Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko Hono Fakaʻilongaʻi e Folofolá ʻaki ha Fakamatalá: Ko Hono Fakaleleiʻi ʻEtau Akó ʻo fakafou ʻi hono Fakaʻilongaʻi, Tānaki Atu ha Fakamatala, mo Hono Fakafehokotaki ʻEtau Folofolá

“Ko Hono Fakaʻilongaʻi e Folofolá ʻaki ha Fakamatalá: Ko Hono Fakaleleiʻi ʻEtau Akó ʻo fakafou ʻi hono Fakaʻilongaʻi, Tānaki Atu ha Fakamatala, mo Hono Fakafehokotaki ʻEtau Folofolá,” Fuakava Motuʻá – Tohi Lēsoni ʻa e Faiako Seminelí (2026)

Ngaahi Taukei Ako Folofolá: Lēsoni 168

Fakaʻilongaʻi e Folofolá ʻaki ha Fakamatalá

Ko Hono Fakaleleiʻi ʻEtau Akó ʻo fakafou ʻi hono Fakaʻilongaʻi, Tānaki Atu ha Fakamatala, mo Hono Fakafehokotaki ʻEtau Folofolá

Girl studying and marking scriptures with help from a smartphone and lesson manual.

ʻE lava ke tokoni ʻa e ako folofola fakatāutahá ke tau fakatupulaki ha vā fetuʻutaki mālohi ange mo e Tamai Hēvaní mo Sīsū Kalaisi. ʻE ala tokoni hono fakaʻilongaʻi ʻetau folofolá ʻaki ha fakamatalá (fakaʻilongaʻi, tānaki atu ha fakamatala, mo fakafehokotakí), ke tau tokanga lahi ange ki he ngaahi foʻi lea ʻoku tau akó pea ongoʻi ofi ange ki he Tamai Hēvaní mo Sīsū Kalaisi ko hano ola. ʻE ako ʻe he kau akó ʻi he lēsoni ko ʻení ke fakaʻilongaʻi ʻenau folofolá ʻaki ha fakamatala ʻi ha founga ʻe ala tokoni ke nau ongoʻi ofi ange ai ki he Tamai Hēvaní mo Sīsū Kalaisi.

Teuteu ʻa e tokotaha akó: Fakaafeʻi e kau akó ke fehuʻi ki ha niʻihi ʻi honau fāmilí, uōtí, pe koló ʻa e meʻa ne nau maʻu ne tokoni ʻi hono fakaʻilongaʻi e folofolá. ʻOku totonu ke omi mateuteu ʻa e kau akó ke vahevahe e meʻa naʻa nau akó.

Ngaahi ʻEkitivitī Ako ʻOku Ala Fakahokó

Lava ʻo maʻu ʻa e folofolá

Ke kamata e kalasí, fakakaukau ke fakaʻaliʻali pe tā ha talavou mei he kuonga ʻo e Fuakava Motuʻá, ʻo hangē ko ʻení. Talaange ki he kau akó ko ha toʻu tupu ʻIsileli ʻeni mei he 600 BC ko Sēkope hono hingoá. Fakaafeʻi e kau akó ke nau fakakaukauloto ʻoku nau ʻinitaviu ʻa Sēkope. Fakaafeʻi e kau akó ke nau aleaʻi mo ha hoa pe kulupu tokosiʻi ʻa e founga ʻoku nau pehē ʻe ala tali ai ʻe Sēkope ʻa e fehuʻi ʻe tolu ko ʻení.

An illustration of a male character from the Book of Mormon dressed in a blue robe, yellow sash, and sandals.

ʻOku faʻu fēfē ʻa e folofolá ʻi ho kuongá?
Ko e hā ha meʻa kuo pau ke ke fai ke ke ako ai mei he folofolá?
ʻOku fēfē hoʻo ngāue ʻaki hoʻo folofolá?

Kapau ʻoku fiemaʻu tokoni ʻa e kau akó, te ke lava ʻo vahevahe ange naʻe tohitongi ʻa e ngaahi folofolá ʻi he 600 BC ʻi ha ʻū lauʻi peleti ukamea pea tohi ʻi ha ‘ū laʻipapa, pe mahalo ʻi ha kiliʻi manu. ʻOku ngalingali naʻe pau ke fononga ʻa Sēkope ki he feituʻu naʻe maʻu ai ʻa e folofolá pea fanongo ki hano lau ia ʻe ha taha. Mahalo naʻá ne fanongo foki ki hano vahevahe ʻe ha kakai ʻa e meʻa naʻa nau ʻiloʻí mei heʻenau manatú.
Kapau naʻe ʻinitaviu koe ʻe Sēkope, te ke tali fēfē ʻa e ngaahi fehuʻi ko ʻení?
Ko e hā nai ha fakakaukau te ne maʻu fekauʻaki mo hoʻo ngaahi talí?

