O Manatu mo Faiga Eseese

Faaaoga ata faatufugaga o le talalelei e talanoaina ai se tala.Faaali atu se ata mai le Potutusi o Ala o Faasalalauga a le Ekalesia ma valaaulia tagata a’oga e suesue fuaiupu o lo o faapupulaina i le ata.Fai atu i tagata a’oga [fesili] nei:

• O le a se mea na faaaofia e le tusitala i fuaiupu o le mau?

• O le a le faauigaina faale-tusiata (e le o maua i le tusiga)?

• O le a se mea e te ono suia e faavae mai mea na e faitauina?

Fesuisuiaiga: Nai lo le faaaliina atu o se ata atoa i le amataga o le vasega e amata ai se talanoaga, vaevae le ata i ni vaega.Faaali atu se vaega se tasi ta’itasi i le taimi ma fai atu i tagata a’oga e mate mai le mea o lo o tupu i le ata atoa.Fai atu ia i latou e faamatala mai mea ua latou vaaia ma taumatemate i mea latou te le o vaaia.

Fesuisuiaiga: Filifili ni nai ata o le Faaola ma tuu i luga o le laupapa.Valaaulia tagata aoga e vaavaai toto’a i le lanu, taulaiga, ma le faataatiaga o ata ma faailoa mai mea taitasi o loo aoao mai e uiga i le tagata o Iesu Keriso.A maea ona faailoaina se mataupu faavae mai tusitusiga paia po o se faamatalaga mai taitai o le Ekalesia, e mafai ona e fai atu fesili e pei o nei:

• O le fea ata o Keriso e te lagona e faatusa i le mataupu faavae na e mauaina ma aisea?

• O fea o nei ata o Iesu e fesoasoani ia te oe e te lagona ai le taua o lenei upumoni?

• O le a se mea e te manao e iloa e se uo e uiga ia Iesu Keriso pe a mafaufau ai i lenei upumoni?

Kopi ia ata mai Tala o Tusitusiga Paia mo Tamaiti ma faapipii i totonu o se pepa faasafua mo tagata aoga.Faaopoopo ni li’o mo upu ia e mafai e tagata a’oga ona tusi ai mea o lo o tautalagia e tagata i le ata e faavae i mau.

Fesuisuiaiga: Faaaofia ata mai Tala o Tusitusiga Paia mo Tamaiti ma valaaulia tagata a’oga e faaaoga tusitusiga paia e aotele ai mea o lo o tutupu i totonu o ata.Mo faataitaiga, tagai i le “Lesona 68: Ruta” ma le “Lesona 151: Iona.”

Fesili i tagata a’oga po o a mea e fai e tagata faasalalau i le taimi o faatasiga tau taaloga.Tusi tali a tagata a’oga i luga o le laupapa.O nisi o faataitaiga o mea e fai e tagata faasalalau o le:

• Fesoasoani i isi ia malamalama i le mea o lo o tupu.

• Fai atu fesili e uiga i tulaga (mo se faataitaiga, “Ou te mafaufau pe aisea …”).

• Faasoa o latou manatu i faaiuga.

• Faailoa atu se mea e le o sologa lelei ma pe aisea e taua ai lena mea.

• Faailoa atu se mea o lo o sologa lelei ma pe aisea e taua ai lena mea.

• Faamanatu manuia ma faalaeiau i toilalo.

Valaaulia tagata a’oga e avea ma tagata faasalalau o se tala mai tusitusiga paia.E mafai ona latou faitau ni nai fuaiupu, ona i le avea ai o se vasega pe i ni vaega to’alaiti, e mafai ona latou faasoa mai soo se manatu o i luga o le laupapa.Uunaia i latou ia tau faatino i se faiga moni o tala faatusi paia.

Tatala le PDF

Tuu atu i tagata aoga taitasi se vaega o mau o le a latou suesueina.Ona tuu atu lea ia i latou o mea e manaomia o le tala fou po o le lipoti o le tusi (i luga o se pepa po o le laupapa).E mafai ona aofia ai ni tagata autu, le otootoga o le tala, se lesona se tasi pe lua na aoaoina (e ta’u mai ai fuaiupu na aumai ai), ma le faaaogaaga mo se talavou.Tuu atu i tagata a’oga se taimi e faasoa atu ai i se isi tagata a’oga mea na latou saunia.

Fesuisuiaiga: I se vaega toalaiti, e mafai e tagata aoga taitasi ona faia se vaega se tasi o le tala po o le lipoti o le tusi: tagata autu, otootoga o le tala, o lesona, po o le faaaogaaga.

A uma ona faitau e tagata aoga se poloka o mau, valaaulia i latou e lisi ni fesili e mafai ona fesoasoani fuaiupu e tali.Lui tagata aoga e tusi ni fesili anoa ma talafeagai mo se talavou, nai lo ni fesili faigofie e suesue ai.Mo se faataitaiga, nai lo le fesili “O le a le uiga o le faatuatua e pei ona fai mai ai Alema?O le a lana tala i mea ua le o le faatuatua ia?” e mafai e tagata a’oga ona fesili “O le a se mea e tatau ona ou faia e iloa ai mo a’u lava e faapea o se mea na aoao mai e le Faaola e moni?”Afai e tele atu poloka o mau nai lo le tasi mo tagata aoga e suesue iai, e mafai ona latou lisiina a latou fesili ma faasoa atu i se tagata aoga na suesueina se isi poloka ese.E mafai e tagata aoga ona vaavaai ma mafaufau e uiga i tali i fesili a tagata o la latou vasega.

Fai atu i tagata aoga e vaai faalemafaufau o i latou o le tusitala o se tala o tusitusiga paia ma o loo faatalanoaina i latou e se tasi e uiga i mea na latou tusia.E mafai e tagata aoga ona faitau le tala o le tusitusiga paia ma feauauai i le faatinoina o matafaioi a le tagata e faia le faatalanoaga ma le tusitala.O nisi nei o fesili e mafai ona fesiligia e le tagata e faia le faatalanoaga:

• O a nisi o vaega o nei fuaiupu e te le manao e misi e le au faitau?

• O le a sau tala e uiga i lou manatu autū, po o se tasi o ou manatu autū?

• E faapefea ona e mana’o i le au faitau e faaaogaina i o latou olaga?

Valaaulia tagata a’oga e faasoa mai mea na latou aoaoina mai le aafiaga.Faaaoga a latou faamatalaga e ta’u mai ai le upumoni faamamafaina.

Tuu atu ni mau faasino i se koluma se tasi ma upumoni tutusa i se faasologa faafefiloi i se isi koluma.E mafai e tagata aoga ona suesue ma faafetauitutusa.

Tatala le PDF

A suesueina e tagata a’oga se mataupu o tusitusiga paia e aofia ai ni upumoni se tele latou te ono faailoa mai, e mafai ona e fai atu ia i latou e amata i le suesueina e i latou lava.E mafai e i tagata aoga ta’ito’atasi ona filifili po o a mea latou te talitonu o upumoni sili ona taua e tolu pe fa i le poloka ma tusi i lalo.Ona mafai lea ona e faatulaga tagata a’oga i ni vaega e ta’ito’alua ma faatusatusa upumoni na latou faailoaina.E fuafua e paga ta’itasi o tagata a’oga o ni upumoni se lua ua latou lagona e sili ona taua ma faamaumauina i lalo.Manatua: E mafai ona ese manatu mai o latou uluai manatu e fa.Ona tuufaatasia lea o paga ta’itasi ma se isi paga e maua ai se vaega to’afa; faatasitasi, e faasoa ma faatusatusa e tagata a’oga e to’afa o latou manatu ma galulue o se ‘au e tasi e iloatino ai le upumoni e tasi e sili ona taua i le tusiga mo i latou.

