Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko Hono Kumi ʻa e Ngaahi Moʻoni ʻo e Ongoongoleleí ʻi he Folofolá: Ako ke ʻIloʻi ʻa e Tokāteliné mo e Ngaahi Tefitoʻi Moʻoní

“Ko Hono Kumi ʻa e Ngaahi Moʻoni ʻo e Ongoongoleleí ʻi he Folofolá: Ako ke ʻIloʻi ʻa e Tokāteliné mo e Ngaahi Tefitoʻi Moʻoní,” Fuakava Motuʻá – Tohi Lēsoni ʻa e Faiako Seminelí (2026)

“Ko Hono Kumi ʻa e Ngaahi Moʻoni ʻo e Ongoongoleleí ʻi he Folofolá: Ako ke ʻIloʻi ʻa e Tokāteliné mo e Ngaahi Tefitoʻi Moʻoní,” Fuakava Motuʻá – Tohi Lēsoni ʻa e Faiako Seminelí

Ngaahi Taukei Ako Folofolá: Lēsoni 167

Ko Hono Kumi ʻa e Ngaahi Moʻoni ʻo e Ongoongoleleí ʻi he Folofolá

Ako ke ʻIloʻi ʻa e Tokāteliné mo e Ngaahi Tefitoʻi Moʻoní

ʻE lava ke mālohi ange ʻa e ako folofolá kapau ʻoku tau fekumi fakamātoato ki he ngaahi moʻoni ʻo e ongoongoleleí ʻa ia ʻokú ne ʻomi kitautolu ke tau ofi ange ki he Tamai Hēvaní mo Sīsū Kalaisí. ʻE lava ke tokoni ʻa e lēsoni ko ʻení ki he kau akó ke fakatupulaki ʻenau malava ke ʻilo ʻa e ngaahi moʻoni ʻo e ongoongoleleí ʻi he folofolá ʻa ia ʻoku tokoni ke nau ofi ange ai ki he ʻEikí.

Teuteu ʻa e tokotaha akó: Fakaafeʻi e kau akó ke fakaʻilongaʻi pe lekooti ʻi heʻenau folofolá ha meʻa ʻoku nau ako mei heʻenau ako folofola fakatāutahá. Hili iá, te nau lava ʻo kole ki hanau kaungāmeʻa pe mēmipa ʻo e fāmilí ke ne lau ʻa e potufolofola tatau, vahevahe ʻa e meʻa ʻokú ne ako mei aí, pea fakafehoanaki ʻa e ngaahi fakakaukaú.

Ngaahi ʻEkitivitī Ako ʻOku Ala Fakahokó

ʻOku fakatolonga ʻe he folofolá ʻa e ngaahi moʻoni ʻo e ongoongoleleí

Ke tokoni ke mahino ki he kau akó ʻa e mahuʻinga ʻo hono maʻu ʻo e ngaahi moʻoni ʻo e ongoongoleleí ʻi he folofolá, ʻe lava ke ʻomi ʻe he fakatātā ko ʻení ha ngaahi fakakaukau ʻaonga fekauʻaki mo e founga ʻoku fakatolonga ai ʻe he ngaahi talanoa mei he folofolá ʻa e ngaahi moʻoni ʻo e ongoongoleleí. Fakakaukau ke ʻomi ki he kalasí ha foʻi siaine (pe ko ha fuaʻiʻakau kehe ʻoku ʻi ai hano kili) ʻoku ʻikai faʻa kai ʻe he kakaí ʻi ho anga fakafonuá. Kole ki ha tokotaha ʻe loto-fiemālie ke kai ʻa e fuaʻiʻakaú. Hili hono fohi mo hono fuofua uʻu ia ʻe he tokotaha akó, ʻe lava ke ke fotu ʻohovale mo fehuʻi ange pe ko e hā naʻe ʻikai ke ne uʻu ai mo e kilí. Hili iá pea fai leva e fehuʻi ko ʻení.

(Kapau ʻoku ʻikai maʻu ha fuaʻiʻakau, te ke lava ʻo liliu ʻa e konga ko ʻení ke faʻu ha fealēleaʻaki tatau ʻaki hano fakaʻaliʻali ha fakatātā ʻo ha fuaʻiʻakau pe tā ia ʻi he palakipoé.)