Ke tokoni ke fakakaukau ʻa e kau akó ki honau faingamālie makehe ke maʻu ʻa e folofolá, vahevahe ʻa e fakamatala ko ʻení.

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:36

Fakalaulauloto ki hotau tāpuaki mahuʻinga ʻoku ala maʻu ʻi heʻetau maʻu ʻa e Tohi Tapú mo e toe ngaahi peesi folofola makehe ʻe 900, ʻo kau ai ʻa e Tohi ʻa Molomoná, Tokāteline mo e Ngaahi Fuakavá pea mo e Mataʻitofe Mahuʻingá. Toe fakakaukau angé, makehe mei aí, ʻa e ngaahi lea naʻe fakahoko ʻe he kau palōfitá ʻi hono ueʻi kinautolu ʻe he Laumālie Māʻoniʻoní ʻi ha ngaahi ʻātakai ʻo hangē ko ʻení, ʻa ia ʻoku ui ai ia ʻe he ʻEikí ko e folofola (vakai, T&F 68:2–4), ʻoku meimei ke ʻomi hokohoko kiate kitautolu … ʻOku ou pehē ʻoku teʻeki ke ʻi he hisitōliá ha kakai kuo tāpuekina ʻaki ha ngaahi folofola lahi ʻaupito. Pea ʻikai ngata aí, ka ʻoku malava ke maʻu ʻe he tangata, fefine, mo e fānau kotoa pē ha tatau fakataautaha ʻo e ngaahi tohi toputapú ni ʻi heʻenau lea fakafonuá. Naʻe mei ngali fakaofo moʻoni ʻa e meʻá ni ki he … Kau Māʻoniʻoni ʻi he ngaahi kuonga fakakosipeli kimuʻá! ʻOku hanga ʻe he tāpuaki ko ʻení ʻo fakahā mai ʻa e naʻinaʻi ʻa e ʻEikí ki hono mahuʻinga ʻo ʻetau toutou fakaʻaongaʻi ʻa e ngaahi folofolá ʻo lahi ange ʻi ha toe kuonga he kuohilí. (“Ko e Tāpuaki ʻo e Folofolá,” Liahona, Mē 2010, 35)

Ko e hā ʻoku makehe kiate koe mei he fakamatala ʻa ʻEletā Kulisitofasoní?
Ko e hā ha ngaahi lelei ʻe lava ke maʻu mei hono maʻu haʻo ngaahi tohi folofola pē ʻaʻaú?

Fakakaukau ke fakaʻaliʻali hoʻo ʻū tohi folofola fakatāutahá. (Te ke lava ʻo ʻomi ʻa e fuofua ʻū tohi folofola naʻe ʻaʻaú, kapau ʻokú ke kei maʻu kinautolu.) Te ke lava ʻo vahevahe mo e kau akó ʻa e ʻuhinga kiate koe ke maʻu ha tatau fakataautaha ʻo e folofolá ʻi hoʻo moʻuí.

Vahevahe mo e kau akó ko e taha ʻo e ngaahi tāpuaki ʻo hono maʻu ha folofola fakatāutahá ko e malava ko ia ke fakaʻilonga kinautolu ʻaki ha fakamatalá (fakaʻilongaʻi, hiki fakamatala, mo fakafehokotaki e ʻū vēsí).
Ko e hā ha ngaahi lelei ʻe lava ke maʻu mei hono fakaʻilongaʻi hoʻo folofola fakatāutahá ʻaki ha fanga kiʻi fakamatalá?

Fakaafeʻi e kau akó ke kumi ha ngaahi founga te nau ala fakaʻaongaʻi lelei ange ai ʻenau folofola fakatāutahá he ʻahó ni ʻo fakafou ʻi he taukei ʻo hono fakaʻilongaʻi e folofolá ʻaki ha fanga kiʻi fakamatalá.