Tatala le PDF

Fesoasoani i tagata aoga e faailoa mai aoaoga faavae po o mataupu faavae o loo aoaoina i tala faatusipaia i se atatusi o le talafaasolo.Iloilo vaega eseese o le talafaasolo e aofia ai mea nei:

1. O le tulaga amata: E mafai ona aofia ai le o lo o aafia, a tulaga amatamata, faapea ma le nofoaga ma le taimi na tupu ai.

2. Faateleina feteenaiga po o faatinoga: Faailoa mai suiga ua aafia ai olaga o tagata o lo o i le tala.

3. Taimi autu faatumutumu: O le taulaiga autū lea o le tala.E masani lava ona iai se suiga tele, e pei o se tagata o lo o manumalo ai i se faafitauli pe ua ia mauaina se taimi o se tali faaaliali.

4. Taunuuga faatino: O taunuuga nei o le faatumutumuga ua faaitiitia ai faatinoga [feteena’i].

5. Iuga: O le vaega lenei o lo o faamatalaina ai le malamalama fou ua maua e tagata ona o o latou aafiaga.

Tusi i luga o le laupapa ia mau faasino mo vaega ta’itasi o le talafaasolo.Valaaulia tagata aoga e faitau fuaiupu mo vaega taitasi o le talafaasolo ma a le o le tusia o se ata o mea o loo latou faitauina pe tusi se lisi o mea autu na tutupu.A maea ona faia e tagata aoga le laasaga mulimuli, valaaulia i latou e vaai i le tala atoa ma tusi i lalo se faamatalaga o le upumoni ua latou aoaoina.

Fai se paso faigofie mai se ata lea e faatusa iai le poloka o mau.Tusi mau faasino i tua o fasi pepa taitasi [o le paso].E mafai ona e faatulaga tagata a’oga i ni vaega ma tuuina atu i vaega ta’itasi se fasi vaega o le paso.E suesue e tagata aoga ia mau faasino ma sauni e aotele a latou fuaiupu.A o faasoa atu e vaega a latou aotelega i le vasega, e mafai ona latou faapipiiina ia fasi pepa [o le paso] i le laupapa e fatu ai le ata atoa.

Mo se tala o loo tele ai ni talanoaga, faatulaga fuaiupu o tusitusiga paia i se tusiga [o le tala] ina ia mafai ai e tagata taitoatasi ona vave maua la latou vaega [tauloto].Faaaoga se tagata faamatala e faitau fuaiupu e le o ni talanoaga.E mafai ona e kopiina fuaiupu o mau ma faailoga vaega ta’itasi e faaaogaina ai se penimaka lanupupula ese e faailoga ai.Manatua: Ia manatua o tagata o le Aiga Atua e tatau ona faatusaina i taimi uma i le tulaga aupito maualuga o le migao.Afai o loo faatusaina se tasi o le Aiga Atua, e aofia ai ma Iesu Keriso, i se tala o tusitusiga paia lea e te manao e fai ai lenei gaoioiga, tuu atu i le tagata faamatala e faitau Ana fetalaiga.

E tele nisi auala e faitau ai tusitusiga paia i le vasega.O [nei auala] taitasi e mafai ona faatino ai faamoemoega eseese.Mafaufau i manaoga o lau vasega pe a filifili ni auala o faitauga.

• Faitauga le leoa: E mafai e tagata aoga ona faitau filemu ia i latou lava.O lenei mea e mafai ai ona maua ai e tagata aoga se taimi e tomanatu ai i tusitusiga paia ma faitau ai i le vave talafeagai ma i latou lava.

• Faitauga faipaga pe faivaega: O lenei mea e mafai ai e le to’atele o tagata a’oga ona auai ma faaitiitia ai le popole i le faitauina leotele.

• Faia’oga po o le leo ua pueina: E mafai e le faia’oga ona faitau le tusitusiga pe taina le leopu’e ma valaaulia tagata a’oga e mulimuli tautu i ai.

• Faitauga leotele: E mafai ona valaaulia le vasega atoa e faitau faatasi fuaiupu.E mafai e ni volenitia se toatele o tagata aoga ona faitau leotele i le vasega pe mafai foi ona mua’i valaaulia ma tuu atu i ai se taimi e saunia ai e faitauina.Faamautinoa atu i tagata aoga e mafai ona latou “faapasi” pe afai latou te le lagonaina le toamalie e faitauina.

Saunia ni fesili i luga o fasi pepa eseese e uiga i se aofaiga faasolo o fuaiupu o loo i tusitusiga paia.Vaevae tagata a’oga i ni vaega to’alaiti.E tuu atu e vaega taitasi se tagata aoga se to’atasi i luma o le vasega e te tuuina atu iai le fesili muamua.Ona toe foi ane lea o tagata a’oga i a latou vaega, lea latou te galulue faatasi ai mo le sueina o le tali.Pe a latou maua le tali, latou te tuu atu se isi tagata aoga e tuuina atu iaiile fesili e sosoo ai mo se tali.Afai e to’alaiti le vasega, e mafai ona faia ta’ito’atasi e tagata a’oga lenei gaoioiga.

Faatulaga le potuaoga i se auala e faatusa i se faataitaiga o le tala e ao ona faitauina i tusitusiga paia i lena aso.Mo se faataitaiga, afai e faitauina Ruta, o ni faailo eseese i le pito i luma o le potu e mafai ona faailoaina mai ai laufanua o Moapi ma laufanua o Iuta.E mafai ona amata atu tagata a’oga i le laufanua o Moapi ma fai foi pine o igoa e faailoa ai Naomi, Ruta, Orepa, Elimeleka, ma isi tagata i le tala.Ona mafai lea ona latou faataitai atu po o ai tagata ua siitia atu i Iuta, ma e mafai e tagata a’oga ona suesue pe aisea.

Saunia le upumoni faamamafaina i tagata aoga.Faitau lemu atu ni nai fuaiupu ia i latou ma fai atu latou te sii o latou lima pe fai atu “Taofi” pe a latou iloaina se mea i se fuaiupu lea e fesoasoani e aoao atu ai lena upumoni.Ona valaaulia lea o tagata a’oga e faasoa mai mea ua latou maitauina.

A o le’i amataina le vasega, tuu atu i se tagata a’oga se to’atasi pe sili atu se faatatauga po o se anotusi e uiga i mau e te manao latou te aoteleina mo le vasega.E mafai ona e lolomiina ma tufatufa [nei aotelega] i le aso a o lumanai le vasega po o le tufa atu i tagata a’oga a o ulufale mai i le vasega.Valaaulia i latou e saunia e faasoa atu le aotelega pe a valaauina i le taimi talafeagai o le vasega.

A uma ona faitau e tagata a’oga se poloka o mau e ono faigata ona malamalama ai, e mafai ona e fai atu ia i latou e filifili se fuaiupu e “faaliliu” pe tusi laina ta’itasi i a latou lava upu.Afai e talafeagai, fesoasoani ia i latou e faataitai le sailia o faauigaga po o le faaaogaina o isi tusitusiga paia ma meafaigaluega mo le suesueina o mau e malamalama ai i upu ma fasifuaitau faigata.

