“Gaoioiga Iloilo o le Atamai i Aoaoga Faavae: O Manatu mo le Toe Iloiloina o Mataupu Faavae o le Mauaina o le Malamalama Faaleagaga” Tusi Lesona a le Faiaoga Seminare o le Feagaiga Tuai (2026)
“Gaoioiga Iloilo o le Atamai i Aoaoga Faavae” Tusi Lesona a le Faiaoga Seminare o le Feagaiga Tuai
Faaopoopoga
Gaoioiga Iloilo o le Atamai i Aoaoga Faavae
O Manatu mo le Toe Iloiloina o Mataupu Faavae o le Mauaina o le Malamalama Faaleagaga
I lesona taitasi o le Faataitaiga o le Atamai i Aoaoga Faavae, e mafai ona fesoasoani le tuuina atu i tagata aoga o se avanoa e toe faamanatu ai mataupu faavae o le mauaina o le malamalama faaleagaga.O le a fesoasoani lenei mea ia i latou e saunia lelei ai e faaaoga nei mataupu faavae i ata faataitai i le vasega ma tulaga masani o le olaga.
O nisi nei o faataitaiga o auala e mafai ona e fesoasoani ai i au tagata aoga e toe faamanatu mataupu faavae o le mauaina o le malamalama faaleagaga:
Tauloto mataupu faavae mai le mafaufau. Talosaga i tagata aoga pe mafai ona latou toe fai faafia ia mataupu faavae e tolu o le mauaina o le malamalama faaleagaga.E mafai e tagata aoga ona tusi taitoatasi ia mataupu faavae i a latou api talaaga mo suesuega, pe mafai foi e tagata eseese o le vasega ona tauloto leotele ia mataupu faavae.A manaomia e tagata a’oga se fesoasoani, e mafai ona latou tagai i le parakalafa 4 i le vaega o le “Mauaina o le Malamalama Faaleagaga” i le Pepa Autū o le Atamai i Aoaoga Faavae (2023).E mafai foi ona e tuuina atu ni faa-ataataga, e pei o se gaoioiga e faatumu ai le avanoa po o le tuuina atu o le mataitusi muamua o upu taitasi i mataupu faavae eseese.
Faafetauitutusa fuaiupu ma le mataupu faavae sa’o. Lisi ia mataupu faavae e tolu o le mauaina o le malamalama faaleagaga i luga o le laupapa.Ona faitau lea pe faaali atu ni fuaiupu po o ni fasifuaitau eseese mai parakalafa 5–12 o le vaega “Mauaina o le Malamalama Faaleagaga” i le Pepa Autu o le Atamai i Aoaoga Faavae.Valaaulia tagata aoga e faasoa mai po o le fea o mataupu faavae o le mauaina o le malamalama faaleagaga e sili ona fesootai i ai le fuaiupu.
Faamalamalama le uiga. Valaaulia tagata aoga eseese e faamatala mataupu faavae o le mauaina o le malamalama faaleagaga i a latou lava upu.E mafai ona faia lenei mea e ala i le fesili atu i tagata aoga eseese e uiga i mataupu faavae eseese, pe ono mafai foi ona e vaevaeina tagata aoga i ni vaega e taitoatolu ma atofa se tasi o mataupu faavae i tagata aoga taitasi.A manaomia, e mafai ona latou toe faamanatu nei mataupu faavae i le parakalafa 5–12 i le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae ae le i fesiligia [i latou] ia faamalamalamaina.
Aotele i ni upu se 10 pe itiiti ifo. Valaaulia tagata a’oga e fatu se aotelega mo mataupu faavae ta’itasi o le mauaina o le malamalama faaleagaga, i ni upu se 10 pe itiiti ifo.Valaaulia tagata aoga eseese e faasoa mai a latou aotelega ma faamatala mai pe aisea na latou filifilia ai na upu.
Fatu se ata po o se aikona. Valaaulia tagata aoga e fatu se faatusa, ata, po o se aikona mo mataupu faavae taitasi o le mauaina o le malamalama faaleagaga.O la latou fatufatuga e tatau ona avea ma faataitaiga o mea o loo aoaoina e mataupu faavae.A maea ona faia e tagata aoga, valaaulia i latou e faaali atu la latou fatufatuga i isi ma faamatala mai pe aisea na latou faaaofia ai mea na latou faia.