Mahalo he ʻikai te ke maʻu ha taimi feʻunga ke akoʻi e ngaahi taukei takitaha ʻe tolu ʻo e fakaʻilongaʻi ʻaki hano tānaki ha fanga kiʻi fakamatalá. Fili ʻa e (ngaahi) taukei ʻokú ke ongoʻi ʻe tāpuekina lahi taha ai hoʻo kau akó. Kapau ʻokú ke akoʻi ha ngaahi taukei lahi, mahalo te ke fie ʻuluaki akoʻi ʻa e ongo konga “Fakaʻuhingaʻi” mo e “Fakatātaaʻi” ʻo e taukei takitaha, pea ʻai ke “Ako Fakahoko” ʻe he kau akó ʻa e ngaahi taukeí ʻi he taimi tatau.

Kimuʻa pea fakafeʻiloaki ʻa e ngaahi taukeí, fakakaukau ke fakaʻaliʻali pe hiki ʻa e veesi kakato ʻo e Mōsese 7:18 (pe ko ha veesi ʻe taha te ke fili) ʻi he palakipoé koeʻuhí ke lava ʻo fakaʻilongaʻi ia ʻi ha ngaahi founga kehekehe lolotonga e lēsoní.

Taukeí: Ko hono fakaʻilongaʻi ʻo e folofolá

Fakaʻuhingaʻí

Ko e fakaʻilongaʻi ʻo e folofolá ko ha founga ia ke fakamamafaʻi ai ha foʻi lea, kupuʻi lea, pe veesi ʻokú ke ongoʻi ʻoku mahuʻinga pe ʻuhingamālie. ʻE lava ke tokoni ʻeni ke ke manatuʻi ʻa e meʻa ʻoku akoʻi ʻe he vēsí. ʻE lava foki ke tokoni hono fakaʻilongaʻi ʻo e folofolá ke ke tokanga ange ai ki he meʻa ʻokú ke laú, ʻa ia ʻe ala tākiekina ai ho fakakaukaú mo e lotó ke mahino lelei ange ʻa Sīsū Kalaisi, ko ʻEne ngaahi akonakí, mo e ngaahi lea ʻo ʻEne kau tamaioʻeikí.

Fakatātaaʻi

Fakakaukau ke fakaafeʻi ha niʻihi ʻo e kau akó ke omi ki he palakipoé ke fakatātaaʻi ha ngaahi founga kehekehe te nau ala fakaʻilongaʻi ʻaki ʻa e Mōsese 7:18, ʻa ia ʻoku fakaʻaliʻali ʻi he palakipoé.

Ko e hā ha ngaahi founga kehekehe ʻe ala fakaʻilongaʻi ai ʻe he kakaí ʻenau folofolá?

ʻE malava ke kau ʻi he ngaahi talí hano fakaʻilongaʻi ha veesi, laineʻi ha kupuʻi lea, pe siakaleʻi ha foʻi lea.

Fakakaukau ke huluʻi ʻa e foʻi vitiō “A Marking System That Works for You” (1:56), ʻa ia ʻoku fakamatala ai ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ki hono fakaʻilongaʻi ʻo e folofolá. Hili ʻa e vitioó, te ke lava ʻo kole ki he kau akó ke tānaki atu ha ngaahi founga kehe ke fakaʻilongaʻi ʻaki e folofolá ʻa ia naʻe ʻikai hiki atu kimuʻá.

1:58

Ki he ngaahi folofola fakaʻilekitulōniká, fakakaukau ke fakaʻaliʻali ki he kau akó ʻa e founga ke fakaʻilongaʻi ʻaki ʻenau folofolá ʻi ha ʻū lanu kehekehe ʻo fakaʻaongaʻi ʻa e ngaahi konga ʻo e polokalamá ki hono fakaʻilongaʻi mo laineʻí. ʻE lava ke ʻomi ʻe he konga ko ʻeni ʻo e polokalamá ha founga kehekehe ange ki he founga ʻoku fakaʻilongaʻi ai ʻe he kau akó ʻenau folofolá ʻaki ha fanga kiʻi fakamatala ʻo fakatatau mo ʻenau fiemaʻu fakatāutahá. Ki ha tokoni ʻi he meʻá ni, lomiʻi ʻi he foʻi toti ʻe tolu ʻi he tuliki toʻomataʻu ki ʻolunga ʻo e polokalama Gospel Library, pea lomiʻi ʻi he “Help.” Te ke maʻu ai ha foʻi vitiō ko e “Highlight a passage.”
Ko e hā ha ngaahi ʻuhinga ʻokú ke fili ai ke fakaʻilongaʻi ha meʻa ʻi hoʻo folofolá?