Tusi ni faamatalaga moni pe sese eseese e uiga i faamatalaga taua i se poloka o mau.Valaaulia tagata aoga e faailoa mai pe na latou muai ioe pe le ioe foi i faamatalaga.Valaaulia i latou e sue se faamaoniga mo le lagolago poo le tetee i faamatalaga a o latou suesueina le poloka o mau.Ona toe tusi faasa’o lea e tagata aoga o faamatalaga e le sa’o a o latou faitauina le fuaitau o mau.

Fesuisuiaiga: Tusi ni nai faamatalaga e uiga i le autū o le lesona e taua ona malamalama ai tamaiti a’oga.Faaaofia ai ma ni nai faamatalaga le sao.Ona valaaulia lea o tagata a’oga e mate pe sao pe sese.Ona mafai lea e tagata a’oga ona sue mau o le lesona e iloa ai pe na sa’o i latou.A maea le gaoioiga, valaaulia tagata a’oga e faasoa mai mea na latou mauaina.Ia mautinoa e manino i tagata a’oga pe a maea le gaoioiga, po o a faamatalaga na sa’o a o a faamatalaga na le sa’o.

Valaaulia tagata aoga e filifili se ata e taua ia i latou.E mafai ona faaaoga ata i a latou telefoni, pe mafai foi ona latou aumaia se ata mai le aiga/fale.Valaaulia i latou e saunia e faasoa mea nei:

• O le muai talaaga, o lo o faamatala ai le mea na tupu e tau atu ai i le ata

• O le manatu autū po o le faamoemoega o le ata

• O ni nai faamatalaga auiliili e taua ia i latou

A uma ona faasoa mai e tagata aoga, ona mafai lea ona latou faitauina le poloka o mau mo le lesona ma saunia mea lava ia e tolu e faatatau i le poloka o mau.

Valaaulia tagata a’oga e taufaaata se tala faatusitusiga paia po o se vaega o le tusitusiga na suesueina.E mafai ona moeiini mata o tagata a’oga ma taulai atu i le taufaaatainao ata na faamatalaina e le faia’oga.Mo se faataitaiga, e mafai ona e valaaulia tagata a’oga e taufaaata e faapea sa latou iai faatasi ma le fanauga a Isaraelu ina ua ina ua siomia i latou i le va o le Sami Ulaula ma le autau a Farao ua aga’i mai e osofaia i latou.O a ni o latou lagona o le a iai?O le a le foliga o “le ao faaniutū” lea na taofia le autau a Aikupito mai le togalauapi a Isaraelu? (tagai i le Esoto 14:19–20).Faamata e faapeī le tukaga na iai ina ua “faatafeeseina [e le Ali’i] o le sami i le matagi tele mai sasaʻe i lea po atoa”?(Esoto 14:21).E te ono fai atu, “Faaata o lo o e savali ‘i totonu o le sami i luga o le ilititai matutu: ma vai o [se] aupa … i [lou] itu taumatau, ma [lou] itu agavale’ (Esoto 14:22).O a ni uiga faaalia o tagata o lo o siomia ai oe?O a ni mea ua latou fai mai ai, pe ua latou savavali le magagana?O a nia outou talanoaga e uiga i lena po i la outou tolauapiga?”Faaauau pea ona fai atu fesili e fesoasoani i tagata a’oga e vaai faalemafaufau ai i le tulaga.

Valaaulia tagata aoga e faailoa mai upu ma fasifuaitau latou te lagona e taua i se fuaitau o mau.Fatu se ao o upu e i ai upu ma fasifuaitau e sili ona taatele pe taua latou te faailoa mai.O le tetele o upu e mafai ona faailoa mai ai lo latou taua.

Faatutu solo ni nofoaga e suesue ai i le potuaoga atoa.O nofoaga ta’itasi e mafai ona aofia ai faatonuga o lo o faapipii i luga o puipui po o luga o kesi.O nei faatonuga e mafai ona aofia ai mau po o upusii e faitau atoa ma fesili po o isi gaoioiga e faamaeaina.E mafai ona taamilo faasolosolo tagata a’oga i ni vaega to’alaiti, ma talanoaina mea ua latou aoaoina i nofoaga ta’itasi.E mafai foi ona latou faia ta’ito’atasi ma savalivali i le vave latou te mananao iai.E mafai ona e tuuina se pepa lautele i nofoaga taitasi mo vaega taitasi po o tagata aoga e tusifaamaumau ai a latou tali.E mafai ona latou faitau ma manatunatu i mea na tusia e isi.

Valaaulia tagata aoga e faaopoopo vaefaamatalaga i mau o loo latou suesueina.E mafai ona faaopoopo nei mea e ala i le fatuina o sootaga i le va o fuaitau o lo o suesueina, ma isi mau ma faamatalaga mai taitai o le Ekalesia.E mafai e tagata a’oga ona tusi ia fefaasinoa’iga i avanoa i autafa o a latou itulau pe faaaoga le vaega o le sootaga i le polokalama o le Potutusi o le Talalelei.E mafai ona latou faasoa atu le tele o mau faaopoopo e ono mafai ona maua ia e tuuina mai ai nisi malamalamaaga tele atu [e faatatau] i le autū.Fesuisuiaiga: E mafai e tagatai a’oga ona faaaoga faailoga i le Potutusi o le Talalelei e faafesootai ai mau eseese ma upusii mai se lesona.

Valaaulia tagata a’oga e faailoa mai se upu po o se manatu faavae e faafaigata ona malamalama iai.Tuu atu ia i latou e vaavaai mo puna’oa e aofia ai tusitusiga paia ma meafaigaluega mo le suesueina o tusitusiga paia (Taiala Autū, Taiala i Tusitusiga Paia, Autū ma Fesili) e fesoasoani ia i latou e aoao atili ai e uiga i le faaupuga.Tuu atu ia i latou e faauiga le faaupuga po o le fasifuaitau i a latou lava upu.

Tatala le PDF

A o suesue tagata aoga, tuu atu ia i latou se pepa e i ai ni li’o putaputa mo mafaufauga po o ni vaega e mafai ona latou tusia ai mea ua latou mauaina.

Faatulaga tagata aoga i ni vaega toalaiti ma atofa atu i vaega taitasi se autu e aoao iai.Tuu atu i vaega se taimi e suesue ai autū ina ia avea tagata ta’ito’atasi o le vaega ma se tagata tomai faapitoa i le autū a le latou vaega.E mafai ona latou faaaoga mau faasino, faamatalaga mai taitai o le Ekalesia, le Taiala i Tusitusiga Paia, ma isi puna’oa e te tuuina atu.A lava loa se taimi, faatulaga tagata aoga i ni vaega fou ina ia aofia ai i vaega taitasi se “tagata tomai faapitoa” i se autu e ese.O le a faasoa atu loa e tagata aoga mea na latou aoaoina e uiga i a latou autu.

A maea ona suesueina e tagata a’oga se fuaitau o mau po o se faamtalaga ma faailoa ai se upumoni o le talalelei, valaaulia i latou e sue faamatalaga mai se vaega po o ni vaega i le tama’i tusi Mo le Malosi o le Autalavou: O se Taiala i le Faia o Filifiliga lea e faamalosia ai le upumoni na latou mauaina mai se poloka o mau.

Tuu atu i tagata aoga e toe tusi se mau i a latou api talaaga mo suesuega ia tasi le laina po o le fuaiupu i le taimi e tasi.E tatau ona latou tuua se avanoa i le va o laina po o fuaiupu taitasi.E mafai e tagata aoga ona suesue ma le toto’a ma mafaufau i upu taitasi i lena laina po o le fuaiupu.E mafai foi ona latou maua ni fefaasinoa’iga po o isi faamatalaga o le Potutusi o le Talalelei e uiga i lena laina.Ona faia lea o lea lava mea e tasi i le isi laina o le fuaitau.O se faataitaiga o lenei mea e mafai ona maua i le “Aua le Fefe,”Mo Le Malosi o le Autalavou, Fep. 2021, 32.