Ko e hā ʻoku kei mahuʻinga ai pē ha kiliʻi siaine neongo kapau ʻoku ʻikai ke tau kai ia?

Te ke lava ʻo tokoni ke mahino ki he kau akó ʻoku maluʻi, fakatolonga, mo tauhi ʻe he kilí ʻa e konga ʻo e fuaʻiʻakaú ʻoku tau kaí.

Hili iá, fakaafeʻi ʻa e kau akó ke vahevahe ʻenau ngaahi fakakaukau kau ki he meʻá ni mo e kalasí pe ko hanau hoa.
Kapau te tau fakafehoanaki ʻa e ngaahi talanoa ʻi he folofolá ki ha kiliʻi siaine, ko e hā nai ʻe ala fakafofongaʻi ʻe he konga ʻoku tau kaí? (ʻI hono fakalea ʻe tahá, ko e hā e ngaahi meʻa ʻoku maluʻi, fakatolonga, mo tauhi ʻe he ngaahi talanoá ke haohaoa maʻatautolú?)

Kapau ʻe fiemaʻu, fakamatalaʻi ange, ke ako lahi ange mei he folofolá, ʻoku fiemaʻu ke tau sio fakalaka atu ʻi he ngaahi talanoá ke ʻiloʻi ʻa e ngaahi moʻoni ʻoku finangalo ʻa e ʻOtuá ke tau akó. ʻE lava ke hangē ʻa e ngaahi talanoá ko ha kili [ʻo ha fuaʻiʻakau] ʻokú ne pukepuke mo fakatolonga ʻa e ngaahi moʻoni ʻo e ongoongoleleí ʻa ia ʻe tokoni ke tau ʻilo mo muimui ʻia Kalaisí.

Vahevahe ʻa e fakamatala ko ʻení pea fakaafeʻi e kau akó ke kumi ʻa e ʻuhinga ʻoku mahuʻinga ai ke fekumi ki he ngaahi moʻoni ʻo e ongoongoleleí ʻi heʻetau akó.

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ou ʻiloʻi ko e tokāteline mo e ngaahi tefitoʻi moʻoni ʻo e ongoongolelei ʻo Sīsū Kalaisí ʻa e maʻuʻanga tokoni taupotu taha ʻo e fakahinohinó ki heʻetau moʻuí pea mo e fiefia tuʻuloa ʻi he moʻui fakamatelié mo e moʻui taʻengatá. … ʻOku ou fakamoʻoniʻi ʻi he loto-fiefia, ko hotau Fakamoʻui ʻoku moʻuí ʻa e matavai ʻoku tafe mei ai e ngaahi moʻoni ko ʻení. (“Ko e Ngaahi Tefitoʻi Moʻoni ʻo ʻEku Ongoongoleleí,” Liahona, Mē 2021, 126)

Te ke fakamatalaʻi fakanounou fēfē ʻa e meʻa ʻokú ke ako meia ʻEletā Petinaá?

Te ke lava ʻo tokoni ke ʻiloʻi ʻe he kau akó ha foʻi moʻoni mei he lea ʻa ʻEletā Petinaá hangē ko ʻení: ʻOku haʻu e tokāteline mo e ngaahi tefitoʻi moʻoni ʻo e ongoongoleleí meia Sīsū Kalaisi pea ko ha maʻuʻanga fakahinohino ia mo ha fiefiaʻanga ʻoku tuʻuloa.

(Fakatokangaʻi ange: He ʻikai aleaʻi ʻi he lēsoni ko ʻení ʻa e ngaahi faikehekehe ʻi he tokāteliné mo e ngaahi tefitoʻi moʻoní. Koeʻuhí ko e ngaahi taumuʻa ʻo e lēsoni ko ʻení, ʻe aleaʻi ʻa e tokāteliné mo e ngaahi tefitoʻi moʻoní fakatouʻosi ʻaki ʻa e foʻi lea fakalūkufua ko e “ngaahi moʻoni ʻo e ongoongoleleí.” ʻOku ʻi ai ha ngaahi fakamatala ʻi he Ngaahi Maʻuʻanga Tokoni Kehe ʻo e lēsoni ko ʻení te ke lava ʻo fakaʻaongaʻi kapau ʻokú ke ongoʻi ʻe ʻaonga ki hoʻo kau akó ke fakafaikehekeheʻi ʻa e tokāteliné mo e ngaahi tefitoʻi moʻoní.)