Ako Fakahoko

Taukeí: Hiki fakamatalá

Fakaʻuhingaʻí

Ko e founga ʻe taha ʻo e fakaʻilongaʻi e folofolá ʻaki ha fakamatalá ko e hiki ha ngaahi fakamatala.

Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo e founga pea mo e ʻuhinga ʻoku tau hiki ai ha ngaahi fakamatalá:

Ko hono hiki ʻa e meʻa ʻoku tau ako, fakakaukau ki ai mo ongoʻi lolotonga ʻetau ako ʻa e folofolá, ko ha founga ia ʻe taha ʻo e fakalaulaulotó mo ha fakaafe mālohi ki he Laumālie Māʻoniʻoní ke hokohoko atu ʻa e fakahinohinó. (“Because We Have Them before Our Eyes,” New Era, Apr. 2006, 6–7)

Fakatātaaʻi

Ko e hā ha ngaahi founga kehekehe te tau lava ai ʻo hiki ʻa e meʻa ʻoku tau ako, fakakaukau, pe ongoʻi ko ha konga ʻo ʻetau ako folofolá?

Tokoni ke mahino ki he kau akó te nau lava ʻo tohi ʻi he tafaʻaki ʻo ʻenau folofolá, ʻi ha tohinoa ako, pe ʻi ha kiʻi tohi fakaʻilekitulōnika.

ʻI hono fakaʻaongaʻi ʻo e veesi ʻi he palakipoé, fakatātaaʻi ʻa e founga ʻe lava ke hiki ai ʻe he kau akó ha kiʻi fakamatala ʻi he tafaʻaki ʻo ʻenau folofolá. Fakakaukau ke fakaʻaliʻali ha sīpinga ʻo e founga kuó ke hiki ai ha fakamatala ʻi hoʻo folofolá pe tohinoa akó. Te ke lava foki ʻo fakaʻaliʻali ʻa e founga ke hiki ai ha kiʻi fakamatala fakaʻilekitulōnika ʻo fakaʻaongaʻi ʻa e konga ki he fakamatalá ʻi he Gospel Library (vakai, “Record your thoughts” ʻi he konga ki he “Help”).

Ako Fakahoko

Kapau naʻá ke fakaʻaongaʻi ʻa e laʻipepa tufa kimuʻá, fakaafeʻi ʻa e kau akó ke fili ha meʻa ne nau fakaʻilongaʻi mei he Saame 116. Fakaafeʻi leva e kau akó ke nau tohi ʻi he tafaʻakí ha meʻa ne nau ako, ko haʻanau fakakaukau, pe meʻa ne nau ongoʻi ʻi heʻenau akó. Kapau ʻoku fakaʻaongaʻi ʻe he kau akó ha folofola fakaʻilekitulōnika, te nau lava ʻo tānaki atu ha kiʻi fakamatala ki ha taha ʻo e ngaahi meʻa naʻa nau fakaʻilongaʻí mei he ngaahi veesi tatau.

Kapau ʻoku toe lahi ʻa e taimí, te ke lava ʻo fakaafeʻi ʻa e kau akó ke vahevahe ʻa e meʻa naʻa nau tohí mo e kalasí pe ʻi ha fanga kiʻi kulupu iiki.

Taukeí: Ko hono fakafehokotaki ʻo e ngaahi vēsí

Fakaʻuhingaʻí

Koeʻuhí ʻe lava ke tānaki ʻe he folofolá ha mahino pe poupou ki he ngaahi folofola kehé, ʻe ala tokoni ke fakafekauʻaki pe fakafehokotaki fakataha ʻa e ngaahi potufolofola ko iá. Ko e founga ʻe taha ʻe lava ke fakahoko ai ʻení ko hano hiki ha potufolofola ʻe taha ʻi he tafaʻaki ʻo ha folofola ʻe taha. Te ke lava foki ʻo fakaʻaongaʻi ʻa e “Link” ʻi he Gospel Library.

Fakatātaaʻi

Vakai ki he potufolofola ʻi he palakipoé. Fakaafeʻi e kau akó ke lau ʻa e potufolofola ko ʻení ko ha potufolofola fakafekauʻaki. Kapau naʻá ke fili ha veesi kehe ke hiki ʻi he palakipoé, kumi ha veesi ʻe feʻunga ke fakafehokotaki ki ai.