Tatala le PDF

Valaaulia tagata aoga e fatu se ata faatulaga o faamatalaga i a latou api talaaga mo suesuega e pei o lea o loo i luga.E mafai ona latou tusia le mataupu faavae po o le aoaoga faavae na latou faailoaina i le pusa ogatotonu.Ona tuu atu lea ia i latou e vaavaai mo nisi mau po o upusii faaopoopo e fesoasoani atu i lo latou malamalama.E mafai ona latou faaopoopoina o latou malamalamaaga e uiga i lena autu i pusa o i fafo atu.Valaaulia tagata aoga e faalautele o latou ata faatulaga o faamatalaga e ala i le faaopoopoina pea o pusa ma faafesootai i mea o loo latou aoaoina.

Tatala le PDF

Valaaulia tagata aoga e filifili ni autu se lua pe sili atu mai le lesona e talitutusa i nisi o auala ae eseese i isi.Fatu se ata e talitutusa ma le ata o i luga, lea e mafai ai e tagata a’oga ona faatulaga mea e tofututusa ai nei mea, ma mea e eseese e uiga i autū e lua.E mafai ona faia lenei mea i ni tagata se to’alua i se tala (mo se faataitaiga, o Iakopo ma Esau) po o ni autū se lua (mo se faataitaiga, Paseka ma le faamanatuga).

Tuu ni nai upusii o loo aoao mai ai se upumoni mai le lesona i totonu o se pulou po o se ato.Valaaulia ni volenitia e se’i se upusii mai totonu o le pulou ma faasoa mai pe faapefea ona fesootai i le upumoni o lo o latou aoaoina ma lona uiga ia i latou.Ia mautinoa e tuu atu ia i latou se taimi e faitau ai ma saunia e faasoa atu.Fesuisuiaiga: O le taimi lava ua uma ai ona faasoa mai tagata aoga, latou te fesuiai upusii ma sue ni paga fou e faasoa atu i ai la latou upusii fou.

Tatala le PDF

Filifili ni mau faasino se 16 ma tusi mau faasino taitasi i laina e 16 i totonu o koluma o loo i fafo o le faapuipui.Valaaulia tagata a’oga i ni paga po o ni vaega to’alaiti e faitau mau o lo o pea faatasi i faapuipui ta’itasi, ma fuafua po o le fea o mau faasino ua latou manatu o le a sili ona anoa i se talavou i aso nei.(E ono fesoasoani le faamamafa atu e taua mau uma.E le o filifili e tagata a’oga po o le fea o fuaiupu e sili lelei atu, ae na o le mea latou te lagona e sili ona taua ia i latou i aso nei.)O le fuaitau latou te filifilia e faasolo atu i le isi faapuipui.E faaauau pea ona talanoaina e tagata aoga ia pea taitasi o mau seia oo ina latou faailoa mai le mau e tasi latou te lagona e sili ona anoa ma talanoaina pe aisea.E mafai ona faasoa e tagata aoga nei mau i le vasega.Mo se faataitaiga o lenei manatu, tagai i le gaoioiga faaopoopo o le aoaoina o ;oo i le “Lesona 109: Faatomuaga i le Faataoto.”

Fai se lisi o gaoioiga suesue e ono.A uma ona faailoaina mai e tagata aoga se upumoni mai se poloka o mau, faaaoga se auala faaleiloga mo tagata aoga e filifili ai po o le fea gaoioiga e faamaea (taisi, se’i se kata, piki se pepa, mea vili ai fuainumera faaleiloga).

O faataitaiga e mafai ona aofia ai mea nei:

1. Faasoa atu se tala mai le soifuaga o Iesu lea na Ia aoao atu ai pe faaalia ai le upumoni.

2. Saili se fuaitau o le atamai i aoaoga faavae po o se isi fuaitau o mau e uiga i le upumoni.

3. Saili se faataitaiga o se tala o tusitusiga paia o se tasi na ola i le upumoni.

4. Saili se faamatalaga mai se taitai o le Ekalesia o loo aoao mai ai le upumoni.

5. Faasoa atu se aafiaga patino o se tasi ua faamanuiaina e ala i le upumoni.

6. Faasoa atu se manatu se tasi auala e mafai ona tatou ola i le upumoni.Saili se fuaitau o mau o loo aoao mai ai le faataitaiga o loo e faasoaina.

I luga o kesi ta’itasi po o nofoa, tuu ai se pepa/kata o lo o iai faatonuga e pei o le “Faitau se fuaitau o mau po o se upusii,” po o le “Tali se fesili mai le lesona.”E mafai ona faasolo faataamilo nofoa e tagata aoga ma mulimuli i faatonuga o loo i lena kata.

Tatala le PDF

Valaaulia tagata aoga e fatu se ata faapenei e amata i le upumoni faamamafaina po o le autu i le ogatotonu.Ona tusi lea e tagata aoga o laina e faasino atu i lio i fafo ma faaigoa i latou i mau fesootai talafeagai, upumoni, po o elemene o le ulutala autu.Mo se faataitaiga, e mafai ona faamaumau e tagata a’oga le valaaulia a le fai Salamo e “Faafetai atu i le Ali’i” i le ogatotonu o le li’o ma le mau faasino “Salamo 136.”Ona mafai lea ona latou lisi i li’o i fafo ane ia mafuaaga mai le Salamo e faafetai atu ai i le Ali’i.

Faaaoga se vitiō ua gaosia e le Ekalesia e faapupula ai pe aoaoina ai e uiga i se mataupu faavae o le talalelei.Taofi i taimi eseese e fatu ai ni faaosoga fiafia pe fesoasoani foi i tagata a’oga e iloilo mea o lo o latou matamata ai.E mafai ona e fai atu i tagata a’oga o fesili e pei o nei:

• “Mata o le a se mea o e mafaufau iai pe lagonaina, pe o a ni au fesili atonu o iai pe afai o e iai i lenei tulaga?”

• “O a tusitusiga paia na e suesueina i le asō e mafai ona fesoasoani?”

• “O le a se mea e te faamoemoe e mafai ona malamalama i ai lenei tagata e uiga i le upumoni sa tatou suesueina i le asō?”

• “O fea e te vaai i ai ia te oe lava i lenei tala i le asō?”

8:12

Tusi se fuaiupu o mau i le ogatotonu o se pepa tele (a le o lena, e mafai ona e faaali atu i luga o le laupapa).Ia mautinoa ua lava le lapopoa [o mataitusi] mo tagata aoga uma e iloa manino ai.E mafai ona faaalu e tagata aoga ni nai minute e fai atu ai se tele e mafai ai o ni fesili e uiga i le fuaiupu o mau.Ona tuu atu lea ia i latou ni nai minute e suesue ai i tusitusiga paia po o le Potutusi o le Talalelei mo ni tali i fesili.A leai, e mafai ona lolomiina le mau i luga o se pepa ma e mafai e tagata aoga ona faia lea lava gaoioiga e tasi e le tagata lava ia.