Ke tokoni ke vakaiʻi ʻe he kau akó ʻenau malava ke maʻu ʻa e ngaahi moʻoni ʻo e ongoongoleleí ʻi he folofolá, te ke lava ʻo fakaafeʻi kinautolu ke fakalaulauloto fakalongolongo ki he ngaahi fakamatala ko ʻení.

Fakafuofuaʻi ʻi ha meʻafua 1–5 ʻa hono moʻoni ʻo e ngaahi fakamatala ko ʻení. (1 = tātātaha ke moʻoni; 5 = meimei ke moʻoni maʻu pē)

ʻOku ou falala te u lava ʻo maʻu ʻa e ngaahi moʻoni ʻo e ongoongoleleí ʻi he folofolá.
ʻOku ou fekumi maʻu pē ki he ngaahi moʻoni ʻi he folofolá ʻokú ne ʻomi au ke u ofi ange ki he Tamai Hēvaní mo Sīsū Kalaisi.

Poupouʻi e kau akó ke nau fekumi ki he Laumālie Māʻoniʻoní ke tokoniʻi kinautolu ke fakatokangaʻi lelei ange ʻa e ngaahi moʻoni ʻi he folofolá kuo fakatolonga mai ʻe he Tamai Hēvaní maʻatautolú.

ʻI he ngaahi ʻekitivitī ko ʻení, mahalo te ke loto ke ʻuluaki ngāueʻi ʻa e konga “Fakaʻuhingaʻi” mo e “Fakatātaaʻi” ʻo e taukei takitaha pea toki fakaafeʻi leva ʻa e kau akó ke nau akoako fakahoko fakatouʻosi ʻa e ongo taukeí ʻi he taimi tatau. Te ke lava ʻo fakaʻaongaʻi ha taha ʻo e ngaahi fakakaukau fakafolofola ʻoku lisi atu ʻi he ngaahi konga “Ako Fakahoko” ʻo e ngaahi taukeí.

Taukeí: ʻIloʻi ʻa e ngaahi moʻoni ʻoku fakamatalaʻi mahino maí

Fakaʻuhingaʻí

Ko e taha ʻo e faʻahinga moʻoni ʻo e ongoongoleleí te ke lava ʻo ʻiloʻi ʻi hoʻo akó ko ha moʻoni kuo fakamatalaʻi mahino. ʻOku fakamatalaʻi ʻa e ngaahi moʻoni peheé ʻi ha sētesi pe kupuʻi lea faingofua ʻi he folofolá.

Fakatātaaʻi

Fakaʻaliʻali ki he kau akó ha sīpinga ʻo ha foʻi moʻoni ʻoku fakamatalaʻi mahino ʻaki hano lau ʻa e potufolofola ko ʻení pe ko ha taha ʻo e ngaahi veesi ʻokú ke saiʻia taha aí ʻa ia ʻoku ʻi ai ha foʻi moʻoni ʻoku mahino hono fakamatalaʻí.

Lau ʻa e Lea Fakatātā 3:5–6, ʻo kumi mo fakaʻilongaʻi ha foʻi moʻoni ʻoku fakamatalaʻi mahino.

Ko e hā e meʻa naʻá ke fakaʻilongaʻí?

ʻE lava ke ʻilo ʻe he kau akó ha foʻi moʻoni hangē ko e “Falala ki he ʻEikí ʻaki ho lotó kotoa … pea ʻe fakatonutonu ʻe Ia ho ngaahi ʻaluʻangá.”
Ko e hā ‘oku mahuʻinga ai kiate koe ‘a e foʻi moʻoni naʻá ke fakaʻilongaʻí?

Ako Fakahoko

Ko e founga ʻe taha ke akoako ai e kau akó ko hono fakaafeʻi kinautolu ke fakaava hake ki he Ngaahi Potufolofola Fakataukei Fakatokāteliné mo e Ngaahi Kupuʻi Lea Fakafolofola Mahuʻinga ʻi he Fakamatala ki he ʻElito ʻo e Fakataukei Fakatokāteliné (2023). Hili iá, ʻe lava ke fakaava ʻe he kau akó ha ngaahi veesi ʻo kumi ha ngaahi moʻoni ʻoku fakamatalaʻi mahino.