Lau ʻa e Tokāteline mo e Ngaahi Fuakava 97:21 pea kumi ʻa e founga ʻoku fekauʻaki ai ʻa e veesi ko ʻení mo e Mōsese 7:18.

Ko e hā ʻe ala tokoni ai ke fakafehokotaki ʻa e ongo veesi ko ʻení?

Hiki ʻa e Tokāteline mo e Ngaahi Fuakava 97:21 ʻi he tafaʻaki ʻo e veesi ʻi he palakipoé ʻo hangē pē ʻoku hiki ia ʻi he tafaʻaki ʻo e vēsí. Ki he ngaahi folofola fakaʻilekitulōniká, fakaʻaliʻali ki he kau akó ʻa e founga ke fakafehokotaki ai ʻa e ngaahi vēsí ʻo fakaʻaongaʻi ʻa e “Link” ʻi he Gospel Library (vakai, “Link related content” ʻi he konga “Help”).

Ako Fakahoko

Fakaafeʻi ʻa e kau akó ke nau toe vakai ki he laʻipepa tufá. ʻI he akoako ko ʻení, fakakaukau ke vahevahe ʻa e kau akó ki ha fanga kiʻi kulupu iiki pea fakaafeʻi ke nau fakakaukau ki ha ngaahi potufolofola kehe ʻoku fekauʻaki mo e meʻa ne nau fakaʻilongaʻi ʻi heʻenau laʻipepá. ʻI heʻenau maʻu ha ngaahi sīpingá, ʻe lava ke vahevahe kinautolu ʻe he kau akó mo ʻenau kulupú pea lau fakataha kinautolu. Hili iá ʻe lava ke tānaki ʻe he kau akó ʻa e ngaahi potufolofola fakafekauʻakí ʻi he tafaʻaki ʻo e laʻipepá pe tānaki atu ha ngaahi fehokotakiʻanga ʻaki hono fakaʻaongaʻi ʻa e founga fehokotakiʻanga ʻi heʻenau folofola fakaʻilekitulōniká.

Fakaʻosí

Fakakaukau ke fakaafeʻi ha niʻihi ʻe loto-fiemālie ke vahevahe ʻa e meʻa kuo nau ako mei hono akoako fakahoko ʻo e ngaahi taukei ko ʻeni ki hono fakaʻilongaʻi e folofolá ʻaki ha fakamatalá. Te ke lava ʻo ʻeke ange ha fehuʻi hangē ko e ongo fehuʻi ko ʻení. Fakahaaʻi hoʻo houngaʻia ʻi he ngaahi tali ʻa e kau akó.

Kuo tokoniʻi fēfē koe ʻi hono fakaʻilongaʻi hoʻo folofolá ke ke ofi ange ai kia Sīsū Kalaisi ʻi hoʻo ako fakatāutahá?
Ko e hā ha fakakaukau pe taukei naʻá ke maʻu he ʻahó ni ʻe ala tokoni ke toe mahuʻingamālie ange ai hoʻo femoʻuekina ʻi he folofolá?

Te ke lava ʻo vahevahe hoʻo fakamoʻoni ki he founga kuo hoko ai hono fakaʻilongaʻi hoʻo folofola fakatāutahá ʻaki ha fanga kiʻi fakamatalá ko ha tāpuaki ki hoʻo moʻuí. Fakaafeʻi ʻa e kau akó ke nau feinga ke ongoʻi ofi ange ki he Tamai Hēvaní mo Sīsū Kalaisi ʻo fakafou ʻi he akoako fakaʻilongaʻi ʻenau folofolá ʻaki ha fanga kiʻi fakamatalá.

Fakaafeʻi ʻa e kau akó ke fakakaukau ki he tuʻunga lelei ʻo ʻenau fakaʻaongaʻi ʻa e taukei ʻo hono fakaʻilongaʻi ʻaki ha fakamatalá pea fili ha taukei ne nau ako pea ʻahiʻahiʻi ia ʻi heʻenau ako folofola fakatāutahá.