E mafai ona tusi e tagata a’oga i luga o le laupapa, pe faaaoga fasipepa pipii pe i ni fasi pepa foi e faapipii i le laupapa, ina ia faasoa atu ai o latou manatu e uiga i auala e faaaoga ai le upumoni o le talalelei.O le laupapa o manatu e mafai ona iai se ata tele o se mea e fesootai i le autū.Mo se faataitaiga, afai o lo o suesueina le Neemia, e mafai ona e tusi se ata o se pa puipui tele e pei o le pa puipui na fausiaina e Neemia.E mafai ona lisi e tagata a’oga se tasi pe sili atu o mea latou te lagona e finagalo le Ali’i latou te faia ina ia faataunuuina ai lana galuega, ma ‘aua le faalavelaveina pe fefe, e talitutusa ma le fausiaina e Neemia o se pa puipui faataamilo i le malumalu.

Tuu atu i tagata aoga e filifili se tauaofiaga e taulai atu i ai ma faasoa mai mea o loo latou aoaoina i se auala e malamalama ai le tauaofiaga.E mafai e tagata aoga ona faia lenei gaoioiga faatasi ma se paga po o se vaega.E mafai ona aoga le tuuina atu i tagata aoga o ni filifiliga se tele ma tuu atu ia i latou e filifili po o le fea o tauaofiaga latou te mananao e aoao atu iai.O nisi nei o [tauaofiaga] e mafai ona latou filifili mai ai:

• O se uo o se isi faatuatuaga i [le taimi o] lau misiona.

• Tamaiti i se vasega Peraimeri.

• O se uo mai le aoga.

• O se tagata o lou aiga.

Tatala le PDF

A o lei faia se talanoaga o se vasega, e mafai ona fesoasoani le uunaia ai tagata aoga e faalogologo lelei le tasi i le isi.E mafai ona tuuina atu manatu nei i tagata aoga a o lei faia le talanoaga.E mafai ona fesoasoani lenei mea ia i latou e faalogologo lelei ai le tasi i le isi ma fatuina ai se talanoaga faagaeetia lea e aofia ai le toatele o tagata aoga i le talanoaga.E mafai ona e faaali atu ia i latou pe tuuina atu i tagata aoga se pepa faasafua o nei manatu.

Faaopoopo iai—Faasoa atu mea sa e fiafia iai e uiga i le faamatalaga a se tagata o le vasega ona faaopoopo lea iai o ou lava manatu, e pei o le:

• ”E faamanatu mai ai ia te au ia …”

• “Ou te ioeina aua…”

• “E moni.O se isi faataitaiga o le taimi na…”

• “O se manatu lelei lena …”

Aotele—Toe faaupu mea na fai mai ai lau uo i le vasega ona fai lea i ai o sou manatu.

• ”Ua ou faalogo o e fai mai e …”

• “O lea, afai ou te malamalama sa’o ia te oe …”

• “Ou te fiafia i le auala na e fai mai ai …”

Fesiligia—Fai atu i se isi tagata aoga ni fesili e uiga i mea na latou fai mai ai.

• “E mafai ona e faamatala maia nisi mea e uiga i lena mea?”

• “Ou te le o mautinoa ua ou malamalama …?”

• “Ua ou iloa lou manatu, ae faapefea …?”

• “Ua e mafaufau e uiga i …?”

Tatala le PDF

Faaaoga le pepa faasafua lenei e fai ai se faasologa o faatonuga e mafai ona aofia ai mau po o upusii e faitau, ma fesili e taliina.Ia mautinoa ua lava le avanoa mo tagata a’oga e tusi ai a latou tali.Ia tuuina atu ia tofu le tagata a’oga ma se kopi ma valaaulia i latou e tusi o latou igoa i le pito i luga.Tali e tagata a’oga le fesili muamua ona gagau lea o le pepa e ufiufi ai la latou tali.Latou te pasi atu le pepa i se isi tagata a’oga, lea e taliina le isi fesili po o le uunaiga e sosoo ai.E gagau e le tagata a’oga ta’itasi le pepa e ufiufi ai la latou tali ma pasi atu i se isi tagata a’oga.I le faaiuga o le faataamiloga, e toe faafoi atu pepa i le uluai tagata a’oga, lea e faitauina mea na tusia e a latou uo o le vasega.

Faasoa atu se fesili taua e te manao e tali e tagata aoga.Ia mautinoa e faasoa atu i ni nai minute a o lei valaauliaina i latou e tali le fesili.Mo se faataitaiga, e mafai ona e faapea atu: “I ni nai minute mai le taimi nei, ou te fiafia e fai atu i nisi o outou e faasoa mai ou manatu e uiga i .Faamolemole ia mafaufau e uiga i mea e te manao e faasoa mai a o tatou suesueina le fuaitau lenei.”E mafai lea ona e valaaulia tagata a’oga e faasoa muamua atu i se paga po o se vaega.

Faatautaia se sailiiliga i au tagata aoga e ala i le tuuina atu ia i latou o se fasi pepa laitiiti.E mafai e tagata a’oga ona tali faalilolilo mai ona tuu lea o a latou pepa i totonu o se koneteina, pei o se pusa, po o se pulou.E mafai ona e aoina mai o latou manatu e uiga i se mataupu faavae, fesili, po o se faaiuga e ono faia e se tasi i se vaaiga faataitai.I se isi faiga, afai e mafai e tagata aoga ona faaaoga se telefoni feavea’i, e mafai ona e faaaogaina se polokalama e fai ai palota e leai se totogi ma e faigofie ona faaaoga.Tuu atu i tagata aoga se galuega faatino mo suesuega ma se sootaga o le palota i se fesili ma fai atu ia i latou e tali atu e faaaoga ai a latou telefoni.Ona e faaali atu lea o a latou tali i le vasega.

Faaaoga fasifuaitau malolosi e aoao ai au tagata aoga e faasoa atu ma faalauiloa ai se talanoaga i le vasega.

O se meafaigaluega aoga lenei mo vasega e tele ina fifilemu pe le o mautinoa pe faapefea pe o le a foi se mea e faasoa atu.Faaali atu le lisi o fasifuaitau o loo i lalo e fesoasoani ai i tagata aoga e saunia ai mea latou te ono faasoa mai.Tuu atu ia i latou e suesue se poloka o mau ma saunia e faasoa atu e faaaoga ai se fuaitau malosi se tasi pe sili atu.Faafoe le talanoaga pe fai atu i se tagata a’oga e na te taitaia.

• O se fuaiupu ou te fiafia i ai o le …

• O se fasifuaitau malamalama ia te a’u o le …

• O se lesona na ou aoaoina mai i lenei mea o le …

• O se mataupu faavae na ou mauaina o le …

• O se upu na manaia pe na nunumi na ou maua o le …

• O se mea e manaomia ona iloa e se talavou mai lenei mea o le …

• O se mea ua ou iloa e moni mai lenei mea o le …

• O se mea ou te le o mautinoa e uiga i ai o le …

• O le mea e tasi ou te lagona e tatau ona ou faia i lenei mea i le asō o le …

• O le mea e tasi ua ou aoaoina e uiga i le Faaola i lenei mea o le …

Tufa atu kata e mafai ona u’u i luga e tagata aoga e fai ma tali vaaia i fesili e te fesiligia.E mafai e tagata aoga ona faaaoga kata e faailoa mai ai a latou tali pe ua latou saunia foi e faasoa atu pe talanoaina o latou manatu.O faataitaiga nei o ituaiga pepa auai:

• O pepa lanu meamata mo le moni, lanu mumu mo le sese.

• Tusi le “Mafaufau Pea” i le tasi itu ma le “Sauni e Faasoa Atu” i le isi itu.

• O se kata e i ai fuainumera po o mataitusi e suitulaga i filifiliga eseese o loo lisiina i luga o le laupapa.E faasino uma tagata aoga i se numera po o se mataitusi mo a latou tali ina ia mafai ona e vaai i a latou tali ma filifili tagata aoga e tali mai.