Toe faamanatu a o talanoaina le ata faataitai. Ina ua mae’a ona faasoaina atu se ata faataitai moni, valaaulia tagata a’oga e suesue le parakalafa 5-12 o le vaega “Mauaina o le Malamalama Faaleagaga” i le Pepa Autu o le Atamai i Aoaoga Faavae.E mafai e tagata aoga ona vaavaai ma faasoa mai aoaoga mai nei parakalafa ia e ono mafai ona fesoasoani i le tagata mai le ata faataitai (1) faatino i le faatuatua, (2) iloilo manatu faavae ma fesili faatasi ma se vaaiga e faavavau, ma le (3) saili le malamalama atili e ala i puna mamana ua filifilia.
Fefaasoaai aafiaga. E mafai ona faiatu i tagata a’oga e faasoa mai ni aafiaga na latou maua i le faaaogaina ai o mataupu faavae o le mauaina o le malamalama faaleagaga.E mafai ona latou faamatala mai pe na faapefea ona fesoasoani na mataupu faavae ia i latou i a latou lava fesili po o tulaga po o le auala na mafai ai ona latou faaaogaina mataupu faavae e fesoasoani ai i isi.
Filifili se fasifuaitau se tasi. Tofi tagata aoga taitasi e taulai atu i se tasi o mataupu faavae o le mauaina o le malamalama faaleagaga.Tuu atu ia i latou se taimi e filifili ai se fasifuaitau se tasi mai parakalafa taitasi i la latou vaega ua atofaina latou te lagona e sili ona avea ma faataitaiga i mea o loo aoaoina i lena parakalafa.Ona valaaulia lea o tagata aoga e feoai solo i le potu ma su’e se tasi na atofa i ai le mataupu faavae lava e tasi ma i latou ma faatusatusa fasifuaitau na latou filifilia.Ona mafai lea e tagata aoga ona su’e tagata aoga o e na atofaina iai isi mataupu faavae e lua ma faasoa mai fasifuaitau na latou filifilia.
O Manatu mo le Toeiloiloina o Fuaitau o le Atamai i Aoaoga Faavae
Faaalu se taimi i le tausaga atoa e toe faamanatu ai e le aunoa fuaitau o le atamai i aoaoga faavae o loo suesueina e tagata aoga.E mafai ona fesoasoani lenei mea e faateleina ai le tomai o au tagata aoga e manatua ai mau faasino ma fasifuaitau autu o mau.E mafai foi ona fesoasoani ia i latou ia malamalama lelei atili, faamalamalama, ma faaaoga aoaoga faavae o loo aoaoina i fuaitau o le atamai i aoaoga faavae.O le lisi o fuaitau o le atamai i aoaoga faavae ma fasifuaitau autu o mau e mafai ona maua i le Pepa Autu o le Atamai i Aoaoga Faavae.
O nisi nei o gaoioiga e mafai ona faaaoga pe fetuunai e fesoasoani ai i au tagata aoga e toe iloilo fuaitau o le atamai i aoaoga faavae i ni auala eseese.
Tauloto
Kata faamanatu. Valaaulia tagata aoga e fai ni kata e manatua ai ma mau faasino o loo tusia i le tasi itu o se fasi pepa ma le fasifuaitau autu o mau o loo tusia i le isi itu.E mafai e tagata aoga ona faia ni kata mo ni fuaitau o le atamai i aoaoga faavae se tele i luga o se fasi pepa se tasi ona tipi ese lea o kata faamanatu.Ona mafai lea ona latou galulue na o i latou lava pe faatasi foi ma se paga e faataitai le taulotoina o mau faasino ma fasifuaitau autu o mau.O nei iloiloga e faaaoga ai kata faamanatu e mafai ona faia mai lea taimi i lea taimi i le aluga o le tausaga.
Polokalama o le Atamai i Aoaoga Faavae. Faaaoga gaoioiga o le taulotoina i luga o le polokalama o le Atamai i Aoaoga Faavae.Afai e ono mafai, e mafai ona e faafesootaia lau masini feaveai i se masini faaali ata po o se televise e faaali ai le anotusi o le polokalama ina ia mafai ai e tagata aoga ona faamaeaina gaoioiga o le taulotoina o se vasega.E mafai foi ona e valaaulia tagata aoga o loo i ai ni masini feaveai e faaaoga le polokalama e faaalu ai le taimi e fai ai gaoioiga tauloto i totonu o le vasega po o fafo atu o le vasega.
Taulotoga a le vasega. A uma ona e faia se mau faasino, e mafai e le vasega ona toe fai faatasi le fasifuaitau autu o mau.E mafai foi ona e fai atu se fasifuaitau autu o mau ma valaaulia le vasega e toe fai faatasi le mau faasino e faatatau i ai.