Ngaahi Maʻuʻanga Tokoni Kehé

Ko e hā ha ngaahi lelei ʻe lava ke maʻu mei hono hiki ha fanga kiʻi fakamatala lolotonga e ako folofolá?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Hiki ʻi ha potu malu ʻa e ngaahi meʻa mahuʻinga kuó ke ʻilo pe ako mei he Laumālié. Te ke ʻilo ʻi hoʻo hiki e ngaahi ongo mahuʻinga ʻokú ke maʻú, ʻe lahi leva ʻene hoko maí. Pea ko e ʻilo foki te ke maʻú, te ke maʻu ia ʻi he kotoa hoʻo moʻuí. (“To Acquire Knowledge and the Strength to Use It Wisely,” Ensign, June 2002, 32)

16:8

ʻE lava ke fakafetuʻutaki ʻe he folofolá ha ngaahi ʻuhinga kehekehe ʻi he taimi kehekehe ʻi heʻetau moʻuí ʻo fakatatau ki heʻetau ngaahi fiemaʻú. ʻE lava ke toki ʻuhingamālie ange ha potufolofola kuo tau toutou lau mo hū foʻou ki he ʻatamaí ʻi he taimi ʻoku tau fehangahangai ai mo ha faingataʻa foʻou ʻi he moʻuí.

ʻOkú ke fakaʻaongaʻi fakataautaha fēfē ʻa e folofolá? ʻOkú ke fakaʻilongaʻi nai hoʻo folofolá? ʻOkú ke hiki nai he tafaʻakí ha kiʻi fakamatala ke ne fakamanatu atu ha tataki fakalaumālie pe meʻa ne ke aʻusia ʻo ke ako ai ha lēsoni mahuʻinga? (“Ko e Mālohi ʻo e Folofolá,” Liahona, Nōvema 2011, 6)

Ngaahi ʻEkitivitī Fakalahi ki he Akó

Ngaahi founga kehe ke fakaʻilongaʻi ʻaki e folofolá

Naʻe vahevahe ʻe Palesiteni Tāleni H. ʻOakesi ʻo e Kau Palesitenisī ʻUluakí ʻene ngaahi fakakaukau fekauʻaki mo e founga ke fakaʻilongaʻi e folofolá. ʻE lava ke hulu ʻa e foʻi vitiō ko ʻení, “Marking Scriptures,” (1:45) ke ne fetongi pe tānaki atu ki he vitiō ʻa ʻEletā Petinā ʻi he lēsoní.

1:45

Pine fakaʻilongaʻi ʻo e folofolá

Ko ha founga ʻe taha ke tokoni ki hono ako ʻo e folofolá ʻoku ui ia ko e pine fakaʻilonga (tagging). ʻE lava ke tokoni ʻa e pine fakaʻilongá ke fokotuʻutuʻu ʻa e folofolá ki ha tefito pē ʻe taha. Hangē ko ʻení, ʻe lava ke faʻu ʻe he kau akó ha pine fakaʻilonga ʻoku ui ko e “Ko hono maʻu ha fakahā fakatāutahá.” ʻI heʻenau maʻu ha ngaahi potufolofola pe fakamatala mei he kau taki ʻo e Siasí ʻi he tefito ko ʻení, te nau lava ʻo fakaʻilongaʻi e ngaahi veesi pe fakamatala ko iá, lomiʻi ʻi he fakaʻilonga “Tag”, pea fili ʻa e pine fakaʻilonga ne nau ʻosi faʻu ko e “Ko hono maʻu ha fakahā fakatāutahá”. Ki ha ngaahi fakahinohino ʻi he founga ke fai ʻení, vakai ki he “Categorize with tags” ʻi he konga “Help” ʻi he Gospel Library.

Ki he ʻū tohi folofolá, ʻe lava ke faʻu ʻe he kau akó ha fanga kiʻi pine fakaʻilonga tatau ʻaki hono tohi ha ngaahi tefito ʻi mui ʻi heʻenau folofolá pe fakahū ha fanga kiʻi laʻipepa iiki ki heʻenau folofolá ʻoku fakakau ai e ngaahi tefitó mo e ngaahi veesi ʻoku fekauʻaki mo iá.

Te ke lava ʻo ʻoange ki he kau akó ha faingamālie ke akoako ʻaki hono faʻu ha pine fakaʻilonga ʻoku ui ko e “Ko e uiuiʻi ʻo e kau palōfitá.” Hili iá ʻe lava ke tānaki atu ʻe he kau akó ha ngaahi veesi hangē ko e Sosiua 1:1–9; 2 Ngaahi Tuʻi 2:5–15; ʻĪsaia 6:5–8; Selemaia 1:4–10; mo e Mōsese 6:27–34. Poupouʻi ʻa e kau akó ke nau tānaki ki he pine fakaʻilongá pea faʻu ha ʻū pine fakaʻilonga kehe ki he ngaahi tefitó ʻi he hokohoko atu ʻenau ako e folofolá.