• Tusi i se pepa ni tali se tele i itu eseese (tagai i le faataitaiga o i lalo).Pe a valaaulia tagata aoga e tali mai, o le ogatotonu pito i luga o lo latou tulaga lea.Ona mafai lea e oe po o se tagata aoga ona valaau atu i tagata aoga e fua i le tulaga o loo latou faaalia.

Tatala le PDF

Tuu atu i tagata aoga se vaaiga faataitai e le mae’ae’a ma valaaulia i latou e faaopoopo atu i faamatalaga auiliili ina ia sili atu ona talafeagai ma fesootai.Mo se faataitaiga, atonu e te fai atu se tala e pei o lenei: “Sei o tatou fatuina se vaaiga faataitai e uiga i se tagata e latalata i lou matua, e igoa ia Julia, o lo o feagai ma ni luitau o le olaga.Faamata o a nisi o nei [luitau]?”A o faasoa mai tagata aoga, fesoasoani ia i latou e fautuaina mai ni faamatalaga auiliili ina ia foliga mai ai o Julia, po o se isi igoa na e filifilia, o se tagata moni.E mafai foi ona e faaopoopoina faamatalaga autu e uunaia ai le talanoaga, e pei o le fesili autu a Julia.A o faasoa mai manatu o tagata a’oga, e mafai ona fesoasoani le fai atu o fesili e pei o le: “Pe e lagona e moni ma fesootai lenei vaaiga faataitai ia te oe?O le a se mea e mafai ona tatou faia ina ia lagona ai e sili atu ona talafeagai le vaaiga faataitai ia i tatou?”Ona mafai lea e tagata a’oga ona vaavaai mo upumoni i le lesona atoa ia e mafai ona fesoasoani i le tagata i le vaaiga faataitai.

Fesuisuiaiga: E mafai ona e tusi le autū po o le upumoni i luga o le laupapa.Valaaulia tagata a’oga e fatu a latou lava vaaiga faataitai ma tusi i luga o pepa.E mafai ona e faafesuiai nei vaaiga faataitai ma fai atu i tagata a’oga e tali mai e ala i le faaaogaina o mea na latou aoaoina.

Fesuisuiaiga: Valaaulia tagata a’oga e faasoa mai ni vaaiga eseese e ono iai i tagata e uiga i se upumoni i le lesona.Mo se faataitaiga, “O nisi tagata e ono mafaufau o le a sili atu ona lelei le olaga pe afai e le manaomia ona latou tausia le mamalu o le aso Sapati.”Po o “O nisi tagata e ono manatu e matagofie malumalu, ae le tele so latou naunau e faia o sauniga i totonu.”Fesili atu i tagata a’oga pe aisea e ono iai ai ni mafaufauga po o lagona faapea i se isi.Ona faasoa mai lea e tagata a’oga le auala e mafai ai ona fesoasoani tusitusiga paia poo faamatalaga mai taitai o le Ekalesia na latou aoaoina i le lesona, i se tagata o iai ni lagona faapena.

Fatu se vaaiga faataitai e amata i se feau tusitusia se tasi, ae aua nei faaali atu i tagata aoga tulaga na afua ai i lena feau tusitusia.E mafai ona e tuuina atu i tagata a’oga ta’itasi se mamanu avanoa o feau tusitusia e pei o lenei, ma valaaulia i latou e fatu se talanoaga mo le faasologa o feau tusitusia.

Tatala le PDF

O le fesoasoani ai i tagata aoga ia lagona le toafimalie e faasoa atu ai i le tasi ma le isi e amata i le fesoasoani ai ia i latou ia iloa tagata o le latou vasega.E mafai ona fesoasoani lenei gaoioiga i tagata aoga ia iloa e le tasi le isi faapea foi ma le faasoaina atu o se mea e uiga i tusitusiga paia.Faamaopopo tagata aoga i ni paga e ala i le faatulagaina o laina e lua o nofoa faafesagai.Ona valaaulia lea o tagata aoga e faailoga se fuaitau o mau ua tuuina mai ma tali se fesili na e saunia e uiga i lena fuaitau.Valaaulia paga faafesagai ta’itasi e tali se fesili faauo na e saunia e mafai ona fesoasoani ia i latou e iloa atili ai e le isi le isi, ona faasoa mai lea o tali ua latou saunia e fesootai i le fuaitau o mau.Valaaulia tagata aoga e fesuiai paga ma toe fai faatele le faagasologa e faaaoga ai fesili eseese ma fuaitau o mau.Ina ia galulue tagata aoga ma paga taitasi uma, e le faataamilo le tagata aoga o loo nofo i se tasi o nofoa tulimanu.

Tuu i luga o le laupapa ni nai fesili mo tagata aoga e tali iai po o fuaiupu e mafai ona latou faasoa mai ni malamalamaaga e uiga i ai.E tusi e tagata a’oga ta’itasi o latou igoa i luga o se fasipepa pipii ma tuu i autafa o fesili po o fuaiupu latou te naunau e tali pe fai iai se manatu.

Fesuisuiaiga: O lanu e mafai ona faailoa mai ai mea e mananao tagata a’oga e faasoa atu e pei o se malamalamaaga, fesili, fefaasinoa’iga, ma isi mea faapena.

Valaaulia tagata aoga e filifili se mea faitino i totonu o le potuaoga po o se ata i luga o a latou telefoni e mafai ona faaaoga e fesoasoani ai e aoao atu se mataupu faavae po o se aoaoga faavae.Valaaulia i latou e faasoa mai pe faapefea ona latou aoaoina se tasi i mea na latou aoaoina e faaaoga ai le mea faitino po o le ata.O lenei gaoioiga atonu e sili ona lelei pe a o aoaoina atu mataupu poo aoaoga faavae ia e faigofie ona faatatau i le faaaogaina o mea faitino po o ata ua maua gofie.

Tuu atu i tagata aoga se taimi e faamaumau ai tali i fesili taua i a latou api talaaga mo suesuega a o lei valaauliaina i latou e tali leotele mai.

Faaaoga mataitusi o se igoa, nofoaga, po o se aoaoga faavae ma fai atu i tagata aoga e fatu ai se solo faasolo i uluai mataitusi e faaaoga ai mea na latou aoaoina i le vasega.Mo se faataitaiga, e mafai e se tagata a’oga ona tusi se solo e faaaoga ai le upu faatuatua e faapei o lenei:

F – Mulimulitaia o le faataitaiga a Iesū Keriso

A – Galue i uunaiga mai le Agaga Paia

I – Ia aofia ai a tatou fesili po o popolega i a tatou tatalo

T – Talitonuina o perofeta a le Atua

H – Faamoemoe ia maua Ana faamanuiaga folafolaina

Tatala le PDF

E mamanu e tagata aoga a latou lava polokalama i luga o se fasi pepa.E mafai ona faaalia i le polokalama se upumoni o loo aoaoina i tusitusiga paia na suesueina ma e aofia ai gaoioiga, ata, mau, po o upusii e mafai ona fesoasoani i se tasi e faaaoga i o latou olaga.