Hili hono maʻu ʻe he kau akó ha taimi ke fakakakato ai ʻa e ʻekitivitií, te nau lava ʻo tafoki ki ha hoa pe kulupu tokosiʻi pea vahevahe ʻa e (ngaahi) moʻoni ne nau ʻiló.

Taukeí: ʻIloʻi ʻa e ngaahi moʻoni ʻoku fokotuʻu maí

Fakaʻuhingaʻí

Ko e taha ʻo e ngaahi moʻoni ʻo e ongoongoleleí te ke lava ʻo ʻilo ʻi hoʻo akó ko ha foʻi moʻoni kuo fokotuʻu mai. ʻOku fokotuʻu mai ʻa e ngaahi moʻoni ko ʻení ʻi ha ngaahi potufolofola lalahi ange pe ngaahi talanoa ʻa ia ʻoku fiemaʻu ke tau fakalaulauloto ki he meʻa ʻoku finangalo ʻa e Tamai Hēvaní ke tau ako meiate kinautolú. Te tau lava ʻo maʻu ʻa e ngaahi moʻoni ko ʻení ʻaki hono ʻeke ha ngaahi fehuʻi hangē ko ʻení.

Mahalo te ke fie fakaʻaliʻali pe lisi e ngaahi fehuʻi ko ʻení ʻi he palakipoé.

ʻOku ʻi ai nai ha ngaahi fakakaukau mahuʻinga, ngaahi kupuʻi lea pe fakataipe ʻokú ne akoʻi atu ha meʻa fekauʻaki mo e Tamai Hēvaní pe ko Sīsū Kalaisi?
ʻOku ʻi ai nai ha ngaahi vā fetuʻutaki ʻi he tupuʻangá mo e olá (kapau/ʻe) ʻi he talanoa ko ʻení?
‘Okú ke pehē ko e hā na‘e ueʻi ai ʻe he ʻOtuá ʻa e tokotaha faʻutohí ke fakakau ʻa e ngaahi me‘a ko ʻeni naʻe hokó pe ngaahi potufolofola ko ʻení?

Fakatātaaʻi

Fakakaukau ke fakaafeʻi ha tokotaha ʻe loto-fiemālie ke lau leʻolahi ʻa e Nōmipa 21:5–9 ki he kalasí. Ko e talanoa ia ki hono akoʻi mo fakamoʻui ʻe he ʻOtuá ʻa e kau ʻIsileli naʻe huhu ʻe he fanga ngata koná. ʻI heʻenau fakafanongó, poupouʻi e kau akó ke nau fekumi ki ha ngaahi moʻoni ʻoku fokotuʻu mai ʻi he talanoá ʻaki hono ʻeke kiate kinautolu ʻa e ngaahi fehuʻi ʻoku hiki atu ʻi ʻolungá.

Hili e laukongá, kole ki ha niʻihi te nau loto-fiemālie ke vahevahe ha faʻahinga moʻoni ʻoku fokotuʻu mai ʻa ia ne nau maʻu. Te ke lava ʻo poupouʻi ʻa e kau akó ke nau hiki ha foʻi moʻoni ʻi he tafaʻaki ʻo e ngaahi veesi ko ʻení ʻi heʻenau folofolá.

ʻE lava ke kau ʻi he ngaahi moʻoni ʻoku fokotuʻu mai mei he talanoa ko ʻení ʻa e:

Ko e lea fakafepaki ki he ʻOtuá mo ʻEne kau palōfitá ʻe iku ia ki he mamahi.
ʻOku tataki kitautolu ʻe he palōfitá kia Sīsū Kalaisi.
ʻOku ʻaloʻofa ʻa e ʻOtuá pea ʻokú Ne tofa ha hala ke fakamoʻui ai kitautolu.

Te ke lava ʻo fakamahinoʻi ange naʻe fakaʻaongaʻi ʻe Sīsū Kalaisi ʻa e talanoa ko ʻení ke akoʻi, ko kinautolu ko ia ʻoku tui mo muimui kiate Iá te nau maʻu ʻa e moʻui taʻengatá (Sione 3:14–16).

