku faingataʻa taha kiate koé, ha faʻahinga fakafeʻātungia pē ʻokú ke fiemaʻu ai e tokoni ʻa e Fakamoʻuí ke ikunaʻi ʻaki.

• ʻIlo ki he ongoongoleleí

• Ngaahi fiemaʻu fakapaʻanga lolotongá mo e kahaʻú

• Akó mo e ngāue maʻuʻanga moʻuí

• Ngaahi fiemaʻu fakatuʻasinó

• Ngaahi fiemaʻu fakaelotó mo fakasōsialé

ʻI he hokohoko atu hoʻo ako he ʻaho ní, manatuʻi ʻa e ngaahi tafaʻaki ʻokú ke fiemaʻu lahi taha ai ha tokoní. Fakaafeʻi ʻa e Laumālie Māʻoniʻoní ke fakamālohia hoʻo tui ʻe tokoniʻi koe ʻe he Tamai Hēvaní mo Sīsū Kalaisi ʻi hoʻo feinga ke langaki ʻa e moʻui fakafalala pē kiate kitá.

ʻI he lēsoni ko ʻení, ʻe laukonga ʻa e kau akó mei he talanoa ʻo Siosefa ʻi ʻIsipité ʻi he tohi ʻa Sēnesí. Kimuʻa pea ako ʻa e talanoá, te ke lava ʻo huluʻi ʻa e foʻi vitiō “I Will Provide for My Saints” (3:08) mei he taimi 0:00 ki he 1:52 pea tuku ki he kau akó ke nau kumi ha fakamoʻoni ʻo e mālohi mo e finangalo ʻo e ʻEikí ke tokoniʻi kitautolu ʻi heʻetau ngāue ʻaki ʻa e tui kiate Iá ke fakatupulaki ʻa e moʻui fakafalala pē kiate kitá. ʻE lava ke tokoni hono fai ʻení ke fakakaukau e kau akó ki he finangalo ʻo e ʻEikí ke tokoní mo e mālohi ke tāpuakiʻi ʻa Siosefa ʻi hono ngaahi tūkunga faingataʻá.

3:8

Ke tokoni ke ako ʻe he kau akó ʻa e fakamatala kia Siosefá, te ke lava ʻo ʻoange ʻa e laʻipepa tufa ko ʻení. Mahalo te ke fie vahe ki he kulupu takitaha ha konga kehe pea ʻai ke nau teuteu ke tali e ongo fehuʻi ʻi he laʻipepa tufá.

• ʻOkú ke pehē naʻe mei fēfē e fakaʻosinga ʻo e talanoa ko ʻení kapau naʻe ʻikai tui ʻa Siosefa ki he ʻOtuá? Kapau naʻe ʻikai fie feinga ʻa Siosefa?

• ʻOkú ke pehē ʻe fakaʻaongaʻi fēfē ʻa e talanoa ko ʻení ki he moʻui ʻa ha toʻu tupu?

Tuku ha kiʻi taimi ke ke lekooti ai ʻi he faʻa lotu ʻa e ngaahi meʻá ni ʻi hoʻo fakakaukau ki he ngaahi tafaʻaki ʻo e moʻui fakafalala pē kiate kitá naʻá ke pehē ʻoku faingataʻa ange kiate koe ‘i he konga kimuʻa ʻi he lēsoní:

1. Ko e meʻa naʻá ke ako ʻokú ne fakamālohia hoʻo tui ʻe tokoniʻi koe ʻe he Tamai Hēvaní mo Sīsū Kalaisi ʻi he ngaahi fakafeʻātungia ki he moʻui fakafalala pē kiate kitá ʻi hoʻo moʻuí.

2. Founga te ke lava ai ʻo fakaʻaongaʻi hoʻo tui ki he Tamai Hēvaní mo Sīsū Kalaisí ʻo fakafou ʻi hoʻo ngaahi feinga ke langaki ʻa e moʻui fakafalala pē kiate kitá.