O le chiasmus o se faiga faalegagana faatusa lea e faaata ai le afa lona lua o se fuaiupu, parakalafa, po o le tusiaina o faa-faaata ma toe fai i se faasologa fefulisai o le afa muamua.O le feau autū e maua i le ogatotonu (tagai i le Kenese 9:12–17 or Alema 36 e fai ma faataitaiga).Valaaulia tagata aoga e fatu se chiasmus mai mea latou te suesueina.O le a tuu e tagata aoga le upumoni faamamafaina i le ogatotonu ma faaopoopo i ai laina o loo i luga ma lalo faatasi ai ma mau lagolago po o faamatalaga faaperofeta.E mafai ona foliga talitutusa ma lenei:

A – o lagona o tagata aoga e uiga i le upumoni po o aafiaga na latou maua ai

E – o mea ua malamalama i ai tagata aoga e uiga i le upumoni

I – upumoni po o mataupu faavae o le talalelei

I – upumoni po o mataupu faavae o le talalelei

E – se malamalamaaga faaopoopo e uiga i le upumoni

A – o aafiaga faaopoopo na maua e tagata aoga i le upumoni ma o latou lagona e uiga i ai

Tatala le PDF

Tuu atu i tagata a’oga se mamanu o se tusi ata komi avanoa, pe fai atu ia i latou e fatu se mamanu i luga o se fasi pepa.E faitau e tagata a’oga le poloka o mau ma fatu se ata komi e faapupula ai le tala otooto i le poloka.Tuu atu ia i latou e faaaoga le pusa mulimuli e faasoa mai ai mea latou te lagona o le upumoni aupito sili lea ona taua e aoaoina mai le tala.E mafai ona latou faasoa a latou ata komi i le vasega.O se isi auala, e mafai ona latou faaaogaina lenei gaoioiga e faapupula ai se faaaogaina faa-onaponei o le upumoni po o le mataupu faavae.

Tatala le PDF

Fatu se otootoga e mafai ona faaaoga e tagata aoga e saunia ai se lesona puupuu, lauga, savali, po o se auala e faasoa atu ai se fuaitau o mau.E mafai ona e tuuina atu se mamanu avanoa o le otootoga lea e faamaumau ai e tagata aoga mea na latou maua.E mafai ona e faatonuina tagata aoga e faaaofia ai faamatalaga eseese i pusa taitasi.Mo se faataitaiga, e mafai e tagata a’oga ona tusi se ulutala i le pusa muamua, otooto fuaiupu autū i le pusa e sosoo ai, lisi faataitaiga po o tala patino i pusa uumi e tolu, ma tusi se molimau i le pusa mulimuli.

Tuu atu i tagata a’oga ta’itasi se pepa ma valaaulia i latou e gautolu [le pepa].E mafai e tagata aoga ona faia se itulau autu o loo i ai le mataupu faavae po o le aoaoga faavae ua latou faailoaina.E mafai e tagata aoga ona fatuina ni itulau o mulimuli ane faatasi ai ma soaautu ma faamatalaga auiliili mai mea o loo latou aoaoina.E mafai ona e valaaulia i latou e tuu ni avanoa i tua o le tamaitusi e tusi ai soo se sini po o ni fuafuaga latou te faia i le taimi o le lesona.

Lolomi se itulau kopi o le poloka o mau ma tuu atu penivali lanu e faailoga ai mau.Faailoa mai vaega e pei o le “Faamanuiaga Folafolaina,” “Faatinoga o le Faatuatua,” po o “Poloaiga.”E mafai ona atofaina i vaega taitasi se lanu.Valaaulia tagata aoga e suesue fuaiupu ma faailoga vaega lanu pe a latou mauaina.Valaaulia tagata a’oga e faasoa mai mea na latou faailogaina ma aoaoina mai lenei gaoioiga.

E mafai ona e faaaogaina se kalafi faamaopopo faamatalaga e fesoasoani ai i tagata aoga e iloilo a latou fuafuaga.E tali e tagata aoga fesili i vaega taitasi o le kalafi.E mafai ona e tagai i se faataitaiga o lenei mea i le “Lesona 105: Salamo 61–86.”

E mafai e tagata aoga ona fatuina se kalafi e faapupula ai le sootaga i le va o faaiuga po o manatu faavae eseese i le lesona.Mo se faataitaiga, o se siata e pei o lenei e mafai ona faaaoga e faaali atu ai le mea e mafai ona taitai atu ai le faatuatua po o le faamoemoe ia Iesu Keriso.

Tuu atu i tagata a’oga ni mea e mafai ona latou faaaogaina e pei o poloka po o le omea gaosimea e fatu ai se mea e faatusa i mea na latou suesueina.Mo se faataitaiga, e mafai e tagata a’oga ona fai ni maa se 12 a o latou suesueina le Iosua 4.I lenei tala, na faatulaga ai e le fanauga o Isaraelu ni maa se 12 i le Vaitafe o Ioritana, e fai ma faamanatu e manatua ai e faapea e tuuina atu e le Ali’i o se auala mo i latou e sopoia ai le vaitafe i le eleele matutu.E mafai e tagata a’oga ona faaigoa maa ta’itasi i se mea na faia e le Ali’i mo i latou, latou te lagona e ao ona manatua.

E mafai ona maua e tagata aoga ni ata i a latou telefoni po o i le Potutusi o le Talalelei e fesootai ma le upumoni.E mafai ona latou fatuina se tuufaatasiga o ni ata faaeletonika ma faasoa atu i le vasega.E mafai foi ona latou faasoa atu i faasalalauga faaagafesootai faatasi ma se faamalamalamaga.Mo tagata a’oga e leai ni telefoni, e mafai ona latou aoina ata mai mekasini a le Ekalesia e pei o le Liahona, Mo le Malosi o le Autalavou, po o le Uo.

Vaevae e tagata aoga se pepa i ni koluma se tolu.I le koluma muamua, latou te tusia ai mea ua uma ona latou iloa e uiga i se autu.I le isi [koluma], latou te tusia ai mea latou te taumatemate pe e fia iloa.O le koluma lona tolu e faatumuina i le taimi o loo fai ai le lesona ma le maea ai o le lesona i mea na aoaoina e tagata a’oga.E mafai ona valaaulia i latou e faailoa mai po o le a se mea, pe afai e iai se mea, na fesoasoani ia i latou e aoao ai pe aafia ai o latou lagona i le taimi o le lesona.

E mafai e tagata aoga ona tusi se tusi ia i latou lava ina ia tatalaina ma faitau i se taimi faapitoa (i se misiona, faaipoipoga, mauaina o le la tama muamua).O le isi filifiliga e mafai ona fai atu i tagata aoga e tusi se tusi i tagata o o latou aiga i le lumanai.Pe mafai foi ona latou tusia se tusi i tagata a’oga i le lumanai o le a o mai i le seminare, ma faamatala mai mea na latou aoaoina ma o latou lagona.

E faailoa mai e tagata aoga taitasi se mataupu faavae mai a latou suesuega ma fatu se fasifuaitau mataina e faapupula ai le mataupu faavae.Fai atu ia i latou e tusi foi se ata e faapupula ai le mataupu faavae.Ia mautinoa o loo aofia ai le mau faasino.Tuu atu ia i latou e faasoa mai ma faamatala mai la latou meme.Atonu e te manao e faaali atu nisi o faataitaiga mai se mekasini lata mai nei o le Mo Le Malosi o le Autalavou.

Tatala le PDF

Tatala le PDF

E mafai e tagata aoga ona faia se fuafuaga e faia ai ni faatinoga aoga ma amiotonu mai mea latou te aoaoina ma lagonaina i le taimi o le lesona.Ina ia faia lenei mea, e mafai ona e fai atu ia i latou e faailoa mai mea latou te mananao e fai ma faia ni laasaga patino o le auala o le a latou faataunuuina ai a latou fuafuaga.E ono aofia ai le faailoaina o faalavefau e ono feagai ma i latou ma laasaga patino e taulima ai nei faalavefau.A o fatuina e tagata aoga a latou fuafuaga, uunaia i latou e vaevae i ni laasaga laiti ifo.O le faia o ni suiga laiti i mea latou te faia i aso uma e mafai ona fesoasoani ia i latou e lagona ai le faamanuiaina soo.