Ako Fakahoko

Fili ha taha ʻo e ngaahi talanoa fakafolofola ʻi laló ke ke ako, pe ko ha talanoa kehe te ke fili.

ʻI hoʻo laú, fakaʻilongaʻi ha faʻahinga moʻoni pē kuo ʻosi fakamatalaʻi mahino ʻi he folofolá.
ʻI he ʻosi hoʻo laukongá, lekooti ʻi he lea pē ʻaʻau ha foʻi moʻoni ʻe taha pe lahi ange kuo fokotuʻu atu naʻá ke ako mei he talanoá.
Fakalaulauloto ki he ʻuhinga ʻoku mahuʻinga ai kiate koe ʻa e ngaahi moʻoni naʻá ke maʻú mo e founga ʻokú ke ongoʻi ʻe finangalo ai e Tamai Hēvaní ke ke fakaʻaongaʻi kinautolú.

1 Samuela 17:44–49 (Ko e fehangahangai ʻa Tēvita mo e saieniti ko Kolaiaté)

2 Ngaahi Tuʻi 6:14–18 (ko ha kau tau Sīlia ʻoku nau takatakaiʻi ʻa e koló ke puke ʻa ʻIlaisa)

Fakamaau 6:11–16 (Ko e ui ʻa Kitione ke fakahaofi hono kakaí mei ha kau tau ʻoku ʻoho mai)

ʻI he ʻosi e ngāue ʻa e kau akó, fakaafeʻi kinautolu ke nau fakamahinoʻi ʻa e ngaahi moʻoni ʻoku ʻuhingamālie kiate kinautolu ʻa ia naʻe hiki ʻe he kau ako kehé ʻi he palakipoé. ʻE lava ke vahevahe ʻe he kau akó ʻa e ʻuhinga ʻoku mahuʻinga ai ʻa e foʻi moʻoní kiate kinautolú pea mo e founga te nau lava ai ʻo fakaʻaongaʻi ʻa e foʻi moʻoni ko iá ʻi heʻenau moʻuí. Te ke lava foki ʻo fehuʻi ange pe kuo maʻu ʻe ha taha ha aʻusia naʻá ne tokoniʻi kinautolu ke nau ʻiloʻi ʻoku moʻoni ha meʻa ʻi he palakipoé.

Fakaʻosí

Fakakaukau ke fakamanatu ki he kau akó ʻa e taumuʻa ako folofola fakataautaha kuo nau fokotuʻu ki he semesitā ko ʻení. Kapau kuo teʻeki ai ke nau fokotuʻu ha taumuʻa, poupouʻi kinautolu ke nau fai ia.

Fakaafeʻi ʻa e kau akó ke fakakaukau ki heʻenau taumuʻá lolotonga ʻenau tali e ongo foʻi fehuʻi ko ʻení ʻi heʻenau tohinoa akó. Fakaafeʻi kinautolu ke nau tauʻatāina ke liliu ʻenau taumuʻá kapau ʻoku nau ongoʻi ke fai pehē.

Ko e hā ha ngaahi taukei naʻe makehe kiate koe ʻe lava ʻo tokoni atu ʻi hoʻo ako folofola fakatāutahá pe fakafāmilí?
ʻE tokoni fēfē hono maʻu mo fakalaulauloto ki he ngaahi moʻoni ʻo e ongoongoleleí ʻi hoʻo ako folofolá ke ke ofi ange ai ki he Fakamoʻuí?

Fakakaukau ke fakaafeʻi ha tokotaha ako ʻe taha ʻi he ʻaho takitaha ʻi he ngaahi lēsoni ka hoko maí ke vahevahe ha foʻi moʻoni ʻe taha naʻa nau maʻu ʻi heʻenau ako folofola fakatāutahá pe fakafāmilí. Kumi ha ngaahi faingamālie kehe ʻi he ngaahi lēsoni ʻi he kahaʻú ke hokohoko atu hono ako fakahoko ʻe he kau akó ʻa e taukei mahuʻinga ko ʻení.

Ngaahi Maʻuʻanga Tokoni Kehé

ʻE tokoniʻi fēfē kitautolu ʻi hono ako ʻo e folofolá ke tau maʻu ha fakahā mei he Tamai Hēvaní?

Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:36

Koeʻuhí ko ʻena fakamatalaʻi ʻa e tokāteline ʻo Kalaisí, ʻoku ʻalu fakataha ai ʻa e ngaahi folofolá mo e Laumālie Māʻoniʻoní ʻa ia ko hono fatongiá ke fakamoʻoni ki he Tamaí mo e ʻAlo (vakai, 3 Nīfai 11:32). ʻI heʻene peheé, ʻoku tau maʻu ʻa e Laumālie Māʻoniʻoní ʻi heʻetau ako ʻa e folofolá. Ko hono moʻoní, ʻoku foaki mai ʻa e folofolá ʻo fakafou ʻi he Laumālie Māʻoniʻoní (vakai, 2 Pita 1:21; T&F 20:26–27; 68:4), pea ʻe lava ʻe he Laumālie tatau pē ko iá ʻo fakamoʻoni kiate koe mo au ʻa hono moʻoni ʻo e folofolá. Ako fakaʻāuliliki mo fakamātoato e folofolá. Fakalaulauloto mo lotu ki ai. ʻOku hoko ʻa e ngaahi folofolá ko e fakahā pea te nau ʻomi ha toe ngaahi fakahā. (“Ko e Tāpuaki ʻo e Folofolá,” Liahona, Mē 2010, 35)

Ko e hā ʻa e tefitoʻi moʻoni ʻo e ongoongoleleí?

Naʻe fakamatalaʻi ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e ngaahi tefitoʻi moʻoní ko ha moʻoni ʻoku fakataumuʻa ke fakaʻaongaʻi ʻi ha ngaahi tūkunga kehekehe. ʻOku hanga ʻe he tefitoʻi moʻoni ʻoku moʻoní ʻo fakamahinoʻi ʻa e ngaahi fili ʻoku tau faí, ʻo aʻu pē ki he ngaahi tūkunga fakapuputuʻu mo faingataʻa tahá. (“Acquiring Spiritual Knowledge,” Ensign, Nov 1993, 86)

Ko e hā ʻa e tokāteline?

ʻOku pehē ʻi he Ko e Faiako ‘i he Founga ‘a e Fakamoʻuí:

Ko e tokāteliné ko ha moʻoni taʻengata ia—ʻoku maʻu ʻi he ngaahi folofolá mo e ngaahi lea ʻa e kau palōfita ʻi he ngaahi ʻaho kimui ní—ʻa ia ʻokú ne fakahaaʻi mai ʻa e founga ke tau hoko ai ʻo hangē ko ʻetau Tamai Hēvaní pea foki kiate Iá. (Ko e Faiako ‘i he Founga ‘a e Fakamoʻuí [2022], 20)

Te u lava fēfē ʻo ʻai ke ola lelei ange ʻeku ako folofolá?

Naʻe akoʻi ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Fakalaulauloto [pea] vakavakaiʻi ʻa e foʻi lea kotoa pē, ʻa e koloa fakafolofola kotoa pē. … Puke hake ia ki he māmá pea fulifulihi, pea vakai ke sio ki he meʻa ʻoku ʻasi pe tapua mai mei aí. … ʻE lava ʻe he faʻahinga vakavakaiʻi peheé ʻo taʻaki ha makakoloa ʻoku fufū ʻi ha ngoue: ko ha mataʻitofe mahuʻinga lahi; ko ha mataʻitofe ʻoku ope atu hono mahuʻingá. (“Students Need Teachers to Guide Them” [address given at the Church Educational System satellite broadcast, June 20, 1992], 4)

Naʻe fakalotolahi mai ʻa Palesiteni Tōmasi S. Monisoni ʻo pehē (1927–2018):

Feinga ke maheni mo e ngaahi lēsoni ʻoku akoʻi mai ʻe he ngaahi potufolofolá. … Ako kinautolu ʻo hangē pē ʻoku nau ʻuhinga atu kiate koé, he ko hono moʻoní ia. (“Fai Ho Lelei Tahá,” Liahona, Mē 2009, 68)

Naʻe pehē ʻe Palesiteni Maʻake L. Peisi, ko e Palesiteni Lahi ʻo e Lautohi Faka-Sāpaté:

Ke ola lelei tahá, kuo pau ko hoʻo ngaahi aʻusia ʻi he folofolá ko ho aʻusia pē ʻaʻau. ʻE lava ke tokoni hono lau pe fanongo ki ha ngaahi aʻusia mo e fakakaukau ʻa ha taha kehe, ka he ʻikai maʻu ai ʻa e mālohi fakaului tatau. ʻOku ʻikai ha fetongi ʻo e taimi ʻokú ke fakaʻaongaʻi ʻi he ngaahi folofolá, ʻo fanongo ki he folofola tonu atu ʻa e Laumālie Māʻoniʻoní kiate koé. (“Ko ʻEtau Taumuʻá ke Fakaului,” Liahona, Mē 2022, 111)

Ngaahi ʻEkitivitī Fakalahi ki he Akó

Ko hono maʻu ʻo e ngaahi moʻoni ʻoku ʻikai faʻa mahinongofuá ʻi he folofolá

Ke tokoni ke mahino ki he kau akó ʻe lava ke tokoniʻi kinautolu ʻe ha vakai loloto ange ki ha talanoa mei he folofolá ke nau ʻiloʻi ʻa e ngaahi moʻoni ʻoku ʻikai fuʻu mahinó, te ke lava ʻo fakaʻaliʻali ha fakatātā ʻo e Fakamoʻuí ʻo hangē ko ʻení. Kole ki he kau akó ke nau hiki vave hifo ʻa e ʻuluaki meʻa ʻoku nau ako fekauʻaki mo Sīsū Kalaisi mei he fakatātaá. Hili iá pea ʻoange ha toe miniti ʻe taha pe ua ke nau fakakaukau lahi ange ai fekauʻaki mo e fakatātaá pea hiki ha toe ngaahi fakakaukau ʻoku nau ako mei ai.

Fakaafeʻi ha kau ako ʻe niʻihi ke vahevahe ʻa e ʻuluaki foʻi moʻoni ne nau ako fekauʻaki mo Kalaisí. Hili iá pea tuku ke nau vahevahe ha ngaahi moʻoni kehe ne nau maʻu mo mamata ki ai ʻi he fakatātaá pe manatuʻi mei he talanoa naʻá ne tokoniʻi kinautolu ke nau fakatokangaʻi e ngaahi moʻoni ko ʻení.

Tokoniʻi e kau akó ke nau fakahoko ʻa e fakafehokotaki, hangē ko e fakatātaá, ʻoku ʻi ai ha ngaahi moʻoni ʻe niʻihi ʻi he folofolá ʻoku faingofua pē ke ʻiloʻi, ka ʻoku ʻi ai ha niʻihi ia ʻe fakaʻaongaʻi ki ai ha taimi, fakakaukau mo ha ivi lahi ange ke toki ʻilo.

Ko e ngaahi aʻusia ʻa e toʻu tupú ʻi hono ʻilo ha ngaahi moʻoni ʻi he folofolá

Mahalo ʻe tokoni ke fanongo ʻa e kau akó lolotonga e ngaahi konga “Fakatātaaʻi” ʻo e lēsoní ki ha ngaahi aʻusia ʻo hono ʻiloʻi ʻe he toʻu tupú ha ngaahi moʻoni ʻi he folofolá. Te ke lava ʻo huluʻi ʻa e foʻi vitiō “Identifying Doctrines and Principles: Students’ Testimonies” (2:39). Hili ʻa e vitioó, te ke lava ʻo kole ki he kau akó ke vahevahe ha ngaahi aʻusia ne nau maʻu ai ha foʻi moʻoni ʻi he folofolá naʻá ne faitāpuekina ʻenau moʻuí.

2:39

Founga ʻe taha ke kamata ʻaki e lēsoní

Huluʻi e foʻi vitiō “Flecks of Gold” mei he taimi 0:00 ki he 2:26. ʻOku fekauʻaki ia mo ha tangata ʻoku fekumi ki he koulá ʻa ia naʻá ne ako ʻa e mahuʻinga ʻo hono tānaki ʻo e fanga kiʻi momoʻi koula īkí ʻi ha vahaʻataimi kae ʻikai fekumi pē ki he ngaahi konga koula ʻoku hāhāmolofia mo lalahí. Fakaafeʻi e kau akó ke nau fakakaukau ki he founga ʻe lava ke fekauʻaki ai e talanoa ko ʻení mo ʻenau ako folofolá.

3:16