Ata e faatatau i ai. Saili ni ata po o ni atatusi e faatatau i aoaoga o fuaitau o le atamai i aoaoga faavae.Faaali atu i tagata aoga nei ata a o latou faataitai le taulotoina o mau faasino ma fasifuaitau autu o mau.E mafai foi ona valaaulia tagata aoga e su’e pe fai a latou lava ata e fesoasoani ia i latou e tauloto ai fuaitau.Afai o ata lava ia e tasi e faaaoga e le vasega atoa pe a taulotoina fuaitau ua tuuina mai, e mafai ona e uuina i luga i nisi taimi na ata i le taimi o vasega i le lumanai e vaai pe mafai pea e tagata aoga ona manatua fasifuaitau ma mau faasino.
Talatala. Faaali atu upu o mau faasino ma fasifuaitau autu o mau i se faasologa faafefiloi ma valaaulia tagata aoga e autala i latou.
Mataitusi muamua. Faaali atu na o le mataitusi muamua o upu taitasi mo mau faasino ma fasifuaitau autu o mau ma valaaulia tagata aoga e taumafai e ta’u sa’o le mau faasino ma le fasifuaitau autu.Tapeese le tele ma le tele o mataitusi muamua a o faateleina le gafatia o tagata aoga e tauloto ai le mau faasino ma le fasifuaitau autu.
Faatumu le avanoa. Faaali atu le mau faasino ma le fasifuaitau autu o mau ma nisi o upu o loo misi.Valaaulia tagata aoga e tauloto le mau faasino ma le fasifuaitau autu a o faatumuina avanoa.Tapeese le tele ma le tele o upu a o faateleina le gafatia o tagata aoga e tauloto ai le mau faasino ma le fasifuaitau autu.
Faafetauitutusa. Faaali atu ni mau faasino se tele ma fasifuaitau autu o mau i totonu o ni koluma se lua.I le koluma muamua, lisi ia mau faasino i le faasologa faasolosolo.I le koluma lona lua, lisi fasifuaitau autu o mau i se faasologa faafefiloi.Ona valaaulia lea o tagata aoga e faafetauitutusa ia mau faasino sa’o ma fasifuaitau autu o mau.
Malamalama ma faamatala
Fefaasinoa’iga. Valaaulia tagata aoga e sue ni mau fefaasinoa’i se tele e faatatau i se fuaitau o le atamai i aoaoga faavae.Ona mafai lea ona latou aoaoina a latou uo i le vasega e uiga i mea sa latou aoaoina, e aofia ai le auala e fesootai ai mau faaopoopo sa latou suesueina i le fuaitau o le atamai i aoaoga faavae.Atonu e te fautuaina e faapea o nisi o mau fefaasinoa’i latou te maua e aumai mai fuaitau o le atamai i aoaoga faavae i isi tusi o tusitusiga paia.
Fesoota’i ia Iesu Keriso. Atofa atu i tagata aoga se fuaitau o le atamai i aoaoga faavae e suesue iai, ma fai atu ia i latou e mafaufau i ni auala eseese e fesootai ai le fuaitau ia Iesu Keriso.E mafai ona latou mafaufau ma talanoaina po o le a se mea e fesoasoani i ai la latou fuaitau ua atofaina ia i latou ia malamalama lelei atili ai e uiga ia Iesu Keriso, Lana aoaoga faavae, po o le ata o le faaolataga.E mafai foi ona latou vaavaai mo faataitaiga o le auala na aoao atu ai pe faataitaia ai e le Faaola le upumoni o loo maua i le fuaitau.
Faamalamalamaga faigofie. Valaaulia tagata aoga e saunia e faamatala le aoaoga faavae o loo aoaoina i fuaitau eseese o le atamai i aoaoga faavae i se tasi e le masani i na aoaoga.E mafai ona latou vaai faalemafaufau o loo latou faamalamalamaina nei aoaoga i se tamaitiiti po o se tasi e le o se tagata o le Ekalesia.Valaaulia i latou e tusi a latou faamalamalamaga i a latou api talaaga mo suesuega, ona faasoa atu lea i se tagata o le vasega.