Tatala le PDF

E mafai e tagata a’oga ona faaaoga se laau o faaiuga e fesoasoani ai e faaaoga se mataupu faavae o le talalelei, e ala i le lisiina o mea e lelei ma mea faale-lelei o faaiuga eseese.E mafai ona latou amata i se fesili se tasi e uiga i se mataupu faavae o le talalelei, ma a uma ona lisi mai mea lelei ma mea faale-lelei, iloilo a latou filifiliga e faia ai lena faaiuga.Fai ni laau eseese mo fesili taitasi ma faaiuga i le fuafuaga.

Mo se faataitaiga: Fai se fuafuaga e suesue ai tusitusiga paia.

O Fesili:

1. O afea o le a ou suesue ai i a’u tusitusiga paia?(Fai se laau o faaiuga se tasi.)

2. O fea o le a ou suesue ai i a’u tusitusiga paia?(Fai se isi laau o faaiuga.)

3. O le a le umi o le a ou faaaluina e suesue ai a’u tusitusiga paia?(Fai se laau o faaiuga lona tolu.)

I le faaiuga o le faagasologa, o faaiuga e tolu faatasi e fatuina ai se fuafuaga, po o se sini, ma ni laasaga patino e ausia ai.

E mafai e tagata aoga ona filifili se viiga e uiga i se upumoni na suesueina i le lesona.Valaaulia i latou e fatu se fuaiupu fou o le viiga mai mea sa latou suesueina.E mafai e le vasega ona filifili ni nai fuaiupu fou e faaali ma usu.

E mafai e tagata a’oga ona fatuina se poloketi o ni lesona se tele, lea o le a latou faaopoopo atu iai anotusi i lesona ma vaiaso mulimuli ane.E mafai ona avea lenei mea ma se solo, viiga, vitiō, poloketi faatufugaga, po o isi faaupuga fatufatua’i latou te fatuina i lesona mulimuli ane.Mo se faataitaiga, e mafai e tagata a’oga ona faia se poloketi i le mana o le Ali’i e laveai ai a o latou suesueina le auala na Ia laveaiina ai le fanauga a Isaraelu i le tusi o Esoto.Po o le latou faia o se poloketi i o latou lagona o le vivii ma tapuai mo le Ali’i, a o latou suesueina le Salamo.

A maea ona suesueina se tala faatusi paia e faatatau i le faia e se tasi o se faaiuga sese pe le amiotonu, valaaulia tagata a’oga e toe tusi le faaiuga o se tala faatusi paia, e peiseaī na faia e le tagata ni faaiuga sili lelei atu pe ese foi.E mafai foi e tagata a’oga ona latou faia lenei mea e faaaoga ai se tala poo se faataitaiga faa-onaponei.

Tatala le PDF

E fatu e tagata aoga ni fua o faiga tau kuka e faaaoga ai mea o loo latou aoaoina.E mafai ona e amata i le faaali atu ia i latou o se faataitaiga o se fua o se faiga tau kuka e aofia ai mea e manaomia, fua, ma faatonuga.Ona fesoasoani lea i tagata aoga e mulimuli i lena fuafuaga e faatulaga ai mea o loo latou aoaoina.E mafai ona latou faaaulutalaina la latou fua kuka i le “Le auala e avea ai ma faifeautalai malosi,” “Le auala e mulimuli ai i le perofeta,” po o “Auala e maua ai suesuega i tusitusiga paia sili atu le aoga.”Ona faaaofia lea e tagata a’oga o mea latou te lagonaina o vaega taua e faaaoga ai mau ma upusii.Mo se faataitaiga, a o suesueina le 2 Nofoaiga a Tupu 14–16, e mafai e tagata a’oga ona lisi se fua tau kuka mo le sailia ma le mauaina o le Ali’i.Ia fautuaina i latou ia fatufatuai i a latou fua taiala e pei i le faiga o se kuka.E mafai ona latou tusia se ata e faatusa iai le fua mulimuli e faapei o le faatinoga o se fua o se kuka.

Tuu atu i tagata a’oga e faatino se tulaga faatusatusa po o se vaaiga faataitai masani o le olaga.E anoanoai fesuisuaiga i lenei mea.E mafai ona e fai atu i volenitia e o mai i luma o le potu e faatino le vaaiga faataitai.E mafai e tagata aoga ona faataitai ona faatino i ni paga po o ni vaega toalaiti.Pe mafai foi ona e faatinoina le vaega o se tagata e i ai fesili ma fai atu i le vasega atoa e talanoaina au fesili po o popolega.

Valaaulia tagata aoga e fuafua se vitio puupuu.E mafai ona latou fatuina se tusiga ma filifili pe faapefea ona faataitai se mea na latou aoaoina mai le lesona.Afai e mafai ma pe a lava se taimi, e mafai e tagata a’oga ona fai le vitiō ma faasoa atu i le vasega.

Fesuisuiaiga: E mafai ona fuafua e tagata a’oga se vitiō e faamatala ai se mataupu faavae po o vaega taua o le talalelei i totonu o le 60 sekone.

Tatala le PDF

Valaaulia tagata aoga e fatu se faasalalauga faaagafesootai e faasoa mai ai o latou talitonuga po o aafiaga patino e faatatau i mataupu faavae o loo talanoaina i le vasega.E mafai ona avea lenei mea ma se mea latou te tusifaapipii i luga o le initaneti, po o se mea latou te fatuina i a latou api talaaga mo suesuega.Pe mafai foi ona latou vaai faalemafaufau i se tasi o tusifaapipii se fesili e faatatau i mea na suesueina i le vasega ma fatu se tali e faaaoga ai le malamalama ua latou aoaoina.Pe mafai foi e tagata aoga ona suesue i se tusitusiga i faasalalauga faaagafesootai a se taitai o le Ekalesia ma tusi se tali po o se faamatalaga faamalosiau i luga o le tusitusiga.Mo se tusiga e fesoasoani i tagata a’oga e faia ni tusitusiga anoa o faasalalauga faaagafesootai, tagai i le “Faasalalauga Faaagafesootai: Mana e Suia ai Olaga,” Mo Le Malosi o le Autalavou, Aperila 2022, 8–9.

Tuu tagata aoga i vaega ina ia latou faaaoga tusitusiga paia, upusii, ma isi punaoa mo suesuega e fatu ai ni pepa lautele o i ai se savali po o ni faaaliga i luga o papuipui mo le potuaoga.O a latou pepa lautele o i ai se savali po o faaaliga e mafai ona aofia ai fuaiupu autu, fesili e mafai ona taliina e le tala o tusitusiga paia, upumoni e faavavau, ata, ma isi mea faapena.E mafai ona faataamilo tagata aoga ma vaai i galuega a isi vaega.

E mafai ona vaai faalemafaufau tamaiti a’oga e faapea o lo o latou tusia se tusiga i mekasini o le Mo Le Malosi o le Autalavou, Uo, po o le Liahona e faasoaina ai mea sa latou suesueina, ma le auala e mafai ona fesoasoani ai i le autalavou i le lalolagi atoa.E mafai ona e faaali atu se tasi o tusiga e fai ma faataitaiga.Uunaia tagata aoga e faaopoopo i ai ata, siata, ma kalafi faamatalaga.