Lea Fuaitau i luga o Lea Fuaitau. Faaali atu i tagata aoga ni faataitaiga o nisi o itulau o le Fuaitau i luga o Lea Fuaitau mai le mekasini Mo Le Malosi o le Autalavou lea e iloiloina ai upu po o fasifuaitau taua mai fuaitau o mau.O se tasi o faataitaiga o se itulau faapena o le “Lea Fuaitau i luga o Lea Fuaitau: O Se Leoleo” (Mo Le Malosi o le Autalavou, Oke. 2022, 32).Valaaulia tagata aoga e fatu a latou lava lomiga o se itulau o le Fuaitau i luga o Lea Fuaitau.Fai atu ia i latou e filifili ni nai upu autu mai se fuaitau o le atamai i aoaoga faavae ma faaaofia ai mau fesootai, faamatalaga mai taitai o le Ekalesia, ma faauigaga e fesoasoani e faaloloto ai le malamalama e uiga i na upu autu.
Fai fesili. Valaaulia tagata a’oga e filifili se fuaitau o le atamai i aoaoga faavae latou te fia malamalama lelei atili iai.Valaaulia i latou e faitau le fuaitau ma lisi ni fesili se lua pe tolu o ia i latou e uiga i lena fuaitau.O nei fesili e mafai ona fesootai i upu po o fasifuaitau latou te mananao e malamalama lelei atili i ai pe aisea foi e taua ai le malamalama i le fuaitau.A uma ona lisiina e tagata aoga a latou fesili, valaaulia i latou e faaaoga punaoa e pei o le polokalama o le Potutusi o le Talalelei, Taiala i Tusitusiga Paia, po o isi meafaigaluega mo suesuega e saili ai tali i a latou fesili.Valaaulia tagata a’oga e faasoa atu mea na latou aoaoina.
Faatusa vaaia. E mafai e tagata aoga ona faia se atatusi, se ata tuufaatasi, se meme, ata o upu, se ao e fau i upu, po o se isi faatusa vaaia e fesoasoani e faaalia ai mea o loo aoaoina i se fuaitau o le atamai i aoaoga faavae.Ona mafai lea e tagata aoga ona faaali atu la latou fatufatuga i isi ma faamatala pe faapefea ona fesootai i le fuaitau o le atamai i aoaoga faavae sa latou taulai atu i ai.
Faaaoga
Ata Faataitai. Faasoa atu ni ata faataitai eseese e faatatau i tulaga, o luitau, po o fesili faaleagaga o ono i ai i talavou.Valaaulia tagata aoga e faasoa mai se fuaitau o le atamai i aoaoga faavae se tasi pe sili atu latou te lagona e mafai ona faatatau i le ata faataitai ma faamatala pe faapefea ona latou manatu e mafai ona fesoasoani ai nei fuaitau.
Fefaasoaai aafiaga. E mafai e tagata aoga ona filifili se tasi o fuaitau o le atamai i aoaoga faavae na latou faaaogaina talu ai nei i o latou olaga pe latou te mananao e sili atu ona faaaogaina atoatoa i o latou olaga.E mafai ona valaaulia tagata a’oga e faasoa mai pe na faapefea ona aafiaina i latou e nei aoaoga.
Suesue fuaitau ma tulaga patino i le mafaufau. Valaaulia tagata aoga e mafaufau i se tulaga, fesili, po o se faai’uga o loo feagai ai ma i latou.Valaaulia i latou e sue ni fuaitau o le atamai i aoaoga faavae o le a fesoasoani i o latou tulaga ma faasoa mai mea na latou iloa e aoga.
Fesoasoani i se talavou. Valaaulia tagata aoga e tusi se ata faafasilaau o se talavou ma tusi i lalo lo latou igoa, tausaga o le matua, ma tulaga faaleaiga ma soo se fesili, faafitauli, po o luitau o loo latou feagai i le taimi nei.Ona mafai lea e tagata aoga ona faailoa mai fuaitau o le atamai i aoaoga faavae latou te lagona o le a fesoasoani i lenei talavou.E mafai ona latou faamatala atu le aoaoga faavae o loo i la latou fuaitau filifilia ma faia ni fautuaga mo ni faatinoga e ono faia e lenei talavou.
Saunia se faigalotu po o se tautalaga. Tuu atu i tagata aoga ni avanoa e faaaoga ai fuaitau o le atamai i aoaoga faavae e saunia ai se savali faalefaigalotu po o se tautalaga puupuu.Atonu e te mafaufau e faatulaga faasolosolo tagata aoga taitasi e faasoa mai a latou faigalotu po o tautalaga i le amataga o le vasega i le aluga o le semesa atoa.Fesoasoani ia i latou e saunia e aotele le faatatauga ma faamatala upumoni o loo aoaoina i fuaitau.Valaaulia tagata aoga e faasoa mai ni aafiaga anoa po o ni faataitaiga o le faaaogaina o upumoni mai fuaitau na latou filifilia ma molimau atu i upumoni o loo aoaoina i fuaitau.